Ang Layi sang Pagpuasa: Isa ka Kinaugalingon nga Responsibilidad agud Mag-atipan sa Imol kag sa Nagakinahanglan
Ni Bishop Dean M. Davies
Ikaduhang Manuglaygay sa Pangulohan sang Bishopric
Bilang mga sumulunod sang Manluluwas, may responsibilidad kita nga kinaugalingon sa pagtatap sang imol kag sa nagakinahanglan.
Palangga ko nga mga kauturan, mahal ko ang priesthood, kag luyag ko gid nga makaupod kamó. Madalom ang pagpasalamat ko nga kita ululupod nga nagaalagad sa sining dakung kawsa.
Nagakabuhi kita sa talalupangdon nga mga panahon. Ang milagrosong mga pag-uswag sa medisina, siyensya, kag teknolohiya nagpaayo sa kalidad sang kabuhi sang madamó. Apang may ebidensya man sang dakung pag-antus sang katawhan kag kagha. Dugang sa mga giyera kag hinuringhuring sang mga giyera, ang pagdamó sang kinaandan nga mga kalalat-ankalakip ang mga baha, sunog, linog, kag balatiannakaapekto sa minilyon nga mga kabuhi sa bug-os nga kalibutan.
Ang pamunoan sang Simbahan nakahibalo kag nagabantay parte sa kaayuhan sang mga anak sang Diyos bisan diin. Kon san-o kag kon diin posible, ang emerhensya nga mga probisyon ginhatag agud magsabat sa yadtong nagakinahanglan. Halimbawa, sang nagligad nga Nobyembre, ang Typhoon Haiyan nag-igò sa isla nga nasyon sang Pilipinas.
Isa ka Kategoriya 5 nga bagyo, ang Haiyan nagbilin sa inagyan sini sang malapad nga pagguba kag pag-antus. Bug-os nga mga siyudad ang naguba; madamó ang nagkalamatay; kag minilyon nga mga puluy-an ang tuman nga nahalitan ukon naguba; ang naunang mga serbisyo subong sang tubig, imburnal, kag elektrisidad nag-untat sa pag-obra.
Ang mga pangbulig sang Simbahan ginhimo nga sarang mahatag sa una nga mga oras pagkatapos sang kalalat-an. Ang mga miyembro sang Simbahan sa Pilipinas naghubon agud magtabang sa mga kauturan nila paagi sa paghatag sang pagkaon, tubig, panapton, kag mga suludlan sa pagpaninlo sang lawas alalangay sa mga miyembro kag indi miyembro.
Ang mga balay-tilipunan sang Simbahan nangin mga lugar palasilungan sang linibo ka mga walay puluy-an. Sa idalom sang pagpamuno sang Area Presidency kag lokal nga mga pinuno sang priesthood, nga ang madamó nadulaan sang tanan nila nga mga kabutangan, ang mga pagtuon parte sa kahimtangan kag kaluwasan sang tanan nga mga miyembro ginhimo. Ang mga plano nga may inspirasyon nagsugod sa paghulag agud buligan nga ipanumbalik ang mga miyembro sa mabaton nga mga kahimtangan sang pagpangabuhi kag pagsalig sa kaugalingon.
Diutay nga mga kinahanglanon ang ginhatag agud buligan ang mga miyembro sang Simbahan nga matukod liwat ang kahoy nila nga mga palasilongan kag mga puluy-an. Indi lamang ini libre nga paghatag. Ang mga miyembro nagbaton sang paghanas kag nagbuhat sa kinahanglan nga obra para sa ila mga kaugalingon kag dayon para sa iban.
Ang isa ka bunga nga bugay amó nga samtang ang mga miyembro nagtuon sang pagpamanday, plumbing, kag iban pa nga mga kahanasan sa pagtukod, sila nakasarang sa pagkuha sang makahulugan nga mga oportunidad sa pagtrabaho sa malapit nga mga siyudad kag ang mga komunidad nagsugod sa pagtukod liwat.
Ang pagsapupo sa mga imol kag nagakinahanglanon isa ka naunang doktrina sang ebanghelyo kag isa ka kinahanglan nga bahin sa walay katapusan nga plano sang kaluwasan.
Antes sa Iya pagpang-alagad sa kalibutan, si Jehovah nagpahayag: “Kay ang imol indi gid madula sa kadutaan; gani ginamanduan ko ikaw, nga nagasiling, Buksan mo sing maalwan ang imo kamót para sa imo utod, sa imol ninyo, kag sa mga nagakinahanglan, sa inyo kadutaan.”1
Sa aton panahon, ang pag-atipan sa imol kag sa nagakinahanglan amó ang isa sa apat ka diosnon nga mga responsibilidad nga gintalana sa Simbahan agud magbulig sa kada isa kag sa mga panimalay nga mangin takos para sa eksaltasyon.2
Ang pag-atipan sa imol kag nagakinahanglan nagabinagbinag sa kaluwasan nga angay kalibutanhon kag espirituhanon. Ini nagalakip sang pag-alagad sang kada isa ka mga miyembro sang Simbahan samtang sila kinaugalingon nga nagaatipan sa imol kag nagakinahanglan, subong man sa pormal nga buluhaton pangkaayuhan sang Simbahan, nga ginadumalahan paagi sa awtoridad sang priesthood.
Sentro sa plano sang Ginuo para sa pag-atipan sang imol kag nagakinahanglan amó layi sang pagpuasa. “Ang Ginuo nagtukod sa layi sang pagpuasa kag mga halad sang pagpuasa agud magbugay sa Iya katawhan kag maghatag sang isa ka paagi para sila makaalagad sa yadtong nagakinahanglan.”3
Bilang mga sumulunod sang Manluluwas, may ara kita sang kinaugalingon nga responsibilidad agud mag-atipan sa imol kag sa nagakinahanglan. Ang himpit nga mga miyembro sang Simbahan bisan diin nagabulig paagi sa pagpuasa kada bulanang di-pagkaon kag pag-inom sa 24 oraskag dayon maghatag sa Simbahan sang isa ka halad pagpuasa nga kwarta nga sa pinakadiutay pareho sa kantidad sang pagkaon nga kontani ila ginkaon.
Ang mga pulong ni Isaiah dapat nga binagbinagon nga may pangamuyo kag itudlo sa kada puluy-an:
“Indi balá nga ang ining puasa akon ginpili? ang pagpalos sang mga higot sang kalautan, ang pagkuha sang mabug-at nga mga palas-anon, kag ang paghilway sa mga ginpigos, kag ang pagbali ninyo sang tanan nga pagpang-ulipon?
“Indi balá ini ang magpaambit sang imo tinapay sa nagutoman, kag ang magdala sa imol nga ginsikway sa imo baláy? kon makit-an mo ang walâ sing panapton, nga siya bayuan mo; kag indi mo pagpanaguan ang kaugalingon mo nga unod?”4
Si Isaiah dayon naglista sang matahom nga mga bugay nga ginsaad sang Ginuo sa yadtong nagatuman sa layi sang pagpuasa. Siya nagasiling:
“Dayon ang kasanag mo magabutlak subong sa kaagahon, kag ang maayong lawas mo magatubo sing madasig: kag ang imo pagkamatarong magauna sa imo; ang himaya sang Ginuo mangin tagabantay mo sa likod.
“Dayon ikaw magatawag, kag ang Ginuo magasabat; ikaw magapangamuyo, kag siya magasiling, Yari ako. ...
“Kag kon ikaw maghalad sang imo kalag sa nagutuman, kag pahalipayon ang napiutan nga kalag; dayon ang imo kapawa magabangon sa di-pagkakilala, kag ang imo kadulom kasubong sang udto-adlaw:
“Kag ang Ginuo padayon nga magagiya sa imo, kag magbusog sang imo kalag sa kamala.”5
Parte sa sining kasulatan, si Presidente Harold B. Lee may yara nga ginsiling: “Ang mga bugay nga dalagku nga nagaabot [halin sa pagpuasa] ginpahayag sa kada dispensasyon, kag diri ang Ginuo nagasiling sa aton paagi sa sining bantog nga propeta kon ngaa may puasa, kag ang mga bugay nga nagaabot sa pagpuasa. ... Kon inyo usisaon … ang 58 nga kapitulo sang libro ni Isaiah masapwan ninyo nga ginpakita kon ngaa luyag sang Ginuo nga magbayad kita sang mga halad pagpuasa, kon ngaa luyag niya kita nga magpuasa. Ini bangud paagi sa pagkatakos, gani kita makatawag sa Ginuo, kag ang Ginuo magasabat. Makapangamuyo kita kag ang Ginuo magasiling, ’Yari ako.’”
Si Presidente Lee nagadugang: “May luyag gid balá kita nga mangin yara sa kahimtangan nga kon diin kita sarang magtawag kag indi siya magsabat? Magatawag kita sa aton pagkakagha kag siya indi mag-upod sa aton? Sa banta ko panahon na agud nga magbanabana kita parte sining mga naunang prinsipyo bangud ang mga ini amó ang mga adlaw nga malapit na, kon sa diin kinahanglan naton ang mas dugang nga mga pagpakamaayo sang Ginuo, kon ang mga paghukom igabubo nga wala sang simbog sa ibabaw sang kabilogan sang kalibutan.”6
Ang aton pinalangga nga propeta, si Presidente Thomas S. Monson, nagpaambit sang iya pagpamatuod parte sining mga prinsipyoisa ka pagpamatuod nga nagahalin sa kinaugalingon nga inagihan. Siling niya: “Wala sang miyembro sang Simbahan nga nagbulig sa paghatag sa yadtong mga nagakinahanglan ang nalipat gid ukon naghinulsol parte sa inagihan. Ang pagtrabaho, pagsupot, pagsalig-sa kaugalingon, kag pagpaambit sa iban indi bag-o sa aton.”7
Mga kauturan, ang mga miyembro sang Ang Simbahan ni JesuCristo sang Mga Santos sa Ulihing Mga Adlaw mga katawhan nga manughimo-sang-kasugtanan kag mga manugtuman-sang-sugo. Walâ ako sing madumdoman nga bisan ano nga layi, ukon sugo, nga kon tumanon sing himpit, mas madali nga sundon kag nagahatag sang mas dakung mga bugay sangsa layi sang pagpuasa. Kon kita magpuasa kag maghatag sang isa ka tampad nga halad pagpuasa, kita nagaamot sa bodega sang Ginuo sang kon ano man nga kontani nagasto sa bayad sang mga pagkaon. Ini wala nagapangayo sang sakripisyo nga kwarta sa kapin sang sa aton kontani nagasto sa kinaandan. Sa amó man nga tion, kita ginpromisahan sang labing pinasahi nga mga bugay, nga natalupangdan na.
Ang layi sang pagpuasa nagakadapat sa tanan nga mga miyembro sang Simbahan. Bisan ang diutay nga mga kabataan sarang matudloan sa pagpuasa, nagasugod sa isa ka pagkaon kag dayon duha, suno sa ikasarang nila sa paghangop kag lawasnon nga ikasarang nga magtuman sang layi sa pagpuasa. Ang mga magtiayon, solo nga mga miyembro, batan-on, kag mga kabataan dapat magsugod sa pagpuasa nga may pangamuyo, nagahatag sang pagpasalamat sa mga bugay sang ila mga kabuhi samtang nagapangita sa mga bugay sang Ginuo kag kabakod sa bug-os nga panahon sang pagpuasa. Ang lubos nga pagtuman sang layi sang pagpuasa nagakatabo kon ang halad sang pagpuasa ginhimo sa tiglawas sang Ginuo, ang bishop.
Mga bishop, kamó ang nagadumala sa kaayuhan sang inyo ward. May ara kamó sang diosnon nga mando agud pangitaon kag atipanon ang imol. Upod ang pagsakdag sang presidente sang Relief Society kag sang mga pinuno sa korum sang Melchizedek Preisthood, ang inyo kalab-uton amó ang magbulig sa mga miyembro nga buligan ang ila mga kaugalingon kag mangin makasalig-sa-kaugalingon. Kamó nagaalagad para sa kalibutanhon kag espirituhanon nga mga pagkinahanglan sang mga miyembro paagi sa mainandamón nga paggamit sang mga halad pagpuasa bilang umalagi nga sustento kag bilang dugang sa mga bulig sang paryente kag komunidad. Samtang ginagamit ninyo ang mga yabi sang priesthood nga may pangamuyo kag pinanilagan sa pagbulig sa imol kag nagakinahanglan, mahibal-an ninyo nga ang husto nga paggamit sang halad sang pagpuasa gintuyò agud magsakdag sang kabuhi, indi ang sahi sang pagpangabuhi.
Mga presidente sang mga korum sang Aaronic Priesthood, kamó nagahupot sang mga yabi kag may gahum sa pag-alagad sang mga ordinansa nga makit-an. Nagabuhat kamo upód sa bishop kag nagatulin sa mga miyembro sang korum parte sa ila mga katungdanan sa priesthood kag sa ila sa pagpangita sa mga miyembro sang Simbahan agud hatagan sang oportunidad sa pag-amot sa pagpuasa. Samtang kamo nga mga nagaangkon sang Aaronic Priesthood magpadaku kamo sang priesthood kag magpaambit sining oportunidad sa tanan nga mga miyembro sang Simbahan, masami ninyo nga ginapadali ang ginsaad nga mga bugay sang pagpuasa sa yadtong nagakinahanglan sini sang lubos. Masaksihan ninyo nga ang espiritu sang pag-atipan para sa imol kag nagakinahanglan may ara sang gahum sa pagpahumok sang ginpatig-a nga mga tagipusuon kag nagabugay sa mga kabuhi sang yadtong talagsahon lang nga nagasimba.
Si Presidente Monson nagasiling, “Yadtong mga bishop nga nagaorganisar sang ila mga korum sa Aaronic Priesthood sa pagpakigbuylog sa pagkolekta sang mga halad sang pagpuasa makasalapo sang nagadugang nga kadalag-an sa sining sagradong responsibilidad.”8
Mga bishop, dumdoma nga ang mga kahimtangan daku nga magkatuhay halin sa kada area padulong sa isa kag halin sa isa ka pungsod padulong sa isa ka pungsod. Ang pagduaw sa kada baláy sang mga miyembro sang Aaronic Priesthood quorum basi indi sarang nga gamiton sa rehiyon nga inyo ginapuy-an. Apang ginaagda namon kamó nga magpangamuyo kag binagbinagon ang laygay sang propeta kag magpangita sang inspirasyon parte sa nagakadapat nga mga paagi kon sa diin ang mga miyembro sang Aaronic Priesthood sa inyo mga ward sarang magpadaku sang ila priesthood paagi sa pagpakigbuylog sa pagkolekta sang mga halad sang pagpuasa.
Sa kapitulo 27 sang 3 Nephi, ang nabanhaw nga Ginuo nagpamangkot, “Ano nga sahi sang mga tawo kamó mangin dapat?” Siya nagsabat, “Bisan kasubong man sa akon.”9 Samtang ginabaton naton sa aton mga kaugalingon ang ngalan ni Cristo kag magtinguha sa pagsunod sa Iya, magabaton kita sang Iya dagway sa aton nawong kag mangin mas kasubong Niya. Ang pag-atipan sa imol kag nagakinahanglan duna sa pagpang-alagad sang Manluluwas. Ini ara sa tanan nga Iya ginahimo. Siya nagalab-ut sa tanan kag nagatib-ong sa aton. Ang Iya singkaw mahapos, kag ang Iya palas-anon mamag-an. Ginadapit ko ang kada isa sa aton nga mangin mas kasubong sa Manluluwas paagi sa pag-atipan sa imol kag sa nagakinahanglan, paagi sa himpit nga pagtuman sa layi sang pagpuasa, kag paagi sa pag-amot sing maalwan nga halad sang pagpuasa. Mapainumuron ako nga nagasaksi nga ang himpit nga pag-atipan sa imol kag nagakinahanglan isa ka pagpakita sang espirituhanon nga pagkahamtong kag magabugay nga may kapareho sa manughatag kag manugbaton. Sa sagrado nga ngalan ni JesuCristo, amen.