Ginagiyahan Pauli nga Walâ sang Katalagman
Ni Presidente Thomas S. Monson
Nagatamod kita sa langit para sa sinang pat-od nga pagbatyag sang direksyon, agud nga kita makahimo kag makasunod sa isa ka maalam kag husto nga alagyan.
Mga kauturan, nagtililipon kita bilang isa ka mabakod nga hubon sang priesthood, kasubong diri sa Conference Center kag sa mga lugar sa bug-os nga kalibutan. Napadunggan ako apang ginapakubos sang akon responsibilidad nga magpamulong sa inyo. Ginapangamuyo ko ang Espiritu sang Ginuo nga mag-upod sa akon samtang ginahimo ko ini.
Setentay singko ka anyos nga nagligad, sang Pebrero 14, 1939, sa Hamburg, Germany, isa ka piyesta opisyal ang ginsaulog. Sa tunga sang nagasilabo nga mga pamulongpulong, nagahinugyaw nga mga katawhan, kag pagtokar sang pungsudnon nga mga ambahanon, ang bag-o nga barko-panggiyera nga Bismarck gintulod sa dagat paagi sa Suba Elbe. Ini, ang pinakalabing gamhanan nga barko nga naglutaw, makahalangyaw nga lalantawon sa panaming kag makinarya. Ang paghimo nagkinahanglan sang 57 ka libo nga mga blueprint para sa 380 ka milimetro, duha ka tore, kag kontrolado sang radar nga mga kanyon. Ang barko may ara sang 45 ka libo ka kilometro nga mga linya sang elektrisidad. Ini nga timbang sang kapin sa trentay-singko ka libo nga mga tonelada, kag ang salsalon nga panaming ang naghatag sang lubos nga pagkasegurado. Harianon sa dagway, higante sa kadakuon, makakulugmat sa pagpalupok, ang higante nga barko ginkabig nga di-malugdang.
Ang pagsug-alaw sang Bismarck sa swerte nag-abot kapin sa duha ka tuig nga nagsunod, nga sang Mayo 24, 1941, ang duha ka pinakalabing gamhanan nga mga barko panggiyera sang British Navy, ang Prince of Wales kag ang Hood, nagpakig-away sa Bismarck kag sa German cruiser nga Prinz Eugen. Sa sulod sang lima ka minutos ang Bismarck naglugdang sa Hood sa kaidadalman sang Atlantic kag ang tanan luwas lamang sa tatlo ka tawo sa kapin sa mil kwatro sientos ka mga tripulante sini. Ang isa ka barko panggiyera, ang Prince of Wales, nagbaton sang daku nga kasamaran kag nagpalagyo.
Kapin sa masunod nga tatlo ka adlaw, ang Bismarck nakipag-away paliwat-liwat sa mga barko panggiyera kag eroplano panggiyera sang Britain. Sa tanan, ang British nagtipon sang kabakod sang lima ka barko panggiyera, duha ka eroplano panggiyera, onse ka mga cruiser, kag baynte-uno ka mga destroyer sa pagtinguha nga makit-an kag malugdang ang mabaskog nga Bismarck.
Sa sining mga pag-inaway, madamo nga bala ang naghatag sang hapaw lamang nga kasamaran sa Bismarck. Ini balá matuod nga di malugdang? Dayon isa ka torpedo ang swerte nga nag-igò, nga nagpa-jam sang sa timon sang Bismarck. Ang mga pagtinguha nga kay-uhon napaslawan. Upod ang mga kanyon, kag ang mga tripulante nga handa, ang Bismarck sarang lamang nga magtiyog sang inanay. Sa malayo lamang nga di-malab-ot amó ang gamhanan nga German air force. Ang Bismarck indi makalab-ut sa kaluwasan sang ginapaulian nga puerto. Ining duha indi makahatag sang ginakinahanglan nga pasilungan, bangud ang Bismarck nadulaan sang abilidad sa pagsunod sa naplano nga pagpanakayon. Walâ sang timon; walâ sang bulig; walâ sang puerto. Ang katapusan nagpalapit. Ang gutom nga mga balud sang Atlantic una nga nagdilap sa iya mga kilid kag dayon naglamon sa bugal sang German navy. Ang Bismarck walâ na.1
Kasubong sa Bismarck, ang kada isa sa aton isa ka milagro sang engineering. Apang ang pagtuga sa aton, indi ginalimitahan sang tawhanon nga kaalam. Ang tawo sarang maghimo sang pinakakumplikadong mga makinarya apang indi makahatag sang kabuhi sa mga ini ukon magdulot sa mga ini sang mga gahum sang pangatarungan kag pagpamat-od. Ang mga ini diyosnon nga mga dulot, nga ang Dios lamang ang makahatag.
Subong sa kinahanglanon nga timon sang isa ka barko, mga kauturan, ginahatagan kita sang isa ka paagi agud pat-uron ang direksyon nga aton ginalakat. Ang parola sang Ginuo nagagiya sa tanan samtang nagapanakayon kita sa mga dagat sang kabuhi. Ang katuyuan naton amo ang magtimon sa isa ka walâ nagabag-o nga alagyan padulong sa aton luyag nga kalab-utonamó gid ang selestiyal nga ginharian sang Diyos. Ang tawo nga walâ sang katuyuan kasubong sang isa ka barko nga walâ sang timon, daw sa indi gid makalab-ut sa ginapaulian nga puerto. Sa aton nagaabot ang mensahe: planuha and alagyan, ihanda ang layag, iposisyon ang timon, kag magpadayon.
Subong sa mabakod nga Bismarck, amó man ang tawo. Ang duso sang motor kag ang gahum sang mga alisi walâ sang pulos kon walâ sang ginahunahuna nga direksyon, inang paggamit sang enerhiya, inang paggiya sang gahum nga ginhatag sang timon, nga di-makit-an, kag diutay kon ikumpara sa kadakuon, apang lubos nga kinahanglanon sa paghimo.
Ang aton Amay naghatag sang adlaw, sang bulan, kag sang mga bituonmga langitnon nga galaxy agud maggiya sa mga marinero nga nagapanakayon sa mga banas sang kadagatan. Sa aton, samtang kita nagalakat sa alagyan sang kabuhi, naghatag Siya sang isa ka maathag nga mapa kag nagatudlo sa alagyan padulong sa aton luyag nga padulongan. Nagapaandam Siya: mag-andam sa mga pag-balhin sang banas, sa mga tugalbong, sa mga siud. Indi kita sarang nga matiplang sadtong mga luyag magpatalang sa aton, yadtong tuso nga mga manugsilindron sang kasal-anan nagaimbitar diri kag didto. Sa luyo sini, nagauntat kitá sa pagpangamuyo, nagapamati kita sa sinang matinong kag diutay nga tingog nga nagahambal sa kaidadalman sang aton mga kalag sang malumanay nga imbitasyon sang Agalon, “Magpalapit kamo, kag magsunod sa akon.”2
Apang may yadtong walâ nagapamati, walâ nagasunod, nga mas luyag ang maglakat sa banas nga ila ginpili. Mas masami sila nagapaidalom sa mga pagsulay nga nagapalibot sa aton tanan kag sarang nga magpakita nga tuman gid ka makagalanyat.
Bilang nagaangkon sang priesthood, ginpadala kita sa kalibutan sa panahon sang pagkinagamo. Nagapuyo kitá sa isa ka kumplikadong kalibutan upód ang mga sulog sang pag-ilinaway nga masapwan bisan diin. Ang mga padihot pangpulitika nagaguba sang kalig-on sang mga nasyon, ang mga diktador nagapang-agaw sang gahum, kag ang mga bahin sang katilingban daw sa walay katapusan nga ginapigos, ginkuhaan sang oportunidad kag ginbilin nga may balatyagon sang kapaslawan. Ang mga katontuhan sang mga tawo mabatian naton, kag ang mga salâ nagapalibot sa aton.
Responsibilidad naton ang mangin takos sa tanan nga mahimayaon nga mga bugay sang aton Amay sa Langit nga Iya gintigana sa aton. Bisan diin man kitá makadto, ang aton priesthood nagaupód sa aton. Nagatindog bala kita sa balaan nga mga lugar? Palihog, antes ibutang ninyo ang inyo kaugalingon kag ang inyo priesthood sa katalagman paagi sa pagkadto sa mga lugar ukon sa pagpakigbuylog sa mga kahiwatan nga indi takos para sa inyo ukon sa sinang priesthood, magdulog agud magbinagbinag sang mga bunga.
Kitá nga ginaordinan sa priesthood sang Diyos sarang makahimo sang isa ka pagkatuhay. Kon ginasostener naton ang aton personal nga pagkaputli kag magpadungog sa priesthood, kita mangin matarong nga mga halimbawa nga sundon sang iban. Ang Apostoles nga si Paul naglaygay, “Mangin halimbawa ka sang mga tumuluo, sa pulong, sa paghambalanay, sa pagpalangga ni Cristo, sa espiritu, sa pagtuo, kag sa pagkaputli.”3 Nagsulat man siya nga ang mga sumulunod ni Cristo dapat nga magmangin “subong sa mga kasanag sa kalibutan.”4 Ang paghatag sang isa ka halimbawa sang pagkamatarong sarang nga makabulig nga magpasanag sa dugang nga nagadulom nga kalibutan.
Madamo sa inyo ang makadumdom kay Presidente N. Eldon Tanner, nga nag-alagad bilang isa ka manuglaygay sa apat ka mga Presidente sang Simbahan. Siya naghatag sang padayon nga halimbawa sang pagkamatarong sa bug-os niya nga pagtrabaho sa industriya, sa bilog nga panahon sang serbisyo sa gobyerno sang Canada, kag bilang Apostol ni JesuCristo. Siya naghatag sining inspiradong laygay: “Walâ sang makahatag sang mas labing daku nga kalipay kag kadalag-an sangsa mangabuhi suno sa mga tudlo sang ebanghelyo. Mangin isa ka halimbawa; mangin isa ka impluhensya para sa kaayuhan.”
Siya nagpadayon: “Ang kada isa sa aton ginpili sang una pa para sa pila ka buluhaton bilang pinili nga alagad sang Diyos kag nakita Niya nga takos agud hatagan sang priesthood kag gahum agud magbuhat sa iya ngalan. Padayon nga dumduma nga ang katawhan nagalantaw sa inyo sa pagpamuno kag kamo nagaimpluhensya sa mga kabuhi sang mga tawo angay sa maayo ukon sa malain, nga among impluhensya mabatyagan sa mga henerasyon pa nga maabot.”5
Ginapabakod kita sang kamatuoran nga ang pinakadaku nga pwersa karon nga adlaw amo ang gahum sang Dios samtang ini nagabuhat paagi sa tawo. Agud nga magpanakayon nga walâ sang katalagman sa kadagatan sang mortalidad, kinahanglan naton ang paggiya sinang Marinero sa Walay Katubtubannga amó ang gamhanan nga Jehovah. Nagalab-ut kita paggwa, kag pataas agud makabaton sang langitnon nga tabang.
Ang isa ka halimbawa nga nakilal-an sing maayo nga walâ maglab-ut pahitaas amó si Cain, anak ni Adan kag ni Eba. Gamhanan sa ikasarang apang mahuyang sa pagbuot, gintugotan ni Cain ang kasakon, kahisa, kag di-pagkamasinulundon, kag bisan pa ang pagpatay sa pag-jam sang kinaugalingon nga timon nga kontani naggiya sa iya sa walay katalagman kag eksaltasyon. Ang pagtulok sang paidalom nagbulos sa pagtangla; si Cain napukan.
Sang isa pa ka panahon kag paagi sa isa ka malaut nga hari, ang isa ka alagad sang Diyos gintilawan. Ginbuligan sang inspirasyon sang langit, si Daniel naghatag sang kahulugan para sa hari nahanungod sa nasulat sa dingding. Nahanungod sa gindulot nga mga padyaamó ang isa ka harianon nga roba, kulintas nga bulawan, kag gahum pangpulitikasi Daniel nagsiling, “Kuhaa ang mga regalo para sa imo kaugalingon, kag ihatag ang padya sa iban.”6 Dalagku nga mga manggad kag gahum ang ginhalad kay Daniel, mga padya nga nagrepresentar sa mga butang sang kalibutan kag indi iya sang Diyos. Si Daniel nagpamatok kag nagpabilin nga himpit.
Sang ulihi, sang si Daniel nagyaob sa Diyos walâ sapayan sa isa ka layi nga nagpahayag nga ang amó ginadumilian, siya gintapok sa isa ka puluy-an sang mga liyon. Ang panaysayon sa Biblia nagahambal sa aton nga sang masunod nga aga, “Si Daniel ginkuha pasaka halin sa puluy-an, kag walâ sang ano man nga samad ang nakita sa iya, bangud nagpati siya sa ... Diyos.”7 Sa tion sang ital-ital nga pagkinahanglan, ang determinasyon ni Daniel nga magsunod sa isa ka tayuyon nga alagyan nagbunga sang diyosnon nga pag-amlig kag naghatag sang isa ka palasilungan nga walay katalagman. Ang amó nga pag-amlig kag kaluwasan sarang man nga mangin aton samtang kita nagasunod sa sinang tayuyon nga alagyan padulong sa walay katapusan nga puluy-an.
Ang orasan sang kasaysayan, subong sa mga balas sang botelya sang oras,nagamarka sa paglipas sang panahon. Ang isa ka bag-o nga mga manugdala ara sa entablado sang kabuhi. Ang mga problema sang aton panahon makakululba nga ara sa atubang naton. Padayon sa kasaysayan sang kalibutan, si Satanas nagtrabaho nga walâ sing pagkakapoy para sa kalaglagan sang mga sumulunod sang Manluluwas. Kon kita malutos sang iya mga pagpangganyat, kitákasubong sang mabakod nga Bismarck—madulaan sinang timon nga sarang maggiya sa aton padulong sa kaluwasan. Sa luyo sini, ginpalibotan sang kumplikasyon sang moderno nga pagpangabuhi, nagatamud kita sa langit para sa sinang pat-ud nga pagbatyag sang direksyon, agud nga kita makahimo kag makasunod sa isa ka maalam kag husto nga alagyan. Ang aton Langitnon nga Amay indi magabilin sa aton sinsero nga pangabay nga walâ sing sabat. Samtang ginapangita naton ang langitnon nga tabang, ang aton timon, nga indi kasubong sa iya sang Bismarck, indi mapaslawan.
Samtang nagasugod kitá sa aton matag-isa nga pagpanglakaton, kabay nga magpanakayon kita nga walay katalagman sa mga dagat sang kabuhi. Kabay nga may ara kitá sang kaisog sang isa ka Daniel, agud nga kiyá magpabilin nga matuod kag himpit walâ sapayan sa salâ kag pagsulay nga nagapalibot sa aton. Kabay nga ang aton mga pagpamatuod mangin madalom kag mabakod kasubong sinang iya ni Jacob, ang utod ni Nephi, nga, sang gin-atubang sang tawo nga nagtinguha sa tanan nga posibleng paagi sa pagdula sang iya pagtuo, nagpahayag, “Walâ gid ako nalingkang.”8
Upod ang timon sang pagtuo nga nagagiya sa aton pagbiyahe, mga kauturan, kitá man makapauli nga walay katalagmanpauli sa Diyos, agud magpuyo upod sa Iya sa walay katubtuban. Nga ang amó matabo sa kada isa sa aton, ginapangamuyo ko sa ngalan nga sagrado ni JesuCristo, ang Manluluwas kag Manunubos naton, amen.