Espirituhanon nga mga Buhawi
Ni Elder Neil L. Andersen
Sang Korum sang Napulogduha ka mga Apostoles
Indi ninyo pagtuguti nga ang mga buwahi magbutong sa inyo paidalom. Ini inyo mga panahonsa pagtindog sing malig-on bilang mga sumulunod ni Ginuong JesuCristo.
Ginatamyaw ko kamo sini nga aga labi na gid ang mga lamharon nga yari diri sa Conference Center kag sa bilog nga kalibutan. Ang inyo isa ka pinili nga henerasyon sang padulungan, kag ako nagahambal labi na gid sa inyo.
Sang madamo nga tuig ang nagligad sang ako nagdu-aw sa akon panimalay sa Florida, ang buhawi nagtupa malapit sa amon. Ang isa ka babaye, nga nagapuyo sa mobile home, nagsulod sa palaliguan para mahilway. Ang iya mobile home nag-umpisa nga nag-uyog. Pila ka tinion ang naglipas, kag nabatian niya ang tingug sang iya kasilingan: “Yari ako sa sala.” Sa paggwa niya sa palaliguan, siya nakibot, nga madiskubrihan nga ang buhawi naghakwat sang iya mobile home sa kahanginan, naghugpa sing tadlong sa ibabaw sang mobile home sang iya kasilingan.
Mga batan-on ko nga mga abyan, ang kalibutan indi malinong nga lugar pakadto sa Ikaduhang Pagkari sang Manluluwas. Ang balaan nga kasulatan nagpahayag “ang tanan nga mga butang magkinagamo.” 1 Si Brigham Young nagsiling, “Ginbugna sa akon sa una nga maragtas sang Simbahan, nga ang Simbahan maglambo, magtubò, mag-uswag, kag magdaku, kag kaangay sa paglambo sang Ebanghelyo sa mga kapungsuran sang kalibutan, amó man nga ang gahum ni Satanas magdaku.” 2
Ang mas makabalaka pa sang sa panagna sang mga linog kag mga inaway3 amó ang mga espirituhanon nga mga buhawi nga maggabot sang inyo espirituhanon nga mga sadsaran kag magdala sa inyo espiritu sa mga lugar nga indi gid ninyo possible nga naisip, kon kaisa nga indi ninyo natalupangdan nga kamo gali ginhalin na didto.
Ang pinakamalala nga mga buhawi amó ang mga pagsulay sang kaaway. Ang kasal-anan isa ka bahin sang kalibutan halin sang una, pero indi ini nangin malapit, indi mapaumpawan, kag ginabaton sing mas mahapos pa sang sa subong. May yara, huo naman, nga isa ka gamhanan nga puwersa nga magdaug sa mga buhawi sang kasal-anan. Ini ginatawag nga paghinulsol.
Indi nga ang tanan nga mga buhawi inyo kahimuan. Ang iban nagaabot bangud sa mga di-husto nga mga pagpili sang iban, kag ang iban nagaabot bangud ini isa ka mamalatyon nga kabuhi.
Sang siya diutay nga bata, si Presidente Boyd K. Packer nag-antus sang manugpalupog nga balatian sang polyo. Sang si Elder Dallin H. Oaks pito ka tuig, ang iya amay hinali lang nga nagtaliwan. Sang si Sister Carol F. McConkie sang Pangkabilogan nga Pangulohan sang Young Women isa ka dalagita, ang iya mga ginikanan nagdiborsyo. Ang mga pagtilaw nagaabot sa inyo, apang kon kamo nagasalig sa Diyos, sila makapabakod sang inyo pagtuo.
Sa kinaiyahan, ang mga kahoy nga nagatubo sa mahangin nga palibot nagatubo sing mas mabakod. Samtang ang mga hangin nagahampas sa palibot sang linghud nga kahoy, ang mga puwersa sa sulod sang kahoy naghimo sang duha ka butang. Nahauna, sila nagapapagsik sa mga gamut nga magtubo sing madali kag maglabà. Ikaduha, ang mga puwersa sa kahoy naga-umpisa nga magtuga sang selula nga mga porma nga sa katunayan nagahimo sang mga punò kag mga sanga nga madamol kag mas maunat sa mga puwersa sang hangin. Ang ining mabaskog nga mga gamut kag mga sanga nagataming sa kahoy sa mga hangin nga segurado gid nga magbalik.4
Kamo indi maisip nga mas bilidhon sa Diyos sang sa kahoy. Kamo Iya anak nga lalaki ukon anak nga babaye. Ginhimo Niya ang inyo espiritu nga mabakod kag maunat sa mga buhawi sang kabuhi. Ang mga buhawi sa inyo lamharon nga kabuhi, katulad sang hangin nga nagahampas sa kahoy, makapadaku sang inyo espirituhanon nga kabakod, nga maghanda sa inyo sa palaabuton nga katuigan.
Paano kamo maghanda sa inyo mga buhawi? “Dumduma … nga sa bató sang aton Manunubos, nga amó si Cristo, nga anak sang Diyos, nga kamo kinahanglan gid nga magpasad sang inyo sadsaran; agud nga kon ang yawa magpadala sang iya mamadlos nga mga hangin, … sang iya baslay sa buhawi, … kon ang tanan niya nga bató nga yelo kag ang iya mabaskog nga dalimuos magtupa sa inyo,, mangin walâ ini sing gahum … sa pagguyod sa inyo paidalom … tungod sang bató nga sa diin kamo napasad.” 5 Ini ang inyo kaluwasan sa buhawi.
Si Presidente Thomas S. Monson nagsiling: “Nga sa diin sang una nga ang mga salandigan sang Simbahan kag ang mga palatukuran sang katilingban daw husto nga nagsantuanay, subong may isa ka daku nga kalayô sa aton katung-an, kag ini masyado nga nagalapad pa.” 6 Ining kalayô, para sa iban, nagapalihok sang espirituhanon nga mga buhawi. Tugoti ako nga magpaambit sang isa ka halimbawa.
Sang nagligad nga bulan ang Unang Pangulohan kag ang Korum sang Napulogduha ka mga Apostoles nagbathala sang isa ka sulat a mga lider sang Simbahan sa bug-os nga kalibutan. Mabasa sa isa ka bahin: “Ang mga balhin sa layi sang pangkatilingban indi, kag indi gid, makabaylo sa katarungan nga layi nga ginpasad sang Diyos. Ang Diyos nagapaabot nga kita magsakdag kag magtuman sang Iya mga kasuguan bisan pa nga laín ang mga panghunahuna kag mga huyog sang pangkatilingban. Ang Iya layi sang pagkaputli maathag: ang mga kaangtanan nga sekswal bagay lang sa tunga sang isa ka lalaki kag isa ka babaye nga kinasal sunô sa layi kag kasuguan. Ginaahâ namon kamo nga suliton ninyo … ang doktrina nga yara sa ‘The Family: A Proclamation to the World.’” 7
Samtang ang kalibutan nagapalayô sa mga layi sang pagkaputli sang Ginuo, si Presidente Monson nagsiling: “Ang Manluluwas sang katawhan naglarawan sa Iya kaugalingon nga diri sa kalibutan pero indi makalibutanon. Kitá man puede nga diri sa kalibutan pero indi mangin makalibutanon samtang kitá nagasikway sang mga di-tama nga mga ideya kag mga di-husto nga mga panudlo kag magpadayon nga matuod sa sina nga ginasugo sang Diyos.” 8
Samtang madamo ang mga gubiyerno kag mga tawo nga may tuyò nga husto nagaliwat sang kahulugan pag-asawahay, ang Ginuo indi. Sa pinakaginsuguran, Siya nagsugod sang pag-asawahay sa tunga sang isa ka lalaki kag isa ka babayesi Adan kag si Eba. Gintumod Niya nga ang mga katuyuan sang pag-asawahay labaw pa sa mga kalipayan kag kadalag-an sang mga may edad, sa, labing mas importante, magpaayo sang huwaran nga palibot sa mga kabataan nga matawo, masapupo, kag mapadaku. Ang mga panimalay amó ang manggad sang langit.9
Ngaa nga nagapadayon kitá nga maghambal nahanungod sini? Sa ginsiling ni Pablo, “Kay walâ namon ginpasulabi ang mga butang nga amon makita diri, kundi ginapasulabi namon ang mga butang nga indi makita.” 10 Bilang mga apostoles sang Ginuong JesuCristo, ang amon katungdanan amó ang pagtudlo sang plano sang Manugtuga para sa Iya mga anak kag magpaandam sang mga kaabutan sang paglalis sang Iya mga kasuguan.
Sining ulihi lang, nakigsugilanon ako sa Laurel sa Estados Unidos. Ihambal ko liwat ang iya ginsulat sa email:
“Sa sining nagligad nga tuig ang iban ko nga mga abyan sa Facebook nag-umpisa nga magsulat sang ila panindugan sa pag-asawahay. Ang madamo nagpabor sang pag-asawahay sang kapareho nga seks kag ang madamo nga batan-on nga mga LDS nagpabutyag nga sila ‘gusto’ sa mga sinulat didto. Walâ ako sing ginsiling.
“Nagdesisyon ako nga magpahayag sang akon pagtuluohan sa kasal sa madinumdumon nga paagi.
“Kaupod sang larawan sang akon nawong, nagdugang ako sang titulo, ‘Ako nagapati sa kasal sang isa ka lalaki kag isa ka babaye.’ Gilayon sa diutay nga tinion nagsugod ako sa pagbaton sang mga mensahe. ‘Ikaw makinaugalingon.’ ‘Ikaw mahusganon.’ Ang iban nagpaanggid sa akon nga isa ka rasista kag tag-iya sang ulipon. Kag ako nakabaton sining sinulat sang akon maayo nga abyan nga masyado kabakod nga miyembro sang Simbahan, ‘Dapat ikaw magsunod sa huyog sang panahon. Ang mga butang nagabag-o kag ikaw dapat man nga magbag-o.’
“Indi ako nakig-away,” siya nagsiling, “ apang indi ko ginkuha ang akon mga pahayag.”
Siya nagtapos: “Kon kaisa, sa ginsiling ni Presidente Monson, ‘Dapat magtindog ka nga nagaisahanon.’ Kabay pa nga bilang mga batan-on, kita ululupod nga magtindog sing matinuuron sa Diyos kag sa mga panudlo sang Iya mga buhi nga propeta.” 11
Ang labi nga kahangawa para sa aton amó ang yadtong mga nagahiwaos sa pagkaluyag sa kapareho nga seks. Ini isa ka unos nga may mabaskog nga paghuyop. Gusto ko magpabutyag sang akon pagpalangga kag pagdayaw sa yadtong mga nagakaisog nga mag-atubang sining pagtilaw sang pagtuo kag nagapadayon nga magmatinumanon sa mga kasuguan sang Diyos! 12 Apang ang tanan, walay sapayan sang ila mga desisyon kag mga ginapatihan, takos sang aton kaayo kag pasunaid.13
Ang Ginuo nagtudlo sa aton nga higugmaon indi lang ang aton mga abyan apang ang yadto nga indi nagapakigsugot sa aton kag bisan pa ang mga nagbiya sa aton. Siya nagsiling: “Kag kon kamo nagapalangga lang sa nagapalangga sa inyo, ano ang inyo padya halin sa Diyos? … Kag kon nagabugno lang kamo sa inyo mga kauturan, ano gid ang inyo ginahimo nga labaw sa iban?” 14
Si Joseph Smith nagpaandam sa aton nga “mag-andam sang kinaugalingon nga pagkamatarungan” kag magpalangga sa tanan nga mga tawo, lalaki kag babaye tubtob nga mabatyagan naton nga sarang “naton sila matib-ong.” 15 Sa ebanghelyo ni JesuCristo, walâ sing lugar sa pagyaguta, paghakô-hakô ukon pagkapanatiko.
“Kon kamo may mga pamangkot nahanungod sa laygay halin sa mga lider sang Simbahan, mahimo nga makigsugilanon kamo sing tampad sa inyo mga ginikanan kag mga lider. Ginakinahanglan ninyo ang kabakod nga nagahalin sa pagsalig sa mga propeta sang Ginuo. Si Presidente Harold B. Lee nagsiling: “Ang amó lamang nga kahilwayan nga mangin aton bilang miyembro sang ini nga Simbahan amó ang … makatuon nga mamati sa mga pulong kag mga kasuguan nga ihatag sang Ginuo paagi sa Iya propeta. … May yara nga mga butang nga nagakinahanglan sang pasensya kag pagtuo. Basi indi ninyo magustuhan ang nagaabot. … Basi ini magkontra sang inyo mga pangpulitika nga mga isip … ang inyo pangkatilingban nga mga hunahuna … maghilabot sa … inyo mga pangsosyal nga kabuhi. Apang kon kamo mamati sa sining mga butang, pareho nga sila mismo nagahalin sa baba sang Ginuo, … ‘ang ganhaan sang impiyerno indi magdaug sa inyo … kag ang Ginuong Diyos magpalayô sang mga gahum sang kadudulman halin sa inyo …’(D&C 21:6).”16
Isa pa ka gamhanan nga proteksyon sa mga buhawi sang kabuhi amó ang Libro ni Mormon.
Sang si Presidente Henry B. Eyring isa ka pamatan-on, ang iya panimalay nagliton sa bag-o nga siyudad. Sa una, nadiskubrihan niya nga ini indi manami kag siya nakig-abyan. Indi siya nakig-impon sa mga estudyante sa iya hayskul. Ang mga buhawi nagabuyong. Ano ang iya ginhimo? Gingamit niya ang iya mga kapisan sa pagtuon, labi na sa pagtuon sang Libro ni Mormon, nga iya ginbasa paliwat-liwat.17 Sang ulihi nga mga tinuig, si Presidente Eyring nagpamatuod: “[Gusto] ko nga magbalik sa Libro ni Mormon kag magkuha sang tudok kag padayon nga ginahatag sini sa kaayuhan sang espiritu.” 18 “[Ini] aton isa ka pinakagamhanan nga sinulat nga pagpamatuod nga si Jesus amó ang Cristo.” 19
Ang Ginuo naghatag sa inyo sang isa pa ka paagi nga magtindog sing malig-on, isa ka espirituhanon nga dulot nga mas gamhanan pa gid sang sa mga buhawi sang kaaway! Siya nagsiling, “Magtindog kamo … sa balaan nga mga lugar, kag indi kamo malingkang.” 20
Sang ako isa ka pamatan-on, may 13 lang ka mga templo sa Simbahan. Subong may yara na nga 142. Otsentay singko ka porsiyento sang kabilogan sang Simbahan subong nagapuyô sa sulod sang 200 ka milya (320 ka kilometro) sang templo. Ang Ginuo nagahatag sa inyo henerasyon sang mas daku nga kahigayunan nga makasulod sa Iya balaan nga mga templo sang sa diin man nga henerasyon sa maragtas sang kalibutan.
Kamo nakatindog gid balá sa templo, nagbayo sang puti, nga nagahulat nga maghimo sang mga pagbunyag? Ano ang inyo nabatyagan? May tunay nga mga balatyagon sang pagkabalaan sa templo. Ang paghidaet sang Manluluwas nagadaug sa tanan nga pagbuyong sang mga buhawi sa kalibutan.
Ang inyo mabatyagaan sa templo isa ka talaksan sang kon ano ang gusto ninyo mabatyagan sa inyo kabuhi.21
Pangitaa ninyo ang inyo mga lolo kag mga lola kag ang inyo mga malayo nga mga pakaisa nga nagtaliwan na. Dalha ang ila mga ngalan sa templo upod sa inyo.22 Sa inyo pagdiskubre sang inyo mga katigulangan makita ninyo ang mga talaksan sang kabuhi, sang pag-asawahay, sang kabataan; mga talaksan sang kamatarungan; kag kon kaisa makita ninyo ang mga talaksan nga gusto ninyo likawan.23
Sa ulihi sa templo matun-an ninyo sing dugang pa ang tungod sa Pagtuga sang kalibutan, nahanungod sa mga talaksan sang mga kabuhi ni Adan kag ni Eba, kag ang labi sa tanan, nahanungod sa aton Manluluwas, si JesuCristo.
Akon mga lamharon nga kauturan, daw ano ang amon pagpalangga sa inyo, pagdayaw sa inyo, kag pagpangamuyo para sa inyo. Indi ninyo pagtuguti nga ang mga buwahi magbutong sa inyo paidalom. Ini inyo mga panahon sa pagtindog sing malig-on bilang mga sumulunod sang Ginuong JesuCristo.24
Ipasad sing malig-on ang inyo sadsaran sa bató sang Manunubos.
Tipigan ninyo sing mas lubos ang Iya indi matuparan nga kabuhi kag mga panudlo.
Sundon ninyo sing mas maukod ang Iya mga ehemplo kag mga kasuguan.
Batunon ninyo sing mas tudok ang Iya paghigugma, ang Iya kaluoy, kag grasya, kag ang gamhanan nga mga dulot sang Iya Pagpasag-uli.
Kon inyo ginahimo ini, ako nagapanaad nga makita ninyo ang mga buhawi sa ila kamatuoran mga pagtilaw, mga pagsulay, mga kabangahan ukon mga pagsupak sa pagbulig sa inyo nga magtubò. Kag samtang kamo nagakabuhi sing makatarungan sa mga katuigan, nakaseguro ako nga ang inyo mga eksperyensya magpat-ud sa inyo paliwat-liwat nga si Jesus amó ang Cristo. Ang espirituhanon nga bató sa idalom sang inyo mga tiil mangin matig-a kag mabakod. Magkasadya kamo nga ang Diyos nagdala sa inyo diri nga mangin bahin sang katapusan nga mga paghanda sa Iya mahimayaon nga pagpanumbalik.
Ang Manluluwas nagsiling, “Indi ko kamo pagpabayaan nga walâ sing kaumpawan: mabalik ako sa inyo.”25 Ini ang Iya pangako sa inyo. Nahibal-an ko nga ining pangako matuod gid. Nahibal-an ko nga Siya buhi, sa ngalan ni JesuCristo, amen.