Ang Sakramento — Isa ka Pagpanibag-o para sa Kalag

Ni Cheryl A. Esplin

Ikaduhang Manuglaygay sa Pangkabilogan nga Pangulohan sang Primary

Ang Espiritu nagapaayo kag nagapabag-o sang aton mga kalag. Ang ginpangako nga bugay sang sakramento amó nga kitá ”dalayon nga maangkon ang iya Espiritu sa pag-upod sa [aton].”

Ang grupo sang lamharon nga kababayinhan sang kaisa nagpamangkot sa akon,”Ano balá ang ginahandum mo nga kontani imo nahibal-an sang ikaw pareho sang amon edad?” Kon ako magsabat sina nga pamangkot subong, ilakip ko ining panghunahuna: Nagahandum ako nga sang ako pareho sang inyo edad kontani nahangpan ko ang kahulugan sang sakramento sing mas maayo pa sangsa sadto. Nagahandum ako nga kontani nahangpan ko ang sakramento katulad sang paglarawan ni Elder Jeffrey R. Holland. Siya nagsiling, ’Isa sa mga pangagda nga duna sa ordinansa sang sakramento amó nga ini mangin tunay nga espirituhanon nga eksperyensya, isa ka balaan nga pag-ugyon sa Espiritu sang Diyos, isa ka pagpanibag-o para sa kalag.’¹”

Paano ang sakramento ”mangin isa ka tunay nga espirituhanon nga eksperyensya, isa ka balaan nga pag-ugyon sa Espiritu, kag isa ka pagpanibag-o para sa kalag” sa kada simana?

Ang sakramento mangin isa ka nakapabakod nga espirituhanon nga inagihan kon kitá nagapamati sa mga pangamuyo sa sakramento kag magkometer liwat sa aton mga kasugtanan. Sa paghimo sini, dapat kitá magbuót nga dalhon sa aton kaugalingon ang ngalan ni JeusCristo.² Sa paghambal sining pangako, si Presidente Henry B. Eyring nagtudlo: ”Ina nagakahulugan nga makità naton ang aton kaugalingon nga bilang Iya. Unahon naton Siya sa aton kabuhi. Gustuhon naton ang Iya nagustuhan sang sa aton nagustuhan ukon anuman ang ginatudlo sang kalibutan nga aton gustuhon.”³

Kon kitá nagaambit sang sakramento, nagasugot man kitá nga ”dalayon nga magdumdom”⁴ kay JesuCristo. Sang gab-i bag-o siya ginlansang sa krus, si Cristo nagtipon sang Iya mga Apostoles sa Iya palibot kag nag-sugod sang sakramento. Ginpamihakpihak Niya ang tinapay, ginbendisyunan ini, kag nagsiling,”Kuha kamo, kaon kamo; ini amó ang pagdumdom sa akon lawas nga ginhatag ko nga pangtubos para sa inyo.”⁵ Dayon nagkuha Siya sang isa ka tasa sang bino, nagpasalamat, ginpainom sa Iya mga Apostoles, kag nagsiling, ”Himuon ninyo ini bilang pagdumdom sa akon dugo ... , nga nag-agay para sa madamo nga magpati sa akon ngalan.”⁶

Upód sa mga Nephites kag sa liwat sa Pagpanumbalik sang Iya Simbahan sa ulihing mga adlaw, Siya nagsiling liwat nga dapat kita mag-ambit sang Sakramento sa pagdumdom sa Iya.⁷

Kon kitá nagaambit sang sakramento, kitá nagasaksi sa Diyos nga padayon naton nga dumdumon ang Iya Anak, indi lang sa tion sang malip-ot nga ordinansa sang sakramento. Ini nagakahulugan nga kitá unay nga nagatulok sa Iya ehemplo kag mga panudlo nga maggiya sa aton mga panghunahuna, sa aton mga pagpili, kag sa aton mga hinimuan. ⁸

Ang pangamuyo sa sakramento nagapahanumdom man sa aton nga kitá dapat ”magtuman sang iya mga kasuguan.”⁹

Si Jesus nagsiling, ”Kon ginahigugma ninyo ako, tumanon ninyo ang akon mga kasuguan.” ¹⁰ Ang sakramento nagahatag sa aton sang kahigayunan nga magbinagbinag kag isa ka kahigayunan nga maglisò sang aton tagipusuon kag pagbuót sa Iya. Ang pagtuman sa mga kasuguan nagadala sang gahum sang ebanghelyo sa aton mga kabuhi kag labing daku nga paghidaet kag pagkaespirituhanon.

Ang sakramento nagahatag sang tion para sa tunay nga espirituhanon nga eksperyensya samtang kitá nagahunahuna sang pangtubos kag nagapasarang nga gahum sang Manluluwas paagi sa Iya Pagpasag-uli. Ang isa ka lider sang Young Women sining karon lamang nakatuon nahanungod sa kabakod nga aton mabaton kon kitá nagahimud-os nga mag-ambit sang sakramento sing mapainu-inuhon. Sa pagtinguha nga matapos ang kinahanglanon sang Personal Progress, siya nagtuyò nga magtuhoy sa mga pulong sa mga pangsakramento nga mga himno kag mga pangamuyo.

Kada simana, siya naghiwat sang kinaugalingon nga pagtimbangtimbang sa tion sang sakramento. Nadumduman niya ang mga kasayupan nga iya nahimo, kag siya nagkometer nga magmangin labing maayo sa masunod nga simana. Nagpasalamat siya nga mapatadlong ang iya dalan kag siya matinluan. Sa pagbalikid sa iya inagihan, siya nagsiling, ”Ako naghimo sang paghinulsol nga bahin sang Pagpasag-uli.”

Sang isa ka Domingo matapos ang iya kinaugalingon nga pagtimbangtimbang, siya nagsugod nga magbatyag sang kamingaw kag kadulom. Iya nakità nga padayon ang iya paghimo sang mga kasayupan simanal nga paliwat-liwat. Pero siya may natuhay nga dahum-dahum nga siya nagpatumbaya sang daku nga bahin sang Pagpasag-uliang nagapasarang nga gahum ni Cristo. Nalipatan niya nga sa tanan nga tion ang Manluluwas nagbulig sa iya nga mangin katulad sang kinahanglanon nga kon mangin ano siya kag makaalagad labaw pa sa iya ikasarang.

Sa sining kaisipan, siya nagbinagbinag liwat sa nagligad nga simana. Nagsiling siya: ”Ang kalipay lapús nga naglikop sa akon kasubo sang matalupangdan ko nga Siya naghatag sa akon sang madamo nga kahigayunan kag mga abilidad. Natalupangdan ko sing may pagpasalamat ang abilidad nga mahangpan ang kinahanglanon sang akon anak bisan nga yadto indi hilmunon. Natalupangdan ko nga sa adlaw nga daw indi na ako makabaton sang isa pa ka hilimuon, nakasarang ako maghatag sang inspirasyon sa akon isa ka abyan. Nakapakità ako sang pagpasensya sa kahimtangan nga sa kinaandan nagabangud sang baliskad nga panugdaon halin sa akon.”

Siya nagtapos: ”Samtang ako nagpasalamat sa Diyos sa nagapasarang nga gahum sang Manluluwas sa akon kabuhi, nagbatyag ako sang labing daku nga paglaum sa paagi sang paghinulsol nga akon ginhimo kag ako nagpaabot sa masunod nga simana sing may bag-o nga paglaum.”

Si Elder Melvin J. Ballard nagtudlo kon paano ang sakramento mangin isa ka nagapaayo kag nagapatinlo nga inagihan. Siya nagsiling:

”Sin-o dira sa aton tanan nga indi nagapilas sang iya espiritu sa pulong, isip, ukon hinimuan, halin sa isa ka balaan nga adlaw tubtob sa masunod? Nagahimo kitá sang mga butang nga sa diin kitá nagahinulsol kag nagalaum nga patawaron. ... Ang paagi sa pag-agom sang pagpatawad amó ang ... paghinulsol sang aton mga salâ, pagkadto sa yadtong sin-o man nga aton nahimuan sang salâ ukon paglapas kag magpangayo sang ila pagpatawad kag magbalik sa latok sang sakramento nga sa diin, kon kitá sinsero nga nagahinulsol kag nagahanda sa aton mga kaugalingon sing maayo, kitá patawaron, kag ang espirituhanon nga pagpaayo maangkon sang aton mga kalag. …

”Ako isa ka saksi,” si Elder Ballard nagsiling, ”nga may yara nga espiritu nga nagatambong sa pagdumala sang sakramento nga nagatudok sa aton tagipusuon; inyo mabatyagan nga ang mga pilas sang espiritu ginapaayo, kag ang kabug-at ginapamag-an. Ang kasulhay kag kasadya nagaabot sa kalag nga takos kag tunay nga nagahangad sa pag-ambit sining espirituhanon nga pagkaon.”¹¹

Ang aton napilasan nga mga kalag mapaayo kag mapabag-o indi lang bangud nga ang tinapay kag tubig nagapahanumdom sa aton sang dulot sang Ginuo sang Iya unod kag dugo pero bangud man sa mga emblema nga nagapahanumdom sa aton nga Siya dalayon nga aton ”tinapay sang kabuhi”¹² kag ”buhi nga tubig.”¹³

Pagkatapos sang paghatag sang sakramento sa mga Nephites, si Jesus nagsiling:

”Siya nga magakaon sining tinapay magakaon sang akon lawas sa iya kalag; kag sia nga magainom sining alak magainom sang akon dugo sa iya kalag; kag ang iya kalag indi gid paggutumon ukon pag-uhawon, kundi nga mabusog.

Karon sang makakaon na ang tanan kag makainom ang kadam-an, yari karon, napunô sila sang Espiritu.”¹⁴

Sa sining mga pulong, si Cristo nagatudlo sa aton nga ang Espiritu nagapaayo kag nagapabag-o sa aton mga kalag. Ang panaad nga bugay sang sakramento amó nga kitá ”dalayon nga maangkon ang iya Espiritu sa pag-upód sa [aton].”¹⁵

Kon ako nagaambit sang sakramento, kon kaisa nagalarawan ako sa akon isip sang pintura nga nagalarawan sang nabanhaw nga Manluluwas nga nagadupa, nga daw handa maghakos sa aton. Naluyagan ko gid ining pintura. Kon ginapanumdom ko ini sa tion sang sakramento, ang akon kalag nagakalipay kay man daw halos mabatian ko ang mga pulong sang Manluluwas: ”Yari karon, ang akon butkon sang kaluoy nauntay tuhoy sa inyo, kag kon sin-o man ang magakari, sia akon pagabatunon; kag bulahan yadtong mga magakari sa akon.”¹⁶

Ang mga nagakapot sang Priesthood ni Aaron nagarepresentar sa Manluluwas kon sila nagahanda, nagabendisyon, kag nagapaambit sang sakramento. Samtang ang nagakapot sang priesthood untay ang butkon nga nagahalad sa aton sang sagrado nga mga emblema, pareho lang ina nga ang Manluluwas mismo ang untay nga nagahalad sang iya butkon sang kaluoy, nga nagaagda sa kada isa sa aton nga mag-ambit sang iya bilidhon nga mga dulot sang paghigugma nga aton maangkon paagi sa Iya daku nga sakripisyo sang Pagpasag-ulimga dulot sang paghinulsol, pagpatawad, kasulhay, kag paglaum.¹⁷

Ang madamo nga pagbinagbinag naton sang kahulugan sang sakramento, nagahatag sang labing balaan nga kahulugan sini sa aton. Ina ang ginpabutyag sang isa ka amay nga 96 ka tuig ang edad sang ang iya lalaking anak nagpamangkot, ”Tatay, ngaa nagakadto ka sa simbahan?” Indi ka makakità, indi ka makabatî, kag mabudlay sa imo ang maghulaghulag. Ngaa nagakadto ka sa simbahan?” Ang amay nagsabat, ”Bangud sa sakramento. Nagakadto ako para mag-ambit sang sakramento.”

Kabay pa nga ang kada isa sa aton magtambong sa miting sang sakramento nga handa sa pag-angkon sang ”tunay nga espirituhanon nga eksperyensya, isa ka balaan nga pag-ugyon sa Espiritu, isa ka pagpanibag-o para sa [aton] kalag.”¹⁸

Nahibal-an ko nga ang aton Amay sa Langit kag ang aton Manluluwas buhi. Nagapasalamat ako sa kahigayunan nga ginahatag sang sakramento nga mabatyagan ang Ila paghigugma kag mag-ambit sang Espiritu. Sa ngalan ni JesuCristo, amen.