Pag-abi-abi sa Konperensya

Ni President Thomas S. Monson

Samtang kitá nagapamati, kabay pa nga ang aton mga tagipusuon matandog kag ang aton pagtuo madugangan.

Mga kauturan, daw ano ako ka malipayon sa pag-abi-abi sa inyo sa sining pangkalibutanhon nga konperensya. Nagtililipon kita nga ululupod sa mga lokasyon sa palibot sang kalibutan agud magpamati kag magtuon halin sa mga kauturan nga ginsakdag naton bilang mga General Authority kag kabilogan nga mga opisyal sang Simbahan. Ginpangita nila ang bulig sang langit nahanungod sa ila mga mensahe nga igahatag, kag nabatyagan nila ang inspirasyon parte sa kon ano ang igapamulong nila.

Ining konperensya nagamarka sang ika-nobenta nga anibersaryo sang pagwaragwag sa radyo sang kabilogan nga konperensya. Sang Oktubre nga konperensya sang 1924, ang mga sesyon ginwaragwag sa radyo sa unang higayon paagi sa ginpanag-iyahan sang Simbahan nga KSL. Ining konperensya nagamarka man sang ika-65 nga anibersaryo sang telebisyon nga pagwaragwag sang konperensya. Sa kabilogan nga konperensya nga ginhiwat sang Oktubre 1949, ang mga sesyon una nga gintelebisyon sa bug-os nga Salt Lake areya paagi sa KSL telebisyon.

Ginapasalamatan namon ang mga bugay sang moderno nga media sa pagtugot sang minilyon ka mga miyembro sang Simbahan nga magtan-aw ukon magpamati sa kabilogan nga konperensya. Ang mga sesyon sining katapusan sang simana ginawaragwag paagi sa telebisyon, radyo, cable, satellite transmission, kag sa Internet, kalakip ang mobile nga mga gamit.

Sa nagligad nga anum ka bulan halin nga kita ulihing nagkita, isa ka bag-o nga templo ang gindedikar kag isa ang liwat nga gindedikar. Sang Mayo si Presidente Dieter F. Uchtdorf Uchtdorf nagdedikar sang Fort Lauderdale Florida Temple. Isa ka matahom nga pagsaulog pangkultura ang ginhimo sang mga batan-on isa ka adlaw antes sa pagdedikar. Sang masunod nga Domingo, Mayo 4, ang templo gindedikar sa tatlo ka mga sesyon.

Duha pa lang ka simana nga nagligad, ako may pribilihiyo sa pagdedikar liwat sang Ogden Utah Temple, nga unang gindedikar sang 1972 ni Presidente Joseph Fielding Smith. Isa ka dakung pagsaulog pangkultura ang natabo isa ka adlaw antes sang pagdedikar liwat, nga may tuman ka madamo nga mga batan-on ang nagpakigbuylog nga duha ka magkatuhay nga pagpresentar ang ginhimo, nga ang kada isa may tuhay nga hubon sang gumuluwa. Sa kabilogan, 16,000 ka mga batan-on ang nagpakigbuylog. Ang pagdedikar liwat nga pagpang-alagad natabo sang masunod nga adlaw, upod ang madamo nga Brethren nga nagpartisipar, kaupod ang mga babaye nga mga pinuno sang auxiliary kag ang presidente sang templo, ang iya mga manuglaygay, kag ang ila mga asawa.

Ang pagtukod naton sang bilding sang templo nagapadayon nga madasig. Sa sunod nga bulan ang bag-o nga Phoenix Arizona Temple igadedikar, kag sa masunod nga tuig, sa 2015, ginalauman ang pagdedikar ukon pagdedikar liwat seguro sa pinakadiutay lima ka mga templo, ukon sang mas madamo pa, depende kon sila matapos.

Subong sa ginhambal ko sang Abril, kon ang tanan nga naanunsyo na nga mga templo matukod kag madedikar, may ara kita sang 170 ka nagaobra nga mga templo sa bug-os nga kalibutan. Bangud ginatumod namon ang amon mga pagtinguha sa pagtapos sang mga templo nga naanunsyo na, indi kami sa subong nga panahon mag-anunsyo sang bisan ano nga bag-o nga mga templo. Apang, sa palaabuton, samtang nga makit-an namon ang mga pagkinahanglan kag makapangita sang mga lugar, ang mga pag-anunsyo sang dugang nga mga templo pagabuhaton.

Ang Simbahan padayon nga nagadaku. Kapin na kita karon sa 15 milyones ka mabakod kag nagadugang sa mga kadamuon. Ang pangmisyonero naton nga mga pagtinguha nagapasulong nga wala sang sablag. May ara kita sang kapin sa 88 ka milyones nga mga misyonero nga nagaalagad, nagapaambit sang mensahe sang ebanghelyo sa bug-os nga kalibutan. Ginapamatud-an namon liwat nga ang buluhaton nga misyonero isa ka katungdanan sa priesthood, kag ginabuyok namon ang tanan nga takos kag makasarang nga batan-on nga mga lalaki sa pag-alagad. Ginapasalamatan gid naton ang mga batan-on nga mga babaye nga nagaalagad man. Nagahatag sila sang importanteng bulig, bisan nga sila wala sa idalom sang sugo subong sang ginahatag sa batan-on nga mga lalaki.

Karon ginadapit ko kamo nga maghatag sang inyo paglalupangod sa mga brethren kag sister nga magapartisipar karon nga adlaw kag sa buas sa aton mga sesyon sang konperensya. Ang tanan nga ginpangabay sa pagpamulong nakabatyag sang dakung responsibilidad sa paghimo sini. Samtang nagapamati kita, kabay nga ang aton mga tagipusuon matandog kag ang aton pagtuo madugangan, may pagpakubos nga ginapangamuyo ko sa ngalan ni JesuCristo, amen.