Sa Diin Kamo Nagatumod?

Ni Elder Lynn G. Robbins

Sang Pangulohan sang Kapituan

Ang pagtinguha nga magustuhan sang iban bag-o magustuhan sang Diyos amó ang pagpasuli sang nauna kag ikaduha nga mga kasuguan.

”Sa diin ikaw nagatumod?” Ginkibot ako ni Presidente Boyd K. Packer sining indi mahangpan nga pamangkot samtang kami upód nga nagbiyahe sa akon nahauna gid nga alatipanon bilang isa ka bag-o nga miyembro sang Kapituan. Walâ sing paathag nga mabutang ko ang pamangkot sa iya kahulugan, ang akon isip nagamwan. ”Ang isa ka Kapituan,” ang padayon nga siling niya, ”indi nagarepresentar sang mga tawo sa propeta apang ang propeta ginarepresentar niya sa mga tawo. Indi mo gid pagkalimtan kon sa diin ka nagatumod!” Yadto isa ka gamhanan nga panudlo.

Ang pagtinguha nga magustuhan sang iban bag-o magustuhan sang Diyos amó ang pagpasuli sang nahauna kag ikaduha ka importante nga mga kasuguan (tan-awa ang Matthew 22:37–39). Ini amó ang pagkalipat kon sa diin kitá nagatumod. Bisan pa, tanan kitá nakahimo sinang sayop bangud sa kahadlok sa mga tawo. Sa Isaiah ang Ginuo nagpaandam sa aton, ”Indi kamo makugmat sang pagpakahuya sang mga tawo”(Isaiah 51:7; tan-awa man ang 2 Nephi 8:7). Sa damgo ni Lehi, ining kahadlok gin-umpisahan sang pag-uliga sang mga tawo halin sa daku kag maligwa nga dakbalay, nga nagbangud sa kadam-an nga malipatan kon diin sila nagtumod kag magbiya sa kahoy nga ”nagkahuya” (tan-awa ang 1 Nephi 8:25–28).

Ining impluhensya sang mga katutubò nagatinguha nga magbaylo sa mga panimuót sang isa, kon indi man ang pamatasan, paagi sa pagpabatyag nga siya ginabasol sa iya sayop nga nahimo. Nagahangad kitá sang malinong nga pagpakigluntad kaupod sa yadtong mga nagaturisok sang ila mga tudlo sa aton, pero apang kon ini nga kahadlok sa mga tawo nagasulay sa aton nga magpasaylo sang mga salâ, ini mangin isa ka ”siud” suno sa libro sang Proverbs (tan-awa ang Proverbs 29:25). Ang siud maalamon nga ginatago nga maghaylo sa aton maluluy-on nga pagkatawo para magpasensya ukon basi magtugot sa butang nga batok sa Diyos. Sa mga may mahuyang sing pagtuo, ini mangin is ka daku nga kasandaran. Halimbawa, ang iban nga mga bataon nga mga misyonero nagadala sining kahadlok sa mga tawo sa kapataran sang misyon kag nagpabaya nga magreport sa presidente sang misyon ang nakit-an nga paglalis sang kaupod bangud indi sila luyag nga magpilas sang balatyagon sang ila malalison nga kaupod. Ang mga pamatbat sang pamatasan ginahimo paagi sa pagdumdom sang husto nga pag-areglo sang nahauna kag ikaduha nga importante nga mga kasuguan (tan-awa ang Matthew 22:37–39). Kon ining mga nagamwan nga mga misyonero nakatalupangod nga sila may salabton sa Diyos kag indi sa ila kaupod, ini dapat maghatag sa ila sang kaisog ngamagliso.

Sa bataon nga edad sang 22, bisan si Joseph Smith nalipat kon diin siya mag-atubang sang siya liwat-liwat nga nagpangabay sa Ginuo nga tugutan si Martin Harris sa paghulam sang 116 nga mga pahina sang manuskrito. Basi luyag ni Joseph Smith nga magpasalamat kay Martin sang iya pagsakdag. Nahibal-an naton nga si Joseph masyado gid nga nalangkag nga ang iban nga mga saksi magbuylog sa iya batok sa makakalagha nga mga kabutigan nga ginpalapnag nahanungod sa iya.

Kon anuman ang mga rason ni Joseph, ukon katarungan nga nagapangibabaw, ang Ginuo indi nagpasaylo sadtong mga rason kag siya masakit nga gin-akigan sang Ginuo: ”Pilá na ka beses nga ikaw naglapas … kag nagsugot sa mga panghaylo sang mga tawo. Gani, yari karon, dapat nga indi ka kontani mas labi nganahadlok sa mga tawo sang sa Diyos” (D&C 3:6–7; ang pagtumod gindugang). Ining makatalandog nga eksperyensya nagbulig kay Joseph nga magdumdom, tubtob sa katapusan, kon sa diin siya nag-atubang.

Kon ang mga tawo nagatinguha nga indi mahuy-an sa mga tawo, sila di-hungod nga madulaansang pagsalig sang Diyos. Sa paghunahuna nga ang isa magustuhan sang Diyos kag sa pareho nga tion makapasaylo sang paglapas sang mga tawo, indi ini walay pagpili, apang pagkadoble sang salandigan, ukon pagpakunokuno ukon pagtinguha sa ”pag-alagad sa duha ka agalon” (Matthew 6:24; 3 Nephi 13:24).

Samtang sa pagkamatuod nagakinahanglan sang kaisog nga mag-atubang sa mga katalagman, ang tunay nga simbolo sang kaisog amó ang pagdaug sang kahadlok sa mga tawo. Halimbawa, ang mga pangamuyo ni Daniel nagbulig sa iya sa pag-atubang sa mga lion, apang ang nagpaisug sa iya amó ang pagsupak kay Haring Darius (tan-awa ang Daniel 6). Inang klase sang kaisog isa ka dulot sang Espiritu sa mga nagakahadlok sa Diyos nga nagapangamuyo. Ang mga pangamuyo ni Raynang Esther naghatag man sa iya sinang kaisog nga mag-atubang sa iya bana, si Haring Ahasuerus, bisan iya nahibal-an nga ang iya kabuhi yara sa katalagman sa paghimo sadto(tan-awa ang Esther 4:8–16).

Ang kaisog indi lang isa sa mga importante nga mga kaayuhan, apang sa pagpanilag ni C.S. Lewis: ”Ang kaisog isa ... ka porma sang tanan nga kaayuhan nga sa diin ini ginatilawan sa kada punto. ... Si Pilato maluluy-on tubtob nga ang iya pamatbat nangin delikado.”¹ Si Haring Herod nasubuan sang siya ginpangabay nga puguton ang liog ni John the Baptist pero luyag niya nga magustuhan siya sang ”yadtong mga bisita nga nagkalalaon upód sa iya” (Matthew 14:9). Si Haring Noah handa nga magluwas kay Abinadi tubtob nga ang kabug-at sang impluhensya sang iya makasasalà nga mga pari nagpabangud sa iya nga mag-alang-alang (tan-awa ang Mosiah 17:11–12). Si Haring Saul naglalis sa pulong sang Ginuo paagi sa pagtago sang mga butang nga nakuha halin sa inaway bangud ”nahadlok siya sa mga tawo, kag iya gintuman ang ila mga gusto” (1 Samuel 15:24). Agud mapakalma ang rebelde nga mga Israelite nga yara sa idalom sang Mount Sinai, si Aaron naghimo sang bulawan nga tinday, kag nalipatan ang iya gintumod (tan-awa ang Exodus 32). Madamo sa mga pinunò sa Bag-o nga Testamento ang ”nagpati sa [Ginuo]; apang bangud sa mga Pharisees indi sila nagpabutyag sang ila pagtuo sa iya, kay man sila indi pagpasudlon sa simbahan: kay ginpasulabi nila ang pagdayaw sang mga tawo sang sa pagdayaw sang Diyos” (John 12:42–43). Ang balaan nga mga kasulatan punô sinang mga ehemplo.

Subong magpamati kamo sa inspirado nga mga ehemplo:

Ang nauna, si Mormon: ”Yari karon, nagahambal ako nga may kaisog, nga may pagbulut-an gikan sa Diyos; kag ako walâ mahadlok kon ano ang mahimo sang tawo; kay ang himpit nga gugma nagatabog sang tanan nga kahadlok” (Moroni 8:16; ang pasulabi gindugang).
Si Nephi: ”Gani, ang mga butabg nga makapahamuot sa kalibutan walâ ko pag-isulat kundi ang mga butang nga makapahamuot sa Dios kag sa ila nga indi iya sang kalibutan” (1 Nephi 6:5).
Si Captain Moroni: ”Yari karon, ako si Moroni, ang inyo punò nga kapitan. Walâ ako nagahangad sang gahum, kundi sa pagbutong sini paidalom. Walâ ako nagahangad sang kadungganan sang kalibutan, kundi sang himaya sang akon Dios, kag sang kahilwayan kag kaayuhan sang akon pungsod” (Alma 60:36).

Si Moroni may daku nga kaisog sa pagdumdom kon sa diin siya nagtumod gani nga ginsiling ini tuhoy sa iya, ”Kon ang tanan nga mga tawo nangin subong, kag amó, kag dalayon nga mangin amó, katulad kay Moroni, yari karon, ang mga kagamhanan mismo sang impiyerno magauyog kuntani sa walay katubtuban; huo, ang yawa indi gid makaangkon sang gahum sa pagpangibabaw sa mga tagipusuon sang mga anak sang mga tawo” (Alma 48:17).

Ang mga propeta sa bikog nga maragtas ang kalibutan padayon nga ginayaguta sang iban. Ngaa balá? Suno sa balaan nga mga kasulatan, ”ang may salâ ginabudlayan sa pagbaton sang kamatuoran, kay ini nagapilas sa ila alibutod” (1 Nephi 16:2), ukon bilang sa panilagan ni Presidente Harold B. Lee, ”Ang naigò nga pispis nagakuyampad!”²Ang ila pagtamay, sa kamatuoran, isa ka pagbasol nga nagatinguha sa pagpaisog sa kaugalingon, subong sa kay Korihor, nga sa ulihi nag-akò, ”Dalayon ko nga nahibal-an nga may Diyos” (Alma 30:52). Si Korihor masyado ka manugkombinsi sa iya paniplang nga bisan siya nagpati sa iya mismo kabutigan (tan-awa ang Alma 30:53).

Ang mga manugtamay masami nga nagaakusar sa mga propeta nga indi nagakabuhi sa ika-21 nga ginatus ka tuigan ukon mga panatiko. Sila nagatilaw nga magkombinsi kag bisan pa sa pagpilit sa Simbahan nga magpanubô sang mga pagsulundan nga magsantò sa ila di-maayo nga pamatasan, nga sa mga pulong ni Elder Neal A. Maxwell, ”nagapadulong sa pagkakontento sa kaugalingon, sa baylo sang pagpauswag sang kaugalingon” ³ kag paghinulsol. Ang pagpanubô sa mga pagsulundan sang Ginuo para magsantò sa di-maayo nga panghulag sang katilingban isa kapagbiya sa pagtuo. Kadam-an sa mga simbahan sang mga Nephite duha ka gatos ka tuig pagkatapos sang pagbisita sang Manluluwas sa ila nag-umpisa ang ”pagpanubô” sang doktrina, sa paghulam sang isa ka panghambal ni Elder Holland.⁴

Samtang kamo nagapamati sa sining mensahe gikan sa 4 Nephi, pangitaa ang mga kaanggid sa aton panahon: ”Kag natabo ini nga sang makalabay na ang duha ka gatos kag napulo ka tuig may madamo nga mga simbahan sa kadutaan; huo, may madamo nga mga simbahan nga nagasugid nga nakakilala kay Cristo, apang ginpanghiwalâ nila ang laban nga mga bahin sang iya ebanghelyo, sa bagay nga ginbaton nila ang tanan nga sari sang pagkamalaut kag ginpanghatag inang sagrado sa iya nga kon sin-o man ginadumilian ini bangud sang pagkaindi-takos” (4 Nephi 1:27).

Déjà vu sa ulihing mga adlaw! Ang iban nga mga miyembro indi nakatalupangod nga sila nagakahulog sa pareho nga siud kon sila nagapamilit sa pagbaton sang sang lokal ukon pangkaliwatan nga ”[mga] kinaugalian sang ila mga katigulangan” (D&C 93:39) nga indi nagasantù sa kultura sang ebanghelyo. Ang iban pa, natiplang sang kaugalingon kag yara sa pangkaugalingon nga paghimutig, nagaulo-ulo ukon nagademanda nga ang mga bishop magpanubô sang pagsulundan sa mga rekomendasyon sa templo, mga pahanugot sa eskuwela, ukon mga aplikasyon pangmisyonero. Indi mahapos ang mangin bishop sa idalom sinang pabug-at. Bisan amó man, katulad sang Manluluwas nga nagtinlo sang templo agud mapangapinan ang pagkabalaan sini (see John 2:15–16), ang mga bishop sa sining panahon ginatawag kag maisog nga magpangapin sa pagsulundan sang templo. Ang Manluluwas ang nagsiling, ”Magpakità ako sa akon mga tawo sing kaluoy … kon ang akon mga tawo magsunod sa akon mga kasuguan, kag indi magmusing sa akon balaan nga puluy-an” (D&C 110:7–8).

Ang Manluluwas, ang aton himpit nga Ehemplo, padayon nga nagtumod sa Iya Amay. Siya nagpalangga kag-alagad sa Iya katawhan apang Siya nagsiling, ”Indi ako nagabaton sang pagpadungog sang tawo” (John 5:41). Naluyag Siya nga ang yadtong Iya gintudloan magsunod sa Iya, pero indi siya nagpaabot sang ila pabor. Sa paghimo sang mahigugmaon nga buhat, katulad sang pagpaayo sa mga masakiton, ang dulot masami nga nag-abot kaupod sang pangabay nga ”indi pagsugiri ang sin-o man” (Matthew 8:4; Mark 7:36; Luke 5:14; 8:56). Sa isa ka parte, ini amó ang paglikaw sang amó man nga kabantugan nga nagsunod sa Iya bisan pa sa Iya mga kabudlay nga likawan ini (tan-awa angMatthew 4:24). Ginkondenar Niya ang mga Pharisee nga naghimo sang maayo nga mga binuhatan agud lamang nga makità sang mga tawo (tan-awa ang Matthew 6:5).

Ang Manluluwas, ang isa lang ka himpit nga tinuga nga nagkabuhi sa katubtoban, amó ang pinakamaisog. Sa Iya kabuhi, Siya ginsugata sang madamo nga mga manug-akusar pero indi gid Siya nagpailob sa ila pagtamay. Siya lang ang tawo nga indi gid naglipat bisan kaisa kon sa diin Siya nagtumod: ”Akon ginahimo sing padayon yadtong mga butang nga nagustuhan [sang Amay]” (John 8:29; ang pasulabi gindugang), kag ”Indi ako nagahimo sang akon kabubut-on, apang ang kabubut-on sang Amay nga nagpadala sa akon” (John 5:30).

Sa natung-an sang 3 Nephi kapitulo 11 kag 3 Nephi kapitulo 28, ang Manluluwas naggamit sang titulo nga Amay sa walay kakulangan sang 150 ka beses, sa pagpaathag sa mga Nephite nga didto Siya nga nagarepresentar sa Iya Amay. Kag halin sa John kapitulo 14 tubtob sa 17, ang Manluluwas nagtuhoy sa Amay sang walay kakulangan sa 50 ka beses. Sa tanan nga posible nga paagi, Siya ang himpit nga sumulunod sang Iya Amay. Siya himpit kaayo sa pagrepresentar sa Iya Amay nga gani sa pagkilala sa Manluluwas amó man ang pagkakilala sa Amay. Ang pagkakità sa Anak amó man ang pagkakità sa Amay (tan-awa ang John 14:9). Ang pagpamati sa Anak amó man ang pagpamati sa Amay (tan-awa ang John 5:36). Siya, sa kaundan, nangin amó man sa Iya Amay. Siya kag ang Iya Amay isa lang (tan-awa ang John 17:21–22). Nahibal-an Niya sing himpit kon diin Siya nagtumod.

Kabay pa nga ang Iya nakainspirar nga ehemplo magpabakod sa aton batok sa mga katalagman sang pangintò halin sa gwa ukon halin sa sulod. Kabay pa nga ini maghatag sa aton sang kaisog nga indi gid magsalipotpot ukon magpakanubo sa tiilan sang pagpamahog. Kabay pa nga ini mag-inspirar sa aton nga maghimo sang maayo kon mahimo sa sekreto nga paagi kag ”indi maghandum sang pagpadungog sang mga tawo” (D&C 121:35). Kag kabay pa nga ang Iya di-mapaanggid nga ehemplo magbulig sa aton sa padayon nga pagdumdom kon diin ang ”nahauna kag importante nga sugo”(Matthew 22:38). Kon ang iban nagapamilit sang pagsugot sa pagbatok sa mga kasuguan sang Diyos, kabay pa nga kitá padayon nga magdumdom kon kay sin-o nga mga sumulunod kitá, kag kon sa diin kitá magtumod, amó ang akon pangamuyo sa ngalan ni JesuCristo, amen.