Ootan Moamoana e bon Oota i Aoia,, iroun Gary L. Kapp

Okitobwa 7–13: “Nooria, E a Bwanin Kimwareireiu”

3 Nibwaai 17–19

Ea tibwa tia Iesu Kristo ni kabanea ana bong n ibuobuoki n te Aba ni mari, n reirei Ana euangkerio, n anganiia aomata aia tai n nora ao n riing mwiin ikoakina n Rabwatana ae mangauti, ao ni kakoaua ae Ngaia bon te Tia Kamaiu ae taekinaki n te berita. Ngkai e nang boo te tai ni mwananga. “E a kaan boo au tai,” E taku (3 Nibwaai 17:1). Ngkai e nang oki Nakon Tamana, ao E ataia bwa a kainnanoa te tai aomata n iangoa te bwai ae E reireiniia iai. Ao, e beritana okina n te bong are i mwiina, E kanakoia aika uanao nakon mweengaia. Ma akea ae nako. A aki taekina te bwai ae a namakinna, ma e kona n namakinna Iesu: a kantaningaia bwa E na “tiku riki teutana irarikiia” (3 Nibwaai 17:5). Iai tabena riki tabeua aika a kakawaki aika e riai ni karaoi, ma kaotan ana nanonaga nakoia natin te Atua bon te bwai ae rangi ni moanbwai Irouna n taainako. Ngaia are e a tiku Iesu teutana riki te tai. Tera are riki imwiina bon te katooto ae moan te akoi n te mwakuri n ibuobuoki ae koreaki inanon koroboki aika tabu. Naake a mene ikekei a tii kona n taekinna bwa te bwai ae kaangaanga aron kabwarabwarakina (taraa 3 Nibwaai 17:16–17). Iesu e taekina bwaron te tamnei ae aki kantaningaaki ma taeka aikai: “Ngkai nooria, bwa e a bwanin kimwareireiu” (3 Nibwaai 17:20).

Iango ibukin Reiakinana n te Mweenga ao n te Taromauri

3 Nibwaai 17; 18:24–25, 30–32

Te Tia Kamaiu bon au banna ni katooto ae kororaoi n te mwakuri n ibuobuoki.

Te katautau tao 2,500 aomata ake a mena ikekei ngke e kaoti te Tia Kamaiu, ma E kunea te anga are E na kona ni buoka temanna imwiin temanna. Tera ae ko nooria n aron are E ibuobuoki iai n 3 Nibwaai 17; 18:24–25, 28–32? Tera kainnano aika e ibuobuoki nako iai? Tera anua are a kanakoraoa aron Ana mwakuri n ibuobuoki? Ko na bae naba n iangoia bwa e na kanga ni buokiko. Ko na kanga n irii Ana katooto? (Taraa naba 3 Nibwaai 18:24–25 ao 28–32.)

Taraa naba “Jesus Christ Has Compassion and Heals the People” (video), Gospel Library.

3 Nibwaai 17:13–22; 18:15–25; 19:6–9, 15–36

E reireinai arou n tataro te Tia Kamaiu.

Iangoia bwa e na kanga arona ngkana ko ongo bwa e tataro te Tia Kamaiu ibukim. E kanga te taneiai ae aron anne n roota arom n tataro? Iangoa aei inanom ngkai ko kamatebwaia 3 Nibwaai 17:13–22; 18:15–25; 19:6–9, 15–36. Tera ae ko reiakinna man ana katooto Iesu Kristo ao ana anga reirei ibukin te tataro? Iangoia ukori atataii bwa ko na kanga, nningai, n te tabo raa, ibukin antai, ao bukin tera ngkai ko tataro. Tera riki nonoori ae ko karekei man kiibu aikai?

Taraa naba Reirei ao Berita aika Tabu 10:5.

3 Nibwaai 18:1‒12

I kona ni kaonaki n te tamnei ngkana I kana te toa.

Ngkana iai te bwai ae ti kakaraoia n taainako, e riki bwa karaoan te mwakuri ae taneiai te aba iai ke ae aki katoa tai. N tabetai ti kunea bwa ti reitinako ni karaoia n akea iangoakina. Ko na kanga ni kateimatoa karaoan anne ma are e riki ma te otenanti n te toa ni katoa wiiki? Ngkai ko wareka 3 Nibwaai 18:1–12, iangoia inanom bwa ko na kanga ni “kaonaki” n te maiu n tamnei ni katoa te tai are ko taua iai te toa (taraa naba 3 Nibwaa 20:1–9). Ni kaineti ma kiibu 5–7, 11, tera bwaai tabeua aika ko riai ni karaoi n “katoatai”? Ko kona naba iangoia inanom bwa bukin tera ngkai e anganiira te otenanti n te toa Iesu Kristo—ao ngkana te toa e kakoroi bukin Ana kantaninga inanon maium. Bukin tera ngkai e tabu te toa iroum?

N ana marooro “Always Remember Him” (Riaona, Beb. 2018, 4–6), Beretitenti Henry B. Eyring e anga “teniua kaoti iango bwa tera ae ko kona n uringnga ni katoa wiiki ngkana ko butimwaei kanikina ibukin tabun te toa.” Tera ae raka taraana iroum n ana kaoti iango aikai? Tera ae ko kona ni karaoia ni kanakoraoa riki am taromauri n tain te toa ao inanon te wiiki ae bwanin?

Tera bwaai riki aika ko kona ni karaoi bwa e na uaana riki am taromauri? Ko kona ni bon titirakiniko titiraki n aron aikai: “E kanga ana anga karea te Tia Kamaiu n roota maiu n te bong ae koraki?” “Iai nakoraoin au waaki ngkai ngai Ana reirei, ao tera ae I kona ni katamaroa?”

Taraa naba Mataio 26:26–28; Jeffrey R. Holland, “Behold the Lamb of God,” Riaona, Meei 2019, 44–46; “As Now We Take the Sacrament,” Anene n Taromauri, nambwa. 169; “Jesus Christ Introduces the Sacrament” (video), Gospel Library; Gospel Topics, “Sacrament,” Gospel Library.

Angan te tai ma taina ni karaua n iangoia. N tabetai, kamatebwaian booki aika tabu e riki bwa te rabakau ae irengan n te wareware, tataro, ao iangoakina inanom. Ngkana ko angan te tai ae rau ma taina n iango ao n taetae ma te Atua ibukin baike ko reiakin, ko kona ni karikirakea mwaakan Ana taeka inanon maium.

3 Nibwaai 18:22-25

I kona n “taua i eta” ootan Iesu Kristo.

Iangoia bwa aongkoa are iai raoraom ae bon tuai n ongo taekan Iesu Kristo ma ngkoe bon temanna te tia Iriiria. A na tera kabanean ana taeka raoraom Ibukina, ni kaineti ma aron am mwakuri? Tera nanon aei iroum ae ko na “taua i eta ootam bwa e na oota nakon te aonaaba”? (3 Nibwaai 18:24). Tera kakao riki tabeua are e anga te Tia Kamaiu n 3 Nibwaai 18:22–25 are e buokiko n taua i eta te oota anne?

Taraa naba Bonnie H. Cordon, “That They May See,” Riaona, Meei 2020, 78–80.

3 Nibwaai 18:36–37; 19:6–22

Ana reirei Iesu Kristo a ukoukora ana bwaintituaraoi te Tamnei ae Raoiroi.

Iangoi am tataro ake n taai aikai. Tera ae a reireiniko am tataro ibukin nanom ae korakora? Imwiin kabanean teuana te bong imatan te Tia Kamaiu, ao aomata ake a uanao “a bon tataro ibukin te bwai are a bon kainnanoia raoi”—ana bwaintituaraoi te Tamnei ae Raoiroi (3 Nibwaai 19:9). Bukin tera bwa e rangi ni kainnanoaki ana bwaintituaraoi te Tamnei are Raoiroi? Ngkana ko wareki mwakoro n taeka aikai, iangoa raoi are ko tangiria mai inanom ibukin ana iraorao te Tamnei ae Raoiroi. Ko na kanga n ukora ana iraorao ma nanom ni koaua?

Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakorakiia Kairake maekatiin.

Iango ibukin Reiakinaia Ataei

3 Nibwaai 17:7, 20–25

Te Tia Kamaiu e tangiriia ni kabane natin Tamara are Karawa.

• Ko kona ni kabongana te tamnei n aron akana inanon te kamataata aei ke te witeo “Jesus Christ Prays and Angels Minister to the Children” (Gospel Library) ni buokiia natim ni katamneia te karaki n 3 Nephi 17. Iangoia wareki kibun taeka ke kiibu man 3 Nibwaai 17 aika a kamatata ana tangira te Tia Kamaiu ibukiia aomata (n aron kiibu 7 ao 20–25). A kona am ataei ni korei tamneia ma Iesu. Ngkana a karaoa anne, buokiia bwa a na iangoi kawai ake E kaota iai Ana tangira Iesu ibukiia.

Nooria Ami Ataei,iroun Gary L. Kapp

3 Nibwaai 18:1–12

I kona n iangoa Iesu n au tai ni kana te toa.

• Tao ko kona ni kaoiia ataei bwa a na tuangko tera ae e riki n tain te bootaki n toa. Ngkanne ko kona ni wareka 3 Nephi 18:1–12 ao tuangiia am ataei bwa a na katea baia ngkana a ongo te bwai ae ti te arona ma are ti karaoia n te bong aei. Tera ae e tangiria iesu Kristo bwa ti na uringnga ke n iangoia n tain te toa? (taraa 3 Nibwaai 18:7, 11).

3 Nibwaai 18:15–24; 19:6–9, 15–36

Iesu e reireinai aron te tataro.

• Ni kaai n anenea te kuna ae taekan te tataro, n aron “A Child’s Prayer” (Aia Boki n Anene Ataei, 12–13), bon te kawai ae tamaroa ni buokiia am ataei n iangoia bwa bukin tera ngkai ti tataro. Ko kona ngkanne ma am ataei ni wareka 3 Nibwaai 18:18–21 ao ni maroroakinna bwa tera ae reireia Iesu ibukin te tataro. Kaoakiia am ataei bwa a na tuangko aron aia namakin ngkana a tataro e kona ni buokiia n tibwaua aia koaua ibukin te tataro.

• E na bae ni kaunga irouia ataei te nako ni kakae kaubwai ibukin tabeua kakabwaia iaon te tataro. Ko kona ni korei kiibu aika a kaineti iaon te mwakoro ni beeba ao karabai: 3 Nibwaai 18:15; 3 Nibwaai 18:20; 3 Nibwaai 18:21; 3 Nibwaai 19:9; ao 3 Nibwaai 19:23. A na kunei ngkanne beeba aikanne am ataei ao are a na wareki koroboki aika tabu aikai, n tarai baika e reirei Iesu Kristo ma Ana reirei iaon te tataro.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

A Karaoa aia Mwakuri n ibuobuoki Anera Nakoia, by Walter Rane.