Ol tijing blong Jisas Kraes oli moa bitim wan naesfala wei blong tingting hevi long hem. Oli stap ia blong givim yumi insperesen blong kam moa olsem Hem. Buk blong namba 4 Nifae i soem olsem wanem gospel blong Sevya i save jenisim ol pipol. Afta long sot seves blong Jisas, plante handred yia blong raorao bitwin Ol Man blong Nifae mo Ol Man blong Leman, i finis. Tufala nesen ia, we oli save gud tufala from fasin blong stap agens mo stap raorao, oli kam “ol pikinini blong Kraes” (4 Nifae 1:17), mo “oli stat blong serem evri samting long medel blong olgeta” (4 Nifae 1:3). “Lav blong God we i bin stap insaed long hat blong ol pipol,” mo “i no save gat wan pipol we i moa hapi long medel blong evri pipol we han blong God i mekem olgeta” (4 Nifae 1:15–16). Hemia nao wei we ol tijing blong Sevya oli bin jenisim Ol Man blong Nifae mo Ol Man blong Leman. ?Olsem wanem nao oli stap jenisim laef blong yu?
Oli singaotem Jos blong Jisas Kraes folem nem blong Hem.
Taem we ol disaepol blong Jisas Kraes oli stat blong stanemap Jos blong Hem truaot long kantri, wan kwestin i kam, be, long sam, i wan smol samting nomo—?bae wanem nem nao i nem blong Jos? (luk long 3 Nifae 27:1–3 ?Wanem nao yu lanem abaot hamas nem ia i impoten long ansa blong Sevya we i stap long 3 Nifae 27:4–12
Sevya i talemaot nem blong Jos blong Hem tedei (luk long Doktrin mo Ol Kavenan 115:4. Tingting Hevi long wanwan toktok insaed long nem ia. ?Olsem wanem ol toktok ia oli helpem yumi blong save huia yumi, wanem yumi biliv long hem, mo olsem wanem bae yumi mekem ol samting?
Luk tu long Russell. M. Nelson, “Stret Nem blong Jos,” Liahona, Nov 2018, 87–89,“Jesus Christ Declares the Name of His Church and His Doctrine” (vidio), Gospel Library.
Oli bildim Jos Ia blong Jisas Kraes folem gospel blong Hem.
Afta we yu eksplenem se Jos blong Hem, oli mas bildim antap long gospel blong Hem, (3 Nifae 27:10Sevya i stap tokbaot wanem nao hem i gospel. ?Hao nao bae yu talem sot stori blong wanem we Hem i talem long 3 Nifae 27:13? Long mining ia, ?i minim wanem long Jos—mo long yu—blong oli bildim long gospel blong Hem?
Raetemdaon wanem we yu lanem. Luksave wanem Sevya i tijim ol disaepol blong Hem long 3 Nifae 27:23–26. ?From wanem hem i impoten blong kipim wan rekod abaot ol eksperiens long saed blong spirit? ?Wanem insperesen nao yu bin kasem blong raetemdaon afta we yu stadi long 3 Nifae?
?Bae yu talem talem wanem sapos Sevya i askem yu, olsem we Hem i askem ol disaepol: “?Yufala i wantem se mi givim wanem long yufala?” (3 Nifae 28:1). Tingbaot kwestin ia taem yu stap ridim 3 Nifae 28:1–11 ?Wanem nao yu lanem abaot ol samting we hat blong ol disaepol i wantem aot long ol ansa blong kwestin blong Hem? ?Wanem nao i stap mekem ol filing blong hat blong yu i stap jenis taem laef folem Jisas Kraes?
Ol hym, oltaem oli talemaot ol filing blong hat—“More Holiness Give Me” i wan gudfala eksampol (Hym, namba 131). Tingting blong faenem wan hym we i soem wanem nao yu wantem tumas.
Buk blong Momon i wan saen we i talem we wok blong ol lata-dei i stat finis mo i stap hapen.
Tingbaot ol saen we i letem yu save se wan samting bae i hapen. Eksampol: ?olsem wanem nao yu save se ren i stap kam? o ?weta i stap jenis? Long 3 Nifae 29:1–3, ?olsem wanem nao yu save se wok blong God blong karem i kam tugeta ol pipol blong Hem “i stat blong i hapen finis”? (luk tu long 3 Nifae 21:1–7). Yu save tekem not long 3 Nifae 29:4–9, ol samting we ol pipol oli no agri long dei blong yumi tedei. ?Olsem wanem nao Buk blong Momon i mekem fet blong yu i kam moa strong long ol samting ia?
Taem yumi stap folem ol tijing blong Jisas Kraes, bae i lidim yumi blong yumi stap wok wan mo stap glad.
?Traem blong tingting se bae i olsem wanem blong laef long ol yia ia we i Sevya i stap visit? Taem yu stap stadi long 4 Nifae 1: 1–18, tingting blong raetemdaon ol blesing we pipol i bin kasem. Maet yu wantem makem o tekem not long ol joes we oli bin mekem we i bin blesem laef blong olgeta. ?Wanem nao Jisas i tijim long olgeta we i givim insperesen long olgeta blong oli mekem ol raet joes? Hemia i sam long ol eksampol, be yu save faenem sam narafala: 3 Nifae 11:28–30; 12:8–9, 21–24, 40–44; 13:19–21, 28–33; 14:12; 18:22–25.
Tingting hevi long wanem yu save mekem blong helpem famli blong yu, wod, o komuniti blong yu blong laef long wan yuniti mo hapines we i moa bigwan, olsem ol pipol. ?Wanem nao yu save mekem blong help blong stopem seraot mo blong stap “wan” wetem ol narafala pikinini blong God? ?Wanem tijing blong Jisas Kraes nao i helpem yu blong mekem gol ia i kamtru?
Sore tumas, sosaeti blong Saeon we oli tokbaot long 4 Nifae long en, i prapa lus evriwan. Taem yu stap ridim 4 Nifae 1:19–49, lukaotem ol fasin blong man, mo fasin blong mekem samting we i bin mekem se sosaeti ia i foldaon, i go brokbrok. ?Wanem nao yu save mekem blong helpem yu stopem ol kaen fasin ia?
Luk tu long Moses 7:18; D. Todd Christofferson, “Sustainable Societies,” Liahona, Nov. 2020, 32–35; Reyna I. Aburto, “With One Accord,” Liahona, May 2018, 78–80; Gospel Topics, “Belonging in the Church of Jesus Christ,” Gospel Library.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Blong introdiusum olsem wanem nem blong Jos blong Jisas i impoten, toktok wetem pikinini blong yu abaot nem blong olgetawan. ?From wanem nem blong yumi i impoten? Yu save rid long 3 Nifae 27:3 mo lukaotem, ol kwestin we ol disaepol blong Jisas i gat. Helpem ol pikinini blong yu blong faenem ansa long 3 Nifae 27:5–8. ?From wanem nem blong Jos i impoten?”
Helpem ol pikinini blong tingting long ol defren grup we oli memba blong ol, olsem wan famli, o wan klas blong Praemeri. Askem olgeta blong talem long yu se i olsem wanem blong stap olsem wan memba blong wanwan grup. Tugeta singsing, “The Church of Jesus Christ” (Children’s Songbook, 77), mo askem ol pikinini blong tokbaot ol risen from wanem oli tangkyu from Jos blong Sevya.
Oli bildim Jos Ia blong Jisas Kraes folem gospel blong Hem.
Sevya i talem sot gospel blong Hem long 3 Nifae 27. Maet yu wantem eksplenem long pikinini blong yu toktok ia gospel i minim ‘gud nius.’ ?Wanem gud nius yumi faenem long 3 Nifae 27:13–16? Yusum aktiviti pej blong wik ia blong tijim ol pikinini wanem ia testemoni mo wanem i stap insaed long wan testemoni.
Papa long Heven i wantem evriwan long ol pikinini blong Hem blong gobak stap wetem Hem.
Yu save plei wan gem, mo insaed long hem i gat wan i haed, mo ol nara memba blong famli oli stap traem blong faenem hem. Hemia i save lidim yumi blong toktok raon long glad we yumi filim taem yumi faenem wan man we i lus. Afta we yu ridim 3 Nifae 27:30–31, yu save tokbaot olsem wanem blong helpem wanwan long yumi stap moa kolosap long Papa long Heven mekem se i “nogat … wan i lus.”
Fo Nifae
Stap folem Jisas Kraes i mekem mi glad.
Blong pikinini blong yu i lanem abaot fasin blong stap glad blong ol pipol we oli tokbaot long 4Nifae yu save soem long olgeta ol pikja blong ol pipol i stap glad. Afta, taem yufala stap ridim ol ves 2–3 mo 15–17 (o “Japta 48: Pis long Amerika,” Book of Mormon Stories, 136–37), oli save poenem aot ol pikja long stori we i gat fasin blong stap glad.
Blong helpem ol pikinini oli praktisim wanem oli stap tijim long 4 Nifae 1:15–16, presentem sam situesen long olgeta, we oli pipol oli kroskros long olgeta. Invaetem olgeta blong oli rolplei long wanem situesen we i stap, mo bae i olsem sapos oli traem blong laef we yumi gat “lav blong God” insaed long ol hat blong yumi.
Blong mo aedia, luk long magasin blong Fren long manis ia.
Pikja
Jisas i stap toktok wetem Ol Trifala Disaepol we Oli Ol Man blong Nifae
Kraes wetem Ol Trifala Disaepol we Oli Ol Man blong Nifae,, i kam long Gary L. Kapp