Mga Gamot kag Mga Sanga
Ni Elder Quentin L. Cook
Sang Korum sang Napulogduha ka Mga Apostoles
Ang pagpadasig sa buluhaton family history kag templo sa panahon naton kinahanglanon para sa kaluwasan kag eksaltasyon sang mga panimalay.
Antes sa iya kamatayon sa kanser sang 1981, ang kontrobersyal nga manunulat nga si William Saroyan naghambal sa press, “Ang tanan magtaliwan, apang dalayon nga nagpati ako nga ako indi kalakip dira. Ti, ano karon?”1
Ang “ti, ano karon” sa atubang sang kamatayon sa sining kabuhi kag ang “ti, ano karon” sa pagpainoino parte sa kabuhi pagkatapos sang kamatayon yara sa tunga sang mga pamangkot sang kalag nga ang ginapanumbalik nga ebanghelyo ni JesuCristo matahom gid nga nagasabat sa plano sang kalipayan sang Amay.
Sa sining kabuhi nagakadlaw kita, nagahibi kita, nagabuhat kita, nagahampang kita, kag dayon mapatay kita. Si Job nagpamangkot sang malip-ot kag maathag nga pamangkot, “Kon ang tawo mapatay, mabuhi bala liwat siya?”2 Ang sabat amo ang matunog nga huo, bangud sa nagapasag-uli nga sakripisyo sang Manluluwas. Makawiwili ang bahin sang nanarisari nga panguna sa pamangkot ni Job: “Ang tawo nga nabun-ag sa isa ka babaye may pila lamang ka mga adlaw. … Nagaabot siya kasubong sang isa ka bulak, kag mautod. … May paglaum ang isa ka kahoy, kon ini utdon, nga ang ini manalingsing liwat, kag ang mahumok nga sanga sini indi mag-untat … kag magdala sang mga sanga kasubong sang isa ka tanom.” 3
Ang plano sang aton Amay parte sa mga panimalay. Ang pila sa aton pinakamakatalandog nga kasulatan nagagamit sang konsepto sang kahoy upod ang mga gamot kag mga sanga bilang kahalimbawa.
Sa panakop nga kapitulo sang Daan nga Testamento, si Malachi, sa paglaragway sang Ikaduhang Pagkari sang Manluluwas, maathag nga nagagamit sining kahalimbawa. Nagahambal parte sa bugalon kag malauton, siya nagasulat nga sila pagasunogon subong sang mga inutdan kag “nga ang ini indi magabilin sa ila sang gamot ukon sanga.”4 Si Malachi nagtapos sining kapitulo upod ang nagapasalig liwat nga saad sang Ginuo:
“Yari karon, ipadala ko si Elijah ang propeta sa wala pa mag-abot ang daku kag makahaladlok nga adlaw sang Ginuo:
“Kag siya magapaulikid sa tagipusuon sang mga amay sa kabataan, kag sa tagipusuon sang kabataan sa ila mga amay, kay basi magkari ako kag hampason ang kalibutan sang isa ka pagpakamalaut.”5
Sa sinugoran sang Pagpanumbalik, si Moroni nagpatalupangod liwat sa sining mensahe sa unang panulin niya sa batan-on nga si Joseh Smith sang 1823.6
Ang mga Kristiyano kag mga Hudeo sa bug-os nga kalibutan nagabaton sa Daan nga Testamento parte sa istorya ni Elijah.7 Siya ang pinakaulihi nga propeta nga nag-angkon sang nagahugpong nga gahum sang Melchizedek Priesthood antes sa panahon ni JesuCristo.8
Si Elijah Nagapanumbalik sang Mga Yabi
Ang pagbalik ni Elijah natabo sa Kirtland Temple sang Abril 3, 1836. Nagpahayag siya nga siya nagtuman sa saad ni Malachi. Gintugyan niya ang mga yabi sang priesthood para sa paghugpong sang mga panimalay sa sining dispensasyon.9 Ang misyon ni Elijah ginapatuman paagi sa kon kaisa ginatawag nga espiritu ni Elijah, nga, subong sa gintudlo ni Elder Russell M. Nelson, amo ang “isa ka pagpakita sang Balaan nga Espiritu sa pagpamatuod sang diyosnon nga kinaiya sang panimalay.”10
Ang Manluluwas mabaskog nga nagpatalupangod parte sa pagkinahanglan sang bunyag. Siya nagtudlo, “Luwas ang isa ka tawo mabun-ag sa tubig kag Espiritu, indi siya sarang makasulod sa ginharian sang Diyos.” 11 Ang Manluluwas kinaugalingon nga nabunyagan agud magpakita sang halimbawa. Ano na lang ang matabo sa mga nagtaliwan nga wala mabunyagan?
Ang Doktrina sang Buluhaton sa Templo kag Family History
Sang Oktubre 11, 1840, sa Nauvoo, si Vilate Kimball nagsulat sa Iya bana nga si Elder Heber C. Kimball, nga upod sa iban nga mga katapo sang Napulogduha nga nag-alagad sa isa ka misyon sa Great Britain. Ang kabilogan nga konperensya bag-o lang ginhiwat sang pila ka adlaw nga nagligad.
Magkutlo ako halin sa mga bahin sang sulat ni Vilate: “May yara kami sang pinakadaku kag pinakamakawiwili nga konperensya nga natabo sugod sang ang Simbahan naorganisar. … Si Presidente [Joseph] Smith nagbukas sang isa ka bag-o kag mahimayaon nga halambalan. … Ina amó ang pagbunyag para sa nagtaliwan. Si Paul nagahambal parte sini, sa First Corinthians Kapitulo 15 bersikulo 29. Si Joseph nakabaton sang mas lubos nga pagpaathag parte sini paagi sa bugna. Siya nagasiling nga pribilihiyo ini sang [mga katapo sang] sining Simbahan ang mabunyagan para sa tanan nga mga paryente nga nagtaliwan antes ining ebanghelyo nag-abot. … Sa paghimo sini, kita nagabuhat bilang mga tiglawas para sa ila, kag maghatag sa ila sang pribilihiyo nga magbangon sa Unang Pagkabanhaw. Nagasiling siya nga ang ebanghelyo iwali sa ila sa bilangguan.”
Si Vilate nagdugang: “Luyag ko nga mabunyagan para sa akon iloy … Indi bala mahimayaon ini nga doktrina?” 12
Ang kinahanglanon nga doktrina sang pagpahiliugyon sang mga panimalay nag-abot linya sa linya kag tinulin sa tinulin. Ang mga ordinansa nga mahimo para sa iban yara sa tunga sang pagsolda nga ululupod sang walay katapusan nga mga panimalay, pagsugpon sang mga gamot sa mga sanga.
Ang doktrina sang panimalay nga may kaangtanan sa family history kag templo nga buluhaton maathag. Ang Ginuo sa nauna nga mabugnaon nga mga panulin nagtumod sa “bunyag para sa inyo minatay.”13 Ang aton pangdoktrina nga obligasyon amó ang parte sa aton mga katigulangan. Ini bangud ang selestiyal nga organisasyon sang langit nabasi sa mga panimalay.14 Ang Unang Pangulohan nagpadasig sa mga katapo, labi na sa batan-on kag lamharon nga mga may edad, ang pagtalupangod sa buluhaton family history kag mga ordinansa para sa kaugalingon nila nga apelyedo ukon mga ngalan sang mga katigulangan sang mga katapo sang ward kag stake nila.15 Kinahanglan naton nga masugpon angay sa mga gamot kag mga sanga. Ang hunahuna nga mag-ulupdanay sa walay katubtuban nga duog matuod nga mahimayaon.
Mga Templo
Si Wilford Woodruff nagpahibalo nga ang Propetang si Joseph Smith nabuhi sa kalawigonnganagkaigô agud magpahamtang sang pundasyon para sa buluhaton sa templo. Ang pinakaulihi gid nga pagtililipon upod sa Korum sang Napulogduha amó sang siya naghatag sa ila sang ila mga endowment.16
Pagkaligad sang pagkamartir sang Propeta, ang mga Santos nagtapos sa Nauvoo Temple, kag ang nagahugpong nga gahum gingamit sa pagbugay sa linibo ka himpit nga mga katapo antes sa pagpanglakaton padulong sa Mountain West. Pagkaligad sang trenta anyos, sa pagkatapos tukod sang St. George Temple, si Presidente Brigham Young nagkilala sa walay katapusan nga kahulogan sang makaluwas nga mga ordinansa nga sang ulihi sarang na mabaton angay para sa buhi kag sa minatay.17
Simple ini nga ginpahayag ni Presidente Wilford Woodruff: “Daw sa halos wala sang bisan ano nga prinsipyo nga ginbugna ang Ginuo nga ako nagkalipay sing mas labaw sangsa pagtubos sa aton minatay; nga makaupod naton ang aton mga amay, mga iloy kag mga kabataan sa panimalay nga organisasyon, sa kaagahon sang unang pagkabanhaw kag sa Ginharian Selestiyal. Ang mga ini dungganon nga mga prinsipyo. Ang mga ini takos sa tanan nga pagsakripisyo.”18
Makahalangyag ang mabuhi karon. Ini ang pinakaulihing dispensasyon, kag mabatyagan naton ang pagpadasig sa buluhaton sang kaluwasan sa kada duog kon diin ang isa ka makaluwas nga ordinansa nahilabtan.19 Karon may yara kita sang mga templo tabok sa kalabanan sang kalibutan agud maghatag sining makaluwas nga mga ordinansa. Ang pagtambong sa templo para sa espirituhanon nga pagpabakod liwat, paghidaet, kaluwasan, kag direksyon sa mga kabuhi naton isa man ka dakung bugay.20.
Kulang sa isa ka tuig pagkatapos nga si Presidente Thomas S. Monson gintawag nga isa ka Apostol, siya nagdedikar sa Los Angeles Temple Genealogical Library. Nagpamulong siya parte sa nagtaliwan nga mga katigulangan “nagahulat [para] sa adlaw nga kamo kag ako maghimo sang pagpangusisa nga ginakinahanglan agud maghanda sa banas, … [kag] amo man magkadto sa balay sang Diyos kag magbuhat sinang buluhaton … nga indi nila … sarang mahimo.”21
Sang si Elder Monson sadto ang naghatag sadtong mga pamulong sa pagdedikar sang Hunyo 20, 1964, may yara lamang sang dose ka nagaobra nga mga templo. Sa panahon nga si Presidente Monson nag-alagad sa senyor nga mga konseho sang Simbahan, 130 sa aton 142 ka mga templo nga nagaobra ang una nga nadedikar. Milagro gid nga makit-an ang pagpadasig sa buluhaton sang kaluwasan sa aton panahon. Baynte-otso ka dugang nga mga templo ang naanunsyo kag yara sa nanarisari nga mga andana sang pagkatukod. Otsentay-singko ka porsiyento sang mga katapo karon ang nagapuyo sa sulod sang 200 ka milya (320 ka kilometro) halin sa isa ka templo.
Teknolohiya sang Family History
Ang teknolohiya sang Family History nagauswag man sing tuman ka madasig. Si Presidente Howard W. Hunter nagpahayag sang Marso 1994: “Nagsugod kita sa paggamit sang teknolohiya sa impormasyon agud magpadasig sa sagradong buluhaton sang paghatag sang mga ordinansa para sa mga nagtaliwan. Ang papel sang teknolohiya. … ginpadasig sang Ginuo mismo. … Apang, kita nagatindog lamang sa ganhaan sang kon ano nga sarang naton mahimo paagi sa sining mga galamiton.”22
Sa 19 anyos halin sining manalagnaon nga pulong, ang pagpauswag sang teknolohiya daw sa indi mapatihan. Ang isa ka 36-anyos nga iloy sang lamharon nga kabataan bag-o lang naghambal sa akon nga may kakunyag, “Pinsara lang − nag-agi kita halin sa mga microfilm reader sa gindedikar nga mga family center padulong sa akon lamesa sa kusina upod ang kompyuter ko nga nagahimo sang family history pagkatapos nga natulogan na ang mga anak ko.” Mga kauturan, ang mga family history center yara na karon sa aton mga puluy-an.
Ang buluhaton sa templo kag family history indi lamang parte sa aton. Hunahunaa ninyo yadtong yara sa pihak sang belo nga nagahulat para sa makaluwas nga mga ordinansa nga magpahilway sa ila halin sa pagkabihag sang espirituhanon nga bilangguan. Ang bilangguan ginapaathag nga isa ka “kahimtangan sang pagkabilanggo ukon pagkabihag.”23 Yadtong yara sa pagkabihag basi nagapamangkot sa pamangkot ni William Saroyan: “Ti, ano karon?”
Ang isa ka himpit nga sister nagpaambit sang isa ka pinasahi nga inagihan sa Salt Lake Temple. Samtang yara sa hulot nga ginakunpirmahan, pagkatapos sang isa ka ordinansa sang pagkunpirma nga ginhimo para sa iban, nabatian niya, “Kag ang bilanggo maalakat nga hilway!” Nabatyagan niya ang daku nga balatyagon sang pagdali para sa yadtong mga nagahulat para sa ila buluhaton nga bunyag kag konpirmasyon. Sa pagpauli sa puluy-an, ginpangita niya ang kasulatan parte sa pulong nga nabatian niya. Nasapwan niya ang pagpahayag ni Joseph Smith saseksyon 128 sang Doktrina kag Mga Kasugtanan: “Tugoti ang mga tagipusuon ninyo nga magkinalipay, kag labi nga mangin masadya. Tugoti ang duta nga magbuka sa pag-amba. Tugoti ang minatay sa paghambal sang sagradong musika sang walay katapusan nga pagdayaw sa kay Haring Immanuel, nga nagtangdo, sang wala pa ang kalibutan, sinang makapasarang sa aton sa pagtubos sa ila paggwa sa ila bilangguan; tungod ang mga bilanggo maglakat nga hilway!”24
Ang pamangkot amó, ano ang kinahanglan naton nga buhaton? Ang laygay sang Propetang si Joseph amó ang magtugyan sa templo sang “mga record sang aton minatay, nga mangin takos sang tanan nga pagbaton.”25
Ang pangulohan sang Simbahan nagpahayag sang isa ka matunog kag maathag nga panawagan sa nagatubong henerasyon agud magpamuno sa paagi sang paggamit sang teknolohiya agud mabatyagan ang espiritu ni Elijah, agud magpangita sa ila mga katigulangan, kag magbuhat sang mga ordinansa sa templo para sa ila.26 Ang kalabanan sang mabug-at nga pag-alsa sa pagpadasig sa buluhaton sang kaluwasan para sa angay buhi kag minatay pagahimuon ninyo batan-on nga katawhan.27
Kon ang batan-on sa kada ward indi lamang magkadto sa templo kag maghimo sang mga bunyag para sa ila mga minatay apang magbuhat man upod ang ila mga panimalay kag iban nga mga katapo sang ward sa paghatag sang mga apelyedo para sa buluhaton pang-ordinansa nga ila buhaton, angay nga sila kag ang Simbahan daku nga mabugayan. Indi magbulobanta sing kulang sa impluhensya sang nagtaliwan sa pagbulig sa mga pagtinguha ninyo kag ang kasadya nga sa ulihi makit-an yadtong gin-alagaran ninyo. Ang walay katapusan kag makahulogan nga bugay sang pagpahiliugyon sang aton kaugalingon nga mga panimalay daw sa halos labaw sa paghangop.28
Sa bug-os kalibutan nga katapo sang Simbahan, singkwentay-uno ka porsiyento sang mga may edad ang sa karon wala ang mga duha ka ginikanan sa Family Tree nga bahin sang FamilySearch Internet site sang Simbahan. Saisyentay-singko porsiyento sang mga may edad ang wala sang nalista nga duha ka lolo kag duha ka lola.29 Dumdoma ninyo, nga kita nga wala sang aton mga gamot kag mga sanga indi sarang maluwas. Ang mga katapo sang Simbahan nagakinahanglan sa pagkuha kag pagbutang sining importanteng impormasyon.
Sa katapusan yara sa aton ang doktrina, mga templo, kag ang teknolohiya para sa mga panimalay agud matuman ining mahimayaon nga buluhaton sang kaluwasan. Ginapanugyan ko ang isa ka paagi nga ini mahimo. Ang mga panimalay sarang maghiwat sang isa ka “Family Tree nga Pagtililipon” Ini dapat paliwatliwat nga pagtinguha. Ang kada isa magdala sang yara na nga mga kasaysayan pangpanimalay, mga istorya, kag mga litrato, kalakip ang mga ginakahamut-an nga mga pagkabutang sang lolo kag lola kag mga ginikanan. Ang aton batan-on nga katawhan ginakunyag nga makahibalo parte sa mga kabuhi sang mga katapo sang panimalay - kon diin sila naghalin kag kon paano sila nangabuhi. Madamo ang nagpaulikid sang ila mga tagipusuon sa mga amay. Luyag gid nila ang mga istorya kag mga litrato, kag sila may kahanasan sa teknolohiya agud mag-scan kag mag-upload sining mga istorya kag mga litrato sa Family Tree kag mag-angot sa ginhalinan nga mga dokumento upod sa katigulangan agud sa pagpabilin sa mga ini para sa tanan nga panahon. Matuod, ang tunay nga katuyoan amo ang magpamat-ud kon ano nga mga ordinansa ang ginakinahanglan pa nga buhaton kag maghimo sang mga pagtalana para sa ginakinahanglan nga buluhaton sa templo. Ang My Family nga libreta sarang magamit agud magbulig sa pagsulat sa mga impormasyon pangpanimalay, mga istorya, kag mga litrato nga sarang dayon ma-upload sa Family Tree.
Ang pangpanimalay nga mga panaad kag mga ginalauman dapat yara sa ibabaw sang aton mga ulonahon agud amligan ang aton diosnon nga padulongan. Para sa yadtong nagapangita sang mas mabungahon nga paggamit sang Adlaw sa Pagpahuway para sa panimalay bilang kabilogan, ang pagpadasig sining buluhaton isa ka lugar nga maayo gid. Isa ka iloy malipayon gid nga naghambal kon paano ang iya diese-siete anyos nga anak nga lalaki naggamit sang kompyuter pagkatapos sang simba sa Domingo agud maghimo sang family history kag ang iya diyes anyos nga batang lalaki luyag gid magpamati sa mga istorya kag maglantaw sa mga litrato sang iya mga katigulangan. Ini nagbugay sa bug-os nga panimalay agud mabatyagan ang espiritu ni Elijah. Ang aton bilidhon nga mga gamot kag mga sanga dapat atipanon.
Si JesuCristo naghatag sang Iya Kabuhi bilang pagpasag-uli sa luyo sang iban. Ginsabat niya ang katapusan nga pamangkot ni Job. Ginlutos Niya ang kamatayon para sa tanan nga katawhan, nga indi naton sarang mahimo para sa aton mga kaugalingon. Apang, kita, sarang maghimo sang mga ordinansa sa luyo sang iban kag matuod nga mangin mga manluluwas sa Mount Zion30 para sa aton kaugalingon nga mga panimalay sa tuyo nga kita, upód sa ila, sarang mapahitaas kag subong man nga maluwas.
Nagasaksi ako sang nagapasag-uli nga sakripisyo sang Manluluwas kag sa kapat-oran sang plano sang Amay para sa aton kag sa aton mga panimalay. Sa ngalan ni JesuCristo, amen.