Ginaabi-abi Kamo sa Konperensya

Ni Presidente Thomas S. Monson

Kita nagahiliugyon … sa aton pagtuo kag sa aton luyag nga magpamati kag makahibalo sang mga mensahe nga ihatag sa aton.

Pinalangga ko nga mga kauturan, malipayon gid ako nga agabi-abi sa inyo sa sining pangkalibutan nga konperensya sang Ang Simbahan ni JesuCristo sang Mga Santos sa Ulihing Mga Adlaw. Nagatililipon kita bilang isa ka dakung panimalay, kapin sa 15 milyones sa kadamuon, nagahiliugyon sa pagtuo kag sa aton luyag nga magpamati kag makahibalo sa mga mensahe nga ihatag sa aton.

Ang nagligad nga anum ka bulan madasig samtang ang buluhaton sang Simbahan nagpadayon nga walâ sing sablag. Kapin sa isa ka bulan ang nagligad, pribilihiyo ko nga magdedikar sang Gilbert Arizona Temple, isa ka matahom nga templo. Sa nagligad nga gab-i antes sa pagdedikar, isa ka pangkultura nga kahiwatan ang ginhimo sa malapit nga Discovery Park. Dose ka libo nga batan-on nga mga katawhan ang naghalad sang palagwaon sa 90-minuto nga programa. Ang sinaot, pag-amba, kag mga palagwaon pangmusika masyado gid kanami.

Ining duog nga nakaagi sang pinasahi nga panahon sang pagmala, kag nagapati ako nga madamo nga mga pangamuyo ang ginpadala palangit sang mga nagligad nga simana para sa pinakinahanglan gid nga ulan. Sa pagkawalay palad, ini nag-abot sing walâ madugay antes mag-umpisa ang palagwaon kag ini nagpadayon sa kabilogan sang programa! Walay sapayan nga ang mga lamharon nabasâ sang ulan kag gintugnawan, kami tanan nakabatyag sang Espiritu sang Ginuo. Ang tema sang programa, “Mangabuhi nga Matuod sa Pagtuo”isipon ninyo ina: “Mangabuhi nga Matuod sa Pagtuo”matahum nga ginpakita paagi sang nagayuhum kag mapagsik nga mga batan-on nga lalaki kag babaye. Walay sapayan sang katugnaw kag ulan, ini isa ka napunô sang pagtuo kag nakahatag sang inspirasyon nga inagihan sa ining mga lamharon nga katawhan nga makapabahandi sang padayon kag ila ma-istorya sa ila mga anak kag kaapohan sa palaabuton nga mga tinuig.

Sang masunod nga adlaw, ang pagdedikar sang Gilbert Arizona Temple ginhiwat. Ini nangin ika-142 nga nagaobra nga templo sang Simbahan. Di kasubong sang nagligad nga gab-i, ang adlaw sang pagdedikar matahom kag punô sang kasanag sang adlaw. Ang mga sesyon matuod nga naka-inspirar. Ang nagtambong upód sa akon amó sanday Presidente Henry B. Eyring, Elder and Sister Tad R. Callister, Elder and Sister William R. Walker, and Elder and Sister Kent F. Richards.

Sa Mayo ang Fort Lauderdale Florida Temple igadedikar. Ang iban nga mga templo gintalanà nga tapuson kag idedikar sa ulihi nga bahin sining tuig. Sa 2015 ginalauman namon ang pagtapos kag pagdedikar sang bag-o nga mga templo sa madamo nga mga bahin sang kalibutan. Ini nga paagi magpadayon. Kon ang tanan nga ginbantala na nga mga templo matapos, may yara kitá nga 170 ka nagaobra nga mga templo sa bug-os nga kalibutan.

Bisan nga kami karon nagatumod sang amon mga pagtinguha sa pagtapos sang nabantala na nga mga templo kag indi magbantala sang anuman nga bag-o nga mga templo sa malapit nga palaabuton, kami magpadayon sa paagi sa pagpat-od sang mga kinahanglanon kag sa pagpangita sang mga lugar para sa mga templo nga maabot pa. Ang mga pagbantala himuon sa palaabuton nga pangkabilogan nga mga konperensya. Kitá mga katawhan sang mga manugtukod sang templo kag mga manugtambong sang templo.

Karon, mga kauturan, kitá may kakunyag nga magpamati sa mga mensahe nga ihatag sa aton subong nga adlaw kag sa buas. Ang yadtong mga manugpamulongpulong sa aton nagpangayo sang bulig kag direksyon sang langit samtang sila naghanda sang ila mga mensahe.

Kabay pa nga tanan kitá, diri kag kon sa diin manmapunô sang Espiritu sang Ginuo kag matib-ong kag mahatagan sang inspirasyon samtang kitá nagapamati kag maghibalo. Sa ngalan ni JesuCristo, ang aton Manluluwas, amen.