Mo Faamanuiaga o le Saolotoga, saunia e Scott M. Snow

12–18 Aokuso: “Tutumau Mausali i le Faatuatua ia Keriso”

Alema 43–52

Pe a tatou faitau i nei upu i le amataga o le Alema mataupu e 43—“Ma o lenei ou te toe foi i se tala o taua i le va o sa Nifaē ma sa Lamanā”—o le mea masani le mafaufau pe aisea na faaaofia ai e Mamona nei tala o taua ae sa utiuti se avanoa i luga o papatusi (tagai Upu a Mamona 1:5). E moni o loo i ai foi a tatou taua i aso e gata ai, ae e i ai se taua i ana upu e sili atu i lo o faamatalaga o mamanu ma le faigata o taua. O Ana upu foi e saunia ai i tatou mo le taua lea “ua tauto tatou i le taua” (Viiga, nu. 157), o le taua o loo tatou tau ai i aso taitasi e faasaga i au a le tiapolo. O lenei taua e matuai mo’i lava, ma o le taunuuga e aafia ai o tatou ola e faavavau. E pei o sa Nifae, ua musuia i tatou i se faamoemoega paia—“lo tatou Atua, la tatou tapuaiga, ma le saolotoga, ma lo tatou filemu, a tatou ava, ma a tatou fanau”—lea na taua e Moronae “o le faamoemoe o Kerisiano” (Alema 46:12, 16).

Manatu mo le Aoaoina i le Aiga ma i le Lotu

Alema 43–52

E mafai e Iesu Keriso ona fesoasoani ia te a’u i a’u taua faaleagaga.

A o e faitau i le Alema 43–52, ia maitau mea na faia e sa Nifae na latou manumalo ai (pe le manumalo ai foi). Ona mafaufau loloto lea pe mafai faapefea ona e faaaogaina mea ua e aoaoina e fesoasoani ai ina ia e manumalo i au taua faaleagaga. Tusi ou manatu iinei:

• Alema 43:19: Na saunia sa Nifae i ofutau. (E mafai ona ou taumafai ina ia ou saunia ma se ofutau faaleagaga.)

• Alema 43:23–24: Sa latou sailia le taitaiga a le perofeta.

• Alema 44:1–4:

• Alema 45:1:

• Alema 46:11–20:

• Alema 48:7–9:

• Alema 49:3, 12–14:

Ma le isi, tagai i mea e mafai ona e aoaoina mai taumafaiga a fili o sa Nifae. Mafaufau loloto pe mafai faapefea e Satani ona osofaia oe i ni auala talitutusa faapea:

• Alema 43:8: Sa saili Sera’emina e faaoso le ita i lona nuu ina ia mafai ona ia maua le pule ia i latou. (Atonu e faaosoosoina au e Satani e faatino i le ita.)

• Alema 43:29:

• Alema 46:10:

• Alema 47:10–19:

Tagai foi Russell M. Nelson, “Opogi le Lumanai i le Faatuatua,” Liahona, Nov. 2020, 73–76; “Le Atua le ‘Olo Malosi,” Viiga, nu. 41.

Minerva. Teichert (1888–1976), Puipuiga o se Aai sa Nifae1949-1951, suauu i luga o le laupapa, 36 x 48 inches. Falemataaga mo Faatufugaga a le Iunvesite a Polika Iaga, 1969.

Alema 46:11–28; 48:7–17

“Tutumau mausali i le faatuatua ia Keriso.”

E te manao e faaitiitia le mana o le fili i lou olaga? O se tasi o auala o le mulimuli lea i le apoapoaiga o loo i le Alema 48:17 ina ia avea “e pei o Moronae.” Mafaufau e fai se lisi o upu e faamatala ai Moronae a o e faitauina le Alema 46:11–28; 48:7–17. O le a se mea ua e aoao mai ia Moronae e uiga i le “tumau mausali i le faatuatua ia Keriso”? (Alema 46:27).

Atonu e te suesue i le ala na musuia ai e Moronae isi i “le faamoemoe o Kerisiano” (tagai Alema 46:11--22). E faapefea ona e faamatalaina lena faamoemoe? O le a se mea e mafai ona e faia e auai ai? E mafai faapefea ona e musuia isi e auai foi?

O le mea e tasi na faia e Moronae e musuia ai isi o le fatuina lea o le tagavai o le saolotoga, lea na faamamafaina ai mataupu faavae e musuia ai sa Nifae (tagai fuaiupu 12). O a mataupu faavae o loo faamamafa mai e o tatou taitai o le Ekalesia i o tatou aso? E mafai ona e vaavaai mo i latou i le Mo le Malosi o le Autalavou: O Se Taiala mo le Faia o Filifiliga (tamaitusi, 2022), “O Le Aiga: O Se Folafolaga i le Lalolagi,” o autu a Tamaitai Talavou ma le Korama a le Perisitua Arona po o savali o konafesi aoao talu ai nei. E mafai ona e aoteleina mea o loo latou aoaoina atu i ni nai faamatalaga faigofie e fatu ai lau lava tagavai o le saolotoga—o se mea e faamanatu atu ai ia te oe ia e faamaoni i le Faaola ma Lana talalelei.

Tagai foi i le Autu o le Talalelei, “Faatuatua ia Iesu Keriso,” Potutusi o le Talalelei.

Sisi e Moronae le Fu’a o le Saolotoga | Alema 46

Ua musuia e le Taitaiau o Moronae sa Nifae e tausia poloaiga ma tau mo le saolotoga i le sisiina o le Tagavai o le Saolotoga.

Alema 47

E faaosoosoina ma faaseseina i tatou e Satani i sina mea itiiti.

Ua iloa e Satani o le toatele o i tatou e le loto e faia ni agasala tetele pe talitonu i ni pepelo mautinoa. O le mea lea, na te faaaogaina ai pepelo ma faaosoosoga laiti—o le tele lava e manatu o ia o le a e taliaina—e taitai ese ai oe mai le saogalemu o le ola amiotonu.

Vaavaai mo lenei mamanu i le Alema 47, ma mafaufau loloto pe faapefea ona taumafai Satani e faasese oe. Mafaufau i manatu nei mai ia Elder Robert D. Hales:

“Sa tauanau e Amalekia taufaalata ia Leoneti e ‘alu ifo i lalo’ la te fetaiai ma ia i le vanu. Ae ina ua tuua e Leoneti le eleele maualuga, sa faaonā o ia ‘i le mea e gata mai ai’ seia oo ina oti ai o ia, ma pauu atu ai lana autau i lima o Amalekia (tagai Alema 47). O feupuaiga ma tuuaiga, e maunu ai e nisi tagata i tatou ina ia tuua a tatou tulaga maualuluga. O le eleele maualuga o le mea e i ai le malamalama. … O le eleele saogalemu” (“Lototele Faakerisiano: O Le Tulaga Manaomia o se Soo,” Liahona, Nov. 2008, 74).

O le a se mea ua e aoaoina mai le vitio “Temptation Fades as We Seek Christ in Every Thought” (Gospel Library) lea e mafai ona fesoasoani ia te oe e tetee atu ai i faaosoosoga?

Tagai foi Neemia 6:3; 2 Nifae 26:22; 28:21–22.

Alema 50–51

E aumai e le lotogatasi le saogalemu.

E ui lava i ofutau ma olo a sa Nifae, na vave lava ona maua e sa Lamana le tele o o latou aai (tagai Alema 51:26–27). Na faapefea ona tupu lena mea? Vaavaai mo tali a o e faitau i mataupu nei (tagai faapitoa i le Alema 51:1–12). Ia mafaufau loloto i lapataiga o mafai ona i ai i lenei tala mo oe ma lou aiga.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

Alema 43:17–21; 48:7–8; 49:1–5; 50:1–6

E mafai ona ou maua le puipuiga faaleagaga i le talalelei a Iesu Keriso.

• Mafaufau e faaaoga le “Mataupu 31: Ua Faatoilaloina e Kapeteni Moronae ia Seraemina” (Tala o le Tusi a Mamona, 85–88) e tau atu ai i lau fanau e uiga i le taua i le va o sa Nifae ma sa Lamana. A o e faitau e uiga i le ofutau o sa Nifae i le Alema 43:19, e mafai ona e faatusatusaina le ofutau lea e puipuia o tatou tino i mea ua tuuina mai e le Atua ia i tatou e puipuia ai o tatou agaga. Atonu e mafai e oe ma lau fanau ona tusi se ata o se tamaitiiti ma faaopoopo se fasi ofutau i le ata mo mea uma e mafai e lau fanau ona ta’u mai e puipuia ai i tatou faaleagaga.

• O nei fuaiupu o loo faamatala mai ai olo na fausia e sa Nifae: Alema 48:7–9; 49:1–9; 50:1–6. A uma ona faitau faatasi nei fuaiupu, atonu e fiafia lau fanau e fau se ‘olo mai mea faitino e pei o nofoa ma palanikeke. O le vitio “Elder Stevenson on Fortifying Families” (Gospel Library) e mafai ona fesoasoani ia te oe e talanoaina ai pe faapefea ona faamalosia faaleagaga lou aiga.

Alema 46:11–16; 48:11–13, 16–17

E mafai ona ou “mausali i le faatuatua ia Keriso” e pei o Kapeteni Moronae.

• E mafai e lau fanau ona vaai i ata o i lenei otootoga e faamatala ai le tala o le tagavai o le saolotoga (tagai Alema 46:11–16; “Mataupu 32: O Kapeteni Moronae ma le Tagavai o le Saolotoga,” Tala o le Tusi a Mamona, 89–90). O le a le mea na manao Moronae ia manatua e tagata (tagai fuaiupu 12)? O a mea e finagalo le Tama Faalelagi ia tatou manatua? Atonu e mafai e tamaiti ona mamanu a latou lava “tagavai o le saolotoga” i ni fuaitau po o ata o le a fesoasoani latou te manatua ai nei mea.

• Ina ia aoao lau fanau e uiga i le “mausali i le faatuatua ia Keriso” e pei o Moronae (tagai Alema 48:13), e mafai ona e fesoasoani ia i latou e saili ma pa’i atu i se mea mautu. O le a le uiga mo le faatuatua ia “mausali”? Faitau faatasi le Alema 48:11–12 e iloa ai po o le a le mea na mausali ai Moronae i lona faatuatua ia Keriso. E mafai foi ona outou usuina le “O Le a Ou Lototoa” (Tusipese a Tamaiti, 85). O le a se mea e mafai ona tatou faia ina ia “mausali i le faatuatua ia Keriso”?

Alema 47:4–19

E faaosoosoina ma faaseseina i tatou e Satani [e amata mai] mea laiti.

Faitau faatasi fuaiupu filifilia mai le Alema 47:4–19. O le a se mea se manu e tupu pe ana fai atu Amalekia ia Leoneti i le mea na ia fuafua e fai mai le amataga? O le a se mea ua aoao mai e nei fuaiupu ia i tatou e uiga i le taumafai o Satani e faasese i tatou?

Fesoasoani i lau fanau ia atia’e le loto toa. O nisi tamaiti atonu latou te le lagona e mafai ona latou aoaoina le talalelei na o latou lava. O se tasi o auala e fausia ai lo latou talitonuga o le viia o i latou pe a latou auai i le vasega. O fea e mafai ona e faaaogaina ai lenei fautuaga i gaoioiga o i lenei otootoga?

Mo nisi manatu, tagai i le lomiga o lenei masina o le mekasini o le Uo .

Tagavai o le Saolotoga, saunia e Larry Conrad Winborg.

© 2018 saunia e Larry Conrad Winborg