Te Kateniua n Nibwaai: Tengaun ma Uoman Aikai Ake I a tia n Rineia, iroun Gary L. Kapp

Tebetembwa 30–Okitobwa 6: “Bon Ngai te Tua, ao te Oota”

3 Nibwaai 12–16

N aroia ana reirei Iesu ake a ikotaki bwa a na ongora n te kabwarabwara iaon te Maunga i Kariraia, ao aomata ake a botaki n te tembora are n te Aba ni Mari a tia ni maeka iaan ana tua Moote. A tia n iria ibukina bwa a kairii tamneia nakon Kristo (taraa Iakoba 4:5), ao ngkai Kristo e tei i mataia, ni katanoata te tua ae rietaata riki. Ma riki ngaira aika ti tuai man maiuakina ana tua Mote ti kona ni kinaa te kainibaire are e kateia Iesu ibukiia Ana reirei bon te tua ae rietaata riki. “I tangiria bwa kam na kororaoi n arou,” E taekinna (3 Nibwaai 12:48). Ngkana ko namakina te aki tau n te bwai aei, uringnga naba are e taku Iesu, “A kakabwaiaki ake a baki tamneia ake a roko nakoiu, bwa aia bwai uean karawa” (3 Nibwaai 12:3). Te tua ae rietaata riki aei bon te kakao—te kawai teuana n taekina “Nakoiu ao kam na kamaiuaki” (3 Nibwaai 12:20). N aron ana tua Mote, te tua aei e kairiira nakon Kristo—ti Temanna ae kona ni kamaiura ao ni kakororaoira. “Nooria,” E taku, “Bon Ngai Te Tua, Ao te Ota. Taraai, ao teimatoa n uaa te toki, ao kam na bon maiu” (3 Nibwaai 15:9).

Iango ibukin Reiakinana n te Mweenga ao n te Taromauri

3 Nibwaai 12–14

I kona n riki bwa ana reirei ni koaua Iesu Kristo.

Aio te kawai teuana ni kamatebwaia ao ni karaoa te bwai ae reireia te Tia Kamaiu inanon 3 Nibwaai 12–14: Rinei kurubu ni kiibu, ao nooria ngkana ko kona ni koroia ni kakimototoa te bwai ae reiakinaki n teuana te tiententi are e moanaki ma “Ana reirei ni koaua Iesu Kristo …” Te katooto, kakimototoan 3 Nibwaai 13:1–8 e kona n ae “Ana reirei ni koaua Iesu Kristo a aki ukora kamoamoakiia irouia aomata ibukin karaoan ae tamaroa.” Kataia ma kiibu aikai:

• 12:3–16:

• 12:38–44:

• 13:19–24:

• 14:1–5:

• 14:21–27:

• Tabeua riki kiibu ake a kaunga nanom

Imwiin kamatebwaian kiibu aikai, tera ae ko kaungaaki iai bwa ko na karaoia n iriira Iesu Kristo?

Te tua inanon 3 Nibwaai 12:48 e kona ni kakua iangoana—ni kangaanga naba karaoana. Tera ae ko reiakinna man ana rongorongo Unimwaane Jeffrey R. Holland “Be Ye Therefore Perfect—Eventually” (Riaona, Nob. 2017, 40–42) are e buokiko bwa ko na oota n ana taeka te Tia Kamaiu n te kibu aei? Ni kaineti ma Moronaai 10:32–33, tera te anga ae kona kororaoi iai n aron te Tia Kamaiu?

Taraa naba Dallin H. Oaks, “The Challenge to Become,” Ensign, Nov. 2000, 32–34; Gospel Topics, “Become like Jesus Christ,” Gospel Library; “Lord, I Would Follow Thee,” Anene n Taromauri, nambwa. 220; “Jesus Christ Teaches How to Live the Higher Law” (video), Gospel Library.

Kabongana te reirei ma bwaai ni kabotau. E reirei te Tia Kamaiu koaua aika korakora man kabonganakin bwaai aika e tataneiai te aba iai. Ko kona ni karaoa te bwai ae ti te arona ngkai ko kamatebwai ke n reiakina taekan 3 Nibwaai 12. N taraia ke n taua i baim te taoro, te taura te nenea, ke te kooti a kona ni katamaroa maroroakinan koaua ae akea tokiia are e anga reirei iaona te Tia Kamaiu.

3 Nibwaai 12:1–2; 15:23–24; 16:1–6

A kabwaia akana a onimaki ao a aki nooria.

Bon tii tabeman ataei ae a tia n noora te Tia Kamaiu ao n ongo Bwanaana, n aron are a karaoia aomata n te Aba ni Mari. Angiia mai ibuakora bon ti tebo ma aomata ake a kabwarabwaraaki n 3 Nibwaai 12:2; 15:23; ao 16:4–6. Tera berita aika a karaoaki nakoia aekan aomata aikanne inanon kiibu aikai? A kanga n tia ni kakoroaki nanon berita aikai inanon maium?

Taraa naba Ioane 20:26–29; 2 Nibwaai 26:12–13; Aramwa 32:16–18.

3 Nibwaai 12:21–30; 13:1–8, 16–18; 14:21–23

I kona ni kekeiaki ni kaitiaka te bwai ae tangiria nanou.

Teuana te botoniango ae ko na riai n ataia inanon mwakoro aikai bon ana kakao te Tia Kamaiu ni maiuakina te tua ae rietaata riki—ni bwaina te raoiroi tiaki tii n ara mwakuri itinaniku ma inanora naba. Taratarai botoniango aikai ngkana e taetae te Tia Kamaiu ibukin te itabarara (3 Nibwaai 12:21–26), kaibwabwaru (3 Nibwaai 12:27–30), tataro (3 Nibwaai 13:5–8), ao te aki mamatam (3 Nibwaai 13:16–18). Tera aekan katooto riki tabeua aika ko kona ni kunei? Tera ae ko kona ni karaoia ni kaitiaki bwaai ake e tangiria nanom?

3 Nibwaai 14:7–11

Tamara are i Karawa e na anganiira bwaai aika tamaroa ngkana I bubuti, ukeuke, ao karebwerebwe.

Ngkana ko wareka ana kakao te Tia Kamaiu n 3 Nibwaai 14:7–11 ni bubuti, ukeuke, ao karebwerebwe, iangoi inanom “bwaai aika a raraoi” ae E tangiriko bwa ko na bubuti ibukina. Koroboki aika tabu riki aikai a kona ni buokiko n ataia bwa ko na kanga ni bubuti, ukeuke, ao ni karebwerebwe. A kona naba n ibuobuoki ni kabwarabwara bwa bukin tera tataro tabeua aki kaekaaki n aron are ko kaantaningaia: Itaia 55:8–9; Ereman 10:4–5; Moronaai 7:26–27, 33, 37; ao Reirei ao Berita aika Tabu 9:7–9; 88:64. A kanga kiibu aikai n roota arom ni bubuti, ukeuke, ao ni karebwerebwe?

Taraa naba Milton Camargo, “Bubuti, Ukeuke, ao Karebwerebwe,” Riaona, Nob. 2020, 106–8.

Ibukin iango riki tabeua, taraa te beeba ni kaongora n te namwakain aio n te Liahona ao Ibukin Kakorakoraia Kairake maekatiin.

Iango ibukin Reiakinaia Ataei

3 Nibwaai 12:14–16

I kona n riki bwa te banna ni katooto ae tamaroa n iriira Iesu.

• N tabetai ataei a kona n aki ata mwaitin aia banna ni katoto are e kona ni kakabwaiaia tabeman. Kabongana 3 Nibwaai 12:14–16 ni kaungaia bwa a na kaotaa otaia. N aron te katooto, ngkana ko wareka “ngkoe” ke “am” inanon kiibu aikai, tuangiia am ataei bwa a na koteiia ibon irouia. Tuangiia ataei te oota are ko nooria irouia ngkana a iriira Iesu Kristo ao e kanga ni kaunga nanom bwa ko na Iriiria naba. Ikotaki anenea te kuna are e kaungaia ataei bwa a na oota n ai aron te oota, n aron “I Am like a Star” (Aia Boki n Anene Ataei, 163).

• Ni kaungai nanoia am ataei bwa a na aki karaba ootaia (taraa 3 Nibwaai 12:15), anganiia bwa a na ikaruoruo ni karabaia ke n rabuna te taura ke taura riki tabeua. A kona ni kanakoa rabunan te taura ni katoa te tai are ngke a atonga aran te bwai are a kona ni karaoia are a na riki bwa banna ni katooto nakoia tabeman.

3 Nibwaai 13:19–21

“Kam na kaikoi kaubwaimi i karawa.”

• Warekan kiibu aikai a kabwanina te marooro iaon bwaai aika ti na kaikoi ni kawakin. Tao ko kona ni kairiia am ataei iaon kakaean te kaubwai bwa a na kakaei bwaai ake a kauringaki iai taekan kaubwai aika moan te kakawaki ae akea tokina.

3 Nibwaai 14:7–11

Tamara are i Karawa e kaekai au tataro.

• Ngkai ko wareka 3 Nibwaai 14:7, tuangiia am ataei bwa a na karaoa te mwakuri are e tei ibukin ana kakao te Tia Kamaiu inanon te kibu aei. Te katoto, a kona ni katei baia (titiraki), kaaraoi bwaai ni kataratara ma baia (kakaae), ke karaoa are aongkoa ko karebwerebwe iaon te mataroa (karebwerebwe). Buokiia am ataei bwa a na iangoi bwaai ake a kona n taekin ao n bubuti n aia tataro.

• A na bae ni kukurei am ataei n te takakaro are a na bubuti te bwai teuana ao a karekea ma ai te bwai ae rangi ni kaokoro. N 3 Nibwaai 14:7–11,tera ae tangiria te Tia Kamaiu bwa ti na ataia ibukin Tamara are i Karawa?

3 Nibwaai 14:21–27; 15:1

Te Tia Kamaiu e tangirai bwa N na ongo ao ni karaoi bwaai ake E reireinai.

• Iangoi kawai aika ko kona ni buokiia am ataei ni katamneia n aia iango taeka ni kaikonaki inanon kiibu aikai. Tao a kona ni korotamnei, katea kain tabeua bwaai, ke katei bwaai aika matoa ao ni bikebike aaia. A kona n oneamwiin araia bwa “te mwaane ae wanawana” ngkai a wareka 3 Nibwaai 14:24–27 ke anenea “The Wise Man and the Foolish Man” (Aia Boki n Anene Ataei, 281). Ke a kona n teirake ni katoa te tai are ngkana a ongo te taeka ae “karaoia” inanon 3 Nibwaai 14:21–27 ao 15:1.

• Aio te bwai n reirei ni kabotau ae ko na kataia: tuangiia am ataei bwa a na iangoia bwa aongkoa are teuana waeia e tei ibukin ongoraean ana taeka te Tia Kamaiu ao are teuana e tei ibukin karaoan nanon ana reirei te Tia Kamaiu are e reireiniira. Kaoiia am ataei bwa a na kataia ni kabaerantiia iaon tii waeia ni “kakauongo”. Tera ae e na riki ngkana e kare te ang ae korakora inanon te ruu? Ngkanne ko kona ngkoe ma am ataei ni kakaei bwaai aika a onoti are e reiakiniira te Tia Kamaiu bwa ti na karaoi: taraa: 3 Nibwaai 12:3–12, 21–26; 13:5–8.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Kawaraia ana Aomata te Tia Kamaiu i Amerika, iroun Glen S. Hopkinson.