21–27 Oketopa: “E Le Mafai Ona I Ai o Ni Tagata e Sili Atu Ona Fiafia”

3 Nifae 27–4 Nifae

O aoaoga a Iesu Keriso, e le na o ni filosofia mananaia e mafaufau loloto i ai. E tatau ona musuia ai i tatou ia avea e faapei o Ia. O le tusi o le 4 Nifae o loo faaalia ai le auala atoa e mafai ai e le talalelei a le Faaola ona suia tagata. I le mavae ai o le auaunaga puupuu a Iesu, sa faapea ona faamutaina loa fefinauaiga na loa ona faia i le va o sa Nifae ma sa Lamana. O malo e lua ia sa lauiloa i le feaina’i ma le faamaualuluga, sa faapea ona “tasi i latou, o le fanau a Keriso” (4 Nifae 1:17), ma sa amata ona latou “tuutele mea uma i totonu ia te i latou” (4 Nifae 1:3). O le “alofa o le Atua … sa mau i loto o tagata,” ma “e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:15–16). O le ala lea na suia ai e aoaoga a le Faaola ia sa Nifae ma sa Lamana. O faapefea ona latou suia oe?

Manatu mo le Aoaoina i le Aiga ma i le Ekalesia

3 Nifae 27:1–12

O le Ekalesia a Iesu Keriso ua faaigoaina i Lona suafa.

A o amata faatulaga e soo o le Faaola Lana Ekalesia i le laueleele, sa aliae se fesili e faapea, i nisi, atonu e foliga o se manatu faatauvaa—o le a le igoa e tatau ona igoa ai le Ekalesia? (tagai 3 Nifae 27:1–3). O le a se mea e te aoaoina e uiga i le taua o lenei igoa mai le tali a le Faaola i le 3 Nifae 27:4–12?

Na faaali mai e le Faaola le igoa o Lana Ekalesia i aso nei i le Mataupu Faavae ma Feagaiga 115:4. Mafaufau loloto i upu taitasi i lena igoa. E faapefea ona fesoasoani nei upu ia tatou iloa ai o ai i tatou, o mea tatou te talitonu i ai, ma pe faapefea ona tatou amio a’i?

Tagai foi Russell M. Nelson, “O Le Igoa Sa’o o le Ekalesia,” Liahona, Nov. 2018, 87–89; “Ua Tautino Mai e Iesu Keriso le Igoa o Lana Ekalesia ma Lana Aoaoga Faavae” (vitio), Gospel Library.

Ua Folafola Mai e Iesu Keriso le Igoa o Lana Ekalesia ma Lana Aoaoga Faavae | 3 Nifae 27

Ua tali e Iesu le tatalo a le perofeta o Nifae ma faaali ia te ia ma isi soo o Amerika Anamua. Ua ta’u e le Alii ia Nifae o le a iloa Lana Ekalesia i Lona suafa, e pei lava ona iloa Ona soo i Lona suafa.

3 Nifae 27:10–22

Ua fausia le Ekalesia a Iesu Keriso i luga o Lana talalelei.

Ina ua maea ona faamatalaina o Lana Ekalesia e tatau ona “fausia i luga o [Lana] talalelei” (3 Nifae 27:10), na faamatalaina e le Faaola po o le a Lana talalelei. E faapefea ona e aoteleina mea na Ia fetalai mai ai i le 3 Nifae 27:13–22? E faavae i lenei faauigaga, o le a le uiga mo le Ekalesia—ma mo oe—ina ia fausia i luga o Lana talalelei?

Tusifaamaumau mea o loo e aoaoina. Matau mea na aoao atu e le Faaola i Ona soo i le 3 Nifae 27:23–26. Aisea e taua ai le tausia o se faamaumauga o mea faaleagaga? O le a se mea ua musuia oe e faamaumau a o e suesueina le galuega a le Faaola i le 3 Nifae?

3 Nifae 28:1–11

“O le a se mea tou te mananao i ai?”

O le a sau tala pe afai e fesili atu le Faaola ia te oe, e pei ona Ia fesili ai i Ona soo, “O le a se mea tou te mananao i ai mai ia te au?” (3 Nifae 28:1). Mafaufau i le fesili lea a o e faitauina le 3 Nifae 28:1–11. O le a se mea ua e aoaoina e uiga i manaoga o loto o le au soo mai a latou tali i Lana fesili? O faapefea ona suia ou manao a o e ola i le talalelei a Iesu Keriso?

O viiga e masani ona faaalia ai manaoga mai le loto—“Faapaia Mai A’u” o se faataitaiga lelei (Viiga, nu. 70). Mafaufau e sue se viiga e atagia ai ou manaoga.

3 Nifae 29–30

O le Tusi a Mamona o se faailoga lea ua faataunuuina le galuega a le Atua i aso e gata ai.

Mafaufau i faailoga e ta’u atu ai ia te oe o le a tupu se mea. Mo se faataitaiga, e faapefea ona e iloa ua oo mai timuga po o ua suia vaitau? E tusa ai ma le 3 Nifae 29:1–3, e faapefea ona e iloa le galuega a le Atua o le faapotopotoina o Lona nuu “ua amata ona faataunuuina”? (tagai foi 3 Nifae 21:1–7). Atonu foi e te manatua, i le 3 Nifae 29:4–9, mea o le a faafitia e tagata i o tatou aso. E faapefea ona faamalosia e le Tusi a Mamona lou faatuatua i nei mea?

4 Nifae 1:1–18

O le mulimuli i aoaoga a Iesu Keriso e taitai atu ai i le lotogatasi ma le fiafia.

Mata e faape’i le ola ai i tausaga na sosoo ma le asiasiga a le Faaola? A o e suesueina le 4 Nifae 1:1–18, mafaufau e lisi ia faamanuiaga na maua e tagata. E mafai foi ona e faailogaina pe matauina ia filifiliga na latou faia na fesoasoani e taitai atu ai i lenei olaga faamanuiaina. O le a le mea na aoao atu e Iesu ia i latou na ono musuia ai a latou filifiliga amiotonu? O nisi nei o faataitaiga, ae e mafai ona e maua isi: 3 Nifae 11:28–30; 12:8–9, 21–24, 40–44; 13:19–21, 28–33; 14:12; 18:22–25.

Mafaufau loloto i mea e mafai ona e faia e fesoasoani ai i lou aiga, uarota, po o le alalafaga ia ola i le lotogatasi ma le fiafia sili atu. O le a se mea e mafai ona e faia e fesoasoani ai e faatoilalo fevaevaeaiga ma avea moni ai ma e “tasi” ma isi fanau a le Atua? O a aoaoga a Iesu Keriso e fesoasoani ia te oe e ausia ai lenei sini?

O le mea e faanoanoa ai, o le nuu o Siona o loo faamatalaina i le 4 Nifae na iu lava ina pauu atu i le amioleaga. A o e faitau i le 4 Nifae 1:19–49, vaavaai mo uiga faaalia ma amioga ia na mafua ai ona uma lo latou fiafia ma le lotogatasi. O le a se mea e mafai ona e faia e aloese ai mai nei uiga po o amioga?

Tagai foi Mose 7:18; D. Todd Christofferson, “O Sosaiete e Gafataulimaina,” Liahona, Nov. 2020, 32–35; Reyna I. Aburto, “Ma le Loto Gatasi,” Liahona, Me 2018, 78–80.

Mo nisi manatu, tagai i lomiga o lenei masina o mekasini o le Liahona ma le Mo Le Malosi o le Autalavou .

Manatu mo le Aoaoina o Tamaiti

3 Nifae 27:3–8

Ou te auai i le Ekalesia a Iesu Keriso.

• Ina ia faailoa atu le taua o le igoa o le Ekalesia a Iesu, talanoa ma lau fanau e uiga i o latou lava igoa. Aisea e taua ai o tatou igoa? Ona mafai lea ona outou faitau faatasi le 3 Nifae 27:3 ma vaavaai mo le fesili na i ai i soo o Iesu. Fesoasoani i lau fanau e sue le tali i le 3 Nifae 27:5–8. Aisea e taua ai le igoa o le Ekalesia?

• E mafai foi ona e fesoasoani i tamaiti e mafaufau i vaega eseese latou te auai ai, e pei o se aiga po o se vasega a le Peraimeri. Fesili atu ia i latou po o le a le mea latou te fiafia i ai e uiga i le auai i vaega taitasi. Ona mafai lea ona outou usuina faatasi le “O Le Ekalesia a Iesu Keriso” (Tusipese a Tamaiti, 48) ma talanoa e uiga i le mafuaaga e te faafetai ai i le auai i le Ekalesia a le Faaola.

3 Nifae 27:13–16

Ua fausia le Ekalesia a Iesu Keriso i luga o Lana talalelei.

• Na aoteleina e le Faaola Lana talalelei i le 3 Nifae 27. E mafai ona e faamatala atu i lau fanau o le upu talalelei o lona uiga o le “tala fiafia.” O le a se tala fiafia tatou te maua i le 3 Nifae 27:13–16? Faaaoga le itulau o gaoioiga o lenei vaiaso e aoao atu ai faapea o le Ekalesia a le Faaola ua fausia i luga o Lana talalelei.

3 Nifae 27:30–31

E olioli le Tama Faalelagi pe a toe foi atu Ana fanau ia te Ia.

• Mafaufau e taaalo i se taaloga e lafi ai se tasi ae taumafai isi e sue o ia. O lenei mea e mafai ona taitai atu ai i se talanoaga e uiga i le olioli tatou te lagonaina pe a maua se tasi na leiloa. A uma ona faitau le 3 Nifae 27:30–31, e mafai ona e talanoa e uiga i le auala e fesoasoani ai i le tasi ma le isi ia latalata atu i le Tama Faalelagi ina ia “leai so latou ua se.”

4 Nifae

O le mulimuli ia Iesu Keriso e aumaia ia te a’u le olioli.

• Ina ia fesoasoani i lau fanau e aoao e uiga i le fiafia o tagata o loo faamatalaina i le 4 Nifae, e mafai ona e faaali atu ia i latou ata o tagata fiafia. Ma, a o outou faitauina faatasi fuaiupu 2–3 ma le 15–17 (po o le “Mataupu 48: Filemu i Amerika,” Tala o le Tusi a Mamona, 136–37), e mafai ona latou faasino i ata pe a e oo i se mea i le tala e aumaia ai le fiafia.

  Chapter 48: Peace in America

• Ina ia fesoasoani i tamaiti e faataitai mea o loo aoaoina i le 4 Nifae 1:15-16, ia tuuina atu ia i latou tulaga e feita ai tagata i isi. Valaaulia i latou e faatino pe faape’i le tulaga e i ai pe afai tatou te maua le “alofa o le Atua” i o tatou loto.

Mo nisi manatu, tagai i le lomiga o lenei masina o le mekasini o le Uo .

O Keriso ma Au Soo Sa Nifae e Toatolu, saunia e Gary L. Kapp.