Proteksyon sa Pornograpiya − Isa ka Puluy-an nga Sentro kay Cristo
Ni Linda S. Reeves
Ikaduha nga Manuglaygay sa Pangkabilogan nga Pangulohan sang Relief Society
Ang pinakamaayo nga filter sa kalibutan … amó ang personal nga filter sa sulod sang aton kinatawo nga nagahalin sa tudok kag nagapadayon nga pagpamatuod.
Pinalangga nga mga kauturan, subong ako ginbugayan nga ang akon 13 ka pinakamagulang nga mga apó diri sa katilingban sang komperensya. Bangud sini, ako nagpamangkot “Ano balá ang luyag ko ipahibalo sa akon mga apo?” Sining aga gusto ko maghambal sing tampad sa akon panimalay kag sa inyo.
Kami bilang mga pangulo, padayon nga daku nga nagakabalaka nahanungod sa kahalitan nga ginatuga sang pornograpiya sa mga kabuhi sang mga miyembro sang Simbahan kag sa ila mga panimalay. Si Satanas nagaatake sing walâ sing katulad nga kabangis.
Isa ka rason nga yari kita diri sa kalibutan amó nga kitá makatuon nga mag-intiyende sang aton mga mainit nga balatyagon kag mga pamatyagon sang aton mamalatyon nga mga lawas. Ining mga balatyagon nga ginhatag sang Diyos nagabulig sa aton nga magpakasal kag mag-angkon sang mga anak. Ang mahirop nga pag-asawahay sa tunga sang lalaki kag babaye nga nagatuga sang mga anak sa mamalatyon nga kabuhi ginatuyò nga mangin matahum, mahigugmaon nga mga eksperiyensya nga nagaugyon sang duha ka mainunungon nga mga tagipusuon nga nagaugyon sa espiritu kag lawas, nga nagahatag sang isa ka kumpleto nga kasadya kag kalipay kon kita nakatuon ibutang sa unahan ang isa kag isa. Si Presidente Spencer W. Kimball nagtudlo nga sa pag-asawahay, “ang tiayon … nangin lapaw sa kabuhi sang bana ukon asawa, kag … [walâ] na sang anuman nga interes [ukon] tawo [ukon] butang nga mag-una pa sa kaupod nga tiayon. …
“Ang pag-asawahay nagakinahanglan sang lubos nga katapatan kag pagkamainunungon.”1
Sang madamo nga tuig ang nagligad ang isa namon ka anak kit-anon nga nagkalisud. Nagsulod ako sa iya hulot, nga sa diin siya tampad nga naghambal kag nagpaathag sa akon nga naghalin siya sa puluy-an sang iya abyan kag siya indi hungod nga nakakita sang makakilibuton kag matinublagon nga mga laragway kag mga buhat sang hublas nga babaye kag lalaki sa telebisyon. Siya nagnguyngoy kag nagpahayag kon daw ano ka lain ang iya ginbatyag sa iya nakita kag gusto niya ini nga madula sa iya isip. Nagpasalamat ako nga siya nagsalig nga sugiran ako, kag naghatag sa akon sang kahigayunan nga magpakalma sang iya inosente kag nagasakit nga tagipusuon kag buligan siya nga makahibalo kon paano makaangkon sang kaumpawan sa aton Pagpasag-uli sang Ginuo kag sa bulig sang aton Langitnon nga Amay.
Madamo nga mga kabataan, mga batan-on, kag mga may edad na ang inosente nga napakit-an sang pornograpiya, pero may nagadamo nga numero sang mga lalaki kag mga babaye nga nagapili nga magtan-aw sini kag sila nagabalikbalik diri asta nga sila naanad diri. Ining mga tawo basi luyag sing lubos sa ila mga tagipusuon nga maggwa sa sini nga siud apang masunson indi sila makada-ug sini sa ila lang kaugalingon. Daw ano ang aton pagpasalamat kon ang ining mga pinalangga nagapili sa pagsalig nga manugid sa aton bilang mga ginikanan ukon sa isa ka lider sang Simbahan. Kita dapat maalamon nga indi magtugda sing may pagkakibot, kaakig, ukon pagsikway, nga magbangud nga sila maghipos liwat.
Bilang mga ginikanan kag mga lider, kinahanglan naton nga maglaygay sa aton kabataan kag mga batan-on sa padayon nga paagi nga nagapamati sing may paghigugma kag paghangop. Dapat nila mahibal-an ang mga katalagman sang pornograpiya kag kon paano ini magpangibabaw sa mga kabuhi, magbangud sa pagdula sang Espiritu, pagtorsi sang mga balatyagon, pagguba sang mga kaugyunan, pagdula sang kaugalingon nga pagpugong, kag ang halos lubos nga paggamit sang tiyempo, hunahuna, kag puwersa.
Ang pornograpiya masyado kalaw-ay, malaot, kag masyado ka malaragwayon sangsa una pa gid. Samtang kitá nagapakigsugilanon sa aton mga anak, ululupod kitá nga makahimo sang pangpanimalay nga plano nga may mga palatukuran kag mga limitasyon, kag mangin aktibo sa pag-amlig sang aton mga panimalay sa pagbutang sang mga filters sa mga sangkap pang-elektronika. Mga ginikanan, nahangpan balá naton nga ang mga aparatong mobile nga may kaabtik sang internet, kag indi mga kompyuter, amó ang pinakadaku nga manughalit? 2
Mga batan-on kag mga may edad, kon kamo nadakop ni Satanas sa iya siud sang pornograpiya, dumduma kon daw ano ka maluluy-on ang aton pinalangga nga Manluluwas. Nakadepara balá kamo kon paano katudok ang pagpalangga kag pagkahamuot sang Ginuo sa inyo, labi na subong? Ang aton Ginuo may gahum nga magtinlo kag mag-ayo sa aton. Makakuha Siya sang inyo nabatyagan nga kasakit kag kalisud kag magtinlo sa inyo liwat paagi sa gahum sang Iya Pagpasag-uli.
Kami nga mga lider daku nga nagakabalaka nahanungod sa mga mag-asawa kag mga panimalay nga nagakalisud bangud sa kahuyugan sa pornograpiya. Si Elder Richard G. Scott nagapakitluoy: “Kon kamo mismo libre sa grabe nga mga salâ, indi kamo mag-antus sing walay pulos sa kaabtanan sang mga salâ sang iban. … Puwede kamo magkaluoy sa isa nga may pilas sang kasakit sa kasal-anan. Pero indi kamo dapat magbatyag sang responsibilidad sa mga yadtong hinimuan.” 3 Dapat ninyo mahibal-an nga kamo indi nagaisahanon. May yara nga bulig. Makakuha kamo sang bulig sang mga pangkahuyugan nga mga miting sa pagpaayo para sa mga mag-asawa, nga nagalakip sang miting sa telepono, nga nagatugot sa mga mag-asawa nga magtelepono sa miting kag magpakigbuylog gikan sa ila mga puluy-an.
Mga kauturan, paano kitá makaamlig sa aton mga kabataan kag mga lamharon? Ang mga filters mga sangkap nga makabulig, apang ang pinakamaayo nga filter sa kalibutan, nga amó lang ang sa ulihi mag-obra, amó ang personal nga filter sa aton kinatawo nga nagahalin sa tudok kag nagapadayon nga pagpamatuod sa paghigugma sang aton Amay sa Langit kag sang halad sang pagpasag-uli para sa isa kag isa sa aton.
Paano naton mabuligan ang aton mga anak nga makilala ang aton Amay kag ang aton Manluluwas? Naluyagan ko ang ginpahayag sang propeta nga si Nephi sang kon ano ang ginhimo sang iya mga katawhan sa pagpalig-on sang mga batan-on sadtong iya panahon: “Nagahambal kitá nahanungod kay Cristo, nagakasadya kitá kay Cristo, nagawali kitá nahanungod kay Cristo, [kag] nagapanagna kitá nahanungod kay Cristo … agud nga mahibal-an sang aton mga kaanakan kon sa ano nga ginhalinan sila mahimo nga magpaabot para sa kapatawaran sang ila mga salâ.”4
Paano naton mahimo ini sa aton mga puluy-an? Ang iban sa inyo nakabati sa akon nga naghambal kon daw ano ako kag ang akon bana nga si Mel, nakabatyag sang daku nga kabudlay bilang mga ginikanan sang apat ka magagmay nga kabataan. Samtang kami nag-atubang sa mga pagtilaw sang pagkaginikanan kag pag-atubang sa mga kinahanglanon sang kabuhi, kami desperado nga nagkinahanglan sang bulig. Kami nagpangamuyo kag nag-ampo nga mahibal-an kon ano ang amon himuon. Ang sabat nga nag-abot maathag: “Sige lang kon ang balay di-areglado kag ang mga bata nagasuksok pa sang mga padyama kag ang iban nga mga katungdanan indi nahimo. Ang mga butang nga dapat gid himuon sa puluy-an amó ang pagtuon sang balaan nga mga kasulatan kag pagpangamuyo, kag sinimanal nga family home evening.”
Nagtinguha kami nga maghimo sining mga butang, pero indi sila ang masami nga ulunahon kag, sa sulod sang mga kinagamo, kon kaisa napabayaan. Nagbaylo kami sang amon tumod kag nagtinguha nga indi magpakalibog nahanungod sa indi mas importante nga mga butang. Ang amon mga gintumod nangin pagpakigsugilanon, pagkasadya, pagwali, kag pagpamatuod kay Cristo paagi sa paghimakas nga magpangamuyo sa adlaw-adlaw nga tanan kag magtuon sang kasulatan kag magfamily home evening kada simana.
Ang isa ka abyan sang bag-o lang nagligad nagpaandam sa akon, “Kon magsiling ka sa mga sisters nga magbasa sang balaan nga mga kasulatan kag magpangamuyo, ini nagapabug-at sa ila. Sila nagabatyag nga madamo na sila sang mga hilikuton.”
Mga kauturan, tungod nahibal-an ko halin sa akon mga eksperiyensya, kag sang yadtong iya sang akon bana, dapat ako magpamatuod sang mga bugay sang pagbasa sang kasulatan, pagpangamuyo, kag family home evening kada simana. Ini gid ang mga pagginawi nga nagakakas sang kabug-at, nagahatag sang giya sa aton mga kabuhi, kag nagadugang sang proteksyon sa aton mga puluy-an. Gani kon ang pornograpiya ukon iban pa nga mga pagtilaw mag-abot sa mga panimalay, makapangayo kita sang bulig sa Ginuo kag magpaabot sang pagtuytoy sang Espiritu, sa pagkahibalo nga nagahimo kitá sang ginapangayo sang aton Amay nga himuon.
Mga kauturan, kon ang mga ini indi pa mga pangginawi sa aton mga puluy-an, kitá mag-umpisa subong. Kon ang aton mga anak may edad na kag nagapangindi nga magbuylog sa aton, sarang kitá mag-umpisa sa aton mga kaugalingon. Samtang aton ini ginahimo, ang impluhensya sang Espiritu magsugod nga magpunô sa aton mga puluy-an kag sa aton mga kabuhi, kag sa sulod sang mga panahon, basi sila magbaton sini.
Dumduma ninyo nga mga Apostoles nagpanaad man nga samtang kita nagapangita sang aton mga katigulangan kag nagahanda sang aton mga ngalan pangpanimalay para sa templo, kitá mahatagan sang proteksyon subong kag sa kabilogan sang aton mga kabuhi samtang ginahimo naton sa aton mga kaugalingon ang mangin takos sa rekomend sa templo.5 Daw ano nga mga panaad!
Mga batan-on, mag-angkon kamo sang responsibilidad para sa inyo espirituhanon nga kaayuhan. Patya ang inyo telepono kon kinahanglan, mag-amba sang kanta sang Primary, magpangamuyo para buligan, maghunahuna sang kasulatan, maggwa sa sinehan, ilarawan ang Manluluwas nga nagatindog sa inyo luyo, takos nga mag-ambit sang sakramento, tun-i ang For the Strength of Youth, mangin isa ka ehemplo sa inyo mga abyan, makighambal sa isa ka ginikanan, magpakigkità sa inyo bishop, magpangayo sang bulig, kag magpangita sang laygay sang propesyonal, kon kinahanglanon.
Ano ang luyag ko nga mahibal-an sang akon mga apo? Gusto ko mahibal-an nila kag ninyo nga ang Manluluwas nagakabuhi kag nagapalangga sa aton. Siya nagbayad sang bili sang aton mga salâ, apang dapat kitá nga magluhod sa atubang sang aton Langitnon nga Amay, nga may tudok nga pagkamainubuson, nagakompisar sang aton mga salâ, kag nagapakitluoy sang Iya pagpatawad. Dapat kitá magbag-o sang aton mga tagipusuon kag mapainubuson nga magpangabay sang Iya bulig kag pagpatawad sang aton mga nahalitan ukon ginsikway.
Nahibal-an ko nga nakità ni Joseph Smith ang Diyos, ang aton Langitnon nga Amay, kag ang aton Manluluwas nga si JesuCristo. Nagapamatuod ako nga kitá may buhi nga propeta diri sa kalibutan, si Presidente Thomas S. Monson. Nagapamatuod man ako nga indi gid kamo magtalang kon kamo nagapamati sang laygay sang propeta sang Diyos. Nagapamatuod ako sang gahum sang aton mga kasugtanan kag ang mga pagpakamaayo sang templo.
Nahibal-an ko man nga ang Libro ni Mormon matuod! ! Indi ko mapaathag ang gahum sining libro. Ang nahibal-an ko lang amó nga, kaupod sang pagpangamuyo, ang Libro ni Mormon nagadala sang gahum nga nagahatag sang proteksyon sa mga panimalay, nagapabakod sang mga kaangtanan, kag nagahatag sang personal nga pagsalig sa Ginuo. Nagapamatuod ako sining mga butang sa balaan nga ngalan ni JesuCristo, amen.