Nambatri Nifae: Olgeta Twelef Ia Nao we Mi Mi Jusum, i kam long Gary L. Kapp

30 Septemba–6 Oktoba: “Mi Mi Loa mo Laet.”

3 Nifae 12–16

Olsem ol disaepol blong Jisas we oli bin kam tugeta blong harem ol Tijing blong Jisas Kraes long Hil blong Galili, ol pipol we oli bin kam tugeta long tempol long ples ia, Plante, oli bin laef folem loa blong Moses. Oli bin folem loa ia from se i bin poenem sol blong olgeta i go long Kraes (luk long Jekob 4:5), mo naoia Kraes i bin stanap long fored blong olgeta, i stap talemaot wan loa we i moa hae. Be, iven olgeta long yumi we oli neva laef folem loa blong Moses, i save luksave standet we Jisas i putum blong ol disaepol blong Hem, se hem i wan loa we i moa hae. Hem i talem: “Mi wantem se yufala i kam stret gud evriwan semmak olsem mi” (3 Nifae 12:48). Sapos toktok ia i mekem yu yu filim se yu no naf, tingbaot se Jisas i bin talem tu se: “Olgeta we oli putum spirit blong olgeta i stap daon we oli kam long mi, bae oli kasem blesing, from kingdom blong heven i blong olgeta” (3 Nifae 12:3). Loa ia we i moa hae, hem i wan invitesen—wan nara wei blong talem: “kam long mi mo bae mi sevem yufala” (3 Nifae 12:20). Olsem loa blong Moses, loa ia i poenem yumi i go long Kraes—Wan ia nomo we i save sevem yumi mo mekem yumi kam stret evriwan. Hem i talem: “Luk, mi mi loa, mo laet. Lukluk long mi, mo stap strong kasem en, mo bae yufala i laef” (3 Nifae 15:9).

Ol aedia blong Lanem Samting long Hom mo long Jos

3 Nifae 12–14

Mi save stap olsem wan tru disaepol blong Jisas Kraes.

Hemia i wan wei blong stadi mo yusum wanem we Sevya i bin tijim long 3 Nifae 12–14: Jusum wan grup blong ol ves, mo luk sapos yu save talem sot stori blong wanem ol ves ia oli tijim, mo talem hemia long wan sentens we i stat wetem, “ Ol tru disaepol blong Jisas Kraes …” Eksampol, blong blong talem sot stori long 3 Nifae 13:1–8, yu save talem: “Ol tru disaepol blong Jisas Kraes no stap lukaotem blong pablik i presem olgeta blong stap mekem gudfala samting.” Traem olgeta wetem ol ves ia:

• 12:3–16:

• 12:38–44:

• 13:19–24:

• 14:1–5:

• 14:21–27:

• Ol narafala ves we oli givim insperesen long yu

Afta we yu ridim long ol ves ia, ?wanem nao yu filim insperesen blong mekem, blong folem Jisas Kraes?blong stap praktisim fet blong yu?

Komanmen long 3 Nifae 12:48 bae yu filim se i bigwan tumas—iven i no posibol blong mekem. Olsem wanem nao mesej blong Elda Jeffrey R. Holland “Bae Yufala I Mas Stret Evriwan—long En” (Liahona, Novemba 2017, 40–42 i helpem yumi blong andastanem ol toktok blong Sevya insaed long ves ia? Long Moronae 10:32–33, ?olsem wanem nao yumi kasem blesing taem yumi stap tingbaot Sevya oltaem?

Luk long Dallin H. Oaks, “The Challenge to Become,” Ensign, Novemba 2000, 32–34; Gospel Topik, “Become like Jesus Christ,” Gospel Laebri; “Lord, I Would Follow Thee,” Hym, namba 220; “Jesus Christ Teaches How to Live the Higher Law” (vidio), Gospel Laebri.

Yusum samting long lesen blong yu. Sevya i bin tijim ol dip trutok taem Hem i stap tokbaot ol samting blong evri dei laef. Yu save mekem wan samting we i semmak olsem taem yu stap stadi o tij abaot 3 Nifae 12. Lukluk o holem sam sol, wan kandel, o wan kot blong save mekem storian i kam moa bigwan abaot ol trutok we i no save finis we Sevya i bin tijim.

3 Nifae 12:1–2; 15:23–24; 16:1–6

Olgeta we oli biliv be oli no luk, oli gat blesing.

Smol namba nomo blong ol pikinini blong God we oli bin luk Sevya mo oli bin harem voes blong Hem, semmak olsem ol pipol long graon ia, Plante, oli bin luk mo harem Hem. Plante long yumi oli olsem ol pipol ia we oli tokbaot long 3 Nifae 12:2; 15:23; mo 16:4–6. ?Wanem promes nao ol pipol long ol ves ia oli kasem? ?Olsem wanem ol promes ia oli kamtru insaed long laef blong yu?

Luk tu long Jon 20:26–29; 2 Nifae 26:12–13; Alma 32:16–18.

3 Nifae 12:21–30; 13:1–8, 16–18; 14:21–23

Mi save traehad blong blong mekem ol samting we hat blong i wantem blong oli kam klin

Wan stamba toktok we maet yu luksave we i stap long ol japta ia, hem i invitesen blong Sevya blong laef folem wan loa we i moa hae—blong stap stret mo gud, i no long ol aksen we man i save luk nomo, be tu, insaed long hat blong yumi. Lukaotem stamba toktok ia taem Sevya i stap tokbaot fasin blong stap raorao (3 Nifae 12:21–26), fasin blong no stap klin long saed blong seks (3 Nifae 12:27–30), prea (3 Nifae 13:5–8), mo fasin blong livim kakae (3 Nifae 13:16–18). ?Wanem ol nara eksampol yu save faenem? ?Wanem nao yu save mekem, blong mekem i kam klin ol samting we hat blong yu i wantem?

3 Nifae 14:7–11

Papa long Heven bae i givim mi ol gudfala samting taem mi askem, lukaotem, mo noknok.

Taem yu stap ridim invitesen blong Sevya insaed long 3 Nifae 14:7–11 blong askem, blong lukaotem, blong noknok, nao, tingting hevi long wanem “gudfala samting” bae Hem i wantem yu blong askem long Hem. Ol skripja ia we oli ademap, oli save helpem yu blong andastanem olsem wanem blong askem, blong lukaotem, mo blong noknok. Oli save eksplenem tu se, from wanem, sam ansa blong sam prea blong yu oli no kam olsem we yu wantem: Aesea 55:8–9; Hileman 10:4–5; Moronae 7:26–27, 33, 37; mo Doktrin mo Ol Kavenan 9:7–9; 88:64. ?Olsem wanem ol ves ia oli jenisim wei we yu askem, lukaotem, noknok?

Luk tu long Milton Camargo, “Ask, Seek, and Knock,” Liahona, Novemba 2020, 106–8.

Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.

Sam Aedia blong Tijim Ol Pikinini

3 Nifae 12:14–16

Mi save stap olsem wan gud eksampol taem mi folem Jisas.

• Samtaem, ol pikinini oli no save luksave hamas eksampol blong olgeta i save blesem ol narawan. Yusum 3 Nifae 12:14–16 blong leftemap tingting blong olgeta blong letem laet blong olgeta i saen. Eksampol, eni taem we yu ridim “yufala” o “blong yufala,” long ol ves ia, askem ol pikinini blong yu blong poenem olgetawan. Talem long ol pikinini abaot laet we yu stap luk long olgeta taem oli folem Jisas Kraes mo olsem wanem i givim insperesen long yu blong folem Hem tu. Singsing wan singsing tugeta, we i leftemap tingting blong ol pikinini blong oli saen olsem wan laet, olsem “I Am like a Star” (Children’s Songbook, 163).

• Leftemap tingting blong pikinini blong yu blong no haedem laet blong olgeta (luk long 3 Nifae 12:15), letem olgeta wanwan blong haed o kavremap laet. Afta, kavremap o haedem laet, mo askem ol pikinini blong talem sam samting we oli save mekem blong stap ol gud eksampol long ol narawan.

3 Nifae 13:19–21

“Be hivimap, blong yufala bakegen, ol rij samting long heven.”

• Taem yumi ridim ol ves ia i save statem wan storian abaot ol rij samting blong yumi. Maet yu save lidim pikinini blong yu long wan tresa hant blong faenem ol samting we i rimaenem olgeta long ol rij samting we i valiu we i no save finis.

3 Nifae 14:7–11

Papa long Heven i ansarem ol prea blong mi.

• Taem yu stap ridim 3 Nifae 14:7, ol pikinini blong yu save mekem ol aksen we i ripresentem wanwan long ol invitesen blong Sevya insaed long ves ia. Eksampol, oli save resemap han blong olgeta (askem), mekem spaeglas wetem han blong olgeta (lukaotem), o mekem oli noknok long doa (noknok). Helpem ol pikinini blong tingting long sam samting we oli save talem mo askem long prea blong olgeta.

• Ol pikinini blong yu maet oli laekem wan gem we bae oli askem wan samting mo karem wan samting we i defren olgeta. Long 3 Nifae 14:7–11,?wanem nao Sevya i wantem yumi blong save abaot Papa blong yumi long Heven ?

3 Nifae 14:21–27; 15:1

Sevya i wantem mi blong harem mo mekem wanem we Hem i stap tijim.

• Tingting long sam wei we yu save helpem famli blong yu i pikjarem parabol we i stap long ol ves ia. Maet ol memba blong famli blong yu oli save droem pikja, mekem ol aksen, o bildim ol samting long ol strong fandesen mo ol fandesen blong sanbij. Oli save jenisim nem blong olgeta i long “waes man” taem oli stap ridim 3 Nifae 14:24–27 o singsing “The Wise Man and the Foolish Man” (Children’s Songbook, 281). O oli save stanap taem oli harem toktok ia“mekem” long 3 Nifae 14:21–27 mo 15:1.

• Invaetem ol pikinini blong stanap, mo askem olgeta blong traem tingting se wan leg i ripresentem fasin blong stap harem ol toktok blong Sevya, mo nara leg i ripresentem fasin blong mekem ol toktok blong Sevya. Invaetem ol pikinini blong traem blong balensem leg blong olgeta taem oli “harem” toktok ia leg. ?Bae wanem i hapen sapos wan strong win i blo i kam insaed long rum? Afta yu mo pikinini blong yu save lukaotem ol stret samting we Sevya i tijim yumi blong mekem: luk long 3 Nifae 12:3–12, 21–26; 13:5–8.

Blong kasem moa aedia, luk long magasin blong Fren long manis ia.

Visit blong Sevya long Ol Pipol long Amerika,i kam long Glen S. Hopkinson