Pagpalapit sa Trono sang Diyos nga may Pagsalig

Ni Elder Jörg Klebingat

Sang Kapituan

Paagi sa pagdapat sang Pagpasag-uli ni JesuCristo, makasugod kitá sa pagpadaku sang aton esprituhanon nga pagsalig subóng kon kamo buót nga magpamati kag maghimo.

Sa timbangan halin sa isa tubtob sa napulo, paano mo matakos ang imo espirituhanon nga pagsalig sa Diyos? May personal ka balá nga pamatuod nga ang imo mga halad bilang isa ka Santos sa Ulihing mga Adlaw bastante sa pagpanubli sang walay katapusan nga kabuhi? Makasiling ka balá sa imo kaugalingon nga ang Langitnon nga Amay nahamuot sa imo? Ano ang sa imo mga hunahuna kon ikaw ayhan magpakighambal sa imo Manluluwas isa ka minuto halin subong? Ang mga salâ, mga pagkanugon, kag mga kakulangan magdaug balá sa imo, ukon ikaw yano nga maka-eksperyensya sang malipayon nga pagpaabot? Magtulok ka ayhan ukon maglikaw sa Iya panulok? Maglingaslingas ka balá sa puwertahan ukon deretso nga magpalapit sa Iya?

Kon san-o man nga ang kaaway indi makahaylo sa indi mga himpit pero nagatinguha nga mga Santos katulad ninyo nga magbiya sa inyo pagpati sa personal kag mahigugmaon nga Diyos, siya nagagamit sang isa ka mabangis nga kampanya sa pagpalayo sa inyo sa Diyos. Ang kaaway nakahibalo nga ang pagtuo kay Cristoang sari sang pagtuo nga nagabunga sang nagapadayon nga malolô nga kaluoy kag bisan pa sang mga daku nga mga milagro nagaangot sa personal nga pagsalig nga kamo nagatinguha nga magpili sang tama. Sa sina nga rason, siya maghangad nga maghatag sang mga kabutigan sa inyo tagipusuonmga kabutigan nga ang Langiton nga Amay nalugaw-an sa inyo, nga ang Pagpasag-uli indi ninyo madab-ot, nga walâ sing pulós nga magtinguha, nga ang mga iban dira mas maayo sangsa inyo, nga kamo walay pulós, kag isa ka libo pa nga pareho ka malain nga halambalon.

Samtang nga ginatugutan ninyo ining mga tingug nga magtigib sa inyo kalag, indi kamo pat-ud nga makapalapit sa trono sang Diyos. Bisan anuman ang inyo ginahimo, bisan anuman nga mga milagro ang inyo ginahandom, may yara gihapon nga bastante nga pagduda sa kaugalingon nga nagasikyap sa inyo pagtuoindi lamang sa inyo pagtuo sa Diyos apang sa inyo man pagsalig sa inyo kaugalingon. Ang pagsunod sa ebanghelyo sa sini nga paagi indi masadya, ukon ini maayo. Labaw sa tanan, ini lubos nga indi kinahanglan! Ang pagpamatbat nga magbaylo inyo gidkag inyo gid lamang.

Luyag ko magpaambit sang anom ka praktikal nga mga panugyan nga, kon pamatian, magkuha sang ining malain nga mga tingog kag magpabalik sa inyo sang sahi sang mahidaiton nga pamat-ud kag espirituhanon nga pagsalig nga mangin inyo kon ini luyag ninyo. Walay sapayan sa pagtimbang nga ginhatag ninyo sa inyo kaugalingon sa timbangan halin sa isa tubtob sa napulo, paagi sa pagsunod sa Pagpasag-uli ni JesuCristo kamo makasugod sa pagpadaku sang inyo espirituhanon nga pagsalig subóng kon handa kamo magpamati kag magsunod. Walay kahadlok ako nga maghambal, sa tuyò nga makapasanag kag indi makapilas sang balatyagon.

1. Mag-akò kamo sang inyo kaugalingon nga espirituhanon nga kaayuhan. Untati ninyo ang pagbasol sa iban ukon sa inyo mga kahimtangan, untati ang pagpasaylo sa mga kasayupan, kag untati ang pagpasaylo kon ngaa nga indi kamo lubos nga nagatinguha nga mangin masinulundon. Batunon niyo nga kamo “hilway suno sa unod” kag “hilway sila sa pagpili sang kahilwayan kag kabuhi nga walay katapusan” (2 Nephi 2:27). Ang Ginuo himpit nga nakahibalo sang inyo mga kahimtangan, pero himpit nga Siya nakahibalo man kon kamo yano nga nagapili nga indi lubos magtuman sang ebanghelyo. Kon ina ang kaso, mangin tampad kamo nga mag-akò sini, kag magtinguha nga mangin himpit sa sulod sang inyo mga kahimtangan. Ang espirituhanon nga pagsalig nagadugang kon kamo naga-akò sang katungdanan sa inyo kaugalingon nga espirituhanon nga kaayuhan paagi sa paggamit sang Pagpasag-uli ni JesuCristo sa tanan nga adlaw.

2. Mag-akò sang responsibilidad para sa kaugalingon nga kaayuhan sang lawas. Ang inyo espiritu ginalakipan sang lawas kag espiritu (tan-awa D&C 88:15). Ang pagsapupo sa espiritu samtang nagapatumbaya sa lawas, nga amó isa ka templo, masami nga nagapadulong sa pagsipak sang espiritu kag pagpanubô sang kinaugalingon nga bugal. Kon ang inyo lawas indi maayo, kon kamo indi komportable sa inyo kaugalingon nga lawas, kag makahimo sang paagi nga mapaayo ini, sugod karon himuon ninyo! Si Elder Russell M. Nelson nagtudlo nga kitá dapat nga “magkabig sang aton lawas bilang isa gid naton ka templo” kag dapat nga kitá “magpugong sang aton ginakaon kag dapat mag-ehersisyo para sa kaayuhan sang lawas”(“We Are Children of God,”Ensign, Nov. 1998, 87; Liahona, Jan. 1999, 103).

Si Presidente Boyd K. Packer nagtudlo nga “ang aton espiritu kag lawas nagaugyon sa paagi nga ang aton lawas mangin isa ka instrumento sang aton isip kag sadsaran sang aton karakter” (“The Instrument of Your Mind and the Foundation of Your Character” [Church Educational System fireside, Feb. 2, 2003], 2; speeches.byu.edu). Gani, kabay pa nga maggamit kamo sang maayo nga pamatbat kon ano kag kon ano kadamo ang inyo ginakaon kag hatagan ang inyo lawas sang ehersisyo nga iya kinahanglan kag dapat sa iya. Kon ang inyo lawas makasarang, magpamatbat subóng nga mangin agalon kamo sang inyo panimalay kag mag-umpisa sang isa ka regular, nagapadayon nga iskedyul sang ehersisyo, nga bagay sa inyo mga abilidad, ginalakipan sang maayo nga diyeta. Ang espirituhanon nga pagsalig nagadugang kon ang inyo espiritu, sa bulig sang Manluluwas, matuod-tuod nga nagagahum sang inyo kinaugali nga pagkalalaki ukon pagkababaye.

3. Angkunon ninyo ang boluntaryo, lubos-tagipuson nga pagkamasinulundon bilang bahin sang inyo kabuhi. Kilalahon ninyo nga indi kamo makapalangga sa Diyos kon indi man kamo nagapalangga sang Iya mga sugo. Ang salandigan sang Manluluwas maathag kag simple: “Kon ginahigugma ninyo ako, tumanon ninyo ang akon mga sugo” (John 14:15). Ang pinili nga pagkamasinulundon nagadala sang pinili nga mga bugay, kag ang pagpili sang isa ka butang nga malain sa lugar sang isa nga mas malain amó man gihapon ang pagpili sang salâ. Indi ka makatan-aw sang malain nga pelikula kag magpaabot sang balatyagon nga maayo bangud indi ka nagtan-aw sang isa ka masyado ka malain pa dira. Ang padayon nga pagsunod sang iban nga mga sugo indi nagapasaylo sa pagpatumbaya sang iban pa. Si Abraham Lincoln matarung nga nagsiling, “Kon ako nagahimo sang maayo, nagabatyag ako sing maayo. Kon ako nagahimo sang malain nagabatyag ako sing malain” (sa William H. Herndon kag Jesse William Weik, Herndon’s Lincoln: The True Story of a Great Life, 3 vols. [1889], 3:439).

Amó man, maghimo sang maayo sa maayo nga mga katarungan. Ang Ginuo, nga amó ang “nagakinahanglan sang tagipusuon kag handa nga isip” (D&C 64:34) kag siya ”amó ang isa ka nakahilom sang mga hunahuna kag mga katuyuan sang tagipusuon” (D&C 33:1), nakahibalo kon ngaa kamo nagakadto sa simbahankon balá kamo nagatambong lang sa lawas ukon matuodtuod nga nagasimba. Indi kamo makakanta sa Domingo, “O Babylon, O Babylon, [Ako] nagapaalam sa imo” kag pagkatapos magpangita ukon magpasensya sa pagpakig-upod liwat sa iya sa madali nga mga tinion. (“Ye Elders of Israel,” Hymns, no. 319). Dumduma ninyo nga ang pagbali-walâ sa espirituhanon nga mga butang indi gid kalipayan. Himua ninyo ang Simbahan kag ang ginpanumbalik nga ebanghelyo inyo lubos nga kabuhi, indi lang isa ka bahin sang inyo panggwa ukon pangkatipunan nga kabuhi. Ang pagpili sa sini nga adlaw kon sin-o ang inyo alagaran isa lang ka alagad sang bibigtubtob nga kamo sa kamatuoran maghimo sini. (tan-awa ang Joshua 24:15). Ang espirituhanon nga pagsalig nagadugang kon kamo matuodtuod nga nagatinguha, sa maayo nga mga katarungan, sa ginkonsagrar nga kabuhi bisan pa nga kamo may mga kahuyangan!

4. Tunay nga mangin maayo gid sa paghinulsol sing lubos kag madali. Bangud nga ang Pagpasag-uli ni JesuCristo mapuslanon, dapat ninyo gamiton ini sing bunayag 24/7, kay ini indi gid maubos. Batunon ninyo ang Pagpasag-uli ni JesuCristo kag ang paghinulsol bilang mga bagay nga dapat batunon kag gamiton sa adlaw-adlaw suno sa mga sugo sang Maayo nga Manugbulong. Magpasad sang panimuot sang nagapadayon nga kalipay, masadya nga paghinulsol sa paghimo sini nga inyo pinili nga paagi sang kabuhi. Sa paghimo sini, mag-andam kamo sa mga sulay nga magpatumbaya, kag indi magpaabot nga ang kalibutan maghugyaw sa inyo. Ang pagpadayon sa Ginuo, labaw nga pagkilala kon ano ang Iya panghunahuna sa inyo, kag tugutan ang masunod nga mga kaabtanan. Ang espirituhanon nga pagsalig nagadugang kon kamo nagabuót kag malipayon nga nagahinulsol sang mga salâ, diutay man ukon daku, sa tama nga tiyempo paagi sa paggamit sang Pagpasag-uli ni JesuCristo.

5. Mangin maayo gid kamo sa pagpatawad. “Ako, ang Ginuo, magpatawad sa kon sin-o man nga Akon patawaron, apang kamo ginakinahanglan nga magpatawad sa tanan nga mga tawo” (D&C 64:10). Patawaron ninyo ang tanan nga mga tawo, ang tanan tanan nga butang, sa tanan nga panahon, ukon bisan lamang nga magtinguha sa paghimo sini, gani ang pagpatawad maangkon sang inyo kabuhi. Indi kamo maghuput sang dumot, indi kamo madali nga mapilasan sang balatyagon, magpatawad kag madali maglipat, kag indi gid mag-isip tubtob kon san-o nga kamo hilway sa sini nga mando. Ang espirituhanon nga pagsalig nagadugang kon kamo nakahibalo nga ang Ginuo nakahibalo nga indi kamo nagahuput sang malain nga mga balatyagon sa isa ka kalag.

6. Batunon ninyo ang mga pagtilaw, mga kabudlay, kag “indi ginapaabot nga mga butang” bilang bahin sang eksperyensya sa mortalidad. Dumduma ninyo nga kamo yari diri agud mapamatud-an kag matilawan, “tan-awon kon [kamo] maghimo sang tanan nga mga butang nga anuman nga isugo sang Ginuo nga [inyo] Diyos sa [inyo]” (Abraham 3:25)—kag kon mahimo ako magdugang, “sa tanan nga mga kahimtangan.” Minilyon nga mga kauturan ninyo ang padayon nga ginahatagan sang pagtilaw ukon ginatilawan, gani ngaa nga kamo dapat hilwayon sa mga ini? Ang iban nga mga pagtilaw nagaabot bangud sang paglalis ukon pagpatumbaya. Ang iban nga mga pagtilaw nagaabot bangud sa pagpatumbaya sang iban ukon simple bangud ini isa ka napukan nga kalibutan. Kon mag-abot ining mga pagtilaw, ang mga alagad sang kaaway nagasugod sa pagbantala nga kamo naghimo sang isa ka salâ, nga ini isa ka silot, isa ka sinyal nga ang Langitnon nga Amay indi nagapalangga sa inyo. Indi ninyo pagsapakon ini! Sa tigaylo, magtinguha kamo nga magyuhom, magtangla sa langit, kag magsiling, “Nahangpan ko, Ginuo. Nahibal-an ko kon ano ini. Tiyempo nga mapamatud-an ko ang akon kaugalingon, indi balá?” Gani karon mag-upód sa Iya sa pagpadayon tubtob sa katapusan. Ang espirituhanon nga pagsalig nagadugang kon nagabaton kamo nga “masami ang mga pagtilaw kag mga pag-antus ginatugutan sa [inyo kabuhi] bangud sa [inyo] husto nga ginahimo” (Glenn L. Pace, “Crying with the Saints” [Brigham Young University devotional, Dec. 13, 1987], 2; speeches.byu.edu).

Samtang ako nagapangulo sa Ukraine Kyiv Mission, sang isa ka bes, nagpamangkot ako sa isa ko ka pinakamasinulundon nga babaying utod kon ngaa siya padayon nga estrikto sa iya kaugalingon, kon ngaa siya padayon nga nagakastigo sang iya kaugalingon sa mga pinakadiutay nga mga butang. Ang iya sabat isa ka salandigan nga ehemplo sang isa nga nagapamati sa salâ nga tingog sang siya nagsabat, “Agud nga walâ sing ma-una sa akon sa sini.”

Mga Kauturan, ang akon laygay sa sining babaying misyonero amó man ang laygay ko sa inyo: kilalahon kag atubangon ang inyo mga kahuyangan, apang indi kamo mangin inutil bangud sini, kay man ang iban sini mangin inyo mga kaupod tubtob nga kamo magtaliwan sa sining kabuhi. Bisan anuman ang inyo sining karon lamang nga kahimtangan, sa tinion gid nga kamo magbuót sa pagpili sang tampad, malipayon, adlaw-adlaw nga paghinulsol paagi sa pagtinguha sa simple nga paghimo sang inyo pinakamaayo kag ikasarang, ang Pagpasag-uli sang Manluluwas, halin sa una, nagalikop kag nagasunod sa inyo kon diin man kamo nagakadto. Ang pagkinabuhi katulad sini, makapat-od nga “padayon ang pagtubos sang inyo mga salâ” (Mosiah 4:12) sa kada oras sang kada adlaw, sa kada segundo sang kada minuto, kag gani karon kamo mangin lubos nga matinlo kag takos sa atubang sang Diyos sa tanan nga tion.

Ini inyo pribelihiyo, kon luyag ninyo, sa paghangop sa inyo kaugalingon, subong ukon sa gilayon, nga ang Diyos nahamu-ot sa inyo bisan pa sa inyo mga kakulangan. Nagapamatuod ako sa mapinalanggaon nga Manluluwas nga nagapaabot sang aton pagtuman sa Iya mga sugo. Nagapamatuod ako sa mapinalanggaon nga Manluluwas nga nahangawa nga maghatag sa aton sang grasya kag kaluoy. Nagapamatuod ako sa mapinalanggaon nga Manluluwas nga nagahugyaw kon kita nagagamit adlaw-adlaw sang Iya Pagpasag-uli sing may matawhay kag masadya nga kaseguruhan nga kita nagaatubang sa husto nga kaladtuan. Nagapamatuod ako sa mapinalanggaon nga Manluluwas nga nahangawa sa ”inyo pagsalig nga [mangin] mabakod sa atubangan sang Diyos” (D&C 121:45). Sa ngalan ni JesuCristo, amen.