Ang Priesthood sang Lalaki
Ni President Henry B. Eyring
Unang Manuglaygay sa Unang Pangulohan
Kamo sarang nga mangin is ka maayo nga modelo, isa ka ordinaryo nga modelo, ukon isa ka indi maayo nga modelo. Basi maghunahuna kamo nga ini walâ sing pulos sa inyo, apang ini may pulos sa Ginuo.
Tanan kitá may mga idolo, labi na gid sang mga bata-on pa kitá. Ako natawo kag nagdaku sa Princeton, New Jersey, sa Estados Unidos. Ang labing bantugan nga mga hubon sang sports nga malapit sa amon gina-estaran may opisina sa New York City. Ina nga siyudad puluy-an sang tatlo ka propesyonal nga mga hubon sang beysbol sadtong madugay na nga mga inadlaw: ang Brooklyn Dodgers, ang New York Giants, kag ang New York Yankees. Ang Philadelphia mas malapit pa gani sa amon puluy-an kag puluy-an sang duha ka hubon sang beysbol nga Athletics kag sang Phillies. May madamo nga sarang mangin idolo ko sa yadtong mga hubon.
Si Joe Dimaggio nga naghampang sa New York Yankees nangin akon idolo sa beysbol. Kon ako kag ang akon mga abyan nagahampang sang beysbol sa hampangan sang amon buluthuan sa tupad sang amon balay, ako nagtinguha nga maghabyog sang bat katulad sa akon hunahuna sang paghabyog ni Joe Dimaggio. Yadtong mga inadlaw walâ pa sing telebisyon, (ini dumaan na nga maragtas), gani ako may mga litrato lang halin sa mga peryodiko nga akon ginkopyahan sang iya habyog.
Sang ako nagadaku, ang akon amay nagdala sa akon sa estudyum sang Yankees. Ina lang ang tiyempo nga nakita ko si Joe Dimaggio nga nagahampang. Nga daw didto pa ako, sa akon hunahuna makita ko siya nga nagahabyog sang bat kag makita ko ang puti nga bola sang beysbol nga nagalupad diretso sa mga ginapungkuan sa tunga sang hampangan.
Subong, ang akon mga abilidad sa beysbol indi gid naglapit sa mga iya sang akon idolo sang ako batà pa. Pero sang mga diutay nga tinion nga akon naigò ang bola sang beysbol, segurado, nga gin-ilog ko sing malapit sa akon masarangan ang kabaskog sang iya mabaskog nga habyog.
Kon kitá nagapili sang mga idolo, kitá nagakopya, sing may pagtumod ukon walâ, ang anuman nga aton labi nga ginahangad sa ila.
Sa maayo nga kapalaran, ang akon maalamon nga mga ginikanan nagbutang sang maayo nga mga idolo sa akon banas bilang isa ka batà nga lalaki. Ang akon amay nagdala sa akon sa estudyum sang mga Yankees isa lang ka bes para magpanilag sa paghampang sang akon idolo, pero kada Domingo gintugutan niya ako nga magpanilag sa lalaking priesthood nga nangin idolo ko. Inang idolo nag-impluhensya sang akon kabuhi. Ang akon amay presidente sang branch nga nagmiting sa amon puluy-an. Sa indi hungod, kon kamo magkadto sa nahauna nga panalgan kon Domingo sang aga, yara na kamo sa simbahan. Ang amon branch walâ sing sobra sa 30 ka miyembro nga nag-tambong.
May isa ka lamharon nga lalaki nagdrayb sang iya iloy sa amon balay para magtambong sang mga miting, apang siyaindi gid nagsulod sa amon balay. Indi siya miyembro. Ang akon amay amó ang nagmadinalag-on sa pag-agda sa iya pasulod sa amon puluy-an. Siya ginbunyagan ang nangin una ko kag amó lang nga akon lider sang Aaronic Priesthood. Siya nangin akon idolo sang priesthood. Nadumdoman ko gihapon ang kahoy nga estatwa nga iya ginhatag sa akon bilang padya pagkatapos nga makumpleto namon ang pagbulig nga mag-utod sang mga panggatong nga kahoy para sa biyuda. Nagtinguha ako nga mangin katulad niya kon san-o man ako nagahatag sang takos nga pagdayaw sa isa ka alagad sang Diyos.
Nagpili pa gid ako sang isa pa ka idolo sa sinang branch. Siya isa ka marino sang Estados Unidos nga nagtambong sang amon mga miting nga nagasul-ob sang iya uniporme. Yadto, tion sang inaway, gani ang ina lang, naghimo sa iya nga idolo ko. Siya ginpa-eskuwela sang kuwerpo sang mga marino sa Princeton University sa pagpadugang sang iya edukasyon. Pero labaw pa sa iya pangmilitar nga uniporme, nagtan-aw ako sa iya paghampang sa Palmer Stadium bilang kapitan sang hubon sang futbol. Nakita ko siya nga naghampang sa hubon sang basketbol kag nakita ko man siya nga naghampang sa unibersidad bilang primero nga katser sang hubon sang beysbol.
Pero labaw sa tanan, nagkadto siya sa akon puluy-an kag magtudlo sa akon kon paano magsyut sang bola sang basketbol sa akon pareho sa tuo kag walá ko nga kamot. Ginsilinagn niya ako nga sa isa ka adlaw kinahanglan ko ina nga abilidad kay ako maghampang sang basketbol sa mga manami nga hubon. Indi ko yadto nahangpan, apang sa mga katuigan, para sa akon, isa isa ka modelo sang tunay nga tawo sang priesthood.
Ang kada isa sa inyo mangin modelo sang isa ka tawo sang priesthood kon balá gusto ninyo ini ukon indi. Kamo nangin nagasiga nga kandila sang inyo ginbaton ang priesthood. Ang Ginuo nagbutang sa inyo sa kandilero sa pagpasanag sang alagyan sa tanan nga nagapalibot sa inyo. Labi na nga ina matuod sa korum sang inyo priesthood. Kamo mangin maayo nga modelo, isa ka ordinaryo nga modelo, ukon indi maayo nga modelo. Basi maghunahuna kamo nga ini walâ sing pulos sa inyo, pero ini may pulos sa Ginuo. Siya nagsiling sini sa masunod:
“Kamo mga kasanag sang kalibutan. Ang siyudad nga ginpatindog sa bungyod indi matago.
Walâ sing mga tawo nga magsindi sang kandila, kag takluban ini sa idalom sang sulukban, kundi itungtong ini sa kandilero; kag ini maghatag sang kasanag sa tanan nga ara sa sulod sang balay.
“Pasigaha ninyo ang inyo mga suga sa mga tawo, agud nga ila makita ang inyo maayo nga mga binuhatan, kag magpakahimaya sa inyo Amay nga yara sa langit.” 1
Ginpakamaayo ako sang mga balaan nga mga ehemplo sang maayo nga mga nagakapot sang priesthood sa mga korum sa diin ako masuwerte nga nag-alagad. Makahimo kamo sang ila ginhimo sa akon paagi sa inyo mga ehemplo nga ila sundon.
Napanilagan ko ang tatlo ka naandan nga mga kinaiya sang nagakapot sang priesthood nga akon mga idolo. Ang isa amó ang sulundan sang pagpangamuyo, ang ikaduha amó ang pag-alagad, kag ang ikatlo amó ang mabatuhon nga pagpat-od nga mangin matampad.
Tanan kitá nagapangamuyo, apang ang nagakapot sang priesthood nga inyo gusto amó ang masami nga nagapangamuyo kag may matuod-tuod nga tinutuyo. Sa gab-i magluhod kamo kag magpasalamat sa Diyos sa iya mga bugay sang adlaw. Magpasalamat kamo sa mga ginikanan, sa mga manunudlo, kag sa mga maayo nga ehemplo nga inyo ginasunod. Ilarawan ninyo sing piho sa inyo pangamuyo kon sin-o ang nagpakamaayo sa inyo kabuhi kag kon paano, sinang adlaw. Ina maggamit sang mas sobra sa diutay nga tinion kag mas sobra sa diutay nga mga panghunahuna. Ina magpatingala sa inyo kag magbag-o sa inyo.
Samtang kamo nagapangayo sang pagpatawad, matukiban sang inyo kaugalingon ang magpatawad sa iban. Samtang kamo nagapasalamat sa Iya pagkamaayo, maghunahuna kamo sang iban, sa ngalan, nga nagakinahanglan sang inyo kaayo. Sa liwat, inang eksperiyensya magpatingala sa inyo sa adlaw-adlaw, kag sa sulod sang mga panahon ini magpabag-o sa inyo.
Ang isa ka paagi nga kamo magbag-o sa sinang maukod nga pagpangamuyo amó nga mabatyagan ninyo nga kamo tunay nga anak sang Diyos. Kon nahibal-an ninyo nga kamo anak sang Diyos, mahibal-an man ninyo nga Siya nagapaabot sang madamo halin sa inyo. Bilang Iya anak, Siya nagaasa nga kamo mangin maalwan kag maayo sa iban. Siya malugaw-an kon kamo mga bugalon kag makinaugalingon. Siya magbugay sa inyo nga makaangkon sang luyag nga magpauna sang mga interes sang iban labaw sa mga inyo.
Ang iban sa inyo mga modelo na sang indi makinaugalingon nga pag-alagad sang priesthood. Sa mga templo sa kabilogan sang kalibutan, ang mga nagakapot sang priesthood nagakadto sa Simbahan bag-o magbutlak ang adlaw. Kag ang iban nagaalagad sing madugay na matapos ang pagsalop sang adlaw. Walâ sing pagkilala ukon pagdayaw sang publiko sa sining kalibutan sa sinang sakripisyo sang tiyempo kag kabudlay. Nakaupod ako sa mga lamharon samtang sila nag-alagad sa mga didto sa kalibutan sang mga espiritu, nga indi makaangkon sang mga pagpakamaayo sang templo sa ila mga kaugalingon.
Samtang nakita ko ang kalipayan imbis sang kakapoy sa mga nawong sang mga nag-alagad didto sing aga kag hapon, ako nakahibalo nga may mga dalagku nga mga padya sa sini nga kabuhi sa sinang tipo sang di-makinaugalingon nga serbisyo, apang ini isa lang ka palatandaan sang kalipay nga ila mabatyagan kaupod sa mga ila gin-alagaran sa kalibutan sang mga espiritu.
Nakita ko ang pareho sina nga kalipay sa mga pisngi sang mga nagapabutyag sang ila kalipay sa iban nahanungod sa mga bugay bilang miyembro sang ginharian sang Diyos. Nakakilala ako sang presidente sang branch nga halos adlaw-adlaw nagadala sang mga tawo sa mga misyonero para ila tudloan. Sang pila lang ka bulan indi pa siya miyembro sang Simbahan. Subong may mga misyonero nga nagatudlo kag isa ka branch nga nagadaku sa numero kag kabakod bangud sa iya. Pero sobra pa dira, siya isa ka kasanag sa iban nga magpamatuod kag gani magpadasig sa pagtipon sang mga anak sang Langitnon nga Amay.
Samtang kamo nagapangamuyo kag nagaalagad sa iban, ang inyo ihibalo nga kamo anak sang Diyos magtubò. Mas mahangpan ninyo nga Siya naga pangasubo kon kamo indi matampad sa kon anuman. Mangin pat-od kamo nga magtuman sang inyo pangako sa Diyos kag sa iban. Mangin mas madeparahon kamo sa pagkuha sang anuman nga indi inyo. Mangin mas matampad kamo sa mga naga-empleyar sa inyo. Mas mangin pat-od kamo nga en punto sa oras kag magtapos sang kada hilimuon nga ginahatag sa inyo sang Ginuo nga inyo gin-akò nga himuon.
Imbis nga matingala kon ang ila mga home teacher maabot, ang mga kabataan sa mga panimalay nga inyo ginatudluan may pag-asa nga nagahulat sa inyo pagduaw. Ang akon mga anak nakabaton sang sina nga bugay. Samtang sila nagdaku, may mga idolo sila sa priesthood nga nagbulig sa pagtukod sang ila mga alagyan sa pag-alagad sa Ginuo. Inang balaan nga ehemplo subong nagapadayon sa ikatlo nga henerasyon.
Ang akon mensahe amó man ang pagpasalamat.
Nagapasalamat ako sa inyo mga pangamuyo. Nagapasalamat ako nga kamo nagaluhod sa pagkilala sang kamatuoran nga kamo walâ sang tanan nga mga sabat. Kamo nagaampo sa Amay sa langit sa pagpasalamat sa Iya mga pagpakamaayo sang inyo mga kabuhi kag inyo mga panimalay. Nagapasalamat ako sa inyo pag-alagad sa iban kag sa mga panahon nga nagbatyag kamo nga indi ninyo kinahanglan ang pagkilala sang inyo pag-alagad.
Nagbaton kitá sang paandam sang Ginuo nga kon kitá nagapangita sang pagdayaw diri sa kalibutan para sa aton pag-alagad, basi balá aton madula ang mas daku pa nga mga bugay. Madumduman ninyo ining mga pulong:
“Mag-andam kamo nga indi kamo nagahatag sang inyo mga limos sa mga tawo, nga magpakità-kità lang sa ila: kay man kon pakià-kità lang ini walâ kamo sing padya halin sa inyo Amay nga yara sa langit.
Gani, kon nagalimos kamo, indi kamo magpanugid, katulad sang ginahimo sang mga nagapakunokuno sa mga simbahan kag sa mga kalye, nga sila mahatagan sang pagpadungog sang mga tawo. Sa kamatuoran ginasiling ko sa inyo, Nakabaton na sila sang ila padya.
Apang kon kamo nagahatag sang limos, indi pagsugiri ang walá nga kamot kon ano ang ginahimo sang tuó nga kamot:
“Nga ang inyo panglimos indi makita: kag ang inyo Amay nga nakakita sang inyo ginahimo sa sekreto maghatag sa inyo sing padya nga makita sang tanan.” 2
Ang yadtong mga nangin modelo ko sang mga nagakapot sang priesthood indi mahapos nga nakilala nga sila nagaangkon sang mga pagkabaganihan nga mga kalidad. Sa kamatuoran, daw nabudlayan sila sa pagkilala sang inang mga butang nga akon labi nga ginahangad. Napabutyag ko nga ang akon amay isa ka matutom nga presidente sang diutay nga branch sa New Jersey. Sang ulihi siya isa ka miyembro sang pangkabilogan nga hunta sang Sunday School sang Simbahan. Apang ako nagaandam subong sa paghambal sing mapainubuson nahanungod sa iya pag-alagad sa priesthood, bangud siya mapainubuson.
Ang amó man matuod sa marinero nga akon idolo sang ako batà pa. Indi gid naghambit sang iya pag-alagad sa priesthood ukon sang iya mga hinimuan. Siya nag-alagad lang. Nathibal-an ko ang nahanungod sa iya halin sa iban. Indi ako makasiling kon balá nakita niya ang iya mga kinaiya nga akon ginhangad.
Gani ang akon laygay sa inyo nga gusto magpakamaayo sa iban paagi sa inyo priesthood may tumod sa kabuhi nga pribado sa tanan pero indi sa Diyos.
Magpangamuyo sa Iya. Pasalamati Siya sang tanan nga maayo sa inyo kabuhi. Pamangkuta Siya kon sin-o sa mga tawo nga Iya ginbutang sa inyo alagyan ang nagakinahanglan sang bulig. Mah-ampo nga buligan Niya kamo sa paghatag sinang pag-alagad. Magpangamuyo nga kamo makapatawad kag gani mapatawad man kamo. Pagkatapos mag-alagad kamo sa ila, magpalangga kamo sa ila, kag magpatawad kamo sa ila.
Labaw sa tanan, panumduma ninyo nga ang tanan nga pag-alagad nga inyo ginahatag, walâ sing mas sobra pa sa pagbulig sa mga twao nga mangin takos sa walay katapusan nga kabuhi. Ang Diyos naghatag sang kabilogan nga giya sa aton kon paano ang paggamit sang priesthood. Siya ang himpit nga ehemplo. Ini ang ehemplo nga aton makita sa diutay nga bahin sa labing maayo sa Iya mga mamalatyon nga mga alagad:
“Kag ang Ginuo nga Diyos naghambal kay Moses, nga nagsiling: Ang kalangitan, madamo sila, kag indi sila puwede maisip sang tawo; apang sila akon maisip, kay sila akon.
“Kag samtang ang isa ka kalibutan maglipas, ang mga kalangitan bisan nga maglipas may masunod pa nga isa; kag walâ sing katapusan ang akon mga hilimuon, katulad sang akon mga pulong.
Kay yari karon, ini ang akon hilumuon kag himaya sa pagpadayon sang walay kamatayon kag walay katapusan nga kabuhi sang katawhan.” 3
Magbukig kitá sa sina nga buluhaton. Ang kada isa sa aton makahimo sang kinatuhay. Ginhanda kitá sa aton panahon kag lugar sa ulihi nga mga adlaw sang sinang sagrado nga hilimuon. Ang kada isa sa aton ginhatagan sang mga ehemplo sang mga naghimo sina nga hilimuon nga isa ka nagapangibabaw nga katuyuan sang ila panahon diri sa kalibutan.
Nagapangamuyo ako nga magbulig kitá sa isa kag isa nga mangin takos sa sinang kahigayunan.
Ang Diyos nga Amay buhi kag magsabat sa inyo mga pangamuyo para sa bulig nga inyo kinahanglan sa pag-alagad sa Iya. Ini Iya Simbahan. Ang priesthood nga inyo ginakaptan amó ang gahum sa paghimo sa Iya ngalan sa Iya buluhaton sa pag-alagad sa mga anak sang Diyos. Samtang nagahatag kamo sang inyo bug-os nga tagipusuon sa sining buluhaton, Siya magpadaku sa inyo. Gani ako nagapangako sa ngalan ni JesuCristo, amen.