16:5

“Kon Ginahigugma Ninyo Ako, Tumanon Ninyo ang Akon mga Kasuguan”

Ni Elder Robert D. Hales

Sang Korum sang Napulogduha ka mga Apostoles

Ang paggamit sang aton pagbuót sa pagtuman nagakahulugan sang pagpili sa “paghimo sang husto [kag pagpaabot] sang kaabtanan nga magsunod.”

Mga kauturan, sa tanan nga mga panudlo nga aton natun-an halin sa kabuhi sang Manluluwas, walâ na sing mas maathag pa kag mas gamhanan sangsa panudlo sa pagkamatinumanon.

Ang ehemplo sang Manluluwas

Sa Premortal Council sa Langit, si Lucifer nagsupok sa plano sang Langitnon nga Amay. Ang mga nagsunod kay Lucifer nagtapos sang ila pagpadayon sa walay katapusan nga kabuhimag-andam kon sin-o ang inyo ginasunod!

Pagkatapos si Jesus nagpabutyag sang Iya kabubut-on sa pagsunod, sang Siya nagsiling, “Amay, ang imo kabubut-on ang mahimo, kag ang himaya mangin imo sa katubtuban.” ¹ Sa bug-os Niya nga pagministeryo, “siya nagbatas sang mga pagsulay apang Siya indi nagpamati sa [mga] yadto.”² Sa kamatuoran, [natun-an] niya ang pagkamatinumanon paagi sa mga butang nga iya gin-antus.”³

Bangud nga ang aton Manluluwas matinumanon, gintubos Niya ang aton mga salâ, agud kitá mabanhaw kag Siya naghanda sang banas nga kitá makabalik sa aton Langitnon nga Amay nga nakahibalo nga kita makahimo sing mga salâ sa aton pagtuon sang pagkamatinumanon diri sa mamalatyon nga kinabuhi. Kon kitá nagatuman, kitá nagabaton sang Iya halad, kay man kitá nagapati nga paagi sa Pagpasag-uli ni Cristo, ang tanan nga katawhan mahimo nga maluwas, paagi sa pagtuman sang mga layi, mga ordinansa kag mga kasuguan nga ginahatag sang ebanghelyo.⁴

Si Jesus nagtudlo sa aton sa pagtuman sa yano nga hambalanon nga madali mahangpan: “Kon ginahigugma ninyo ako, tumanon ninyo ang akon mga kasuguan,”⁵ kag “Magkari kamo, magsunod kamo sa akon.”⁶

Sang kitá ginabunyagan, kitá “nagadala sa [aton] sang ngalan ni Cristo” kag nagasulod “sa kasugtanan upód sa Diyos nga [kitá mag] mangin matinumanon tubtob sa katapusan sang [aton] mga kabuhi.” ⁷ Kada Domingo ginabag-o naton inang kasugtanan sang bunyag paagi sa pag-ambit sang sakramento kag nagasaksi nga buot kitá magtuman sang mga kasuguan. Nagapangayo kitá sang pagpatawad sa ano man nga mga hunahuna, mga balatyagon, ukon mga hinimuan nga indi nagakabagay sa kabubut-on sang aton Langitnon nga Amay. Samtang kitá nagahinulsol paagi sa pagpalayo sa pagkamalalison kag mag-umpisa nga magtuman liwat, nagapakita kitá sang aton paghigugma sa Iya.

Mga tipo sang Pagkamasinulundon

Samtang kitá nagatuman sang ebanghelyo, kita nagadaku sa aton paghangop sang pagkamatinumanon. Kon kaisa daw masulay kitá nga maghimo sang ginatawag ko nga “pagkamalalison sang kinaugali nga tawo,” nga sa diin ginasikway naton ang mga layi sang Diyos sa pagpabor sang aton kaalaman kag mga kaluyagan ukon basi pa ang pagkabantog. Bangud ini ginahimo sang kadamuan, ining kabadlongan nagapanubo sang mga talaksan sang Diyos sa aton kultura kag sa aton mga layi.

Kon kaisa ang mga miyembro daw nagaugyon sa “pinili nga pagkamatinumanon,” nga nagaakò sa paghigugma kag pagtahod sa Diyos samtang nagakagusto kag nagapili kon diin sa mga kasuguan kag mga panudlokag ang mga panudlo kag mga laygay sang mga propetaang lubos nga sundon nila.

Ang iban nagapili kon ano ang tumanon bangud indi sila nakamarasmas sang tanan nga mga rason sang isa ka kasuguan, katulad sang mga batà nga indi masami makahangop sang mga rason sang mga laygay kag mga pagsulundan sang ila mga ginikanan. Apang kitá sa gihapon nakahangop sang mga rason nga kitá nagasunod sa mga propeta, kay man ini ang Simbahan ni JesuCristo, kag ang Manluluwas amó ang nagagiya sa Iya mga propeta sa tanan nga mga dispensasyon.

Samtang ang aton paghangop sang pagkamasinulundon nagatubò, makilala naton ang importante nga papel sang pagpili. Sang si Jesus sa Hardin sang Gethsemane, nagpangamuyo Siya sing tatlo ka beses sa Iya Langitnon nga Amay, sa pagsiling, “O, Amay ko, kon mahimo, ilikaw mo ining pag-antus nga yari sa akon: pero indi sa akon pagbuót, apang sa imo pagbuót.” ⁸ Ang Diyos indi magpangibabaw sa pagbuót sang Manluluwas, apang maluluy-on Siya nga nagpadala sang anghel nga magpabakod sa iya Pinalangga nga Anak.

Ang Manluluwas nag-atubang sang isa pa ka pagtilaw sa Golgotha, nga sa diin sarang Siya magtawag sang panong sang mga anghel nga magpapanaog sa Iya sa krus, pero nagpili Siya nga magbatas sing matinumanon tubtob sa katapusan kag tapuson ang Iya halad sang pagpasag-uli, bisan pa nga ini nagkahulugan sang daku nga pag-antus kag kamatayon.

Ang espirituhanon nga pagtubò sa pagkamatinumanon amó ang “pagkamatinumanon sang Manluluwas.” Ini ginapahulag sang tunay nga paghigugma sa Langitnon nga Amay kag sa Iya Anak. Kon kitá nagabuót nga magtuman, katulad sang pagtuman sang Manluluwas, nagapalangga kitá sang mga pulong sang Langitnon nga Amay: “Ini ang akon pinalangga nga Anak, nga sa iya nahamuot ako.”⁹ Kag nagapaabot kitá nga mabatian, sa aton pagsulod sa atubang sang aton Amay sa Langit, “Maayo ang hinimuan mo, ikaw nga maayo kag masaligan nga suluguon: … dali … magkalipay ka upód sa imo agalon.”¹⁰

Ang paggamit sang aton pagbuót sa pagtuman nagakahulugan sang pagpili sa “paghimo sang husto [kag pagpaabot] sang kaabtanan nga magsunod.”¹¹ Ini nagakinahanglan sang kinaugalingon nga pagdaug kag nagadala sang pagsalig, walay katapusan nga kalipay, kag isa ka balatyagon sang pagkamadinalag-on sa aton kag, paagi sa ehemplo, sa mga yara sa aton palibot; kag padayon nga nagalakip ini sang tudok nga personal nga debosyon sa pagsakdag sa mga lider sang priesthood kag pagsunod sa ila mga panudlo kag mga laygay.

Mga Kaabtanan

Sa pagpili kon balá kità magtuman, ini makabulig sing padayon nga magdumdom sang mga kaabtanan sang aton mga pagpili. Si Lucifer balá kag ang iya mga sumulunod nakahangop sang mga kaabtanan sa pagpili nga magsupak sang plano sang Amay sa Langit? Kon amó man, ngaa balá nga siya naghimo sinang makahaladlok nga pagpili? Dapat kitá mamangkot sang amó man nga pamangkot: ngaa balá nga ang iban sa aton nagapili nga mangin malalison bisan pa nga nakahangop kitá sang mga walay katapusan nga kadangatan sang salâ? Ang kasulatan nagahatag sang sabat: ang rason nga si Cain kag ang iban nga mga anak ni Adan kag ni Eba nagpili nga magmalalison amó nga “mas palangga nila si Satanas sang sa Diyos.”¹²

Ang aton paghigugma sa Manluluwas amó ang yabi sa pagtuman katulad sang Manluluwas. Samtang kitá nagatinguha nga mangin masinulundon sa subong nga kalibutan, nagapahayag kitá sang aton paghigugma kag pagtahod sa tanan nga mga anak sang aton Amay sa Langit. Pero imposible nga ining paghigugma sa iban magbaylo sang mga kasuguan sang Diyos, nga ginhatag para sa aton kaayuhan! Halimbawa, ang sugo nga “indi ka … magpatay ukon maghimo sang daw katulad sina”¹³ ginpasad sa espirituhanon nga layi nga nagahilway sa tanan nga mga anak sang Diyos, bisan pa sa mga indi pa natawo. Ang madamo nga mga eksperyensya nagapakita nga kon indi naton ginasapak ining layi, ang di-maisip nga kalisud nagaabot. Apang ang iban nagapati nga puwede batunon ang pagpahulog sang indi pa natawo nga batà sa mga rason sang kagustuhan ukon kahapusan.

Ang pagpangatarungan sang pagkamalalison indi nagabaylo sang espirituhanon nga layi ukon ang iya sini kaabtanan pero nagapadulong sa kagamuhan, walay kalig-unan, pagdalang-dalang sa di-naandan nga mga banas, pagkadula, kag kagha. Bilang mga sumulunod ni Cristo, may sagrado kitá nga obligasyon sa pagsakdag sang Iya mga layi kag mga kasuguan kag mga kasugtanan nga aton ginapanaad sa aton kaugalingon.

Sang Disyembre 1831 ang iban nga mga lalaking kauturan gintawag nga magbulig pakalma sang di-maabyanon nga mga balatyagon nga naglapnag sa Simbahan. Paagi kay Joseph Smith nga propeta, ang Ginuo nag-ubay sa ila sa di-tumalagsahon kag makatilingala nga sistema:

“Patalangon ninyo ang inyo mga kaaway; tawgon sila nga mag-atubang sa inyo sa publiko kag sa pribado. …

“Gani, padalha sila sang ila mabaskog nga mga rason supak sa Ginuo.

“ …Walâ sing armas nga ginhimo batok sa inyo ang magmadinalag-on;

“Kag kon sin-o man ang mag-alsa sang iya tingog batok sa inyo sila pakahuy-an ko sa akon husto nga panahon.

“Gani, tumanon ninyo ang akon mga kasuguan; sila matuod kag himpit.”¹⁴

Mga Panudlo sa Balaan nga mga Kasulatan

Ang kasulatan punô sang mga ehemplo sang mga propeta nga nakatuon sang mga panudlo sang pagkamasinulundon paagi sa ila kaugalingon nga inagihan.

Si Joseph Smith natudlu-an sang mga kaabtanan sa pagsugot sa mga pamilit sang iya manugsakdag, abyan, kag manunulat nga si Martin Harris. Bilang sabat sa mga pang-ulo-ulo ni Martin, si Joseph nagpangayo sa Ginuo sang pahanugot nga ipahulam ang116 ka mga sinulat sang kamot nga mga pahina sang Libro ni Mormon agud ini mapakita ni Martin sa iya panimalay, pero ang Ginuo nagsiling kay Joseph nga indi siya magtugot. Si Martin nag-alungay kay Joseph nga mamangkot liwat sa Ginuo. Pagkatapos sang ikatlo nga pangabay ang Ginuo naghatag sang pahanugot sa lima ka mga tawo nga magsulit sang sinulat. “Sa pinakamaampuon nga kasugtanan si Martin nagpanaad sa sini nga kasugtanan. Sang pag-abot niya sa iya puluy-an, ang pamilit sang iban nag-abot sa iya, gani nalipatan niya ang iya sagrado nga pangako kag siya nagtugot nga ipakita ang sinulat sa iban, upód sang resulta nga paagi sa himbon sining mga tawo ini ginkuha sa iya mga kamot,”¹⁵ kag nadula ang mga sinulat.” Bilang resulta, si Joseph gin-akigan sang Ginuo kag ginkuhaan sang pahanugot nga magpadayon sa paglubad sang Libro ni Mormon. Si Joseph nag-antus kag naghinulsol sang iya kalapasan sa pagsugot sa mga pamilit sang iban. Pagkatapos sang malip-ot nga mga tinion, si Joseph gintugotan nga magpadayon sa iya trabaho sa paglubad. Si Joseph nakatuon sang importante nga leksyon sa pagkamasinulundon nga nagbulig sa iya sa bilog niya nga kinabuhi!

Ang propeta nga si Moses naghatag sang isa pa ka ehemplo. Sang si Moses masinulundon nga nag-asawa sang babaye nga Ethiopian, si Miriam kag si Aaron nagsupak sa iya. Apang ang Ginuo naakig sa ila nga nagsiling, “Kay [Moses] makighambal ako.”¹⁶ Ang Ginuo naggamit sining hitabo sa pagtudlo sa mga miyembro sang Simbahan sa aton dispensasyon. Sang 1830 si Hiram Page nagpahayag nga siya nakabaton sang bugna para sa Simbahan. Siya gintadlong sang Ginuo kag nagtudlo sa mga Santos, “Kamo dapat nga matinumanon sa mga butang nga akon ihatag sa kay [Joseph], bisan kay Aaron,”¹⁷ “kay man siya nagabaton sini bisan pa katulad sa kay Moses.”¹⁸

Ang pagkamatinumanon nagadala sang mga bugay, “kag kitá nagabaton sang bugay halin sa Diyos, ini paagi sa pagkamatinumanon sa sina nga layi nga sa diin ini ginabasihan.” ¹⁹

Ang pagkamatinumanon ginatudlo paagi sa ehemplo. Paagi sa kon paano kita nagakabuhi, nagatudlo kitá sa aton kabataan, “Magtuon sang kaalam sa imo pagkalamharon; huo, magtuon sa imo pagkalamharon sa pagtuman sang mga kasuguan sang Diyos.”²⁰

Ang pagkamatinumanon mauswagon nga nagapabaskog sa aton, nagapasarang sa maukod nga pagbatas sang nagapadayon nga mga pagsulay kag mga pagtilaw sa palaabuton. Ang pagkamasinulundon sa Gethsemane naghanda sa Manluluwas sa pagtuman kag magbatas tubtob sa katapusan sang Golgotha.

Pinalangga ko nga mga kauturan, ang mga pulong ni Alma nagapautwas sang mga balatyagon sang akon tagipusuon:

“Pinalangga ko nga mga kauturan, nagsiling ako sining mga butang sa inyo agud mahimo ko kamo nga mapukaw sa isa ka igbalatyag sang inyo tulumanon sa Diyos, agud mahimo kamo nga maglakat nga walay kasawayan sa iya atubang. …

“Kag karon luyag ko nga kamo mag mangin mapainubuson, kag mangin masinulundon kag malulô; … nga maukod sa pagtuman sang mga kasuguan sang Diyos sa tanan nga mga tinion.”²¹

Ako nagahatag sang akon pinasahi nga pamatuod nga ang aton Manluluwas buhi. Bangud Siya nagtuman, “ang tagsa ka tuhod magluhod, kag ang tagsa ka dila magtuad sa iya atubang … nga siya [aton Manluluwas].”²² Kabay pa nga higugmaon naton Siya sing tuman ka tudok kag magsalig sa Iya sing may pagtuo nga lubos nga kitá man magtuman, magsunod sa Iya mga kasuguan, kag magbalik nga magkabuhi kaupod sa Iya sa walay katapusan nga ginharian sang aton Diyos amó ang akon pangamuyo sa ngalan ni JesuCristo, amen.