Ang Mga Yabi kag Awtoridad sang Priesthood

Ni Elder Dallin H. Oaks

Sang Korum sang Napulogduha ka mga Apostoles

Litrato

Ang mga yabi sang priesthaood nagadirekta sa mga babaye subong man sa mga lalaki, kag ang mga ordinansa kag awtoridad sang priesthood nahanungod sa mga babayi subong man sa mga lalaki.

I.

Sa sining konperensya nasaksihan naton ang pagbuyi sa pila ka himpit nga mga kautoran nga mga lalaki, kag nagsakdag kita sa mga palangakuan sang iban. Sa sining pagpatiyog labing kinaandan sa Simbahan wala kita “nagapanaog” kon kita ginabuy-an, kag wala kita “nagasaka” kon kita gintawag. Wala sing “pasaka ukon panaog” sa pag-alagad sa Ginuo. May yara lamang sang “pasulong ukon paatras,” kag inang kinatuhay depende sa kon paano kita nagabaton kag nagahulag sa aton mga pagbuyi kag sa aton mga palangakuan. Sang kaisa nagpangulo ako sa pagbuyi sang isa ka batan-on nga stake president nga naghatag sang maayo gid nga pag-alagad sa siyam ka tuig kag karon nagakalipay gid sa iya pagbuyi kag sa bag-o nga palangakuan nga nabaton niya kag sang iya asawa. Sila gintawag nga mangin mga pinuno sang nursery sa ila ward. Sa Simbahan lamang nga ini ang ina makit-an nga kasubong ka dungganon!

II.

Samtang nagpamulong sa isa ka konperensya sang kababayinhan, ang presidente sang Relief Society nga si Linda K. Burton nagsiling, “Ginalauman namon ang magbutang sa kada isa sa aton sang mas daku nga luyag agud mas maayo nga mahangpan ang priesthood.”¹ Ina nga pagkinahanglan nagakadapat sa aton tanan, kag pagasundan ko ini paagi sa paghambal parte sa mga yabi kag awtoridad sang priesthood. Tungod ining mga halambalan magkasubong sa importansya sa mga lalaki kag mga babaye, malipayon ako nga ining mga kabuhatan ginawaragwag kag ginabantala sa tanan nga mga katapo sang Simbahan. Ang gahum sang priesthood nagabugay sa aton tanan. Ang mga yabi sang priesthood nagadirekta sa mga babaye subong man sa mga lalaki, kag ang mga ordinansa kag awtoridad sang priesthood nahanungod sa mga babaye subong man sa mga lalaki.

III.

Si Presidente Joseph F. Smith naglaragway sa priesthood bilang “ang gahum sang Diyos nga gintugyan sa tawo sa paagi nga ang tawo sarang magbuhat sa kalibutan para sa kaluwasan sang katawhan nga panimalay.”² Ang iban nga mga lider nagatudlo sa aton nga ang priesthood “amo ang pinakagamhanan nga gahum sa sining kalibutan. Ini ang gahum sa paagi nga ang kalibutan gintuga.”³ Ang mga kasulatan nagatudlo nga “ining kasubong nga Priesthood, nga yara sa sinugoran, mangin yara man sa katapusan sang kalibutan.” (Moses 6:7). Gani, ang priesthood amo ang gahum sa paagi nga kita pagabanhawon kag magpadayon sa kabuhing walay katapusan.

Ang paghangop nga ginapangita naton nagasugod sa paghangop sang mga yabi sang priesthood. “Ang mga yabi sang priesthood amo ang awtoridad nga ginhatag sang Diyos sa mga nagaangkon sa priesthood agud magdirekta, magdumala, kag magpalakat sa Iya priesthood sa kalibutan.” ⁴ Ang kada buhat ukon ordinansa nga ginhimo sa Simbahan ginhimo sa idalom sang direkta ukon di-direkta nga pahanugot sang isa ka nagahupot sa mga yabi para sa sina nga buluhaton. Subong sa ginapaathag ni Elder M. Russell Ballard, “Yadtong may mga yabi sang priesthood … tunay nga nagahimo sini nga posible sa tanan nga nagaalagad sing himpit sa idalom sang direksyon nila ang maggamit sang awtoridad sang priesthood kag makabaton sang gahum sang priesthood.” ⁵

Sa pagdumala sa paggamit sang awtoridad sang priesthood, ang buluhaton sang mga yabi sang priesthood angay nga nagapalapad kag nagapakitid. Ini nagapalapad paagi sa paghimo nga posible sa awtoridad kag mga bugay sang priesthood nga yara para sa tanan nga kaanakan sang Diyos. Ini nagapakitid paagi sa pagdirekta kon sin-o ang hatagan sang awtoridad sang priesthood, kon sin-o ang mag-angkon sa mga palangakuan sini, kag kon paano ang mga pagkamatarong kag mga gahum igatugyan. Halimbawa, ang isa ka tawo nga nagaangkon sang priesthood indi sarang magtugyan sang iya palangakuan ukon awtoridad sa iban luwas kon ginpahanugotan sang isa nga nagaangkon sang mga yabi. Kon wala ining pahanugot, ang ordinasyon indi mabaton. Ini nagapaathag kon ngaa ang isa ka nagaangkon sang priesthood walay sapayan sa palangakuan indi sarang mag-orden sa isa ka katapo sang iya panimalay ukon mag-alagad sang sacramento sa iya puluy-an nga wala sang pahanugot halin sa isa ka nagaangkon sang nagakadapat nga mga yabi.

Luwas sa sagradong buluhaton nga ginahimo sang mga sister sa sulod sang templo sa idalom sang mga yabi nga ginaangkon sang presidente sang templo, nga akon ilaragway sa ulihi, isa lamang ka nagaangkon sa isa ka palangakuan sang priesthood ang sarang maghimo sa isa ka ordinansa sang priesthood. Kag ang tanan nga mga ordinansa sang priesthood nga ginpahanugotan gintala sa mga record sang Simbahan.

Sa katapusan, ang tanan nga mga yabi sang priesthood ginaangkon sang Ginuong si JesuCristo, nga amo ang nagapanag-iya sa priesthood. Siya amo ang nagapamat-od kon ano nga mga yabi ang ginatugyan sa mga tawo kag kon paano yadtong mga yabi pagagamiton. Naandan naton ang maghunahuna nga ang tanan nga mga yabi sang priesthood gintugyan kay Joseph Smith sa Kirtland Temple, apang ang kasulatan nagasiling nga ang tanan nga gintugyan didto amo “ang mga yabi sining dispensasyon” (D&C 110:16). Sa kabilogan nga konperensya sa madamo na nga tuig nga nagligad, si Presidente Spencer W. Kimball nagpahanumdom sa aton nga may iban pa nga mga yabi sang priesthood nga wala pa mahatag sa tawo sa kalibutan, kalakip ang mga yabi sang pagtuga kag pagbanhaw. ⁶

Ang diyosnon nga kinaiya sang ginbutang nga mga limitasyon sa paggamit sang mga yabi sang priesthood nagapaathag sang ginakinahanglan nga pagkatuhay sa tunga sang mga desisyon sang pagpalakat sa Simbahan kag mga desisyon nga makaapekto sa priesthood. Ang Unang Pangulohan kag ang Konseho sang Unang Pangulohan kag Korum sang Napulog-duha, nga nagapangulo sa Simbahan, ginpakagamhanan sa paghimo sang madamo nga mga desisyon nga makaapekto sa mga sulundon kag mga pamaagi sang Simbahan mga butang subong sang lokasyon sang mga bilding sang Simbahan kag mga edad para sa pag-alagad pangmisyonero. Apang bisan nga ining nagapangulo nga mga awtoridad nagaangkon kag nagagamit sang tanan nga mga yabi nga gintugyan sa katawhan sa sining dispensasyon, sila indi hilway sa pagbag-o sang Diyosnon nga mando nga ang mga kalalakinhan lamang ang magaangkon sang mga palangakuan sa priesthood.

IV.

Karon magahambal ako parte sa awtoridad sang priesthood. Nagasugod ako sa tatlo ka mga prinsipyo nga bag-o lang ginhambalan: (1) ang priesthood amó ang gahum sang Diyos nga gintugyan sa tawo agud maghimo para sa kaluwasan sang panimalay sang katawhan, (2) ang awtoridad sang priesthood ginadumalahan sang mga nagaangkon sang priesthood nga nagahupot sang mga yabi sang priesthood, kag (3) tungod kay ang kasulatan nagapahayag nga “ang tanan nga iban nga mga awtoridad [kag] mga palangakuan sa simbahan mga kadugangan sa sining [Melchizedek] priesthood”(D&C 107:5), ang tanan nga ginhimo sa idalom sang direksyon sadtong mga yabi sang priesthood ginhimo nga may awtoridad sang priesthood.

Paano ini nagakadapat sa kababayinhan? Sa isa ka pagpamulong sa Relief Society, si Presidente Joseph Fielding Smith, sadto Presidente sang Korum sang Napulog-duha ka Mga Apostoles, nagsiling sini, “Samtang ang mga sister wala mahatagan sang Priesthood, wala ini ginatugyan sa ila, ina wala nagakahulogan nga ang Ginuo wala maghatag sa ila sang awtoridad. … Ang isa ka tawo, babaye ukon lalaki, sarang mahatagan sang awtoridad sa paghimo sang pila ka mga butang sa Simbahan nga matuod kag tunay nga kinahanglanon para sa kaluwasan naton, subong sa buluhaton nga ginahimo sang mga sister naton sa Balay sang Ginuo. May awtoridad sila nga ginhatag sa ila agud magbuhat sang dalagku kag matahom nga mga bagay, sagrado sa Ginuo, kag matuod subong ka lubos sang mga bugay nga ginahatag sang mga kalalakin-an nga nagaangkon sa Priesthood.”⁷

Sa sinang talalupangdon nga pamulong, si Presidente Smith nagsiling paliwatliwat nga ang kababayinhan ginhatagan sang awtoridad. Sa mga babaye nagsiling siya: “Makahambal kamó nga may awtoridad, bangud ang Ginuo nagbutang sang awtoridad sa inyo.” Nagsiling man siya nga ang Relief Society “[gin]hatagan sang gahum kag awtoridad agud maghimo sang madamo nga importanteng mga bagay. Ang buluhaton nga ila ginahimo ginhimo paagi sa diyosnon nga awtoridad.” Kag, huo, ang buluhaton sang Simbahan nga ginhimo sang mga babaye kag mga lalaki, sa templo man ukon sa ward ukon sa branch, ginhimo sa idalom sang direksyon sang yadtong nagahupot sa mga yabi sang priesthood. Nian, nagahambal parte sa Relief Society, si Presidente Smith nagpaathag, “[Ang Ginuo] naghatag sa ila sining dakung organisasyon kon diin sila may awtoridad sa pag-alagad sa idalom sang mga direksyon sang mga bishop sang mga ward … , nagabantay sa kaayohan sang aton mga katawhan angay espirituhanon kag kalibutanhon.”⁸

Gani, matuod gid nga masiling nga para sa mga kababayinhan ang Relief Society indi lamang isa ka klase apang bagay nga kon diin sila nagakadapat isa ka diyosnon nga gintukod nga kadugangan sa priesthood.⁹

Wala naton maandan ang maghambal parte sa kababayinhan nga may yara sang awtoridad sang priesthood sa ila mga palangakuan sa Simbahan, apang ano nga iban pa nga awtoridad ini sarang mangin? Kon ang isa ka babaye batan-on man ukon may edad ginpain sa pagwali sang ebanghelyo bilang lubos –panahon nga misyonera, siya ginhatagan sang awtoridad sang priesthood agud maghimo sang buluhaton pang-priesthood. Ang amó matuod man kon ang isa ka babaye ginpain agud magbuhat bilang isa ka opisyal ukon manunudlo sa isa ka organisasyon sang Simbahan sa idalom sang direksyon sang isa nga nagahupot sa mga yabi sang priesthood. Kon sin-o man ang nagabuhat sa isa ka palangakuan ukon katungdanan nagbaton halin sa isa nga nagahupot sang mga yabi sang priesthood kag nagagamit sang awtoridad sang priesthood sa paghimo sang iya natalana nga mga katungdanan.

Kon sin-o man ang nagagamit sang awtoridad sang priesthood dapat kalimtan ang parte sa kinamatarong nila kag magtumod sa ila mga responsibilidad. Ina isa ka prinsipyo nga kinahanglanon sa katilingban sang laban. Ang bantog nga manunulat sa Russia nga si Aleksandr Solzhenitsyn ginkutlo nga nagsiling, “Ini tion na … sa pagpangapin indi laban sang katawhan nga mga kinamatarong kondi sang katawhan nga mga obligasyon.” ¹⁰ Ang mga Santos sa Ulihing Mga Adlaw pat-od nga nakahibalo nga ang mangin takos para sa eksaltasyon indi bagay sang pagduso sang mga kinamatarong apang bagay sa pagtuman sang mga responsibilidad.

V.

Ang Ginuo nagdirekta nga ang mga kalalakinhan lamang ang paga-ordenan sa mga palangakuan sang priesthood. Apang, subong sa ginpatalupangod sang madamo nga mga lider sang Simbahan, ang mga kalalakinhan indi amó “ang priesthood.”¹¹ Ang kalalakinhan nagaangkon sang priesthood, upod ang sagradong katungdanan sa paggamit sini para sa pagbugay sa tanan nga kaanakan sang Diyos.

Ang pinakadakung gahum sang Diyos nga ginhatag sa Iya anak nga mga lalaki indi sarang magamit nga wala ang pag-upod sang isa Niya ka anak nga mga babaye, bangud lamang sa Iya anak nga mga babaye ang Diyos naghatag sang gahum nga “mangin manunuga sang mga lawas … agud nga ang disenyo sang Diyos kag ang Dakung Plano sarang matuman nga mabungahon.”¹² Yadto ang mga tinaga ni Presidente J. Reuben Clark.

Siya nagpadayon: “Amó ini ang lugar sang aton mga asawa kag sang aton mga iloy sa Walay Katapusan nga Plano. Indi sila mga manugdala sang Priesthood; wala sila pagmandoan nga magtuman sang mga katungdanan kag mga buluhaton sang Priesthood; ukon sila ginapapas-an sang mga responsibilidad sini; sila mga manugtukod kag manug-organisar sa idalom sang gahum sini, kag manug-ambit sang mga bugay sini, nagaangkon sang bahin agud makumpleto ang mga gahum sang Priesthood kag nagaangkon sang isa ka buluhaton bilang diyosnon nga gintawag, subong ka importante sa katubtuban sa lugar sini sang Priesthood mismo.”¹³

Sa yadtong may inspirasyon nga mga pulong, si Presidente Clark naghambal parte sa panimalay. Bilang ginpahayag sa family proclamation, ang amay nagapangulo sa panimalay, siya kag ang iloy may magkatuhay nga mga responsibilidad, apang sila “obligado sa pagbulig sa kada isa bilang magkasubong nga magkaupod.”¹⁴ Pila ka mga tuig antes sa family proclamation, si Presidente Spencer W. Kimball naghatag sining may inspirasyon nga pagpaathag: “Kon kita nagahambal sang pag-asawahay bilang isa ka pag-updanay, tugoti nga maghambal kita sang pag-asawahay bilang lubos nga pag-updanay. Indi naton luyag nga ang aton LDS nga mga kababayinhan mangin mahipos nga mga kaupod, ukon limitado nga mga kaupod sa sinang walay katapusan nga katungdanan! Palihog nga mangin isa ka nagahatag kag lubos nga kaupod.”¹⁵

Sa mga mata sang Diyos, sa Simbahan man ukon sa panimalay, ang mga kababayinhan kag mga kalalakinhan alalangay, upod ang magkatuhay nga mga responsibilidad.

Tapuson ko upod ang pila ka mga kamatuoran parte sa mga bugay sang priesthood. Di-kasubong sa mga yabi sang priesthood kag mga ordinasyon sa priesthood, ang mga bugay sang priesthood sarang maangkon sang kababayinhan kag kalalakinhan sa magkasubong nga mga kasugtanan. Ang dulot sang Balaan nga Espiritu kag ang mga bugay sang templo naandan nga mga halimbawa sining kamatuoran.

Sa iya mabaskog nga pamulong sa BYU Education Week sang nagligad nga tag-init, si Elder M. Russell Ballard naghatag sining mga panudlo:

“Ang doktrina naton sa Simbahan nagapahamtang sa mga kababayinhan nga angay sa kag magkatuhay sa kalalakinhan. Ang Diyos wala nagakabig sa lalaki ukon babaye bilang mas maayo ukon mas importante sangsa isa. …

“Kon ang mga lalaki kag mga babaye nagakadto sa templo, sila ginhatagan sang magkasubong nga gahum, nga amó ang gahum sang priesthood. … Ang pagbaton sa gahum kag mga bugay sang priesthood sarang makuha sang tanan nga mga kaanakan sang Diyos.”¹⁶

Nagasaksi ako sa gahum kag mga bugay sang priesthood sang Diyos, yara nga alalangay para sa Iya anak nga mga lalaki kag mga babaye. Nagasaksi ako sa awtoridad sang priesthood, nga nagabuhat sa tanan nga mga palangakuan kag kahiwatan sang Ang Simbahan ni JesuCristo sang Mga Santos sa Ulihing Mga Adlaw. Nagasaksi ako sa diyosnon nga paggiya sa paghikot sang mga yabi sang priesthood, gin-angkon kag gingamit sa kalubosan sini sang aton propeta kag presidente, si Thomas S. Monson. Sa ulihi kag pinakaimportante, nagasaksi ako sa aton Ginuo kag Manluluwas, si JesuCristo, nga nagapanag-iya sining priesthood kag kami mga alagad Niya, sa ngalan ni JesuCristo, amen.