Ang Pag-agom sang Nagapabilin nga Paghidaet kag Pagtukod sang Walay Katapusan nga Mga Panimalay

Ni Elder L. Tom Perry

Sang Korum sang Napulogduha ka mga Apostoles

Ang ebanghelyo ni JesuCristo amó ang nagahatag sa aton sang sadsaran nga sa diin kitá makaagom sang nagapabilin nga paghidaet kag makatukod sang walay katapusan nga mga yunit sang panimalay.

Ang aton pagpanglakaton sa kabuhi may ara sang pareho nga maayo kag malain nga mga panahon. Ang kada isa nagapresentar sang magkatuhay nga mga panghangkat. Kon paano kita magtuon sa pagsugata sa mga pagbaylo nga nagaabot nagadepende sa sadsaran kon diin kita nagatukod. Ang ebanghelyo sang aton Ginuo kag Manluluwas nagahatag sang isa ka pat-od kag bilog nga sadsaran. Ini natukod tipik sa tipik samtang kita nagaagom sang ihibalo parte sa walây katapusan nga plano sang Ginuo para sa Iya mga anak. Ang Manluluwas amó ang Agalon nga Manunudlo. Ginasunod naton Siya.

Ang mga kasulatan nagasaksi sa Iya kag nagahatag sang halimbawa sang himpit nga pagkamatarong para sundon naton. Ginpaambit ko sa miyembro sang Simbahan sa isa ka nagligad nga konperensya nga may pila ako ka mga kuwaderno kon diin ang iloy ko nagsulat sang mga butang nga gingamit niya sa paghanda sang mga leksyon sa Relief Society. Ang mga sinulat niya nagakadapat sa panahon subóng pareho gihapon sang una. Ang isa sa sining sinulat niya amó ang ginsulat sang 1908 ni Charles Edward Jefferson sa karakter ni JesuCristo. Ini mabasa:

Ang mangin Kristiyano amó ang pagdayaw sing tunay ka sinsero kag sing may kabaskog nga ang bug-os nga kabuhi nagalab-ot sa iya handom nga mangin katulad niya.

“… Makakilala kitá sa iya paagi sa mga pulong nga ginhambal niya, paagi sa mga buhat nga nahimo niya, kag sa iya mga kahipusan. Makilala man naton siya paagi sa marka nga nahimo niya una sa mga abyan niya kag ikaduha sa mga kaaway niya, kag ikatlo sa kabilogan nga katilingban sa panahon niya. …

“Ang isa sa mga sinulat parte sa ika-baynte nga siglo nga pangabuhi amó ang pagka-diskontento [kag kinagamó]. …

“… Ang kalibutan nagasinggitan para sa isa ka butang, nga ang ini diutay nga nahibal-an. Ang manggad nag-abot, … [kag] ang kalibutan napuno sang ... mga imbento sang kahanasan sang tawo kag kaalam, apang kita [sa gihapon] walâ sang kapahuwayan, di-kontento, [kag] nagasalangisag. ... [Kon buksan naton] ang Bag-o nga Testamento [ginatamyaw kita sining mga tinaga], ‘Magkari kamo sa akon kag hatagan ko kamo sang kapahuwayan, Ako ang tinapay sang kabuhi, Ako ang kasanag sang kalibutan, kon sin-o man ang ginauhaw tuguti siya nga magpalapit sa akon kag mag-inom, ang paghidaet ko ginahatag ko sa inyo, makaagum kamo sang gahum, mangin malipayon kamo’” (The Character of Jesus [1908], 7, 11, 15–16).

Ang mga lalaki kag mga babaye ginaporma sang yadtong ginpili nila updon sa pagpangabuhi. Yadtong mga ginadayaw nila kag ginatinguha nga sundon nagaporma man sa ila. Si Jesus ang dakung Modelo. Ang paagi lamang nga makaagom sang nagapabilin nga paghidaet amó ang magtamód sa Iya kag mabuhi.

Ano ang parte kay Jesus nga pinakalabing takos gid naton nga tun-an?

”Ang mga manunulat sa Bag-o nga Testamento walâ sang gana parte sa kataason ni [Jesus], sa mga panapton nga ginsuksok Niya, ukon sa mga balay nga ginpuy-an Niya. ... Ginbun-ag Siya sa kamalig sang mga sapat, nag-obra sa pandayan, nagtudlo sa tatlo ka tuig, kag dayon napatay sa krus. ... Ang Bag-o nga Testamento ginsulat sang mga lalaki nga nagpat-ud nga kita ... magtulok sing padayon sa [Iya]” (Ang Karakter ni Jesus, 21–22) upód ang pagpasalig nga Siya amó ang tunay nga Anak sang Diyos, ang Manluluwas kag Manunubos sang kalibutan.

Isa sa mga parabola sang Manluluwas, sa akon hunahuna, labi nga nagakadapat sa aton panahon subóng.

Ini makita sa Matthew kapitulo 13, nga sa diin mabasa naton:

“Apang samtang ang mga kalalakinhan natulogan, ang kaaway niya nagkari kag nagsabwag sang malaut nga mga hilamón sa tunga sang mga trigo, kag nagpalagyo.

“Apang sang nag-ulhot ang salingsing, kag namunga, dayon man nga naggwa ang mga malaut nga hilamón.

“Gani ang mga alagad sang tag-iya nagkari kag nagsiling sa iya, Sir, indi bala nga nagsabwag ka sang maayo nga binhi sa imo talamnan? Sa diin subóng karon naghalin ang malaut nga mga hilamón?

“Nagsiling siya sa ila, Ang kaaway ang naghimo sini. Ang mga alagad nagsiling sa iya, Luyag mo bala nga subóng karon maglakat kami kag gabuton ang mga ini?

“Apang nagsiling siya, Indi; kay basi sa paggabut ninyo sang malaut nga mga hilamón, magabut man ninyo ang trigo upod sa mga ini.

“Tuguti nga angay ang mga ini magtubo nga ululupod tubtob sa pag-ani: kag sa tion sang pag-ani magahambal ako sa mga manug-alani, Tipuna ninyo sing ululupod una ang malaut nga mga hilamón, kag bugkosa ang mga ini agud sunugon: apang tipuna ang trigo pasulod sa akon bodega” (verses 25–30).

Inang daan nga kaaway sang tanan nga katawhan nakatukib sang subong ka madamo nga mga pahito sa mahunahunaan niya agud maglapta sang malaut nga mga hilamón sa malayo kag malapad. Nakatukib siya sang mga paagi nga ang mga ini makadulot sa pagkasagrado sang aton mga puluy-an. Ang malain kag kalibutanhon nga mga pagginawi nagmangin tuman ka madamo nga daw sa walâ na sang husto nga paagi agud gabuton ang mga ini. Ang mga ini nagaabot paagi sa linya kag sa hangin pasulod sa mga galamiton nga nahimo naton agud mag eduka kag maglingaw sa aton. Ang trigo kag ang hilamón naglambo nga nagalapitay kag ululupod. Ang agsador nga nagadumala sa talamnan dapat, sa bug-os niya nga ikasarang, saguron inang maayo kag himuon ini nga tuman ka mabakod kag matahom nga ang hilamón walâ sang pagganyat sa mata ukon sa dalunggan. Daw ano ka bulahan kita bilang mga miyembro sang Simbahan sang Ginuo nga nagaangkon sang bilidhon nga ebanghelyo sang aton Ginuo kag Manluluwas bilang sadasaran kon sa diin sarang naton itukod ang aton mga kabuhi.

Halin sa Libro ni Mormon sa 2 Nephi mabasa naton: “Kay yari karon, sa liwat ginasiling ko sa inyo nga kon magasulod kamo sa dalan, kag magbaton sang Balaan nga Espiritu, ipakita sini sa inyo ang tanan nga mga butang nga inyo dapat himuon.” (2 Nephi 32:5).

Dapat gid nga indi naton pagtugotan ang gahud sang kalibutan nga maglutos kag magdaug sa sinang matinong, kag diutay nga tingog.

Pat-od nga kita ginpaandaman parte sa mga hitabo nga aton pagaatubangon sa aton panahon. Ang panghangkat sa aton amó ang kon paano kita maghanda para sa mga hitabo nga siling sang Ginuo pat-ud nga magaabot pa.

Madamo sa nagakabalaka nga katilingban naton ang nakahangop nga ang pagkarumpag sang panimalay magadala lamang sang kalisud kag kawalây paglaum sa kalibutan nga nagamwan. Bilang mga miyembro sang Simbahan, may responsibilidad kita sa pagpabilin kag pag-amlig sa panimalay bilang naunang yunit sang katilingban kag walây katubtuban. Ang mga propeta nagpaandam karon kag sa nagligad parte sa di-malikawan kag nagaguba nga bunga sang pagpanubo sang mga talaksan pangpanimalay.

Samtang ang kalibutan nagapadayon sa pagbantay sa aton, pat-uron naton nga ang halimbawa naton magasustener kag magasakdag sa plano nga ginhimo sang Ginuo para sa mga anak Niya diri sa mortalidad. Ang pinakadakung pagtudlo sa tanan dapat ginahimo paagi sa matarong nga halimbawa. Ang mga puluy-an naton dapat nga sagrado nga mga lugar agud nga sarang kita nga magbatò batok sa mga pagpamilit sang kalibutan. Dumduma nga ang pinakadakung mga bugay sang Ginuo nagaabot paagi sa kag ginhatag sa matarong nga mga panimalay.

Dapat mainandamón kag padayon naton nga tun-an ang aton pagbuhat bilang mga ginikanan. Ang pinakagamhanan nga panudlo nga sarang gid mabaton sang isa ka bata magahalin sa nagaulikid kag matarong nga mga amay kag mga iloy. Tuguti nga lantawon naton sing una ang papel sang iloy. Pamatii ang ining kutlo halin kay Presidente Gordon B. Hinckley:

“Ang mga babaye nga nagahimo sa isa ka balay nga mangin puluy-an nagahimo sang mas daku nga amót sa katilingban sangsa yadtong nagamando sa madamo nga mga hangaway ukon nagatindog sa ulohan sang dalayawon nga mga korporasyon. Sin-o ang sarang magbutang sang etikita sang presyo sa impluhensya sang isa ka iloy sa iya mga anak, sang isa ka lola sa iya kaapohan, ukon mga tiya kag mga utod nga babaye sa ila mga paryente?

”Indi kita sarang magsugod sa pagtakos ukon sa pagbulobanta sa impluhensya sang kababayin-an nga, sa ila kaugalingon nga mga paagi, nagatukod sang malig-on nga kabuhi pangpanimalay kag nagabatiti para sa padayon nga kaayohan sang mga henerasyon sang palaaboton. Ang mga desisyon nga ginhimo sang mga babayi sa sining henerasyon mangin walay katapusan ang mga bunga sang mga ini. Luyag ko ipanugyan nga ang mga iloy karon nga adlaw walâ sang mas dakung oportunidad kag mas seryosong panghangkat sangsa maghimo sang tanan nila nga mahimo agud magpabakod sa [puluy-an]” (Standing for Something: 10 Neglected Virtues That Will Heal Our Hearts and Homes [2000], 152).

Karon lantawon naton ang papel nga ginadala sang isa ka amay sa aton mga kabuhi:

Ang mga amay nagahatag sang mga bugay kag nagabuhat sang sagradong mga ordinansa para sa ila mga kabataan. Ang mga ini mangin espirituhanon nga mga dulumdumon sa ila mga kabuhi.

Ang mga amay kinaugalingon nga nagabuhat sa pagpamuno sa mga pangamuyo pangpanimalay, matag-adlaw nga pagbasa sang kasulatan, kag sinimana nga mga family home evening.

Ang mga amay nagatukod sang pangpanimalay nga mga tradisyon paagi sa pagplano sang mga pagbiyahe agud magbakasyon kag mga outing nga upód ang tanan nga mga miyembro sang panimalay. Ang mga handurawan sining mga pinasahing mga tion nga sila ululupod indi gid malimtan sang ila mga kabataan.

Ang mga amay nagahiwat sang paghambalanay sa kada isa sa ila mga anak kag magtudlo sa ila sang mga prinsipyo sang ebanghelyo.

Ang mga amay nagatudlo sa mga anak parte sa balor sang pagtrabaho kag nagabulig sa paghimo sang takos nga mga tuluyuon sa kaugalingon nila nga mga kabuhi.

Ang mga amay nagapakita sang halimbawa sang mahimpit nga pag-alagad sa ebanghelyo.

Palihog inyo dumduma, mga kauturan, ang sagrado ninyo nga katunggdanan bilang isa ka amay sa Israel—ang pinakaimportante ninyo nga katungdanan sa tion kag sa walay katubtubanisa ka pagtawag kon sa diin kamo indi gid pagabuy-an.

Sang madamo na nga mga tuig nga nagligad, sa isa ka stake conference, kami nagpakita sang isa ka bahin sang sine agud ilaragway ang tema sang mensahe nga amón ginapresentar. Sa panahon sang isa ka tuig, samtang kami nagbiyahe palibot sa Simbahan sa amon gintalana nga mga pagduaw sa stake conference, nangin tuman kami kabatid parte sa unod sang sine. Ang mensahe nagpabilin sa akon hunahuna sining nagligad na nga mga tinuig. Ang sine gin-asoy ni Presidente Harold B. Lee kag nag-istorya sa isa ka hitabo sa puluy-an sang iya anak nga babaye. Nagpadayon ini nga daw kasubong sini:

Isa ka gab-i ang iloy sang puluy-an masako kag nagadali sa pagtapos sang pagbutang sang prutas sa botelya. Sang ulihi ang mga kabataan ara na sa katre kag ang tanan nangin malinong. Tion na nga atipanon ang mga prutas. Samtang nagsugod na siya sa pagpanit kag pagkuha sang liso sang prutas, duha ka magagmay nga mga batang lalaki ang naggwa sa kusina kag nag-anunsyo nga sila handa na para sa ila nga pagpangamuyo.

Indi luyag nga mahuder, ang iloy nagsiling sang maabtik sa mga batang lalaki, “Ngaa indi na lang kamo magpangamuyo nga nagaisahanon karon nga gab-i kag si Nanay ninyo padayon nga mag-obra sa prutas?”

Ang mas magulang sa duha ka batà malig-on nga nagtindog kag nagpamangkot, “Diin ang pinakalabing importante, ang mga pangamuyo ukon ang prutas?” (Tan-awa ang Teachings of Presidents of the Church: Harold B. Lee [2000], 143–44.)

Kon kaisa masapwan naton ang aton mga kaugalingon kon diin may ara kita sang oportunidad agud magtudlo sa isa ka batà sang isa ka leksyon nga may ara sang nagapabilin nga epekto sa ila batan-on nga mga kabuhi. Matuod, ang mga pangamuyo mas importante sangsa prutas. Ang madinalag-on nga ginikanan indi gid dapat nga mangin tuman ka masako agud magdakop sa isa ka kahigayunan sa kabuhi sang isa ka batà kon ang isa ka importanteng leksyon sarang nga matudlo.

Nagapati ako sang mabaskog nga walâ pa gid sang panahon sa madamo ko nga mga tinuig kon diin ang mga anak sang aton Langitnon nga Amay mas nagakinahanglan sang nagagiya nga kamot sang himpit, kag deboto nga mga ginikanan. May ara kita sang daku kag dungganon nga palanublion parte sa mga ginikanan nga nagsakripisyo sang halos tanan nila nga ginpanag-iyahan agud makasapo sang isa ka lugar kon diin mapadaku nila ang ila mga panimalay nga may pagtuo kag kaisog agud nga ang masunod nga henerasyon makaangkon sang mas daku nga mga oportunidad sangsa sa naangkon nila. Dapat naton tukibon sa sulod sang aton mga kaugalingon ang amó man nga pagpamat-od sang espiritu kag lutuson ang mga kabudlay nga aton ginaatubang sa kasubong nga espiritu sang pagsakripisyo. Dapat naton itudlo sa maabot nga mga henerasyon ang mas mabakod nga pagsalig sa mga panudlo sang aton Ginuo kag Manluluwas.

“Kag karon, mga anak ko, dumduma, dumduma nga sa bató sang aton Manunubos, nga amó si Cristo, ang Anak sang Dios, nga kamo kinahanglan gid nga magpasad sang inyo sadsaran; agud kon ang yawa magapadala sang iya mamadlos nga mga hangin, huo, sang iya mga baslay sa buhawi, huo, kon ang tanan niya nga bato nga yelo kag ang iya mabaskog nga dalimuos magatupa sa inyo, mangin walâ ini sang gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amó ang isa ka pat-ud nga sadsaran, isa ka sadsaran nga kon diin ang mga tawo magapasad indi sila mapukan.” (Helaman 5:12).

Ini amó ang ebanghelyo ni JesuCristo nga nagahatag sa aton sining sadsaran nga sa diin kita makaagom sang nagapabilin nga paghidaet kag makatukod sang walay katapusan nga mga yunit sang panimalay. Sa sini ako nagasaksi sa ngalan ni JesuCrsito, amen.