Ipakita Ang Inyo Pagtuo
Ni Elder Russell M. Nelson
Sang Korum sang Napulogduha ka mga Apostoles
Sa adlaw-adlaw nga tanan, sa inyo dalan pakadto sa walay katapusan nga padulungan, padakua ang inyo pagtuo. Ibantala ang inyo pagtuo! Ipakita ang inyo pagtuo!
Pinalangga nga mga kauturan, nagapautwas kami sang amon tudok nga mga balatyagon sang paghigugma kag pagpasalamat sa inyo. Kami nagapasalamat sang amon mga katungdanan sa inyo.
Sining ulihi nga paglupad sa eroplano, ang amon piloto nagwaragwag nga kami mag-atubang sang bulubagyo sa amon paghugpa kag ang tanan nga mga pasahero dapat seguruhon nga magtakod sang ila mga seat belts. Sa pagkamatuod, ang bulubagyo nag-abot. Yadto masyado gid ka maundag. Sa pihak sang pasilyo kag duha ka linya sang pulungkuan sa likod ko, ang isa ka nahadlok nga babaye kinulbaan. Upod sang kada isa ka makahaladlok kag naga-uyog nga pagsunggò, nagsinggit siya sing matunog. Ang iya bana nagtinguha nga mag-ulo-ulo sa iya pero ini walâ sing kapuslanan. Ang iya nerbiyoso nga mga singgit nagpadayon asta nga kami natapos makaagi sa puwesto sang bulubagyo kag mahilway nga naghugpa. Sa tinion sang iya kahangawa, ako naluoy sa iya. Kay man ang pagtuo amó ang bulong sa kahadlok, mahipos ako nga naghandom nga kontani napabakod ko ang iya pagtuo.
Sang ulihi, samtang ang mga pasahero nanaog sa eroplano, ang bana sang babaye nakighambal sa akon. Siya nagsiling, “Nagapangayo ako sang pagpasensya nga ang akon asawa nahadlok gid. Ang isa lang ka paagi nga siya akon maulu-ulohan amó ang pagsiling sa iya nga ‘Si Elder Nelson diri sa sini nga biyahe sa kahanginan, gani, indi ka dapat mahangawa.’”
Indi ako nakaseguro kon ang akon pagkaupod didto naghatag sa iya sang diutay nga kasulhay, pero ako magsiling nga isa sa mga kamatuoran sang mamalatyon nga kabuhi amó nga ang aton pagtuo tilawan kag hangkaton. Kon kaisa yadtong mga pagtilaw nagaabot samtang kitá nagaatubang sang daw ital-ital nga mga kahimtangan. Sa sining nahadlok nga babaye, ang mabaskog nga pag-uyog sang eroplano naghatag sang yadtong mga tinion sang kamatuoran nga ang aton pagtuo ginatilawan.
Kon kita nagahambal sang pagtuoang pagtuo nga nagapabalhin sang mga bukid − indi kita nagatuhoy sa kabilogan nga pagtuo apang sa pagtuo sa Ginuong JesuCristo. Ang pagtuo kay JesuCristo mapabakod samtang kitá nagatuon nahanungod sa Iya kag nagakabuhi sang aton relihiyon. Ang doktrina ni JesuCristo ginplano sang Ginuo nga magbulig sa pagpadaku sang aton pagtuo. Sa subong nga halambalon, bisan pa, ang tinaga nga relihiyon makahulugan sang lain-lain nga mga butang sa lain-lain nga mga tawo.
Ang tinaga nga relihiyon tinuod-tuod nagakahulugan “iangot liwat” ukon “ihigot liwat” sa Diyos.1 Ang pamangkot nga dapat naton ipamangkot sa aton mga kaugalingon amó ang, seguardo balá kita nga nagaangot sa Diyos agud nga ang aton pagtuo makit-an? Ukon kitá balá nagaangot sa iban nga butang? Halimbawa, nakabati ako sang mga pakighambalanay sang Lunes sang aga nahanungod sa mga propesyonal nga panghampang pagpabaskog nga natabo sang nagligad nga Domingo. Para sa iban nga masyado kamahilig nga mga tagahangad, nagakatingala ako kon ang ila “relihiyon” mag “angot liwat sa ila” sa isa lang ka tipò sang nagaumpok nga bola.
Ang kada isa sa aton dapat magpamangkot sa aton mga kaugalingon, diin ang aton pagtuo? Ini balá yara sa isa ka marka? Yara balá ini sa isa ka ginabantog nga tawo? Bisan ang pinakamaayo nga mga hubon panghampang malugaw-an. Ang mga bantog nga tawo mapalà. May Isa lang nga sa Iya ang inyo pagtuo padayon nga hilway, kag yara ina sa Ginuong JesuCristo. Kag kinahanglan nga inyo ipakita ang inyo pagtuo!
Ang Diyos nagpahayag sa Iya naunanga Napulo ka mga Kasuguan, “Indi kamo dapat nga may iban pa nga diyos-diyos sa akon atubang.” 2 Siya nagsiling man, “Magtulok kamo sa akon sa inyo tanan nga panghunahuna; indi kamo magduda, indi kamo magkahadlok.” 3 Pero kalabanan sa mga tawo nagatulok lang sa balanse sang ila banko para sa ila paghidaet ukon sa kapareho nga mga isigkatawo para sa mga modelo nga ila ginasunod.
Ang mga nagatatap sang mga pasyente, mga intelekwal nga mga tawo, kag mga politiko masami nga ginahatagan sang pagtilaw sa ila pagtuo. Sa paghangad sang ila mga padulungan, ang ila relihiyon ayhan nga makita ukon ini taguon nila? Sila balá nagaangot liwat sa Diyos ukon sa tawo?
May yara ako nga pareho sina nga pagtilaw napulo ka mga tuigan nga nagligad sang ang akon isa ka kaupod sa panudlo sa medisina nangakig sa akon kay indi ko ginseparar ang akon propesyonal nga ihibalo sa akon relihiyoso nga mga pagtuo. Siya nagpilit nga indi ko pag-iapid ang duha. Paano ko ina mahimo? Ang kamatuoran isa ka kamatuoran! Indi ini mapihak, kag ang ano man nga parte sini indi mabalhin.
Bisan ang kamatuoran maggwa halin sa laboratoryo sa siyensya ukon sa panagna, ang tanan nga kamatuoran nagahalin sa Diyos. Ang tanan nga kamatuoran bahin sang ebanghelyo ni JesuCristo. 4 Bisan pa, ginhambalan ako nga taguon ko ang akon pagtuo. Indi ako nagsunod sa pangabay sang akon kaupod. Ginpakità ko ang akon pagtuo!
Sa tanan nga propesyonal nga mga hilimuon, ang hugot nga mga talaksan sang pagkahimpit kinahanglanon. Ang mga may tinun-an nagapalangga sang ila kahilwayan sa pagpahayag. Pero ang himpit nga kahilwayan indi maagom kon ang bahin sang ihibalo sang isa indi ginabaton sang kasuguan sang mga tawo.
Ang espirituhanon nga kamatuoran indi puwede nga likawan − labi na gid ang mga diyosnon nga mga kasuguan. Ang pagtuman sa diyosnon nga mga kasuguan nagadala sang mga bugay, sa tanan nga tion! Ang paglapas sa diyosnon nga mga kasuguan nagadala sang pagkadula sang mga bugay, sa tanan nga tion!5
Ang mga problema madamo sa sini nga kalibutan bangud ini ginapuy-an sang indi himpit nga mga katawhan. Ang ila mga padulungan kag mga naluyagan mabug-at nga gina-impluhensya sang ila pagtuo ukon ang pagkawalâ sini. Ang kadam-an nagabutang sang iban nga pang-una nga mga hilimuon bag-o sa Diyos. Ang iban nagahangkat sang kaugnayan sang relihiyon sa moderno nga kabuhi. Nga sa kada panahon, karon subong may mga nagayaguta ukon nagatamay sa hilway nga pagpraktis sang relihiyon. Ang iban nagabasol pa gani sang relihiyon sa kon anuman nga mga kapiutan ang yara sa kalibutan. Sa kamatuoran, may mga tiyempo nga may mga kalainan nga nahimo sa ngalan sang relihiyon. Apang ang pagsunod sa tunay nga relihiyon sang Ginuo, nga nagakahulugan nga mangin isa ka matuod nga sumulunod ni JesuCristo, isa ka paagi sang kabuhi kag isa ka pang-adlaw- adlaw nga debosyon nga maghatag sang balaan nga paggiya. Samtang kamo nagakabuhi sang inyo relihiyon, kamo nagatuman sang inyo pagtuo. Kamo nagapakità sang inyo pagtuo.
Ang Ginuo nakahibalo nga ang Iya mga anak nagakinahanglan nga magtuon kon paano Siya makilala. “Kay masipot ang gawang,” ang Iya siling, “kag makitid ang dalan nga nagapadulong sa … pangkahitaasan … , kag diutay lang ang makasapo sini.” 6
Ang kasulatan nagahatag sang isa sa pinakamaayo nga mga paagi nga makita ang aton dalan kag magpadayon diri. Ang ihibalo sa kasulatan nagahatag man sang proteksyon. Halimbawa, sa kabilogan sang maragtas, ang mga impeksyon katulad sang “hilanat sang pagpamatà” nagpatay sa mga inosente nga mga nanay kag mga lapsag. Apang, ang Dumaan nga Testamento may tunay nga mga prinsipyo para magbulong sa mga na-impeksyon nga mga pasyente, nga ginsulat sobra na sa 3,000 ka tuig ang nagligad!”7 Ang kadam-an nagtaliwan bangud ang ila pagpangita sang ihibalo nga indi naglakip sa pagpamati sa pulong sang Ginuo!
Pinalangga ko nga mga kauturan, ano ang kulang sa aton mga kabuhi kon kita “padayon nga nagatuon, [apang] indi gid kitá makahangop sang kamatuoran?” 8 Makaangkon kitá sang daku nga ihibalo halin sa kasulatan kag magkuha sang inspirasyon paagi sa mga pangamuyo sang pagtuo.
Ang pangamuyo sang pagtuo nagabulig sa aton samtang kitá nagahimo sang pang-adlaw- adlaw nga mga desisyon. Labi na gid kon ang mga layi sang tawo ginahimo kag ginapatuman, ang mga layi sang Diyos dapat padayunon gid nga aton talaksan. Sa pag-atubang sang mga makalilibog nga mga butang, dapat unahon naton ang pagpangità sa giya sang Diyos.
Dapat naton “idapat ang tanan nga balaan nga mga kasulatan sa aton, … para sa aton kapuslanan kag tinun-an.”9 Ang katalagman malapit kon kitá nagahimud-os nga magpihak sang aton mga kaugalingon sa mga paghambal katulad sang “pribado ko nga kabuhi ini” ukon bisan pa “ang akon pinakamaayo nga pamatasan.” Kon ang isa nagatinguha nga ibalhinon ang iya kabuhi sa pagbulág sang mga bahin, indi gid siya maglabaw sa lubos nga kalibre sang kinaugalingon nga kadungganan − indi gid mag-abot sa katunayan sang iya matuod nga pagkatawo.
Ang pagsulay nga mangin bantog basi magpauna sa mga panghunahuna sang katilingban lapaw pa sa pulong sang Diyos. Ang pangpulitiko nga mga kampanya kag pangnegosyo nga mga pagmaneho nagagamit sang mga pagboto sang publiko sa pagporma sang ila mga plano. Ang mga kaabtanan sining mga pagboto nagahatag sing pasayod. Pero halos ini maggamit nga mga palatukuran sa sa pangatarungan nga maglalis sa mga kasuguan sang Diyos! Bisan pa nga “ang tanan nagahimo sini,”ang salâ indi gid husto. Ang kalalat-an, kasaypanan, kag ang kadulom indi gid mangin kamatuoran, bisan pa nga ang mga ini ginakilala. Ang paandam sang kasulatan gani nagapahayag: “Kaluluoy kamo nga nagatawag sang malaot nga maayo, kag sang maayo nga malaot; kag nagabutang sang madulom sa kasanag, kag kasanag sa madulom.”10
Pagkatapos sang World War I, ang kanta nga daw medyo may pangsekswal nga panugyan nangin uso. Sa pagpadelanto sang imoralidad, ini nagsumpa nga ang 50 ka milyon nga mga tawo indi gid magsalâ. Apang ang kamatuoran, ang 50 ka milyon nga mga tawo puwede nga magsalâ − lubos nga yara sa salâ. Ang imoralidad sa gihapon imoralidad sa mga mata sang Diyos, nga sa diin Siya sa isa ka adlaw maghukom sang tanan naton nga mga binuhatan kag mga kaluyagan.”11
Ipaanggid ang kahadlok kag ang pagkawalay pagtuo nga uso sa kalibutan subong sa pagtuo kag kaisog sang akon pinalangga nga babaying anak nga si Emily, nga karon didto na sa pihak nga kinabuhi. Sang ang mamalatyon nga kabuhi daw magtaliwan na sa iya lawas nga latum sa kanser daw halos siya makahambal. Apang upód sang yuhom sa iya nawong, siya nagsiling sa akon, “Daddy, indi ka magkabalaka sa akon. Nahibal-an ko maayo ang tanan sa akon!” Ang pagtuo ni Emily makita − nagabanaag nga makita − sa sinang malolô nga tion, sa sina mismo sang amon pagkakinahanglanon gid.
Ining matahom nga lamharon nga iloy sang lima ka anak may lubos nga pagtuo sa iya Langitnon nga Amay, sa Iya plano, kag sa walay katapusan nga kaayuhan sang panimalay. Segurado siya nga nag-angot liwat sa Diyos. Siya lubos nga matinumanon sa iya mga kasugtanan sa Ginuo kag sa iya bana. Ginhigugma niya ang iya mga anak apang siya may paghidaet, bisan nga malapit na ang iya pagbulág sa ila. Siya may pagtuo sa iya palaabuton, kag sa ila man, bangud may pagtuo siya sa aton Langitnon nga Amay kag sa Iya Anak.
Sang 1986, si Presidente Thomas S. Monson nagsiling: “Siyempre mag-atubang kita sang kahadlok, mag-agi sang pangyaguta, kag mag-atubang sang pagsupok. Mag-angkon kitá sang kaisog nga magsupak sa pangkabilogan nga mga pagsugot, kaisog nga magtindog sa prinsipyo. Ang kaisog nga indi nagakompromiso, nagadala sang yuhom sang pagpakamaayo sang Diyos. … Dumduma ninyo nga ang tanan nga tawo may mga kahadlok, pero ang mga nagaatubang sang ila kahadlok upód sang [pagtuo] may kaisog man.”12
Ang laygay ni Presidente Monson nagapadayon! Gani, naga-aampo ako sa inyo, pinalangga ko nga mga kauturan: Sa adlaw-adlaw nga tanan, sa inyo dalan pakadto sa walay katapusan nga padulungan, padakua ang inyo pagtuo. Ibantala ang inyo pagtuo! Ipakita ang inyo pagtuo!13
Nagapangamuyo ako nga kamo mag-angot liwat sa Diyos, nga ang Iya walay katapusan nga mga kamatuoran maukit sa inyo tagipusuon sa katubtuban. Kag nagapangamuyo ako nga, sa bug-os ninyo nga kinabuhi, ipakita ninyo ang inyo pagtuo! Sa ngalan ni JesuCristo, amen.