Isa ka Bilidhon Nga Palanublion sang Paglaum
Ni President Henry B. Eyring
Unang Manuglaygay sa Unang Pangulohan
Kon kamo nagapili kon balá maghimo ukon magtuman sang isa ka kasugtanan sa Diyos, kamo nagapili kon balá kamo nagabilin sang palanublion sang paglaum sa mga nagasunod sa inyo ehemplo.
Pinalangga ko nga mga kauturan, ang iban sa inyo gin-agda sa sini nga miting sang mga misyonero sang Ang Simbahan ni JesuCristo sang mga Santos sa Ulihing mga Adlaw. Yadtong mga misyonero basi nag-agda na sa inyo nga magpili nga maghimo sang kasugtanan sa Diyos paagi sa pagpabunyag.
Ang iban sa inyo nagapamati bangud nagbaton kamo sang pangagda sang isa ka ginikanan, isa ka asawa, ukon basi ang isa ka batà, nag-agda sa inyo sa mga paglaum nga kamo magbuót nga ibutang ang inyo mga kasugtanan nga inyo na ginhimo upód sang Diyos sa tunga sang inyo mga kabuhi. Ang iban sa inyo nga nagapamati nagbuót na nga magbalik sa pagsunod sa Manluluwas kag nagabatyag subong sang kalipay sang Iya pag-abi-abi.
Kon sin-o man kamo kag kon diin man kamo, nagakapot kamo sa inyo mga kamot sang kalipayan sang mas madamo nga mga tawo sangsa inyo mahunahuna subong. Kada adlaw kag kada oras kamo makapili nga maghimo ukon magtuman sang isa ka kasugtanan sa Diyos.
Kon sa diin man nga yara kamo sa dalan sa pagpanubli sang halad sang waly katapusan nga kabuhi, kamo may kahigayunan nga magpakilala sa mga tawo sang banas padulong sa mas daku nga kalipayan. Kon kamo nagapili nga maghimo ukon magtuman sang isa ka kasugtanan upód ang Diyos, kamo nagapili nga magbilin sang palanublion sang paglaum sa mga yadto nga basi magsunod sa inyo ehemplo.
Kamo kag ako ginbugayan sang panaad sang ina nga palanublion. Daku ang utang ko sa akon malipayon nga kabuhi sa tawo nga indi ko gid nakilala diri sa mamalatyon nga kabuhi. Siya isa ka ilo nga nangin isa sa mga lolo ko sa tuhod. Ginbilinan niya ako sang bilidhon nga palanublion sang paglaum. Tuguti ako nga maghambal sa inyo sang bahin nga iya natigayon sa paghatag sa akon sining palanublion.
Ang iya ngalan amó si Heinrich Eyring. Siya nabun-ag sa daku nga manggad. Ang iya amay may daku nga propyedad sa Coburg, sa ginatawag na subong nga Germany. Ang iya iloy amó si Viscountess Charlotte Von Blomberg. Ang iya amay amó ang manugbantay sang mga duta sang Hari sang Prussia.
Si Heinrich magulang nga batang lalaki ni Charlotte kag ni Edward. Si Charlotte nagtaliwan sa edad nga 31, pagkatapos sang pagbun-ag sang iya ikatlo nga anak. Si Edward nagtaliwan man sang indi madugay pagkatapos sina, sang nadulaan siya sang tanan niya nga propyedad kag manggad sa napalpak nga puhunan. Kuwarenta lang ang iya edad. Ginbilin niya ang tatlo ka nailo nga mga anak.
Si Heinrich nga akon lolo sa tuhod, nadulaan sang mga ginikanan kag mga kalibutanon nga mga palanublion. Ginsulat niya sa iya maragtas nga ang iya pinakamaayo nga paglaum amó ang pagkadto sa America. Bisan pa nga walâ siya sing panimalay ukon mga abyan didto, may balatyagon siya sang paglaum nahanungod sa pagkadto sa America. Una siya nga nagkadto sa New York City. Sang ulihi siya nagsaylo kaupod ang iya manghud nga babaye sa St. Louis, Missouri.
Sa St. Louis, isa sang iya kaupod sa trabaho isa ka miyembro sang Simbahan. Paagi sa iya nakabaton siya sang kopya sang libreta nga ginsulat ni Elder Parley P. Pratt. Ginbasa niya ini kag gintun-an niya ang tanan nga pulong nga iya naangkon nahanungod sa mga Santos sa Ulihing mga Adlaw. Nagpangamuyo siya nga mahibal-an kon balá matuod nga may mga anghel nga nagapakita sa mga tawo, kon balá may yara nga buhi nga propeta, kag kon balá masapwan niya ang matuod kag binugna nga relihiyon.
Pagkatapos sang duha ka bulan sang matutom nga pagtuon kag pagpangamuyo, si Heinrich nagdamgo nga sa diin ginhambalan siya nga magpabunyag. Ang tawo nga ang ngalan kag priesthood ginadumdom ko sing balaan sa akon isip, si Elder William Brown, amó ang naghimo sining ordinansa. Si Heinrich ginbunyagan sa palaliguan sang tubig sang ulan sang Marso 11, 1855, sang alas 7:30 sang aga.
Nagapati ako nga si Heinrich Eyring nakahibalo sadto nga ang akon ginatudlo subong matuod. Nakahibalo siya nga ang kalipayan sang walay katapusan nga kabuhi nagaabot paagi sa mga pag-ugyon nga nagapadayon sa katubtuban. Bisan pa nga siya indi lang madugay nga nakasapo sang plano sang kalipayan sang Ginuo, siya nakahibalo nga ang iya paglaum sa walay katapusan nga kalipay nagdepende sa libre nga mga pagpili sang iban nga magsunod sa iya ehemplo. Ang iya paglaum sa walay katapusan nga kalipay nagdepende sa mga tawo nga indi pa nabun-ag.
Bilang bahin sang palanublion sang paglaum sang panimalay, siya nagbilin sang maragtas sa iya mga kaliwatan.
Sa sina nga maragtas nabatyagan ko ang iya paghigugma sa amon nga nagasunod sa iya. Sa iya mga pulong nabatyagan ko ang paglaum nga ang iya mga kaliwatan magpili sa pagsunod sa iya sa banas pakadto sa aton langitnon nga puluy-an. Nahibal-an niya nga indi ini isa ka daku nga pagpili apang pagpili sang madamo nga diutay nga mga pagpili. Ako nagapahayag sang iya ginsiling gikan sa iya maragtas:
“Halin sang tion nga nabatian ko si Elder Andrus nga nagpamulongpulong … padayon ako nga nagtambong sang miting sang mga Santos sa Ulihing mga Adlaw kag ang mga okasyon nga ako [nag] palta sa pagtambong sang miting masyado ka lakâ gid bangud ini akon katungdanan.
“Ako nagmitlang sini sa akon maragtas agud nga ang akon mga anak magsunod sang akon ehemplo kag indi gid magpabaya-baya … sining importante nga katungdanan [sa pagpakigbuylog] sa mga Santos.” 1
Si Heinrich nakahibalo nga sa pangsakramento nga mga miting sarang bag-uhon ang aton panaad sa pagpanumdom sa Manluluwas kag mag-angkon sang Iya Espiritu.
Ina ang Espiritu nga nagsakdag sa iya sa iya misyon nga sa diin siya gintawag lamang sang pila lang ka bulan pagkatapos nga mabunyagan siya. Ginbilin niya bilang palanublion ang iya ehemplo sa pagkamatinuuron sa iya misyon sa sulod sang 6 ka tuig sa ginatawag sang una nga Indian Territories. Sa pagbaton sang iya pagbuhi sa misyon, naglakat siya kag nag-ugyon sa bagon halin sa Oklahoma pakadto sa Salt Lake City, sang may kalayuon nga lapit sa 1,100 ka milya (1,700 ka kilometro).
Walâ madugay pagkatapos sina siya gintawag sang propeta sang Diyos nga magsaylo sa bagatnan nga bahin sang Utah. Halin didto nagsabat siya sang isa pa ka panawag nga magmisyon sa iya kinatawhan nga Germany. Pagkatapos nagbaton siya sang pangagda sang Apostol sang Ginuong JesuCristo nga magbulig sa pagtukod sang mga puluy-anan sang mga Santos sa naaminhan nga bahin sang Mexico. Halin didto siya gintawag liwat nga mangin lubos-panahon nga misyonero. Ginpadunggan niya ang yadtong mga katungdanan. Siya ginlubong didto sa gamay nga lulubngan sa Colonia Juárez, Chihuahua, Mexico.
Ginadeklarar ko ining mga kamatuoran indi nga mag-angkon sang iya pagkadungganon ukon sang iya hinimuan ukon para sa akon mga kaliwatan. Ginadeklarar ko ang mga ini sa pagpadungog sa iya mga ehemplo sang pagtuo kag paglaum nga yadto sa iya tagipusuon.
Ginbaton niya yadtong mga panawag bangud sang iya pagtuo nga ang nabanhaw nga Cristo kag ang aton Amay sa Langit nagpakita kay Joseph Smith sa mga kakahuyan sa estado sang New York. Ginbaton niya ang mga panawag bangud siya may pagtuo sa mga yabi sang priesthood sa Simbahan sang Ginuo nga ginbalik nga may gahum sa walay katapusan nga paghugpong sang mga panimalay, kon sila may tumbas nga pagtuo sa ila mga kasugtanan.
Katulad ni Heinrich Eyring nga isa sang akon katigulangan, basi ikaw nauna sa inyo panimalay nga magtuytoy pakadto sa walay katapusan nga banas sa sagrado nga mga kasugtanan nga gintuman sing may kaukod kag may pagtuo. Ang kada isa nga kasugtanan nagadala upód diri ang mga katungdanan kag mga panaad. Para sa tanan sa aton, katulad sa kay Heinrich, ang inang mga katungdanan kon kaisa simple apang masami nga mabudlay. Pero panumdumon ninyo, ang mga katungdanan kon kaisa dapat nga mabudlay bangud ang ila katuyuan amó ang pagduso sa aton sa banas nga magkabuhi kaupod ang Langitnon nga Amay kag ang Iya Pinalangga nga Anak nga si JesuCristo, sa mga panimalay.
Madumduman ninyo ang mga pulong halin sa libro ni Abraham:
“Kag didto nagtindog ang isa nga upód nila nga katulad sang Diyos, kag siya nagsiling sa mga upód niya: Magpanaog kitá, kay may lugar didto, kag magdala kitá sining mga materyales, kag magtuga kitá sang kalibutan nga sa diin ang mga ini magpuyô.
“Kag magpamatuod sa ila diri, kon balá himuon nila ang tanan nga mga butang nga ano man nga isugo sa ila sang Ginuo nga ila Diyos;
“Kag sila nga nagtuman sang ila una nga ginpuy-an hatagan sang madamo pa; kag ang mga indi nagtuman sang ila una nga ginpuy-an indi makabaton sang himaya sa ginharian kaupod sang mga yadtong nagtuman sang ila una nga ginpuy-an; kag sila nga nagtuman sang ila ikaduha nga ginpuy-an hatagan sang himaya nga walay katapusan.”2
Ang pagtuman sang aton ikaduha nga ginpuy-an nagadepende sa aton paghimo sang mga kasugtanan sa Diyos kag ang matutom nga nagahimo sang aton mga katungdanan nga ginakinahanglanon. Ini nagakinahanglan sang pagtuo kay JesuCristo bilang aton Manluluwas nga magtuman sang aton mga kasugtanan sa bug-os nga kinabuhi.
Bangud si Adan kag si Eba matuod nga napukan, kitá may pagsulay, mga pagtilaw, kag kamatayon bilang aton pangkalibutan nga palanublion. Apang ang Langitnon nga Amay nga hatag sa aton sang dulot sang Iya Pinalangga nga Anak, nga si JesuCristo, ang aton Manluluwas. Inang daku nga dulot kag bugay sang Pagpasag-uli ni JesuCristo nagadala sang pangkalibutan nga palanublion: ang panaad sang Pagpasag-uli kag ang posibilidad sang walay katapusan nga kabuhi sa tanan nga natawo.
Ang pinakadaku sa tanan nga mga bugay sang Diyos, ang walay katapusan nga kabuhi, mag-abot sa aton lamang kon kitá nagahimo sang mga kasugtanan nga ginhatag sa matuod nga Simbahan ni JesuCristo paagi sa Iya may awtoridad nga mga alagad. Bangud sa Pagkapukan, tanan kitá nagakinahanglan sang pagpatinlo nga kaabtanan sang pagbunyag kag ang pagpadapat sang mga kamot sa pagbaton sang dulot sang Balaan nga Espiritu. Ining mga ordinansa dapat nga himuon sang yadto nga may matuod nga awtoridad sang priesthood. Pagkatapos, sa pagbulig sang Espiritu ni Cristo kag sang Balaan nga Espiritu, makatuman kitá sang tanan nga mga kasugtanan nga aton ginahimo sa Diyos, labi na ang mga yadto nga ginahatag sa Iya mga templo. Sa ina lang nga paagi, kag sina nga pagbulig, makaangkon ang sin-o man sang iya makatarungan nga palanublion bilang anak sang Diyos sa isa ka panimalay nga walay katapusan
Sa iban nga nagapamati sa akon, daw ina isa ka halos walay pag-asa nga damgo.
Nakakita kamo sang mga kalisud sang matinumanon nga mga ginikanan sa ila mga anak nga nagsikway ukon mga nagpili nga maglalis sang ila mga kasugtanan sa Diyos. Apang inang mga ginikanan makasalapo sang kasulhay kag paglaum sa eksperyensya sang iban nga mga ginikanan.
Ang lalaking anak ni Alma kag ang mga lalaking anak ni Haring Mosiah naghalin sa ila masidhi nga pagrebelde batok sa mga kasugtanan kag mga kasuguan sang Diyos. Si Alma nga Lamharon nakasaksi sang iya anak nga si Corianton nga nagliso halin sa binastos nga mga salâ pakadto sa matutom nga pag-alagad. Ang Libro ni Mormon nagasulat man sang mga milagro sang mga Lamanites sa pagsikway sang mga kina-andan nga pagdumot sa mga makatarungan pakadto sa paghimo sang kasugtanan nga magpakamatay sa pagpadayon sang paghidaet.
Ang anghel ginpadala sa kay Alma nga lamharon kag mga lalaking anak ni Mosiah. Ang anghel nag-abot bangud sang pagtuo kag mga pangamuyo sang ila mga amay kag mga katawhan sang Diyos. Sa yadtong mga ehemplo sang gahum sang Pagpasag-uli nga nagamadinalag-on sa mga tagipusuon sang mga tawo, kamo makabaton sang kaisog kag kasulhay.
Ang Ginuo naghatag sa aton sang tanan nga ginatunaan sang paglaum samtang kitá nagahiwaos nga magbulig sa yadtong naluyag nga magbaton sang walay katapusan nga palanublion. Siya naghimo sang mga pangako sa aton samtang kitá padayon nga nagatinguha nga magtipon sang sang mga katawhan sa Iya, bisan pa nga sila nagapamatok sa Iya pangagda nga maghimo sina. Ang ila pagsupok nagapasubô sa Iya, pero Siya indi naga-untat, ukon kitá man. Nagahatag Siya sang himpit nga ehemplo para sa aton sa Iya mabatason nga pagpalangga: “Kag sa liwat, daw ano kasunson nga buót ko kuntani kamo nga panipunon subong sang isa ka munga nga nagapanipon sang iya mga pisô sa idalom sang iya mga pakpak, huo, O, kamong katawhan sang panimalay ni Israel, nga nahulog; O kamong katawhan sang panimalay ni Israel, kamo nga nagpuyô sa Jerusalem, subong sa inyo nga nahulog; huo, daw ano kasunson nga buót ko kuntani kamo nga panipunon subong sang isa ka munga nga nagapanipon sang iya mga pisô, kag indi kamo buót.” 3
Makadepende kita sa sinang di-nagalubad nga luyag sang Ginuo nga magpabalik sa mga espiritung anak sang Langitnon nga Amay sa ila puluy-an kaupod sa Iya. Ang kada isa ka matinumanon nga ginikanan, kag lolo- lola, kag lolo-lola-sa tuhod nagapakig-ambit sa sinang kaluyagan. Ang aton Amay sa Langit kag ang Manluluwas amó ang himpit nga mga ehemplo sang kon ano ang mahimo kag dapat naton himuon. Sila indi gid nagapamilit sa aton pagpili sang katarungan. Sila nagabulig nga mahangpan naton ang kamatarungan, kag aton maangkon ang kalipay sa pagpili sang katarungan.
Ang tanan nga nabun-ag diri sa kalibutan nagabaton sang Kapawa ni Cristo, nga nagabulig nga makita naton kag mabatyagan kon ano ang husto kag indi tama. Ang Ginuo nagapadala sang mamalatyon nga mga alagad nga makabulig, paagi sa Balaan nga Espiritu, nga kitá makahangop sang dapat Niya ipahimo sa aton kag kon ano ang Iya ginadumilian. Ang Diyos nagaganyat sa aton nga magpili sang katarungan paagi sa pagpabatyag sa aton sang mga kaabtanan sang aton mga pagpili. Kon magpili kit´sang maayo, makagum kitá sang kalipay − sa hingapusan. Kon kitá magpili sang kalainan, mag-abot ang kalisud kag paghinulsol − sa hingapusan. Inang mga kaabtanan segurado. Sila kon kaisa ginaawat nga may kabangdanan. Kon ang mga bugay yara dayon, ang pagpili sang kaayuhan indi nagapasad sang pagtuo. Kag bangud nga ang kalisud kon kaisa ginaawat man sing masyado kadugay, nagakinahanglan sing pagtuo nga mabatyagan ang paghinulsol para sa salâ sing mas temprano pa sangsa matapos nga kitá makabatyag sang ila sini malisud kag masakit nga mga kaabtanan.
Si Father Lehi nagkalisud sa mga pagpili sang iya mga lalaking anak kag sang ila mga panimalay. Siya isa ka dungganon kag maayo nga tawo − isa ka propeta sang Diyos. Siya masami nga nagpamatuod sa ila sang aton Manluluwas, nga si JesuCristo. Siya ehemplo sang pagkamatinumanon kag pag-alagad sang siya gintawag sang Ginuo nga magbiya sang iya mga pagkabutang agud maluwas ang iya panimalay sa kapahamakan. Sa hingapusan sang iya kabuhi, padayon siya nga nagpamatuod sa iya mga anak. Katulad sang Manluluwas − kag bisan pa sang iya gahum nga mahibal-an ang ila mga tagipusuon kag malantaw ang palaabuton pareho nga masubo kag maayo gid − si Lehi nagpadayon sa pagbulig sa ila pakadto sa kaluwasan.
Subong minilyon nga mga kaliwatan ni Father Lehi ang nagapakamatarong sang paglaum para sa ila.
Ano ang aton himuon sa natun-an nga halimbawa ni Nephi? Mahimo ninyo ini paagi sa pagpangamuyo kon kamo nagatuon sang balaan nga mga kasulatan kag paagi sa pagpanilag.
Nagapangabay ako nga kamo magpadumdom sang kalabaan kag kalip-utan sang panahon samtang kamo nagatinguha nga maghatag sang paglaum sa inyo panimalay. Sa malip-ot nga tion, may mga gamo kag si Satanas magsulay sa aton. Kag may mga butang nga dapat hulaton sing may pagpasensya, pagtuo, sa pagkahibalo nga ang Ginuo nagahulag sa Iya ginbuót nga tiyempo kag sa Iya kaugalingon nga paagi.
May mga butang nga puwede unahon, kon ang inyo mga pinalangga bata-on pa. Panumduma ninyo nga ang pang-adlaw-adlaw nga pangamuyo sang panimalay, pangpanimalay nga pagtuon sang kasulatan, kag ang pagpaambit sang aton pagpamatuod sa miting sang sakramento mas mahapos kag mas epektibo kon ang aton mga bata gamay pa. Ang gamay nga kabataan masami nga mas sensitibo sa Espiritu sang sa aton pagkahibalo.
Kon sila may edad na, madumduman nila ang mga himno nga ginkanta nila kaupod sa inyo. Bisan sobra pa sa ambahanon, madumduman nila ang mga pulong sang kasulatan kag ang pagpamatuod. Ang Balaan nga Espiritu magpahanumdom sa ila sang tanan nga butang, pero ang mga pulong sang kasulatan kag mga himno magpadayon sing pinakamadugay. Ang inang mga handurawan mag-impluhensya sa ila nga magbalik kon sila magtalang sa kapanahunan, possible nga madugay, halin sa alagyan sang puluy-an padulong sa walay katapusan nga kabuhi.
Kinahanglan naton ang malaba nga pag-isip kon ang inang pinalangga naton na-impluhensya sang kalibutan kag ang balatyagon sang pagduda daw nagadaug sa ila pagtuo. Kitá may pagtuo, paglaum kag may putli nga paghigugma ni Cristo nga magtuytoy sa aton kag magpabakod sa ila.
Nakita ko ini bilang manuglaygay sang duha ka buhi nga mga propeta. Sila mga tawo nga may kinaiya nga mga personalidad. Apang sila nagapakig-ambit sang walâ nagalubad nga kapagsik. Kon may nagapautwas sang kabalaka nahanungod sa isa ka butang sa Simbahan, ang ila pinakamasami nga tugda amó ang “Ah, inang mga butang mahatagan sang kalubaran.” Sa kabilogan sila mas nakahibalo sang problema sangsa mga nagapautwas sang kabalaka.
Sila padayon nga nakahibalo sang paagi sang Ginuo, kag gani masami sila nga nagalaum nahanungod sa Iya ginharian. Sila nakahibalo nga Siya ang pangulo. Siya lubos nga gamhanan kag nagahamil-ay sa aton. Kon ginatugotan ninyo nga Siya ang mangin pangulo sang inyo panimalay, ang mga butang malubad.
Ang iban nga mga kaliwatan ni Heinrich Eyring daw nagtalalang. Pero ang madamo niya nga mga kaapuhan-sa-duha-ka-tuhod nagakadto sa mga templo sang Diyos alas 6:00 sa aga sa paghimo sang mga ordinansa para sa ila mga katigulangan nga indi man nila nakilala. Nagagwa sila bangud sang palanublion sang paglaum nga iya ginbilin. Siya nagbilin sang palanublion nga ginaangkon sang madamo niya nga mga kaliwatan.
Pagkatapos sang tanan naton nga mahimo sa pagtuo, ang Ginuo magpakamatarong sang aton mga paglaum para sa mas daku nga mga bugay para sa aton mga panimalay sang sa aton maisip. Luyag Niya ang pinakamaayo para sa ila kag para sa aton, bilang Iya mga anak.
Tanan kitá mga anak sang buhi nga Diyos. Si Jesus sang Nazareth Iya Pinalangga nga Anak kag ang aton nabanhaw nga Manluluwas. Ini Iya Simbahan. Sa ini diri ang Iya mga yabi sang priesthood, kag gani ang mga panimalay puwede nga mangin walay katapusan. Ini ang aton bilidhon nga palanublion sang paglaum. Nagasaksi ako nga ini matuod sa ngalan sang Ginuong JesuCristo, amen.