Ua Toetu o Ia, saunia e Del Parson

5–11 Aokuso: “O Le Fuafuaga Sili o le Fiafia”

Alema 39–42

Pe a fai e se tagata tatou te alolofa i ai se mea sese ogaoga, e mafai ona faigata ona iloa le ala e tali atu i ai. O le mea e taua tele ai le Alema 39–42 o le, o loo faaalia mai ai le auala na taulima ai e Alema—o se soo o Keriso o lē sa i ai se taimi sa i ai ni ana lava foi agasala matuia e salamo ai—se tulaga faapea. Na faia e Korianetona le atalii o Alema agasala feusuai, ma o Alema, e pei ona sa ia aoaoina e fai i lana galuega, na faatuatuaina le mana o aoaoga faavae moni e tuu atu ai i lona atalii se vaaiga e faavavau ma uunaia le salamo (tagai Alema 4:19; 31:5). I nei mataupu, tatou te matauina ai le toa o Alema i le ta’usalaina o le agasala ma lona faapelepele ma le alofa mo Korianetona. Ma mulimuli ane, tatou te lagonaina ai le talitonu o Alema e faapea, “o le a afio mai [le Faaola] e aveese agasala a le lalolagi ma tau mai tala fiafia o le olataga i ona tagata” (Alema 39:15). O le mea moni e faapea, sa iu ina salamo ma toe foi atu Korianetona i le galuega o le auaunaga (tagai i le Alema 49:30) e mafai ona aumaia ia i tatou le faamoemoe mo le faamagaloga ma le togiolaina pe a tatou popole e uiga i a tatou lava agasala po o agasala a se tagata tatou te alolofa i ai (tagai Alema 42:29).

Tagai foi “Alma Counsels His Sons” (vitio), Gospel Library.

Ua Fautuaina e Alema Ona Atalii | Alema 36-42

Ua fautuaina e Alema le Itiiti ona atalii. Ua ia fai atu ia Helamana e tusia se faamaumauga o le nuu. Ua ia viia Sepulona i lona amiotonu. Ua ia poloaiina Korianetona e salamo.

Manatu mo le Aoaoina i le Aiga ma i le Lotu

Alema 39

E mafai ona ou aloese mai agasala tau i feusuaiga.

O le fautuaga a Alema i lona atalii o Korianetona i le Alema 39 ua maua ai se avanoa sili e aoao ai e uiga i aafiaga faataumaoi o agasala faalefeusuaiga, e aofia ai ponokalafi. Atonu e sili atu ona taua, e mafai foi ona fesoasoani e te malamalama ai i le ofo a le Faaola o le faamagaloga ma le faamalologa i tagata o e salamo. E mafai ona fesoasoani nei fesili ma gaoioiga:

• O a mea sese na taitai atu ai Korianetona e solia le tulafono o le legavia? (tagai Alema 39:2–4, 8–9). O a taunuuga o ana amioga? (tagai fuaiupu 5–13). O le a se faamaoniga o ia i tatou na salamo Korianetona? (tagai Alema 42:31; 49:30; 48:18). O a ni mea ua e aoao ai e uiga i le Faaola mai lenei aafiaga?

• Faitau itulau 19–20 o le Mo le Malosi o le Autalavou: O Se Taiala mo le Faia o Filifiliga. Ona tusi lea o lau oe lava faamalamalamaga po o le a le ponokalafi, aisea e matautia ai, ma o le a se mea o le a e faia pe a e fetaiai i ai. (Tagai foi i le Mataio 5:27–28 ma le Mataupu Faavae ma Feagaiga 63:16.)

• E faapefea ona e faamatalaina i se uo pe aisea ua e filifili ai e aloese mai ponokalafi ma ola i le tulafono o le legavia? O a vaaiga e mafai ona e faasoa mai le “E Paia Lou Tino” i le Mo le Malosi o le Autalavou: O Se Taiala mo le Faia o Filifiliga (itulau 22–29)?

• Mafaufau e matamata le vitio “To Look Upon” (Gospel Library). Taofi le vitio i taimi taitasi na ono mafai ai e Tavita ona faia se filifiliga ese. E faapefea ona tutusa filifiliga a Tavita ma filifiliga e ono feagai ma oe?

Ia Vaavaai Atu I Ai

(2 Samuelu 11) Ua faamatala mai e Elder Dallin H. Oaks le tala i le Tupu o Tavita e faamalamalama ai le matautia o ponokalafi. Tagai OvercomingPornography.org

Taofi ae manatunatu loloto. Pe a matamata i se vitio, pe o e aoao atu po o suesue oe lava ia, taofi le vitio mai lea taimi i lea taimi e fesili ai, “O le a le mea o loo ou aoaoina?” O lenei mea e mafai ona valaaulia ai malamalamaaga loloto mai le Agaga Paia.

Tagai foi Bradley R. Wilcox, “O Le Agavaa e Le o le Atoatoa,” Liahona, Nov. 2021, 61–67; “Ponokalafi” i le tuufaatasiga o le “Fesoasoani mo le Olaga” o le Potutusi o le Talalelei.

Alema 40–41

O le a le mea o le a tupu pe a ou oti?

Sa i ai ni fesili a Korianetona e uiga i le mea e tupu pe a oti. O ona popolega na taitai atu ai Alema e aoao atu mataupu faavae i le Alema 40–41. A o e suesue, fai se lisi o upumoni e te maua e uiga i mea e pei o le lalolagi o agaga, toetu, ma le faamasinoga. Mafaufau e faitau nei mataupu mai le vaaiga a se tasi, e pei o Korianetona, e manaomia ona salamo—i mea uma, e moni lena mea mo i tatou uma.

Alema 40

E mafai ona ou sailia ma le faatuatua ia Iesu Keriso tali i a’u fesili.

O nisi taimi atonu tatou te mafaufau ai e iloa e perofeta le tali i fesili uma o le talalelei. Ae matau ia fesili e lei taliina na i ai ia Alema i le mataupu e 40. O le a le mea sa ia faia ia maua ai tali? O le a le mea sa ia faia ina ua le ia te ia ni tali? E mafai faapefea e le faataitaiga a Alema ona fesoasoani ia te oe?

O le tatalo o se tasi lea o auala e mafai ona tatou maua ai tali i fesili o le talalelei

Alema 42

O le Togiola a Iesu Keriso ua mafai ai ona maua le faaolataga.

Na talitonu Korianetona sa le talafeagai le faasalaga mo agasala (tagai Alema 42:1). I le Alema 42, na faapefea ona taulimaina e Alema lona popolega? E mafai ona e faatulagaina fuaitau i lenei mataupu i ni vaega se lua: “E Amiotonu le Atua” ma le “E alofa mutimutivale le Atua.” E mafai faapefea e le Togiola a le Faaola ona mafai ai ona maua le faamasinotonu ma le alofa mutimutivale? Vaavaai mo ni malamalamaaga faaopoopo i le vitio “The Mediator” (Gospel Library).

Tagai foi “Maeu le Poto ma le Alofa,” Viiga, nu. 109.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

Alema 39:1, 10–11

O la’u faataitaiga lelei e mafai ona taitai atu ai isi ia Keriso.

• O le fautuaga a Alema ia Korianetona e mafai ona fesoasoani ai i tamaiti ia malamalama i le taua o le avea ma faataitaiga lelei. Mafaufau e faitau faatasi le Alema 39:1. Na faapefea ona avea le uso o Korianetona o Sepulona ma se faataitaiga lelei? E mafai e lau fanau ona maua nisi tali i lenei fesili i le Alema 38:2-4.

• E mafai foi ona outou taaalo i se taaloga e feauauai ai oe ma lau fanau e mulimuli pe faataitai e le tasi le isi. Faaaoga lenei taaloga e faapupula ai pe mafai faapefea e a tatou amioga ona fesoasoani i isi e faia filifiliga lelei. Usu faatasi le “E Pei Au o se Fetu” (Tusipese a Tamaiti, 84), ma fesoasoani i lau fanau e mafaufau i ni auala e mafai ona avea ai i latou ma se faataitaiga lelei.

• Faatasi ai ma se moli uila po o se ata o le la, e mafai ona e faatusatusaina le malamalama i le mana o se faataitaiga lelei. E mafai foi e oe ma lau fanau ona tilotilo i ata o Iesu o faia mea lelei ma talanoa e uiga i le faataitaiga na Ia faatuina mo i tatou. O vitio “Shine Your Light So Others May See” ma le “Lessons I Learned as a Boy” e mafai ona fesoasoani i lau fanau e talanoaina ai pe mafai faapefea e a latou faataitaiga ona taitai atu tagata ia Keriso.

Alema 39:9–13

Ona o Iesu Keriso, ua mafai ai ona ou salamo pe a ou faia ni mea sese.

• E aunoa ma le auiliiliina o le natura o ana agasala, faamatala atu na faia e Korianetona se filifiliga sese. O le a se latou tala e fai atu e fesoasoani ai ia te ia? Mafaufau e faitau le Alema 39:9 i lau fanau, ma fesoasoani ia latou malamalama po o a uiga o le salamo ma le lafoai . Molimau atu o le salamo e mafai ona o Iesu Keriso ma Lana Togiola.

• O se lesona faatino lenei e faapupula ai le olioli o le salamo: Tuu atu i se tamaitiiti se mea mamafa e uu a o e faamatalaina se tala e uiga i se tasi na faia se mea sese ma lagonaina le leaga. Tau atu i tamaiti o le mea faitino e pei o lagona le lelei atonu tatou te maua pe a tatou faia se mea sese. Aveese le mea mamafa mai le tamaitiiti ao e molimau atu e mafai e le Tama Faalelagi ma Iesu Keriso ona aveesea lagona mamafa, lagona le lelei ma fesoasoani ia i tatou ia sili atu ona lelei pe a tatou salamo.

Alema 40:6–7, 11–14, 21–23

A tatou feoti, o o tatou agaga e o atu i le lalolagi o agaga seia oo i le Toetu ma le Faamasinoga.

• E masani lava ona mafaufau po o le a le mea e tupu i a i tatou pe a tatou feoti. O le a se mea e mafai ona e faia e fesoasoani ai i lau fanau ia maua ni tali musuia? E mafai ona e tusia le oti, lalolagi o agaga (parataiso ma le falepuipui o agaga), toetu, ma le faamasinoga i ni fasipepa eseese. Fesoasoani i lau fanau ia malamalama pe o le a le uiga o nei upu. A o outou faitau faatasi le Alema 40:6–7, 11–14, 21–23, e mafai e lau fanau ona tuu upu i le faasologa o loo i ai i nei fuaiupu.

• O tamaiti matutua atu e mafai ona manuia mai le mauaina o tali i fesili e ala i le suesueina o le Alema 40:6–7, 11–14, 21–23. Mafaufau e fai atu i lau fanau ni fesili e mafai ona taliina i nei fuaiupu, e pei o le “O le a faape’i lo’u tino pe a ou toetu?” Valaaulia i latou e saili mo tali i fuaiupu talafeagai.

  

  Maria ma le Alii Toetu, saunia e Harry Anderson

• Pe o iloa e lau fanau se tasi ua maliu? Atonu e mafai ona e talanoa puupuu e uiga i lena tagata. Tuuina atu lau molimau o le a i ai se aso o lena tagata—ma isi tagata uma—o le a toetutu ona o Iesu Keriso. Afai e manaomia, faaaoga le itulau o gaoioiga o lenei vaiaso e faamatala ai le uiga o le toetu.

Mo nisi manatu, tagai i le lomiga o lenei masina o le mekasini o le Uo .

O Lo’u Atalii Lenei, saunia e Elspeth Caitlin Young