Ano Nga Sari Sang Mga Tawo?

Ni Elder Donald L. Hallstrom

Sang Pangulohan sang Kapituan

Ano nga mga pagbag-o ang ginakinahanglan sa aton nga mangin sari sang mga tawo nga kitá mangin dapat.

Samtang ginapanan-aw naton ining pangkabilogan nga miting, kitá ginapadumdom nga walâ sing kaanggid ining pagtililiponbisan diin pa. Ang katuyuan sang sesyon sang priesthood sa pangkabilogan nga konperensya amó ang pagtudlo sa mga nagakapot sang priesthood kon ano nga sari sang tawo kitá mangin dapat (tan-awa ang 3 Nephi 27:27) kag maghatag sa aton sang inspirasyon nga maabot inang aton pagkahimpit.

Sa akon mga panahon sang pagka-Aaronic Priesthood sa Hawaii lima ka napulo ka anyos nga nagligad kag bilang isa ka misyonero sa England, nagtililipon kami sa mga balay-mitingan kag (sa may labi nga kabudlay) nagpamati sang sesyon sang priesthood nga gin-angot sa koneksyon sang telepono. Sang ulihi nga mga tinuig ang mga satellites nagtugot sang mga konperensya nga marawagwag sa mga pinili nga mga lugar sang Simbahan kaupod sadtong mga dakagku nga mga dish receivers para mabatian kag makita ining mga hitabo. Kami natingala gid sa ina nga teknolohiya! Indi madamo ang nakalarawan sadto sa ila isip nga sa sining panahon, nga sa diin ang sin-o man nga may smartphone, elektronico nga tableya, ukon kompyuter makabaton sang mga mensahe sang sining miting.

Apang, ining daku nga nga pag-uswag sa pagbaton sang mga tingog sang mga alagad sang Ginuo, nga pareho lang sang mga pulong sang Ginuo mismo (tan-awa ang D&C 1:38), may diutay nga bili kon indi kitá handa nga magbaton sang pulong (tan-awa ang D&C 11:21) kag sundon ini. Sa malip-ot nga hambal, ang katuyuan sang pangkabilogan nga konperensya kag sang sesyon sang priesthood matuman lang kon kitá handa nga maghimokon kitá handa nga magbag-o.

Sang madamo nga mga napulo ka tuigan ako nag-alagad nga bishop. Sa sulod sang madugay nga tion nakigkita ako sa isa ka tawo nga mas tigulang sang sa akon sa amon Ward. Ining utod may problema sa iya asawa kag napalayô sa iya mga anak. Nabudlayan siya nga magpadayon sang trabaho, kag walâ sing suod nga mga abyan, kag nabudlayan sa pagpakig-ugyon sa mga miyembro sang Ward gani sa ulihi siya walâ sing pagbuót nga mag-alagad sa Simbahan. Sang isa ka masingkal nga pagdiskusyon nahanungod sa mga pagtilaw sa kabuhi, naghilay siya ayon sa akon bilang pagtapos niya sa amon madamo nga mga pagpakighambalanay kag nagsiling, “Bishop, mainiton ang ulo ko, kag, kay man amó gid ako sini.”

Inang hambal nagtapungaw sa akon sinang gab-i kag nagabalikbalik sa akon isip halin sadto. Sang ining tawo nagpamat-od”Bahala na kay amó gid ako sini,” kitá nagatalikod sa aton abilidad nga magbag-o. Kon amó sinâ maayo pa nga kitá magpataas sang puti nga bandera, ipahigad ang aton mga armas, magsungka ang anuman nga esperansa sa pagdaug dulaon. Samtang nga ang iban sa aton nagahunahuna nga ina indi nagalarawan sa aton, basi ang kada isa sa aton nagapakita sing bisan isa ukon duha ka malain nga mga bisyo, “Kay man amó gid ako sini.’”

Gani, nagaululupod kita sa sini nga miting sang priesthood bangud nga kon ano man kitá indi pa kon ano kita mangin dapat. Nagatililipon kita sining gab-i sa ngalan ni JesuCristo. Kita nagatililipon nga may pagsalig nga ang Iya Pagpasag-uli nagahatag sa aton tanan bisan ano pa ang aton mga kakulangan, ang aton mga kaluyahan, ang aton mga kahuyugan ang abilidad nga magbag-o. Kita nagatililpon nga may paglaum nga ang aton palaabuton, magmaayo.

Kon kita nagapakig-upod sa sini nga miting nga may “matuod-tuod nga katuyuan” nga magbag-o (Moroni 10:4), ang Espiritu nagasulod sa aton mga tagipusuon kag mga hunahuna. Sa ginbugna sang Ginuo sa Propeta nga si Joseph, “Kag matabo ini, nga tungud kay sila … nagasunod sa ila pagtuo sa akon”dumduma ninyo, nga ang pagtuo isa ka prinsipyo sang gahum kag paghimo “Ihatag ko ang akon Espiritu sa ila sa adlaw nga sila upod nga magtililipon” (D&C 44:2). Ina nagakahulugan sining gab-i!

Kon kamo nagaisip nga ang inyo mga pagtilaw indi madaug, tuguti ako nga magsaysay sa inyo sang nahanungod sa isa ka tawo nga amon nakilala sa diutay nga baryo sa gwa sang Hyderabad, India, sang 2006. Ining tawo nagpakita sang ehemplo sang pagbuót nga magbag-o. Si Apa Rao Nulu natawo sa probinsya sang India. Sang siya tatlo ka tuig, gindakop siya sang polyo kag siya nangin inutil. Ang iya katilingban nagtudlo sa iya nga ang iya ikasarang masyado nga nalimitahan. Apang, sang siya lamharon nga may edad nakilala niya ang mga misyonero. Sila nagtudlo sa iya sang mas daku nga ikasarang sa sining kabuhi kag sa walay katapusan nga palaabuton. Ginbunyagan siya kag ginkompirmahan nga katapo sang Simbahan. Sa iyad daku nga palanan-awon, nagplano siya nga makabaton sang Melchizedek Priesthood kag mag-alagad sang lubos-kapanahunan nga misyonero. Sang 1986 siya gin-ordinan nga elder kag nag-alagad sa India. Ang paglakat indi mahapos nagtinguha siya sang iya pinakamaayo, sa paggamit sang baston sa duha niya ka kamot, kag masunson siya nga natumba pero ang pag-untat indi gid isa ka pagpili. Siya nagpanaad nga dungganon kag matinumanon nga magmisyon, kag ginhimo niya ini.

Sang makita namon liwat si Brother Nulu, halos 20 ka tuig pagkatapos sang iya misyon, masadya nga ginabi-abi niya kami sa dalan nga ang punta nagapadulong sa batu-batuhon nga alagyan pakadto sa iya duha ka hulot nga puluy-an kaupod ang iya asawa kag tatlo ka mga kabataan. Masyado kainit kag tama ka masariwaol ang ina nga adlaw. Nagalakat pa gihapon siya sing may daku nga kabudlay, pero siya walâ sing balatyagon nga siya makaluluoy. Paagi sa iya katutom, siya nangin manunudlo, nga naghatag sang edukasyon sa mga kabataan sang baryo. Sang kami nagsulod sa iya diutay nga balay, gilayon nga gintuytuyan niya ako pakadto sa kilid kag ginhunos niya ang kahon nga suludlan sang iya pinakaimportante nga mga pagkabutang. Gusto niya ipakita sa akon ang isa ka papel. Ini nagbasa, “Maayo nga mga halandumon kag mga pagpakamaayo kay Elder Nulu, isa ka baleroso kag malipayon nga misyonero; [may petsa] Hunyo 25, 1987; [pirma] Boyd K. Packer.” Sa sina nga tion, sang si Elder Packer nagbisita sa India kag nagpamulongpulong sa mga misyonero, ginpamatud-an niya ang ikasarang ni Elder Nulu. Sa kamatuoran, ang ginhambal sa akon ni Brother Nulu sang adlaw sang 2006 amó nga ang ebanghelyo nagpabag-o sa iya sing permanente!

Sa sining pagbisita sa puluy-an ni Nulu, kaupod namon ang presidente sang misyon. Didto siya para mag-interbyu kay Brother Nulu, sa iya asawa, kag sa iya mga anak sa pagbaton sang ila mga endowment kag mahugpong sa ila nga panimalay sa templo. Ginhatagan man namon sila sang mga plano nga magbiyahe sa Hongkong China Temple para sa ining mga ordinansa. Sila naghilibion sa kasadya nga matuman na ang ila damgo nga madugay na nga ginpaabot.

Ano ang ginapaabot sa isa ka nagakapot sang priesthood sang Diyos? Ano nga mga pagbag-o ang kinahanglanon sa aton nga kitá magmangin mga tawo nga kitá mangin dapat? Nagahatag ako sang mga panugyan:

1. Kinahanglan kitá nga mangin mga tawo sang priesthood! Kon balá kitá lamharon nga mga tawo nga nagakapot sang Aaronic Priesthood ukon mga tawo nga nagakapot sang Milchizedek Priesthood, kinahanglan nga kitá mangin tawo sang priesthood, nga nagapakità sang espirituhanon nga kagulangan bangud kitá may kasugtanan sa Diyos. Sa ginsiling ni Paul, “Sang batà pa ako, ang akon paghambal iya sang batà, ang akon paghangop iya sang batà, ang akon pa hunahuna iya sang batà: Pero sang may edad na ako, ginbayaan ko ang pagginawi sang batà” (1 Corinthians 13:11). Kità dapat nga may kinatuhay bangud kità nagakapot sang priesthood indi bugalon ukon hambugero, ukon nagapakanubo sa iban pero siya dapat mangin mapakainubuson kag matudloan kag mapainumuron. Ang pagbaton sang priesthood kag sang iya sini mga katungdanan dapat nga nagakahulugan sang isa ka butang sa aton. Indi ini dapat nga naandan nga buluhaton nga unay nga matabo sa kada pat-od nga mga edad pero ini isa ka sagrado nga kasugtanan nga ginahimo pagkatapos sang maayo nga pagbinagbinag. Dapat kitá nagabatyag nga ini isa ka priblihiyo kag nagapasalamat gid nga ang aton tanan nga hinimuan nagapakita sini. Kon halos indi kitá nagaisip nahanungod sa priesthood, kinahanglan magbag-o kitá.

2. Kinahanglan nga kitá mag-alagad! Ang kinahanglanon sang priesthood amó ang pagpadaku sang aton katungdanan (tan-awa angD&C 84:33) paagi sa pag-alagad sa iban. Ang paglikaw sa aton importante nga katungdanan nga mag-alagad sa aton mga asawa kag mga anak, ang indi pagbaton ukon pabayabaya nga paghimo sang aton katungdanan sa Simbahan, ukon ang indi pagbulig sa iban kon ini indi konbenyente ang amó nga kitá indi mangin dapat. Ang Ginuo nagpahayag, “Higugmaon mo ang Ginuo nga imo Diyos sang bug-os mo nga tagipusuon, kag sang bug-os mo nga kalag, kag sang bug-os mo nga hunahuna” (Matthew 22:37) kag sang ulihi Siya nagdugang, “Kon kamo nagapalangga sa Akon alagaran ninyo Ako” (D&C 42:29). Ang pagkamainugalingon isa ka kabaliskaran sang katungdanan sang priesthood, kag kon ini isa ka pamatasan, dapat kitá magbag-o.

3. Dapat kitá mangin takos! Basi ako walâ sing abilidad ni Elder Elder Jeffrey R. Holland sang siya naghambal sa sesyon sang priesthood sang nagligad nga diutay nga tuigan nga “magpalapit sa inyo guya … , ilong sa ilong, nga may bastante lang nga kainit … nga magsilab sa inyo mga kilay” (“We Are All Enlisted,” Ensign ukonLiahona, Nob. 2011, 45); pero, pinalangga nga mga kauturan, magtalupangod kitá nga ang mga pagginawi sa kalibutan nga ginabaton sang pangkabilogan nagapigar sang gahum sang aton priesthood. Kon kitá nagapanumdom magsunod bisan diutay lang sa pornograpiya ukon mga panglapas sang pagkaputli ukon pagkamalimbungon sa anuman nga porma kag walâ sila sing epekto sa aton kag sa aton mga panimalay, kitá natiplang. Si Moroni naghambal, “Tan-awa nga ginahimo ninyo ang tanan nga mga butang sing takos” (Mormon 9:29). Ang Ginuo gamhanan nga nagtudlo, “Kag karon nagahatag ako sa inyo sang sugo nga mag-andam kamo nahanungod sa inyo mga kaugalingon, nga maghatag sang maukod nga pagpamati sa mga pulong sang walay katapusan nga kabuhi” (D&C 84:43). Kon may yara nga di-pa-nalubad nga mga salâ nga nagatapna sang aton katakus, dapat kita magbag-o.

Ang lubos lang nga sabat sa pamangkot ni JesuCristo “Ano nga sari sang mga tawo kamo mangin dapat?” amó ang isa nga ginhatag Niya sing malip-ot apang punô kag tudok: “Bisan subong man sa Akon” (3 Nephi 27:27). Ang pangagda nga “magkari kay Cristo, kag magmangin himpit sa Iya” (Moroni 10:32) pareho nga nagakinahanglan kag nagapaabot sang pagbag-o. Sa kaluluy-on, indi Siya nagbiya sa aton nga nagaisahanon. “Kag kon ang mga tawo magkari sa akon ipakita ko sa ila ang ila mga kahuyang. … Pagkatapos himuon ko ang mga butang nga mahuyang nga mangin mabaskog” (Ether 12:27). Ang magsalig sa Pagpasag-uli sang Manluluwas, kitá puwede magbag-o. Sa sini ako segurado. Sa ngalan ni JesuCristo, amen.