Ang Priesthood Sang Paghanda

Ni President Henry B. Eyring

Unang Manuglaygay sa Unang Pangulohan

Sa paghanda sa priesthood, ”ipakita mo sa akon” mas labi pa sang sa ”ihambal mo sa akon.”

Nagapasalamat ako sa pagtililipon kaupod sang mga priesthood sang Diyos, nga sa sining gab-i nakalab-ot sa bilog nga kalibutan. Ako nagapasalamat sa inyo pagtuo, sa inyo pag-alagad, kag sa inyo mga pangamuyo.

Ang akon mensahe sa sining gab-i nahanungod sa Aaronic Priesthood. Ini para sa tanan sa aton nga nagabulig sa pagtuman sang mga pangako sang Ginuo sa yadtong mga nagakapot sang ginatawag sa balaan nga kasulatan nga amó ang ”kubos nga priesthood.”¹ Ini ginatawag man nga priesthood sang paghanda. Amó ining mahimayaon nga paghanda ang akon pagahambalan sining gab-i.

Ang plano sang Ginuo para sa Iya buluhaton punô sang paghanda. Siya naghanda sang kalibutan para sa aton nga makaeksperyensya ang mga pagtilaw kag mga kahigayunan sang mortalidad. Samtang diri kitá, yara kitá sa ginatawag sang balaan nga mga kasulatan nga isa ka ”kahimtangan sa paghanda.”²

Ang propeta nga si Alma naglarawan sang importante nga kahulugan sinang paghanda para sa walay katapusan nga kabuhi, nga sa diin kitá magkabuhi sa katubtuban sa mga panimalay kaupod ang Diyos nga Amay kag ni JesuCristo.

Siya nagpaathag sang kinahanglanon sa paghanda sa sining paagi: ”Kag makità naton nga ang kamatayon nagaabot sa tawo, huo, ang kamatayon nga ginhambal ni Amulek, nga amó ang umalagi nga kamatayon; walay sapayan sini may isa ka panahon nga gintugot nga sa diin mahimo siya nga maghinulsol; gani ining kabuhi nagin isa ka kahimtangan sang pagtilaw; isa ka tion sa paghanda sa pag-atubang sa Diyos; isa ka tion sa paghanda para sa sinang nagapadayon nga kahimtangan nga amon ginahambal nga nagasunod sa pagkabanhaw sang mga minatay.”³

Katulad nga ang ginhatag nga tion sa aton nga magkabuhi sa mortalidad amó ang paghanda sa pag-atubang sa Diyos, ang tion nga ginahatag sa aton nga mag-alagad sa Aaronic Priesthood isa ka kahigayunan sa paghanda sa aton sa pagtuon kon paano maghatag sang importante nga bulig sa iban. Katulad nga ang Ginuo nagahatag sa aton sang bulig nga kinahanglanon nga makapasar sa mga pagtilaw sa mortalidad nga kabuhi, Siya nagahatag man sang bulig sa aton paghanda sa priesthood.

Ang akon mensahe para sa yadtong ginapadala sang Ginuo nga magbulig sa paghanda sang Aaronic Priesthood, kasubong man sapagbulig sa yadtong nagakapot na sang Aaronic Priesthood. Ako nagahambal sa mga amay. Ako nagahambal sa mga bishop. Kag ako nagahambal sa yadtong mga Melchizedek Priesthood nga ginasaligan nga mangin mga kaupod kag mga manunudlo sang lamharon nga mga lalaki nga yara sa paghanda sa priesthood.

Ako nagahambal sing may pagdayaw kag pagpasalamat sa madamo sa inyo sa bilog nga kalibutan kag sa mga magapamati sa ulihi.

Ako mangin mapatinumbayaon kon indi ako magsugilanon tuhoy sa branch president kag bishop sang akon pagkalamharon. Ako nangin isa ka diyakono sa edad nga 12 sa diutay nga branch sa sidlangan nga bahin sang Estados Unidos. Ang branch diutay gid kaayo gani ako lang kag ang akon magulang nga lalaki ang nagkapot sang Aaronic Priesthood tubtob nga ang akon amay, nga branch president, nag-imbita sang isa ka hamtong nga lalaki nga mag-ugyon sa Simbahan.

Ang bag-o nga kinabig nagbaton sang Aaronic Priesthood kag, upód sini, ang panawag nga magdumala sa Aaronic Priesthood. Sa gihapon nadumduman ko ini nga daw kahapon lamang. Nadumduman ko ang matahum nga mga dahon sang autumn samtang inang bag-o nga kinabig nag-upod sa akon kag sa akon utod nga magbulig sa biyuda. Indi ko madumduman kon ano ang proyekto, apang madumduman ko ang balatyagon nga ang gahum sang priesthood nagaangot sa paghimo sang akon sa ulihi nahangpan ang ginsiling sang Ginuo nga dapat naton tanan himuon agud mapatawad ang aton mga salâ kag gani makahanda nga makità Siya.

Samtang ako nagapanundom subong, nagapasalamat ako sa branch president nga nagtawag sa bag-o nga kinabig sa pagbulig sa Ginuo nga maghanda sa duha ka batang lalaki nga gali sa ulihi mangin mga bishop nga nagsapupo sa mga imol kag sa mga nagkinahanglanon kag nagpangulo man sa priesthood sang paghanda.

Ako isa ka diyakono pa sang ang amon panimalay nagsaylo sa daku nga Ward sa Utah. Yadto una nga tion nga akon nabatyagan ang bug-os nga gahum sa korum sang Aaronic Priesthood. Sa katunayan, una nga tion yadto nga nakità ko ang isa. Kag sang ulihi yadto ang una nga tion nga ako nagbatyag sang gahum kag bugay sang isa ka bishop nga nagapangulo sang korum sang mga pari.

Ang bishop nagtawag sa akon nga mangin unang asistant sang korum sang mga pari. Nadumduman ko nga siya mismo ang nagtudlo sa korumbisan pa nga siya masako, may iban pa nga may kinaadman nga mga tawo nga puwede niya tawgon nga magtudlo. Iya ginplastar nga sirkular ang mga siya sa kuwarto. Ginpapungko niya ako sa iya tupad, sa iya tuo.

Makakità ako sa ibabaw sang iya abaga samtang siya nagatudlo. Nagtulok siya kon kaisa sa iya mahalungon nga ginmakinilya nga sinulat sa diutay nga panit nga polder sa iya sa isa niya ka tuhod kag sa natata kag markado nga balaan nga mga kasulatan nga iya ginbuksan sa pihak nga tuhod. Nadumduman ko ang iya kakunyag samtang nagsaysay siya sang mga istorya sang kaisog sa libro ni Daniel kag sang iya pagpamatuod sa Manluluwas, ang Ginuong JesuCristo.

Padayon ko nga madumduman kon paano ang Ginuo nagatawag sing mahinalungon sang mga kaupod nga ginpili para sa iya mga tagkapot sang priesthood nga yara sa paghanda.

Ang akon bishop may gamhanan nga mga manuglaygay, kag sa mga rason nga indi ko nahangpan sadto, sobra sa isa ka bes gintawag niya ako sa balay kag nagsiling, ”Hal, kinahanglan ko ikaw nga mag-upód sa akon sa paghimo sang mga pagbisita.” Sang isa ka bes, gindala niya ako sa puluy-an sang isa ka biyuda nga nagaisahanon kag walâ sing pagkaon. Sang amon pagpauli ginpara niya ang iya kotse, ginbuksan ang iya balaan nga mga kasulatan, kag ginsilingan ako kon ngaa gintrato niya ang biyuda nga siya daw may gahum nga indi lang sa pagtatap sa iya kaugalingon apang sa palaabuton, makabulig sa iban.

Ang isa pa ka pagbisita natumod sa isa ka tawo nga madugay na nga indi nagtambong sa Simbahan. Ang akon bishop nag-imbita sa iya nga magbalik sa pag-ugyon sa mga Santos. Nabatyagan ko ang iya pagpalangga sa isa nga sa akon daw isa ka mabudlay palanggaon kag rebelde nga kaaway.

Sa isa pa gid ka okasyon nagbisita kami sa puluy-an nga sa diin duha ka diutay nga babaying batà ginpadala sang ila palahubog nga ginikanan nga magsugata sa amon sa puwertahan. Ang diutay nga mga batà nagsiling sa amon paagi sa screen sang puwertahan nga ang ila iloy kag amay nagakatulog. Ang bishop padayon nga nakighambal sa ila, nagyuhom kag nagdayaw sang ila kaayo kag sang ila kaisog, nga sa akon hunahuna daw sa may kadugayan sang10 minutos ukon sobra pa. Samtang ako nagpalayô upôd sa iya luyo, siya nagsiling sing mahinay, ”Yadto maayo nga pagbisita. Indi gid malipatan sadtong mga diutay nga batà nga kitá nagbisita.”

Ang duha ka mga bugay nga mahatag sang may eksperyensya nga kaupod sa priesthood amó ang pagsalig kag isa ka ehemplo sang pagpalangga. Nakità ko ina sang ang akon anak nga lalaki ginhatagan sang kaupod sa home teaching sang isa nga may madamo nga eksperyensya sa priesthood sang sa iya. Ang iya kaupod nangin presidente sang misyon duha ka beses kag nag-alagad sa iban pa nga mga katungdanan sa pagdumala.

Bag-o sila magbisita sa isa sa ila alatipanon nga mga panimalay, inang may kinaadman nga lider sang priesthood nagpangabay nga magbisita anay sa akon anak nga lalaki sa amon puluy-an. Gintugutan nila ako nga mamati. Ang may eksperyensya nga kaupod nag-umpisa sang pangamuyo, nga nagpangayo sang bulig. Pagkatapos nagsiling siya sang daw subong sini sa akon anak: ”Nagahunahuna ako nga dapat kitá magtudlo sang leksyon nga kon pamatian daw nahanungod sa paghinulsol. Nagahunahuna ako nga labing maayo nga batunon nila ining mensahe halin sa imo sang sa akon. Ano ang imo nabatyagan parte sina?”

Nadumduman ko ang kahadlok sa mga mata sang akon anak. Daw nabatyagan ko sa gihapon ang kalipay sang sinang tion sang ang akon anak nagbaton sang pagsalig.

Indi yadto aksidente nga ang bishop naghimo sinang pag-updanay. Yadto may mahalungon nga paghanda nga ang may eksperyensya nga kaupod nakahangop sang mga balatyagon sang panimalay nga ila pagatudloan. Yadto may inspirasyon nga iya nabatyagan nga siya mag-isol, nga magsalig sa isa ka di-eksperyensiyado nga batan-on sa pagtawag sa may edad nga mga anak sang Diyos sa paghinulsol kag sa kahilwayan.

Indi ko nahibal-an ang bunga sang ila pagbisita, apang nahibal-an ko gid nga ang isa ka bishop, isa ka nagakapot sang Melchizedek Priesthood, kag ang Ginuo naghanda sa isa ka batang lalaki nga mangin lalaki sang priesthood kag sa pila adlaw mangin isa ka bishop.

Karon, inang mga sugilanon sang pagkamadinalag-on sa paghanda sa priesthood nahangpan ninyo halin sa inyo nakità kag sa ano man nga inyo naagihan sa inyo mga kabuhi. Nahibal-an ninyo kag kamo nangin mga bishop, mga kaupod, kag mga ginikanan. Nakità ninyo ang pagbulig sang Ginuo sa inyo paghanda para sa mga katungdanan sang priesthood nga Iya nahibal-an nga nabutang sa inyo atubang.

Ang tagsa sa aton sa priesthood may obligasyon sa pagbulig sa Ginuo nga maghanda sang iban. May yara nga mga butang nga mahimo naton nga pinakaimportante sa tanan. Bisan labi pa nga gamhanan sang sa paggamit sang mga pulong sa aton panudlo sang doktrina amó ang aton mga ehemplo sa pagsunod sa mga doktrina.

Ang importante gid sa aton pag-alagad sa priesthood amó ang pag-imbita sa mga tawo nga magpalapit kay Cristo paagi sa pagtuo, paghinulsol, pagpabunyag, kag pagbaton sang Balaan nga Espiritu. Halimbawa, si Presidente Thomas S. Monson naghatag sang mga wali nga tudok nga nagtandog sa tagipusuon nahanungod sa yadtong mga doktrina. Pero ang akon nahibal-an sang iya ginhimo sa mga tawo kag mga misyonero kag mga kaabyanan sang Simbahan sang siya nagapangulo sa misyon sa Toronto nagpahulag sa akon sa paghimo.

Sa paghanda sa priesthood, ”ipakita mo sa akon” labi pa sang sa ”ihambal mo sa akon.”

Gani ini kon ngaa ang balaan nga mga kasulatan masyado gid ka importante sa paghanda sa aton sa priesthood. Sila punô sang mga ehemplo. Nabatyagan ko nga daw makità ko si Alma nga nagasunod sa sugo sang anghel kag pagkatapos siya nagbalik sing dali-dali sa pagtudlo sa mga malaut nga mga tawo ni Ammonihah nga nagsikway sa iya.⁴ Nabatyagan ko ang katugnaw sang sulod-bilangguan sang si Joseph Smith ginhambalan sang Diyos nga magpakaisog kag siya bantayan.”⁵ Kaupod sang yadtong larawan sang balaan nga mga kasulatan sa isip, kitá makahanda nga magpadayon sa aton pag-alagad kon ini daw mabudlay.

Ang isa ka amay ukon isa ka bishop ukon isa ka may edad na nga kaupod sa home teaching nga nagapakità nga siya nagasalig sa isa ka lamharon nga tagkapot sang priesthood makapabaylo sang iya kabuhi. Ang akon amay sang isa ka bes ginpangabay sang isa ka miyembro sang Korum sang Napulogduha nga magsulat sang malip-ot nga sinulat nahanungod sa siyensya kag relihiyon. Ang akon amay isa ka bantug nga siyentipiko kag isa ka matinuohon nga tagkapot sang priesthood. Apang madumduman ko gihapon ang tion nga ginhatag niya sa akon ang iya sinulat kag nagsiling. ”Ari, bag-o ko ini ipadala sa Korum sang Napulogduha, luyag ko nga basahon mo ini. Mahibal-an mo kon balá ini matuod.” Siya 32 ka tuig nga gulang sa akon kag di-maisip nga labing maalam kag may kinaadman.

Ako ginapabakod gihapon sinang pagsalig halin sa maayo nga amay kag lalaki sang priesthood. Nahibal-an ko nga ang iya pagsalig walâ sa akon kundi nga ang Diyos makahambal kag maghambal sa akon kon ano ang matuod. Kamo nga may kinaadman nga mga kaupod makapaayo sa mga lamharon nga tagkapot sang priesthood sa paghanda kon san-o man nga mapakità sa iya inang sari sang pagsalig. Ini magbulig sa iya nga magsalig sa malulo nga balatyagon kon ini mag-abot samtang siya sa palaabuton magdapat sang iya mga kamot sa pag-selyo sang bugay nga magpaayo sa isa ka batà nga suno sa mga doktor mapatay. Inang pagsalig nagbulig sa akon sa madamo nga mga tion.

Ang aton pagakamadinalag-on sa paghanda sa iban sa priesthood mag-abot nga nagakabagay sa kon daw ano ang aton pagpalangga sa ila. Ina labi na gid nga matuod kon kitá dapat nga magtadlong sa ila. Panumduma ang isa ka tion kon ang tagkapot sang Aaronic priesthood, basi sa latok sang sakramento, nakahimo sang sayop sa paghimo sang ordinansa. Ina isa ka seryoso nga bagay. Kon kaisa ang sayop nagakinahanglan sang pangpubliko nga panadlong nga may posibilidad sang pagsunggod, isa ka balatyagon sang pagkahuya ukon basi pa ang pagsikway.

Panumdumon ninyo ang laygay sang Ginuo: ”Pagsaway sing maabtik nga may kasakít, kon ginatandog sang Balaan nga Espiritu; kag pagkatapos magpakità sugod karon sang nagadugang nga paghigugma sa iya nga imo ginsaway, kay basi magtamod siya sa imo nga ikaw iya kaaway.”⁶

Ang tinaga nga nagadugang may kinatuhay nga kahulugan sa paghanda sa mga tagkapot sang priesthood kon sila nagakinahanglan sang panadlong. Ang tinaga nagatugyan sang dugang nga pagpalangga nga ara na dira. Ang ”pagpakità sugod karon” amó ang nahanungod sa pagdugang. Ang yadtong iban sa inyo nga nagahanda sa tagkapot sang priesthood segurado nga makakità sa ila nga maghimo sang mga kasaypanan. Bag-o sila magbaton sang inyo pagpanadlong, dapat anay sila magbatyag sang inyo pagpalangga sa una kag sa padayon. Dapat sila magbatyag sang inyo tampad nga pagdayaw bag-o sila magbaton sang inyo pagpanadlong.

Ang Ginuo mismo nagatamod sa yadtong nagakapot sang kubos nga priesthood nga nagapadungog sang ila ikasarang kag nagapalangga sa Iya. Pamatii ninyo ining mga pulong, nga ginhambal ni Juan nga Bawtista sang ang Aaronic Priesthood ginpanumbalik: ”Dira sa inyo mga ka-alagad ko, sa ngalan sang Mesiya akon ginatugyan ang Priesthood ni Aaron, nga nagauyat sang mga yabi sang pag-alagad sang mga anghel, kag sang ebanghelyo sang paghinulsol, kag sang pagbunyag paagi sa pagtugmaw para sa kabayaran sang mga salâ; kag ini indi gid pagkuhaon liwat sa kalibutan, tubtob nga ang mga lalaking anak ni Levi maghalad liwat sang sakripisyo para sa Ginuo sa katarungan.”⁷

Ang Aaronic Priesthood isa ka dugang nga angot sa labing daku nga Melchizedek Priesthood.⁸ Bilang presidente sang tanan nga priesthood, ang Presidente sang Simbahan nagapangulo man sa priesthood sang paghanda. Ang iya mga mensahe sa sulod sang madamo nga tinuig nga magkadto sa pagtabang nagakaigô sing himpit sa sugo nga dalhon ang ebanghelyo sang paghinulsol kag pagbunyag sa mga kabuhi sang iban.

Ang mga Korum sang mga diyakono, mga manunudlo, kag mga pari padayon nga nagapakiglaygayanay sa pagpalapit sa kada miyembro sang korum sa Ginuo. Ang mga pangulohan nagatugyan sa mga miyembro nga mag-alagad sa pagtuo kag paghigugma. Ang mga diyakono nagapaambit sang sakramento nga may pagtahod kag may pagtuo nga ang mga miyembro makabatyag sang bugay sang Pagpsag-uli kag magpamat-od nga magtuman sang mga kasuguan samtang sila nagaambit sang yadtong sagrado nga mga emblema.

Ang mga manunudlo kag mga pari nagapangamuyo upód sa ila mga kaupod nga magtuman sang katungdanan nga magbantay sa Simbahan, tawo sa tawo. Kag ang yadtong mga pag-updanay ululupod nga nagapangamuyo samtang sila nakahibalo sang kinahanglanon kag mga handum sang mga pinunò sang mga panimalay. Samtang ginahimo nila ini, sila ginahanda para sa importante nga adlaw kon sila magpangulo bilang isa ka amay, sa pagtuo, sa ila mismo mga panimalay.

Ako nagapamatuod nga ang tanan nga nagaalagad nga ululupod sa priesthood nagahanda sa mga tawo para sa pagkari sang Ginuo sa Iya Simbahan. Ang Diyos nga Amay buhi. Nahibal-an konahibal-an konga si Jesus amó ang Cristo kag Siya nagapalangga sa aton. Si Presidente Thomas S. Monson amó ang buhi nga propeta sang Ginuo. Ako nagapamatuod gid sa ngalan ni JesuCristo, amen.