Ang Kalipayan sa Pagpas-an sang Pagkasumulunod

Ni Elder Ronald A. Rasband

Sang Pangulohan sang Kapituan

Litrato

Ang pagsakdag sa aton mga pinunò isa ka pribilihiyo; ini nagaabot kaupod sang personal nga katungdanan nga magbulig sa ila palas-anon kag mangin mga sumulunod ni Ginuong JesuCristo.

Sang Mayo 20 sang nagligad nga tuig, isa ka masyado ka daku nga buhawi ang naghampas sa mga distrito sa gwa sang Siyudad sang Oklahoma, sa sentro nga bahin sang America, nga nagkurit sang isa ka banas nga sobra sa isa ka milya (1.6 ka kilometro) ka lapad kag 17 ka milya (27 ka kilometro) ka labà. Ang ining unos, nga isa ka pagdasdas sang malalâ nga mga buhawi, nagbaylo sang talan-awon kag mga kabuhi sang mga tawo nga gin-agyan sini.

Isa lang ka semana matapos nga nag-abot ang masyado ka daku nga unos, ako gintawag nga magbisita sa lugar nga sa diin ang mga puluy-an kag mga pagkabutang nagalinapta sa bilog nga natapan nga napapas nga mga kasilinganan.

Bag-o ako naghalin, nagpakighambal ako sa aton pinalangga nga propeta nga si President Thomas S. Monson, nga nahamuot sa sina nga mga buluhaton para sa Ginuo. Bilang pagtahud nga dala indi lamang sang iya katungdanan pero amó man sang iya kaayo, ako nagpamangkot, “Ano balá ang luyag mo nga himuon ko? Ano balá ang gusto mo nga ihambal ko?”

Siya malolô nga nag-uyat sang akon kamot, katulad nga dapat niya himuon sa kada isa ka mga biktima kag kada isa sa mga nagbulig sa kapahamakan kon didto siya, kag nagsiling:

“Nahauna, silingan mo sila nga palangga ko sila.

“Ikaduha, silingan mo sila nga nagapangamuyo ako sa ila.

“Ikatlo, palihog pasalamatan mo ang yadtong tanan nga nagabulig.”

Bilang isa ka miyembro sang Pangulohan sang Kapituan, nabatyagan ko ang kabug-at sa akon mga abaga sa mga pulong nga ginhambal sang Ginuo kay Moses:

“Tipunon mo para sa akon ang pitó ka napulo ka mga pinunò sang Israel, nga nakilala mo nga mga pinunò sang mga tawo, kag mga opisyales sa ibabaw nila; …

“Kag ako magpanaog kag makighambal sa imo didto: kag kuhaon ko ang espiritu nga yara sa imo [Moses], kag ihatag ko sa ila; kag sila magpas-an sang palas-anon sang mga tawo kaupod sa imo, agud indi ikaw lang ang magpas-an sina.”¹

Ini ang mga pulong gikan sa dumaan nga mga panahon, apang ang mga paagi sang Ginuo indi nagbag-o.

Subong sa Simbahan, ang Ginuo nagtawag sang 317 nga mga Kapituan, nga nagaalagad sa 8 ka mga korum, para magbulig sa Napulogduha ka mga Apostoles sa pagpas-an sang kabudlay nga ginbutang sa Unang Pangulohan. Malipayon ako nga nagabatyag sinang katungdanan sa kadadalman sang akon mismo kalag, katulad sang pagbatyag sang kaupod ko nga mga Kauturan. Bisan pa, indi lang kami ang nagabulig sa sining mahimayaon nga trabaho. Bilang miyembro sang pangkabilogan nga Simbahan, tanan kita may talagsahon nga kahigayunan sa pagpakamaayo sang mga kabuhi sang iban.

Natun-an ko sa aton propeta kon ano ang kinahanglan sang mga tawo nga ginhalitan sang unos—paghigugma, mga pangamuyo, kag pagkilala sang mga kamot nga nagabulig.

Karon sa hapon ang kada isa sa aton magbayaw sang aton tu-o nga kamot sa kuwadrado kag magsakdag sa Unang Pangulohan kag sa Korum sang Napulogduha ka mga Apostoles bilang mga propeta, mga manugtan-aw, kag mga mananagna sang Ang Simbahan ni JesuCristo sang mga Santos sa Ulihing mga Adlaw. Indi lang ini isa ka pormalidad, ukon ginatigana sa mga gintawag sa pangkabilogan nga pag-alagad. Ang pagsakdag sa aton mga pinunò isa ka pribilihiyo; ini nagaabot kaupod sang personal nga katungdanan nga magbulig sa ila palas-anon kag mangin mga sumulunod ni Ginuong JesuCristo.

Si Presidente Monson nagsiling:

Ginapalibutan kita sang yadtong mga nagakinahanglan sang aton pagtamod, sang aton pagpaisog, sang aton pagsakdag, sang aton pagpaumpaw, sang aton kaayokon sila man mga miyembro sang aton panimalay, kaabyanan, mga kakilala, ukon mga dumuluong. Kita ang mga kamot sang Ginuo yari sa duta, nga may mando nga mag-alagad kag magpataas sa Iya mga anak. Siya nagasalig sa isa kag isa sa aton. …

“‘ … Sa kamatuoran nga ginhimo ninyo ini sa isa sa sining mga pinakakubos … , pareho man nga ginhimo ninyo ini sa akon’ [Matthew 25:40].”²

Magsabat balá kitá nga may paghigugma kon ang kahigayunan yara sa aton atubang sa pagdu-aw sa pagtelepono, sa pagsulat, ukon paggamit sang isa ka adlaw sa pagtigayon sang mga kinahanglanon sang iban? Ukon kita mangin katulad sang batan-on nga lalaki nga nagpanaksi sa pagtuman sang tanan nga kasuguan sang Diyos:

“Ini tanan natuman ko na halin pa sang ako lamharon asta subong: Ano pa balá ang kulang sa akon?

“Si Jesus nagsiling sa iya, Kon luyag mo nga ikaw mangin himpit, maglakat ka kag ibaligya mo ang imo pagkabutang, kag ang kuwarta ihatag mo sa mga imol, kag ikaw makaangkon sang manggad sa langit: kag magbalik ka kag magsunod sa akon.”³

Ang pamatan-on gintawag sa mas dako pa nga pag-alagad kaupod ang Ginuo sa paghimo sang buluhaton sa ginharian sang Diyos diri sa duta, apang siya nagtalikod, “kay man madamo ang iya mga pagkabutang.”⁴

Ano sa aton ang kalibutanon nga mga pagkabutang? Makita naton kon ano ang mahimo sang buhawi sa ila sa sulod sang pila lang ka minutos. Tama ka importante sa aton nga magsupot sang aton espirituhanon nga mga manggad sa langitsa paggamit sang aton tiyempo, mga kinaadman, kag pagpili sa pag-alagad sa Diyos.

Si JesuCristo nagapadayon sa paghatag sang panawag “Kari kamo kag magsunod sa akon.” ⁵ Ginlakat Niya ang Iya kinatawhan nga duta kaupod sang Iya mga sumulunod sa di-makinaugalingon nga paagi. Nagapadayon Siya nga maglakat upód sa aton, nagatindog sa aton luyó, kag nagagiya sa aton. Ang pagsunod sa Iya himpit nga halimbawa amó ang pagkilala kag pagpadungog sa Manluluwas, nga nagpas-an sang tanan naton nga mga kabudlay paagi sa Iya balaan kag nagaluwas nga Pagpasag-uli, ang pinakamataas nga buhat sang pag-alagad. Ang Iya ginapangabay sa kada isa sa aton amó nga kitá makahimo kag makapili nga magdala sang malipayon nga “palas-anon” sang pagkasumulunod.

Sang ako didto sa Oklahoma, may kahigayunan ako nga makipakigkità sa mga panimalay nga nahalitan sang masyado kabaskog nga mga buhawi. Sang nagduaw ako sa panimalay sang mga Sorrels, kinatuhay nga natandog ako sang eksperiyensya sang ila babayeng anak nga si Tori, nga sadto sa ikalima nga grado sa Plaza Towers Elementary School. Siya kag ang iya iloy yari diri upód sa aton subong.

Si Tori kag ang iya diutay nga mga abyan naghukbong sa comfort room para magpasilong sa buhawi nga nagabagrong sa bilog nga eskuwelahan. Magpamati kamo samtang ginabasa ko sa mga pulong mismo ni Tori ang hitabo sa sina nga adlaw:

“May nabatian ako nga nagtupâ sa atup. Nagpensar ako nga ang yadto mga yelo nga ulan lang. Ang tunog nagmasyado ka gahud. Nagpangamuyo ako nga ang Langitnon nga Amay magluwas sa amon tanan sa katalagman. Sang hinali lang kami nakabatî sang magahud nga daw tunog sang bakyum, kag ang atup nadula sa amon mga uluhan sa ibabaw. May madamo nga mga hangin kag mga dinugmok nga mga butang ang nagalinupad sa palibot kag nagatupâ sa tanan nga bahin sang amon lawas. Mas madulom sa gwa kag ang langit daw maitom, pero indi man − yadto amó ang sulod sang buhawi. Ginpiyong ko lang ang akon mga mata naghandum kag nagpangamuyo nga ini madali nga mag-untat na.

“Sang hinali lang naglinong.

“Sang buksan ko ang akon mga mata, nakita ko ang stop sign sa atubang sang akon mga mata! Halos ini nagatandog sa akon ilong.”⁶

Si Tori, ang iya iloy, tatlo niya ka mga utod, kag madamo nga mga abyan nga didto man sa eskuwelahan kaupod sa iya, milagroso nga naluwas sa buhawi; pito sa ila mga ka-eskuwela ang indi naluwas.

Sina nga katapusan sang semana ang mga kauturan sang priesthood naghatag sang mga bendisyon sa mga miyembro nga nahalitan sang unos. Ako mainubuson nga naghatag sang bendisyon kay Tori. Sang gindapat ko ang akon mga kamot sa iya ulo, ang paborito nga kasulatan akon nadumduman: “Magkadto ako sa inyo atubang. Magkadto ako sa sa inyo tuo nga kamot kag sa inyo walá nga kamot, kag ang akon Espiritu magsulod sa inyo mga tagipusuon, kag ang akon mga anghel magpalibut sa inyo, sa pagpas-an sa inyo.”⁷

Ginlaygayan ko si Tori nga dumdumon niya ang adlaw sang ang alagad sang Ginuo nagdapat sang iya mga kamot sa iya ulo kag nagpahayag nga siya ginluwas sa unos sang mga anghel.

Ang pagbulig sa pagluwas sa kada isa kag isa, sa anuman nga mga kahimtangan, isa ka timbang sang paghigugma. Ini ang pag-alagad nga may bili.

Masami ginahatagan kita sang mga oportunidad nga magbulig sa iban sa ila tion sang pagkinahanglanon. Bilang miyembro sang Simbahan, ang kada isa sa aton may sagrado nga katungdanan “nga magpas-an sang palas-anon sang isa kag isa, agud nga mangin mamag-an ang mga ini,” ⁸ “nga magpaumpaw sadtong mga nagakinahanglan sang kaumpawan,”⁹ “mag-alsa sang mga kamot nga nagaluyloy, kag magpalig-on sang maluya nga mga tuhod.”¹⁰

Mga kauturan, daw ano ang pagpasalamat sang Ginuo sa kada isa kag sa tanan sa inyo, sa mga di-maisip nga mga oras kag mga buhat sang pag-alagad, bisan diutay ukon daku, nga maalwanon kag malipayon nga ginahatag ninyo adlaw-adlaw.

Si King Benjamin nagtudlo sa Libro ni Mormon, “Kon yara kamo sa pag-alagad sa inyo mga isigkatawo yara lamang kamo sa pag-alagad sa inyo Diyos.”¹¹

Ang pagtumod sa pag-alagad sa aton mga kauturan makagiya sa aton nga maghimo sang diyosnon nga mga pagpili sa aton adlaw-adlaw nga mga kabuhi kag maghanda sa aton sa paghatag sang balor kag pagpalangga sa mga ginapalangga sang Ginuo. Sa paghimo sini, nagapamatuod kita paagi sa aton mismo mga kabuhi nga kita Iya mga sumulunod. Kon kita okupado sa Iya hilimuon, mabatyagan naton ang Iya Espiritu nga yara sa aton. Magtubò kita sa pagpamatuod, pagtuo, pagsalig, kag paghigugma

Nahibal-an ko nga ang akon Manlulubos nagakabuhi, nga amó si JesuCristo; nga Siya nagapakighambal sa kag paagi sa Iya propeta, ang pinalangga nga si Presidente Thomas S. Monson, sa sini, aton panahon.

Kabay pa nga tanan kitá makaangkon sang kalipay nga nagahalin sa sagrado nga pag-alagad sa pagpas-an sang mga palas-anon sang isa kag isa, bisan pa nga yadto mga simple kag diutay lang, amó ang akon pangamuyo sa ngalan ni JesuCristo, amen.