Pagbaton sang Pagpamatuod sang Ihibalo kag Kamatuoran

2014

18:9

Pagbaton sang Pagpamatuod sang Ihibalo kag Kamatuoran

Ni President Dieter F. Uchtdorf

Ikaduhang Manuglaygay sa Unang Pangulohan

Bilang piloto sang eroplano, naglupad ako sang madamo ka oras sa tabok sang mga kontinente kag mga kadagatan sa kaduluman sang gab-i. Sa pagtan-aw sa madulom nga kalangitan sa bintana sang akon cockpit, labi na gid sa Balatas ukon Milky Way, masami ako nagakatingala sa kalaparan kag kadadalman sang mga tinuga sang Diyosang ginalarawan sang balaan nga mga kasulatan nga “mga kalibutan nga indi maisip.”¹

Kubo slang sa isa ka gatos ka tuig nga ang kadamuan sa mga astronomo nagbanta nga ang Balatas nga galaksi amó lang ang galaksi sa sangatanan.² Sila nagbulubanta nga ang tanan nga nabutang lapaw sa aton galaksi isa lang malapad gid nga pagkawalâ, isa ka walay katapusan nga basiyowalay unod, matugnaw, kag kulang sa mga bitoon, kasanag, kag kabuhi.

Samtang ang mga teleskopyo nangin mas modernolakip ang mga teleskopyo nga puwede ipadala didto sa sangatananang mga astronomo nag-umpisa nga makahangop sang makatalanhaga, halos indi mahangpan nga kamatuoran: nga ang sangatanan nga nagapatingala sa isip nga mas daku pa sa kay sin-o man nga sang una naghunahuna, kag ang mga kalangitan punô sang indi maisip nga mga galaksi, indi mahunahuna ang kalayuon halin sa aton, nga ang kada isa nagalakip sang ginatos ka bilyones nga mga bitoon.³

Sa sulod sang malip-ot nga panahon, ang aton paghangop sang sangatanan nagbaylo sa katubtoban.

Subong makita naton ang iban nga malayo nga mga galaksi.⁴

Nahibal-an naton nga yara sila dira.

Yara sila dira sa madugay na nga panahon.

Pero bag-o ang katawhan maka-angkon sang mga kasangkapan nga tama ka makagalahum sa pagtingob sa langitnon nga kasanag kag magdala sining mga galaksi sa panan-awan, indi kitá nagpati nga ang tagsubong sina matabô.

Ang kalaparan sang sangatanan indi hinali lang nga nagba-go, apang ang aton abilidad nga makakità kag makahangop sining kamatuoran nagbag-o sing makakulunyag. Kag sa sina nga mas daku nga kasanag, ang katawhan ginpakilala sa mahimayaon nga mga panan-awon nga indi gid ginhunahuna sang una.

Mabudlay Para sa aton nga Magpati sa Indi Naton Makita

Pananglitan kamo sarang makabalik sa nagligad nga tiyempo kag magpakigsugilanon sa mga tawo nga nangabuhi sang isa ka libo ukon bisan pa isa ka gatos ka tuig nga nagligad. Hunahunaon ninyo ang paglarawan sa ila sang mga binag-o nga teknolohiya nga inyo kag akon ginabali-walâ subong. Halimbawa, ano ayhan ang ila isipon sa aton kon sila aton sugiran sang mga sugilanon tuhoy sa mga higante nga eroplano, mga pugon nga microwave, mga ginakaptan nga mga kagamitan nga nagaunod sang madamo gid nga mga libreriya-digital, kag mga bideyo sang aton mga apo nga gilayon aton maipaambit sa minilyon nga mga tawo sa bilog nga kalibutan?

Ang iban magpati sa aton. Ang kalabanan maglangolango, magsumpong, ukon bisan pa magpahipos ukon maghalit sa aton. Ang iban basi magtinguha nga maggamit sang pangatarungan, rason, kag mga kamatuoran nga ila nahibal-an agud magpakità nga kitá salâ, buang, kag gani delikado. Basi pamatbatan pa kitá nga nagapatalang sa iban.

Pero siyempre, ining mga tawo lubos nga nagkasalâ. Basi nga sila may maayo nga katuyuan kag sinsero. Basi sila nagabatyag sing lubos nga makatarungan sa ila isip. Pero sila simple nga indi maathag nga nakakità bangud sila indi pa nakabaton sang lubos nga kasanag kag kamatuoran.

Ang Promisa sang Kasanag

Daw kwalidad sang katawhan nga maghunahuna nga kitá salâ bisan pa nga kitá husto. Sa sinâ nga kahimtangan, ano nga paglaum ang yara sa sin-o man sa aton? Kitá balá magkabuhi nga indi makahibalo sang kamatuoran bangud may madamo nga nagabalangigay nga mga ideya kag kita magsalig lang sa aton mga ihibalo kag pagpati?

Sarang Balá Mahibal-an ang Kamatuoran?

Ang tuyò sang akon hambal amó ang pagbantala sang masadya nga mensahe sang Iya mismo Kaugalingon sang Diyos ang Ginuo sang mga Kasuldadohan nga nakahibalo sang tanan nga kamatuorannaghatag sa Iya katawhan sang panaad nga sila makahibalo sang kamatuoran para sa ila mga kaugalingon.

Kon mahimo hunahunaon ninyo ang dakung importansya sining promisa:

Ang Walay Katapusan kag Gamhanan nga Diyos, ang Tagtuga sining masyado ka malapad gid nga kalibutan, makighambal sa mga yadtong nagapalapit sa Iya sing may bunayag nga tagipusuon kag may matuodtuod nga tinutuyo.

Makighambal Siya sa ila sa mga damgo, mga palanan-awon, mga hunahuna, kag mga balayagon.

Maghambal Siya sa paagi nga indi gid masal-an kag lapaw pa sa tawhanon nga eksperyensya. Maghatag Siya sang balaan nga giya kag mga sabat sa ila personal nga mga kabuhi.

Siyempre, may mga yadtong magyaguta kag maghambal nga ang kasubong sina indi puwede, nga kon may Diyos, Siya may mas maayo pa nga mga dapat himuon sangsa magsabat sang pangamuyo sang isa ka tawo.

Pero ako nagahambal sa inyo sini: Ang Diyos nagapalangga sa inyo. Magpamati Siya kag magsabat sa inyo personal nga mga pamangkot. Ang mga sabat sa inyo mga pangamuyo mag-abot sa Iya lang paagi kag sa Iya lang tiyempo, kag gani, kinahanglan magtuon kamo sa pagpamati sa Iya tingog. Ang Diyos luyag nga kamo magbalik sa Iya, kag ang Ginuo amó ang dalan.⁵ Ang Diyos luyag nga kamo makahibalo sa Iya Anak, si JesuCristo, kag mag-eksperyensya sang tudok nga paghidaet kag kalipay nga nagahalin sa pagsunod sa dalan sang balaan nga pagkasumulunod.

Pinalangga ko nga mga kaabyanan, may yara nga daw tama ka matadlong eksperimento, nga may garantiya halin sa Diyos, nga makita sa dumaan nga balaan nga kasulatan, nga maangkon sang kada isa ka lalaki, babaye, kag batà nga handa magbuot sa pagtilaw sini:

Nahauna, dapat kamo magsiyasat sang pulong sang Diyos. Ina nagakahulugan nga magbasa kamo sang balaan nga mga kasulatan kag magtuon sang mga pulong sang mga dumaan subong man sa sining panahon nga mga propeta nahanungod sa ginpanumbalik nga ebanghelyo ni JesuCristoindi sa tuyò nga magduda ukon magsaway apang matuod-tuod nga maghangad nga inyo matukiban ang kamatuoran. Binagbinagon ang mga butang nga inyo mabatyagan, kag ihanda ang inyo mga hunahuna sa pagbaton sang kamatuoran.⁶ ”Bisan pa kon indi na kamo maglabaw sang sa maghandum sa pagpati, tuguti ini nga handum sa paghikut sa sulod ninyo ... nga mahatagan ninyo sang duog ang [pulong sang Diyos].”⁷

Ikaduha dapat ninyo hunahunaon, binagbinagon, magtinguha sa pagpati sing maisugon,⁸ kag magpasalamat kon daw ano ka maluluy-on ang Ginuo sa Iya kaanakan halin sa panahon ni Adan tubtob sa sining panahon naton paagi sa paghatag sang mga propeta, mga mananan-aw, kag mga manugbugna nga nagagiya sang Iya Simbahan kag nagabulig sa aton pagbalik sa Iya.

Ikatlo, dapat kamo magpangayo sa Langitnon nga Amay, sa ngalan sang Iya Anak, nga si JesuCristo, sa pagpakita sa inyo sang kamatuoran sang Ang Simbahan ni JesuCristo sang mga Santos sa Ulihing mga Adlaw. Magpamangkot kamo sing may mabunayag nga tagipusuon kag may matuodtuod nga tinutuyò, nga may pagtuo kay Cristo.⁹

May ara pa gid ngafourth nga paagi, nga ginhatag sa aton sang Manluluwas: “Ang bisan sin-o nga gusto magtuman sang kabubut-on [sang Diyos], makahibalo kon ining akon ginatudlo halin sa Diyos ukon akon-akon lang.”¹⁰ Kon sa aton pa, kon kamo nagatinguha nga magpamatuod sang kamatuoran sang mga prinsipyo sang ebanghelyo, una sa tanan dapat nga himuon ninyo ini. Tilawan ninyo ang doktrina sang ebanghelyo kag ang mga panudlo sang Simbahan sa inyo kaugalingon nga kabuhi. Himuon ninyo ini sing may matuodtuod nga tinutuyò kag sing may padayon nga pagtuo sa Diyos.

Kon himuon ninyo ining mga butang, kamo may pangako sa Diyosnga obligado sa Iya panaad¹¹—nga Siya magpakità sang kamatuoran sa inyo sa gahum sang Balaan nga Espiritu. Maghatag Siya sa inyo sang mas daku nga kasanag nga magtugot sa inyo nga makakita sa kadulom kag magsaksi sang indi mahunahuna nga mga mahimayaon nga palanan-awon nga labaw pa sa tawhanon nga panan-aw.

Ang iban magsiling nga ang mga paagi masyado kabudlay ukon indi takos sa kabudlay. Pero ako nagatugyan nga ining personal nga pagpamatuod sang ebanghelyo kag sang Simbahan isa ka pinakaimportante nga butang nga inyo maangkon sa sining kabuhi. Indi lamang nga ini magpaayo kag maggiya sa inyo sa sulod sining kabuhi, apang ini may direkta nga pagpakamaayo sa inyo kabuhi sa kabug-usan sang walay katapusan nga kinabuhi.

Ang Mga Butang sang Espiritu Mahangpan Lang sang Espiritu

Ang mga siyentipiko nabudlayan nga mahangpan and kadadalman sang kalibutan, tubtob nga ang mga kasangkapan nangin masanyog sa pagtipon sang ihibalo agud mahangpan ang mas kumpleto nga kamatuoran.

Ang Apostol nga si Pablo nagtudlo sang katulad nga prinsipyo tuhoy sa espirituhanon nga kaalam. “Ang tawo nga walâ sa iya ang Espiritu sang Diyos indi magbaton sang mga panudlo nga halin sa Espiritu sang Diyos,” siya nagsulat sa mga taga-Corinto, “tungod nga para sa iya kabuangan lang ini: kag indi niya ini mahangpan bangud ining mga butang mahangpan lang sang Espiritu sang Diyos.”¹²

Kon sa aton pa, kon luyag ninyo nga makilala ang espirituhanon nga kamatuoran, gamiton ninyo ang husto nga mga kasangkapan. Indi kamo makahangop sang espirituhanon nga kamatuoran paagi sa mga kasangkapan nga indi makakilala sini.

Ang Ginuo nagsiling sa aton sa sining panahon, “Ang ina nga tuhoy sa Diyos isa ka kasanag; kag ang sin-o man nga nagabaton sang kasanag kag nagapadayon sa Diyos, nagabaton sang mas daku pa nga kasanag; kag inang kasanag nagasanag nga nagasanag tubtob sa himpit nga adlaw.”¹³

Ang labi nga pagsunod sang aton tagipusuon kag mga hunahuna sa Diyos, labi nga ang langitnon nga kasanag magtinlo sa aton mga kalag. Kag kada tiyempo nga buót kitá kag maukod nga nagapangità sang kasanang, nagapakità kitá sa Diyos nga kitá handa nga magbaton sang daku pa nga kasanag. Amát-amát, ang mga butang nga sang una daw malubog, madulom, kag malayo mangin matin-aw, masanag, kag malapit sa aton.

Dundumon, kon aton ibulág ang aton mga kaugalingon sa kasanag sang ebanghelyo, ang aton mismo kasanag mag-umpisa nga magdulomindi sa isa ka adlaw ukon isa ka gab-i apang amat-amat sa padayon nga panahontubtob nga kitá magbalikid kag daw indi makahangop kon ayhan ngaa kitá nagpati nga ang ebanghelyo matuod. Ang aton ihibalo sang una daw sa kabuangan para sa aton bangud and anuman nga masyado kaathag sang una liwat nga nangin malubog, maburon, kag malayo.

Ini amó kon ngaa nga si Pablo nagpamilit nga ang mensahe sang ebanghelyo kabuangan sa yadtong mga nagakalawalâ, “apang sa [mga yadtong] nagakalaluwas ini isa ka gahum sang Diyos.”¹⁴

Walâ sang Testing sa Litmos

Ang Simbahan ni JesuCristo sang mga Santos sa Ulihing mga Adlaw isa ka lugar para sa mga tawo nga may sari-sari nga mga pagpamatuod. May yara nga mga katapo sang Simbahan nga ang pagpamatuod segurado kag nagabanaag sing masyado sa ila tagipusuon. Ang iban naman nagatinguha pa lang nga makahibalo para sa ila mga kaugalingon. Ang Simbahan isa ka puluy-an para sa tanan nga ululupod nga magtambong, bisan ano pa ang kadalom ukon kataas sang aton pagpamatuod. Indi ako nakahibalo sang isa ka pasayod sa mga ganhaan sang aton mga balay-mitingan nga nagasiling, “Ang inyo pagpamatuod dapat nga pareho sini kataas para kamo makasulod.”

Ang Simbahan indi lamang para sa mga himpit nga mga tawo apang para sa tanan nga “magpalapit kay Cristo, kag mangin himpit para sa Iya.”¹⁵ Ang Simbahan isa nga para sa mga tawo katulad sa imo kag sa akon. Ang Simbahan isa ka lugar nga nagaabi-abi kag nagasapupo, indi nagabulag kag nagasaway. Ini isa ka lugar nga nagakab-ot para maghatag sang kaisog, magtib-ong, kag magsakdag sa isa kag isa samtang kitá nagasunod sang aton kinaiya nga pagpangita sang balaan nga kamatuoran.

Sa katapusan, kitá tanan mga biyahero sa lugar sang mga Santos nga nagapangita sang ihibalo sang Diyos samtang nagapanakayon sa dalan sang pagkasumulunod. Indi kitá nagasilot sa iban sa kantidad sang ihibalo nga yara ukon walâ sa ila; Sa tigaylo, kitá nagasustento kag nagapabaskog sang tanan nga ihibalo tubtob nga ini dugangan nga maathag, masanag, kag matuod.

Isa Ka Pangako sa Tanan

Dapat naton kilalahon nga masunson ang pag-angkon sang pagpamatuod indi isa ka buluhaton sang isa ka minuto, isa ka oras, ukon isa ka adlaw. Indi ini isa kon kaisa kag tapos na. Ang paagi sa pagtipon sang espirituhanon nga kasanag isa ka pagpangita sang bilog nga kinabuhi.

Ang inyo pagpamatuod sa nagakabuhi nga Anak sang Diyos kag sa Iya Ginpanumbalik nga Simbahan, Ang Simbahan ni JesuCristo sang mga Santos sa Ulihing mga Adlaw, basi indi madali nga mag-abot sa inyo luyag, pero ako nagapangako sa inyo sini: kon himuon ninyo ang inyo bahin, maabot ini.

Kag ini mangin mahimayaon.

Ako nagahalad sang akon personal nga pagpamatuod nga ang espirituhanon nga kamatuoran magpunô sang inyo tagipusuon kag magdala sang kasanag sa inyo espiritu. Ini magbugna sa inyo sang kaalam nga putli nga may makatalanhaga nga kasadya kag langitnon nga paghidaet. Naagman ko ini sa akon kaugalingon paagi sa gahum sang Balaan nga Espiritu.

Katulad sa ginapangako sang dumaan nga mga kasulatan, ang indi mamitlang nga pagtambong sang Espiritu sang Diyos magpaamba sa inyo sang ambahanon sang pangtubos nga pagpalangga,¹⁶ mag-alsa sang inyo mga mata sa langit, kag magpataas sang inyo tingog sa pagdayaw sa Pinakamataas nga Diyos, ang inyo Pasilungan, ang inyo Paglaum, ang inyo Manug-apin, ang inyo Amay. Ang Manluluwas nagpangako nga kon kamo magpangita, kamo makakità.¹⁷

Ako nagasaksi nga ini matuod. Kon kamo magpangità sang kamatuoran sang Diyos, nga sa subong daw madulom, indi nasentro, kag malayo mangin amat-amat nga ipahibalo, kag ipaathag, kag mangin malapit sa inyo tagipusuon paagi sa kasanag sang grasya sang Diyos. Mga mahimayaon nga mga palanan-awon, nga indi mahunahuna sang tawhanon nga mga mata, ibugna sa inyo.

Ini ang akon pagpamatuod nga ining espirituhanon nga kasanag maangkon sang kada isa ka anak sang Diyos. Ini magpasanag sa inyo hunahuna kag magdala sang kaayo sa inyo tagipusuon, kag kasadya sa inyo adlaw nga tanan. Akon mahal nga mga abyan, kabay nga indi kamo mag-awat sang tinion nga magpangità kag magpabakod sang inyo personal nga pagpamatuod sang balaan nga buluhaton sang Diyos, bisan pa ang buluhaton sang kasanag kag kamatuoran.

Ang inyo personal nga pagpamatuod sang ihibalo kag kamatuoran indi lamang nga magbugay sa inyo kag sa inyo mga kaliwatan diri sa mortalidad, apang ini mag-upód man sa inyo sa kabug-usan sang walay katapusan nga kabuhi, sa mga kalibutan nga walay katapusan. Sa sini ako nagapamatuod kag nagabilin ako sa inyo sang akon pagpakamaayo sa ngalan ni JesuCristo, amen.