Ang Katarungan sang Aton Paglaum

Ni Presidente Boyd K. Packer

Presidente sang Korum sang Napulogduha ka mga Apostoles

Ang isa ka pagpamatuod sang paglaum sang pagtubos isa ka butang nga indi matakos ukon maisip. Si JesuCristo ang ginahalinan sinang paglaum.

Sang nagligad nga tinuig, si Sister Packer kag akó nagkadto sa Oxford University. Nagpangita kami sang rekord sang akon lolo-sa-tuhod. Ang pangulo sang Christ’s College sa Oxford, si Dr. Poppelwell, maayo man nga nagpangabay sa arkibista sang kolehiyo nga magdala sang mga rekord sa amon. Didto sa tuig nga 1583 nakit-an namon ang ngalan sang akon kaliwat, si John Packer.

Sang masunod nga tuig nagbalik kami sa Oxford sa pagdulot sang matahom nga set sang salandigan sang balaan nga mga kasulatan sang Simbahan para sa libreriya sang Christ’s College. Daw diutay nga masaw-a para kay Dr. Poppelwell. Basi siya naghunahuna nga indi kami mga Kristiyano. Gani, gintawag niya ang kapilyan sang kolehiyo nga magbaton sang mga libro.

Bag-o ko ginhatag sa kapilyan ang mga kasulatan, ginbuksan ko ang Giya sa Topiko kag ginpakità ko sa iya ang isa ka tulun-an: 18 ka pahina, tama ka pino nga imprinta, isa lang ang angkat, listahan sang mga reperensya sa tema nga ”JesuCristo.” Ini isa ka pinakakumpleto nga hinugpong nga mga balasahon sang reperensya sa balaan nga mga kasulatan sa tema tuhoy sa Manluluwas nga tubtob kon san- o gintipon sa maragtas sang kalibutanisa ka saksi sa Dumaan kag Bag-o nga mga Testamento, sa Libro ni Mormon, sa Doktrina kag Mga Katipan, kag sa Perlas nga Bilidhon.

”Bisan ano ang pagsunod mo sa sining mga reperensya, ”ang siling ko sa iya, ”patakilid, pataas kag paidalum, palibro-libro, patema-temamakità mo nga sila isa ka naunay, nagasantuanay nga saksi sa balaan nga misyon sang Ginuong JesuCristoang Iya pagkatawo, ang Iya kabuhi, ang Iya mga panudlo, ang Iya Paglansang sa Krus, ang Iya Pagkabanhaw, kag ang Iya Pagpasag-uli.”

Matapos ko mapaambit ang mga panudlo sang Manluluwas sa kapilyan, ang palibot nagbaylo, kag siya naglibot sa amon sa bilding lakip sa sining karon lang nga kinalkal nga mga pintura sa dingding nga pinitsahan sa panahon sang mga Roman.

Upód sa mga reperensya nga ginlista sa Giya sang Topiko amó ining isa sa Libro ni Mormon: Isa Pa Ka Katipan Nahanungod Kay JesuCristo: ”Nagawali kitá nahanungod kay Cristo, nagapanagna kitá nahanungod kay Cristo, kag nagasulat kitá suno sa aton mga panagna, agud nga mahibal-an sang aton mga kaanakan kon sa ano nga ginhalinan sila mahimo magpaabot para sa kapatawaran sang ila mga salâ” (2 Nephi 25:26).

Sa Iya mismo mga pulong, ang Ginuo nagpahayag, ”Ako amó ang dalan, ang kamatuoran, kag ang kabuhi: walâ sing may makakadto sa Amay, kon indi paagi sa akon” (John 14:6).

Kag sa Libro ni Mormon, siya nagapahayag: ”Yari karon, ako amó sia nga ginhanda gikan pa sa sadsaran sang kalibutan sa pagtubos sang akon katawhan. Yari karon, ako si JesuCristo.   ... Sa akon ang tanan nga tawo makaangkon sing kabuhi, kag inang walay katapusan, bisan sila nga magapati sa akon ngalan; kag sila mangin akon mga anak nga lalaki kag mga anak nga babayi” (Ether 3:14).

May yara nga masyado kadamo nga mga reperensya sa bug-os nga salandigan sang balaan nga mga kasulatan nga nagapahayag sa balaan nga papel ni JesuCristo bilang Manunubos sang tanan nga natawo na ukon matawo pa sa mortalidad.

Paagi sa Pagpasag-uli ni JesuCristo tanan kitá gintubos halin sa Pagkapukan sang tawo, nga natabo sang si Adan kag si Eba nagkaon sang ginadumilian nga bungangkahoy sa Hardin sang Eden, nga ginhambal sa Corinthians, ”Kay ang tanan nga tawo mapatay tungod kay Adan, tungod kay Cristo ang tanan mabanhaw” (1 Corinthians 15:22).

Ang Libro ni Mormon nagatudlo, ”Kay ginakinahanglan nga isa ka pagpasag-uli ang pagahimuon ..., ukon indi ang tanan nga tawo pat-od gid nga indi malikawan nga mawalâ; huo, ang tanan nagapakatig-a; huo, ang tanan nangin malalison kag nagtalalang, kag pat-od gid nga mawalâ luwas nga ini paagi sa pagpasag-uli, ... isa ka walay dulonan kag walay katapusan nga halad” (Alma 34:9–10).

Basi indi kitá magkabuhi sang himpit nga mga kabuhi, kag may mga silot sa aton mga kasal-anan, apang bag-o kitá nagkadto sa kalibutan, nagsugot kitá nga magpasakop sa Iya mga layi kag magbaton sang mga silot sa paglalis sang yadtong mga layi.

”Kay ang tanan nga tawo nagpakasalâ, kag indi takos sa himaya sang Diyos;

”Pero bangud sa grasya sang Diyos ginpakamatarong kitá paagi sa pagtubos ni JesuCristo” (Romans 3:23–24).

Ang Manluluwas nagtuman sang Pagpasag-uli, nga nagahatag sang paagi sa aton nga mangin matinlo. Si JesuCristo amó ang nabanhaw nga Cristo. Nagasimba kag nagakilala kitá sa Iya sa kasakit nga Iya gin-antus para sa aton tanan kag sa kasakit nga Iya ginbatas para sa kada isa sa aton, pareho sa Hardin sang Gethsemane kag sa krus. Gin-antus Niya ang tanan sing may daku nga pagkamainubuson kag walay katapusan nga paghangop sang Iya balaan nga bahin kag tuyò.

Ang mga yadtong maghinulsol kag magbiya sang ila salâ makakità sang Iya maluluy-on nga butkon nga nagadupa sa gihapon. Ang mga yadtong nagapamati kag nagahalong sa Iya mga pulong kag mga pulong sang Iya pinili nga mga alagad makakità sang paghidaet kag paghangop bisan sa sulod sang daku nga kasakit kag kasubo. Ang padulungan sang Iya sakripisyo amó ang pagluwas sa aton sa mga epekto sang salâ agud nga ang tanan nga kabalasulan mapanas kag makabatyag sang paglaum.

Kon Siya indi nakatuman sang Pagpasag-uli, walâ sing pagtubos. Ining kalibutan mangin isa ka mabudlay nga puluy-an kon kitá indi gid mapatawad sang aton mga kasal-anan, kon kitá indi gid makapaputli sang aton mga kaugalingon kag magpadayon.

Ang kaluoy kag grasya ni JesuCristo indi limitado sa yadtong nakasalâ bisan sa paghimo ukon sa indi paghimo, pero sila nagalakip sang panaad sang walay katapusan nga paghidaet sa tanan nga magbaton kag magsunod sa Iya kag sa Iya mga panudlo. Ang Iya kaluoy isa ka gamhanan nga manugbulong, bisan pa sa mga napilasan nga mga inosente.

Ako nakabaton sining karon lamang sang isa ka sulat halin sa babaye nga nagbalita sang iya pagbatas sang daku nga kasakit sa iya kabuhi. Isa ka makahaladlok nga salâ, nga indi niya ginhingalanan pero nagsugot nga ini, ang ginhimo batok sa iya. Siya nagbaton nga siya naghiwaos sa mga balatyagon sang daku nga kapaitan. Sa iya kaakig, nagsinggit siya sa iya hunahuna,”Ang isa dapat magbayad sining makahaladlok nga salâ.” Sa sining pinakasobra nga tion sang kasubo kag palamangkutanon, siya nagsulat nga nag-abot sa iya tagipusuon ang maabtik nga sabat: ”May isa nga nagbayad na.”

Kon indi naton natalupangdan kon ano ang mahimo sang sakripisyo sang Manluluwas sa aton, basi magpadayon kitá sa kabuhi nga nagadala sang mga kabalasulan nga kita nakahimo sang isa ka butang nga indi husto kag nagpilas sang balatyagon sang isa. Ang pagbasol nga nagaupód sa mga kasal-anan mahugasan. Kon kitá nagasayasat nga makahangop sang Iya Pagpasag-uli, makaabot kitá sa madalom nga pagtahod sa Ginuong JesuCristo, sa Iya kalibutanon nga pag-alagad, kag sa Iya balaan nga misyon bilang aton Manluluwas.

Ang Simbahan ni JesuCristo sang mga Santos sa Ulihing mga Adlaw ginpanumbalik nga magpadayon sa bilog nga kalibutan sang kaalam sang kabuhi kag mga panudlo sang Manluluwas. Ining daku nga konperensya ginawaragwag sa 94 nga mga linggwahe paagi sa satellite sa 102 ka mga pungsod pero puwede man makuha sa Internet sa kada pungsod nga sa diin yara ang Simbahan. Kitá may sobra sa 3,000 nga mga stake. Ang lubos panahon nga puwersa pangmisyonero sobra sa 88,000, kag ang kabilogan nga miyembro sang Simbahan lapaw sa 15 ka milyones. Ining mga numero nagapamatuod nga ang ”bató nga gin-utód halin sa bukid nga walâ sing mga kamot” nagapadayon nga nagaligid pasulong, kag sa hingapusan magpunô sa bug-os nga kalibutan” (D&C 65:2).

Pero bisan mangin ano kadako ang organisasyon sang Simbahan ukon pila ka milyones ang mga katapo nga mag-ugyon sa mga kubay, bisan pila ka mga kontinente kag mga pungsod ang makadtuan sang aton mga misyonero ukon pila ka mga linggwahe ang aton ginahambal, ang tunay nga kadalag-an sang ebanghelyo ni JesuCristo itakson paagi sa espirituhanon nga kabakod sang tig-isa ka mga miyembro. Kinahanglan naton ang kabakod sang pagtuo nga makità sa tagipusuon sang kada isa ka matampad sing buót nga sumulunod ni Cristo.

Isa ka pamatuod sang paglaum sang pagtubos isa ka butang nga indi naton matakos ukon maisip. Si JesuCristo ang ginahalinan sinang paglaum.

Nagatinguha kitá nga magpabakod sang mga pagpamatuod sang mga lamharon kag mga tigulang, kinasal ukon nagaisahanon. Kinahanglan naton itudlo ang ebanghelyo ni JesuCristo sa mga lalaki, mga babaye, kag mga kabataan, sa yadtong kada isa ka kaliwatan, kapungsuran, sa mga manggaranon, kag sa mga imol. Kinahanglan naton ang sining karon lamang nga mga ginkabig kag mga yadtong nagtalalang kag buligan sila nga magbalik sa sinakupan. Kinahanglan naton ang kaalaman kag ihibalo kag espirituhanon nga kabakod sang tanan. Ang kada miyembro sining Simbahan bilang isa ka tawo importante nga bahin sa organisasyon sang Simbahan.

”Kay ang lawas isa lang, kag may madamo nga mga parte, kag ang tanan nga mga parte sang sina nga lawas, bisan madamo, isa lang ka lawas: gani katulad man ni Cristo.

”Kay man paagi sa isa ka Espiritu kitá tanan ginabunyagan nga isa ka lawas. ...

”Kay ang lawas indi isa ka parte, pero madamo nga mga parte” (1 Corinthians 12:12–14).

Ang kada miyembro nagaalagad bilang isa ka pagpamatuod sang kabuhi kga mga panudlo ni JesuCristo. Yara kitá sa awayan sang mga puwersa sang kaaway, kag kinahanglan naton ang isa kag isa kon kitá magmadinalag-on sa hilimuon sang Manluluwas nga ginapahimo sa aton.

Basi kamo maghunahuna, ”Ano ang mahimo ko? Ako isa lang ka tawo.”

Sa kamatuoran si Joseph Smith nagbatyag sang pagkaisahanon kon kaisa. Siya nagpangibabaw sa pagkadungganon, pero siya nag-umpisa nga isa ka 14-ka-anyos nga batang lalaki nga may palamangkutanon: ”Diin sa tanan nga mga simbahan ako dapat magbuylog?” (tan-awa ang Joseph Smith–History 1:10). Ang pagtuo kag pagpamatuod ni Joseph Smith sa Manluluwas nagtubò katulad sang aton nga dapat magtubò, ”dinalan sa dinalan, pagsulundan sa pagsulundan, diutay diri kag diutay didto” (2 Nephi 28:30; tan-awa man ang D&C 128:21). Si Joseph nagluhod sa pagpangamuyo, kag daw ano ka makatalanhaga nga mga butang ang nag-abót bilang bunga sang inang pagpangamuyo kag sang Unang Palanan-awon.

Bilang isa sa mga Napulogduha ka mga Apostoles, ako nagapamatuod sa Ginuong JesuCristo. Siya buhi. Siya ang aton Manunubos kag ang aton Manluluwas. ”Paagi sa Pagpasag-uli ni Cristo, ang tanan nga katawhan puwede maluwas” (Mga Artikulo sang Pagtuo 1:3). Nagapangulo Siya sa sining Simbahan. Siya indi dumuluong sa Iya mga alagad. Samtang kitá nagapadayon sa palaabuton nga may malinong nga pagsalig, ang Iya Espiritu mag-upód sa aton. Walâ sing katapusan ang Iya gahum nga magbugay kag maggiya sa mga kabuhi sang yadtong mga nagapangita sang kamatuoran kag katarungan. Ako nagapamatuod sa Iya, sa ngalan ni JesuCristo, amen.