“Naghatag Ako sa Inyo sang Isa ka Ehemplo”
Ni Elder Richard G. Scott
Sang Korum sang Napulogduha ka mga Apostoles
Ang labing maayo gid nga ehemplo nga nagkari sa kalibutan amó ang aton Manluluwas, si JesuCristo. … Siya nagapangagda sa aton nga magsunod sang Iya himpit nga ehemplo.
Samtang ako nagabinagbinag sang akon katungdanan nga magpaambit sang ebanghelyo, nagapanumdom ako sang mga pinalangga nga sa diin ang ila mahumok nga impluhensya nagbulig sa akon nga makita ang diyosnon nga alagyan pakadto sa akon espirituhanon nga paglambo. Sang mga importante nga mga tiyempo sa akon kabuhi, ang Langitnon nga Amay nagbugay sa akon sang isa nga naghamil-ay sa akon sing bastante pakadto sa husto nga mga pagpili. Sila nagsunod sa mga pulong sang Ginuo: “Ginhatagan ko kamo sang ehemplo, nga dapat ninyo sundon ining ginhimo ko sa inyo.”1
Sang ako batà pa, ang akon amay indi miyembro sang Simbahan kag ang akon iloy indi masyado ka aktibo. Kami nag-estar sa Washington D.C., kag ang mga ginikanan sang akon iloy nag-estar 2,500 ka milya (4,000 ka kilometro) malayô sa amon sa estado sang Washington. Pila ka bulan pagkatapos sang akon ika-walo nga kaadlawan, si Lola Whittle nagdu-aw sa amon. Si Lola nahangawa nga ako kag ang akon magulang nga lalaki indi pa nabunyagan. Indi ko nahibal-an kon ano ang iya ginsiling sa akon amay kag iloy nahanungod sini, pero nahibal-an ko nga sang isa ka aga gindala niya ako kag ang akon magulang nga lalaki sa isa ka parke kag siya nagpaambit sang iya balatyagon nahanungod sa pagkinahanglan sang bunyag kag masami nga pagtambong sa mga miting sang Simbahan. Indi ko madumduman ang detalya sang iya ginsiling pero yadto nagtudok sa akon tagipusuon, kag sa indi madugay kami ginbunyagan.
Si Lola nagpadayon nga nagsakdag sa amon. Nadumduman ko nga sa ano man nga tion nga kami ginhatagan sang katungdanan nga magpamulongpulong, ginatawgan namon siya sa telepono para sa iya mga panugyan. Sa sulod sang diutay nga mga inadlaw, ang iya sinulat nga pamulongpulong nagaabot sa koreyo. Sa indi madugay ang iya mga panugyan nagbaylo sa porma nga nagakinahanglan sang pagtinguha sa amon kaugalingon.
Si Lola naggamit sang husto lang nga kaisog kag respeto nga mabuligan ang amon amay nga makilala ang importansya sa pagdala sa amon sa mga miting sang Simbahan. Sa tama nga paagi, ginbuligan kami nga mabatyagan ang pagkinahanglan sang ebanghelyo sa amon mga kabuhi.
Ang pinakaimportante, nahibal-an namon nga kami palangga sang amon Lola kag siya nagpalangga sa ebanghelyo. Siya isa ka magayon nga ehemplo! Daw ano ang akon pagpasalamat sa iya pagpamatuod nga ginpaambit sa akon sang ako mas batà pa. Ang iya impluhensiya nagpabag-o sang padulungan sang akon kabuhi para sa walay katapusan nga kaayuhan.
Sang ulihi, samtang akon dali na lang nga magtapos sa unibersidad, naluyag ako sa isa ka matahom nga lamharon nga babaye nga naghingalan kay Jeanene Watkins. Naghunahuna ako nga siya may tudok man nga balatyagon para sa akon. Sang isa ka gab-i samtang kami nagahambalanay tungod sa palaabuton, mainandamon nga ginsal-ot niya ang isa ka pulong sa diskusyon nga sa katubtuban nagbag-o sang akon kabuhi. Siya nagsiling, “Kon ako magpamana, dapat siya isa ka masinulundon, nga nagpanumbalik nga misyonero sa templo.”
Bag-o sina, indi man ako nagpainoino nga magmisyon. Sang sina nga gab-i ang akon hangad nga magmisyon nagbag-o sing lubos nga may kakunyag. Nagpauli ako kag indi makaisip sang iban pa. Indi ako makatulog sa bilog nga kagab-ihon. Nalingas ako sa akon pagtuon sa masunod nga adlaw. Pagkatapos sang madamo nga mga pangamuyo nagpakigkita ako sa akon bishop kag nag-umpisa sang akon aplikasyon pangmisyonero.
Si Jeanene indi nagpangayo nga ako magmisyon para sa iya. Ginpalangga niya ako sing tama sa pagpaambit sang iya hugot nga mga pagtuo kag ginhatagan niya ako sang kahigayunan nga magpasad sang padulungan sang akon kabuhi. Kami nga duha nagmisyon kag sang ulihi ginhugpong sa templo. Ang kaisog kag debosyon ni Jeanene sa iya pagtuo naghatag sang kinatuhay sa amon pag-updanay. Segurado ako nga indi namon naangkon ang kalipayan nga nangin amon kon indi sa iya mabakod nga pagtuo sa prinsipyo sa pag-alagad sa Ginuo una sa tanan. Siya isa ka magayon, matarong nga ehemplo!
Si Lola Whittle kag si Jeanene nagpalangga sa akon sing tama sa pagpaambit sang ila hugot nga pagtuo nga ang mga ordinansa sang ebanghelyo kag ang pag-alagad sa sa Langitnon nga Amay magpakamaayo sa akon kabuhi. Wala sing isa sa ila nga nagpuwersa sa kon ukon nagpakalain sa akon pagkatawo sadto. Yano nga ginpalangga nila ako kag ang Langitnon nga Amay. Duha sila nakahibalo nga Siya makahimo sa akon kabuhi sang indi ko mahimo sa akon kaugalingon lang. Ang kada isa sa ila maisog nga nagbulig sa akon sa mahigugmaon nga mga paagi sa pagpangita sa dalan sang pinakadako nga kalipay.
Paano ang kada isa sa aton mangin isa ka importante nga impluhensya? Dapat nga segurado nga hugot kita nga magpalangga sa mga luyag naton mabuligan sing makatarungan agud sila makasugod nga mag-angkon sang pagsalig sa paghigugma sang Diyos. Sa mga kadamuan sa kalibutan, ang una nga pagtilaw sa pagbaton sang ebanghelyo amó ang pagpatubò sang pagtuo sa Langitnon nga Amay, nga himpit nga nagapalangga sa ila. Madali ang pagpatubò sina nga pagtuo kon sila may mga abyan kag mga miyembro sang panimalay nga pareho man nga nagapalangga sa ila.
Ang paghatag sa ila sang pagsalig sa inyo paghigugma sarang makabulig sa ila sa pagpatubò sang ila pagtuo sa paghigugma sang Diyos. Pagkatapos paagi sa inyo madinumdumon nga pagpalangga, madinumdumon nga pagpakighambal, ang ila mga kabuhi mabugayan sang mga panudlo nga inyo natun-an, mga eksperynesya nga nangin inyo, kag mga prinsipyo nga inyo ginsunod nga makakita sang mga sabat sa inyo mga paghiwaos. Ipakita ang inyo sinsero nga interes sa ila ikaayo; pagkatapos ipaambit ang inyo pagpamatuod sang ebanghelyo ni JesuCristo.
Makabulig kamo sa mga paagi nga napasad sa prinsipyo kag doktrina. Paisugon ang inyo mga pinalangga nga magpangayo nga mahangpan kon ano ang dapat ipahimo sang Ginuo sa ila. Ang isa ka paagi nga mahimo ini amó ang mga pamangkot nga magpadumdom sa ila kag maghatag sa ila sang bastante nga panahon bisan mga inoras, mga inadlaw, mga binulan, ukon dugay pasa pagbinagbinag kag pagpangayo sang mga sabat sa ila. Basi kinahanglan nga buligan ninyo sila kon paano magpangamuyo kag kon paano mahangpan ang mga sabat sa ila mga pangamuyo. Buligi sila nga mahibal-an nga mga kasulatan importante nga ginahalinan sang pagbaton kag paghangop sinang mga sabat. Sa sina nga paagi mabuligan ninyo sila sa paghanda sa palaabuton nga mga kahigayunan kag mga pagtilaw.
Ang tuyo sang Diyos amó ang “pagpaabut sang di-mamalatyon kag walay katapusan nga kabuhi sang katawhan.”2 Ina kinahanglan sa aton tanan nga hilimuon. Kon kaisa nawili kita sa mga butang nga makatilingala ukon kita nadaug sang mga pangkalibutan nga mga katungdanan nga kita nadulaan sang aton diyosnon nga katuyuan. Kon kamo nagapadayon nga nagatumod sang inyo kabuhi sa pinakanauna nga mga prinsipyo, kamo makabaton sang paghangop kon ano ang inyo dapat himuon, kag kamo magbunga sang mas madamo para sa Ginuo kag dugang nga kalipayan para sa inyo.
Kon ginatumod ninyo ang inyo kabuhi sa mga nauna nga mga prinsipyo sang plano sang kaluwasan, magtumod kamo sing mas maayo sa pagpaambit sang inyo ihibalo bangod nahangpan ninyo ang walay katapusan nga importansya sang mga ordinansa sang ebanghelyo. Magpaambit kamo sang inyo ihibalo sa paagi nga magpaisog sa inyo kaabyanan nga maghangad sang espirituhanon nga kabaskog. Mabuligan ninyo ang inyo mga pinalangga nga maghangad nga magpadayon nga magsunod sa tanan nga mga kasuguan kag magdala sa ila mga kaugalingon sang ngalan ni JesuCristo.
Panumdumon ninyo nga ang pagbag-o sang mga tawo isa lang ka bahin sang hilimuon. Padayon nga magpangayo sa pagpabakod sa mga panimalay. Magtudlo sang palanan-awon sang importansya sang mga panimalay nga ginahugpong sa templo. Sa iban nga mga panimalay, madamo ang mga tinuig nga mag-abot ini, katulad sa akon mga ginikanan. Matapos ang madamo nga tuig nga ako ginbunyagan, ang akon amay ginbunyagan, kag sang ulihi ang akon panimalay ginhugpong sa templo. Ang akon amay sang ulhi nag-alagad nga sealer [taghugpong] sa templo, ka gang akon iloy nga-alagad upod sa iya. Kon kamo may panan-awon sang panghugpong nga ordinansa sang templo, makabulig kamo nga magpasad sang ginharian sang Diyos sa kalibutan.
Dumduma ninyo, ang pagpalangga sa ila isa ka gamhanan nga sadsaran sa pag-impluhensya sa mga gusto naton buligan. Ang impluhensya sang akon Lola Whittle kag sang akon asawa nga si Jeanene, daw walâ sing pulos kon indi ko una nahibal-an nga palangga nila ako kag sila naghangad nga ako makaangkon sang pinakamaayo sa kabuhi.
Bilang isa ka malapit nga kaupod sa sina nga pagpalangga, saligi sila. Sa iban nga mga kahimtangan, basi mabudlay ang magsalig, pero mangita sang paagi nga magsalig sa ila. Ang mga anak sang Langitnon nga Amay makahimo sang makatilingala nga mga butang kon mabatyagan nila nga sila ginasaligan. Ang kada isa ka anak sang Diyos diri sa kalibutan nagpili sang plano sang Manluluwas. Magsalig nga hatagan sinang kahigayunan sila liwat maghimo sina.
Ipaambit ang mga prinsipyo nga nagbulig sa yadtong mga ginapalangga ninyo nga magpadayon pakadto sa dalan sang kabuhi nga walay katapusan. Dumduma ninyo, kita tanan nagalambo dinalan sa dinalan. Nagsunod kamo sang pareho nga talaksan sa inyo paghangop sang ebanghelyo. Himua ang inyo pagpaambit sang ebanghelyo nga simple.
Ang inyo pangkinaugalingon nga panaksihon sang Pagpasag-uli ni JesuCristo isa ka gamhanan nga sangkap. Ang kaupod nga mga kinahanglanon amó ang pangamuyo, ang Libro ni Mormon kag ang mga kasulatan, kag ang inyo padayon nga pagtuman sang mga ordinansa sang priesthood. Ini tanan magpadasig sang giya sang Espiritu, nga tama gid ka importante nga salandigan ninyo.
Para mangin epektibo nga ehemplo kag maghimo sang katulad sang ginhimo ni Cristo,3 bug-uson ang inyo isip sa una nga prinsipyo sang ebanghelyo: sa Pagpasag-uli ni JesuCristo puwede kita mas mangin katulad sang aton Amay sa Langit, agud nga magkabuhi kita sa walay katapusan nga pag-ululupod sa aton bilog nga mga panimalay.
Walâ na sing doktrina nga mas labi pa sa aton hilimuon sang sa Pagpasag-uli ni JesuCristo. Sa kada tama nga kahigayunan magpamatuod kamo sang Manluluwas kag ang gahum sang Iya halad sang Pagpsag-uli. Gamiton niyo ang mga kasulatan nga nagatudlo parte sa Iya kag kon ngaa Siya ang himpit nga sulundan para sa tanan sa kabuhi.4 Kinahanglan nga kamo magtuon sing maukod. Indi kamo magmangin okupado sa mga butang nga diutay ang pulos gani indi kamo makatuon sang doktrina kag mga panudlo sang Ginuo. Sa mabakod, pangkaugalingon nga sadsaran sang doktrina, kamo mangin gamhanan nga halinan sang pagpaambit sang importante nga mga kamatuoran sa iban nga nadulaan sing pag-asa.
Nagaalagad kita sing pinakamaayo sa aton Amay sa langit paagi sa makatarungan nga paghaylo kag pag-alagad sa iban.5 Ang pinakamaayo nga gid nga ehemplo nga nagkari sa kalibutan amó ang aton Manluluwas, si JesuCristo. Ang Iya diyosnon nga pang-alagad sa kalibutan punô sang pagpanudlo, pagserbisyo, kag pagpalangga. Nagpakigbuylog Siya sa mga tawo nga ginhusgahan nga indi takos sa Iya pagpakig-upod. Siya nagpalangga sa ila. Nakahilom Siya sang ila mga kinahanglanon kag gintudluan sila sang Iya ebanghelyo. Siya nagapangagda sa aton nga sundon ang Iya himpit nga ehemplo.
Nahibal-an ko nga ang Iya ebanghelyo amó ang alagyan sa paghidaet kag kalipayan sa sining kabuhi. Kabay pa nga madumduman naton ang Iya ginhimo sa pagpaambit sang aton pagpalangga, pagsalig, kag ihibalo sang kamatuoran sa iban nga indi pa nakabaton sang nagabanaag nga kasanag sang ebanghelyo. Sa ngalan ni JesuCristo, amen.