21–27 nō ’Ātopa : « ’Aita ho’i e mau ta’ata i ’oa’oa roa atu »

3 Nephi 27–4 Nephi

’Ua hau atu te mau ha’api’ira’a a Iesu Mesia i te parau nehenehe noa e feruri. ’Ua fa’ata’ahia te reira nō te fa’auru ia tātou ’ia riro mai iāna ra te huru. Tē fa’a’ite nei te buka 4 Nephi, nāhea te ’evanelia a te Fa’aora e nehenehe ai e taui hope roa i te ta’ata. I muri iho i te tāvinira’a tau poto a Iesu, ’ua ’ore roa e rave rahi tenetere mārōra’a i roto i te mau ’āti Nephi ’e te mau ’āti Lamana. ’Ua riro mai nā nūna’a i mātauhia nō tō rātou ’āfaro ’ore ’e te te’ote’o « ’ei hō’ē, e mau tamari’i nā te Mesia » (4 Nephi 1:17), ’e ’ua ha’amata rātou i te « ’āmui-tāhō’ē-hia tā rātou mau mea ato’a i rotopū ia rātou » (4 Nephi 1:3). « ’Ua vai te aroha o te Atua i roto i te ’ā’au o te mau ta’ata » ’e « ’aita ho’i e mau ta’ata i ’oa’oa roa atu i rotopū i te mau ta’ata i hāmanihia e te rima o te Atua » (4 Nephi 1:15–16). Mai teie te huru te mau ha’api’ira’a a te Fa’aora i te fa’ataui i te mau ’āti Nephi ’e te mau ’āti Lamana. Nāhea te reira i te fa’ataui ia ’oe ?

Mana’o nō te ’apo i te ha’api’ira’a i te ’utuāfare ’e i te fare purera’a

3 Nephi 27:1–12

’Ua topahia te ’Ēkālesia a Iesu Mesia i tōna i’oa.

’A ha’amata ai te mau pipi a te Fa’aora i te ha’amau i tāna ’Ēkālesia nā te fenua ato’a, ’ua hiti mai te hō’ē uira’a, nō vetahi mau ta’ata, e uira’a faufa’a ’ore paha—e aha te i’oa o te ’Ēkālesia ? (hi’o 3 Nephi 27:1–3). E aha tā ’oe i ’apo mai nō ni’a i te faufa’a rahi o teie i’oa i roto i te pāhonora’a a te Fa’aora i roto te 3 Nephi 27:4–12 ?

’Ua heheu mai te Fa’aora i te i’oa o tāna ’Ēkālesia i teie mahana i roto Te Ha’api’ira’a Tumu ’e te mau Fafaura’a 115:4. ’A feruri i te ta’o tāta’itahi i roto i terā i’oa. Nāhea teie mau ta’o i te tauturu ia tātou ’ia ’ite ’o vai tātou, e aha tā tātou e ti’aturi nei ’e e nahea tātou ’ia rave ?

Hi’o ato’a Russell M. Nelson, « Te i’oa ti’a o te ’Ēkālesia », Liahona, Novema 2018, 87–89 ; « ’Ua fa’a’ite Iesu Mesia i te i’oa o tāna ’Ēkālesia ’e tāna ha’api’ira’a tumu » (video), Vaira’a buka ’evanelia.

3 Nephi 27:10–22

’Ua patuhia te ’Ēkālesia a Iesu Mesia i ni’a i tāna ’evanelia.

I muri iho i te tātarara’a ē, tītauhia ’ia patu i tāna ’Ēkālesia « i ni’a iho i [tāna] nei ’evanelia » (3 Nephi 27:10, ’ua fa’ata’a mai te Fa’aora e aha tāna ’evanelia. Nāhea ’oe i te ha’apoto i te mea tāna i parau i roto te 3 Nephi 27:13–22 ? ’Ia au i teie tātarara’a, e aha te aura’a nō te ’Ēkālesia—’e nō ’oe—’ia patuhia i ni’a i tāna ’evanelia ?

Pāpa’i i te mea tā ’oe e ha’api’i mai ra. ’A hi’o i te mea tā te Fa’aora i ha’api’i i tāna mau pipi i roto te 3 Nephi 27:23–26. Nō te aha e mea faufa’a ’ia tāpe’a i te hō’ē pāpa’a parau nō te mau ’itera’a pae vārua ? E aha tei fa’auruhia ia ’oe ’ia pāpa’i ’a tuatāpapa ai ’oe i te tāvinira’a a te Fa’aora i roto te 3 Nephi ?

3 Nephi 28:1–11

« E aha tā ’outou i hina’aro ? »

E aha tā ’oe e parau ’āhani ’ua ui mai te Fa’aora ia ’oe mai tāna i ui i tāna mau pipi ē : « E aha tā [’oe] i hina’aro iā’u nei ? » (3 Nephi 28:1). ’A feruri i teie ’a tai’o ai ’oe te 3 Nephi 28:1–11. E aha te ha’api’ira’a tā ’oe i ’apo mai nō ni’a i te mau hia’ai o te ’ā’au o te mau pipi i roto i tā rātou pāhonora’a i tāna uira’a ? Nāhea tō ’oe mau hina’aro e taui ai ’a ora ai ’oe i te ’evanelia a Iesu Mesia ?

Pinepine te mau hīmene i te fa’a’ite i te mau hina’aro o te ’ā’au—« E te Fatu here » ’o te hō’ē ïa hi’ora’a maita’i (Te mau Hīmene, N°65). ’A feruri i te ’imi mai i te hō’ē hīmene ’o te fa’a’ite mai i tō ’oe mau hina’aro.

3 Nephi 29–30

E tāpa’o te Buka a Moromona ē, tē tupu ra te ’ohipa a te Atua i te mau mahana hope’a nei.

’A feruri i te mau tāpa’o ’o te fa’a’ite mai ia ’oe ē, e tupu mai te hō’ē ’ohipa. ’Ei hi’ora’a, nāhea ’oe i te ’itera’a ē, tē tae mai nei te ua ’aore rā tē taui ra te pu’e tau ? ’Ia au i tei pāpa’ihia i roto te 3 Nephi 29:1–3, nāhea ’oe e ’ite ai ē te ’ohipa a te Atua nō te ha’aputuputura’a i tōna mau ta’ata « ’ua ha’amata i te tupu » ? (hi’o ato’a 3 Nephi 21:1–7). E nehenehe ato’a ’oe e pāpa’i, i roto te 3 Nephi 29:4–9, i te mau mea tā te ta’ata e huna nei i tō tātou nei ’anotau. Nāhea te Buka a Moromona i te ha’apūai i tō ’oe fa’aro’o i roto i teie mau mea ?

4 Nephi 1:1–18

E arata’i te pe’era’a i te mau ha’api’ira’a a Iesu Mesia i te hō’ēra’a ’e i te ’oa’oa.

E aha ïa te huru ’ia ora i te mau matahiti i tupu ai te tere o te Fa’aora ? ’A tuatāpapa ai ’oe te 4 Nephi 1:1–18, ’a feruri i te tāpura i te mau ha’amaita’ira’a tā te mau ta’ata i fāri’i. E nehenehe ato’a ’oe e tāpa’o ’aore rā e pāpa’i i te mau mā’itira’a tā rātou i rave, tei tauturu i te arata’i atu i teie orara’a ha’amaita’ihia. E aha tā Iesu i ha’api’i ia rātou ’o tei fa’auru i tā rātou mau mā’itira’a parauti’a ? Teie te tahi mau hi’ora’a, e ’itehia mai rā ia ’oe te tahi atu : 3 Nephi 11:28–30 ; 12:8–9, 21–24, 40–44 ; 13:19–21, 28–33 ; 14:12 ; 18:22–25.

’A feruri e aha tā ’oe e nehenehe e rave nō te tauturu i tō ’oe ’utuāfare, te pāroita ’aore rā te huira’atira ’ia ora ma te tāhō’ē rahi a’e ’e te ’oa’oa rahi. E aha tā ’oe e nehenehe e rave nō te tauturu ’ia upo’oti’a i ni’a i te mau vāhira’a ’e ’ia riro mau ’ei « hō’ē » ’e te tahi atu mau tamari’i a te Atua ? E aha te mau ha’api’ira’a a Iesu Mesia e tauturu nei ia ’oe ’ia fa’aoti i teie fā ?

Te vāhi pe’ape’a, ’ua topa te tōtaiete Ziona tei fa’a’itehia i roto te 4 Nephi i roto i te ’ino. ’A tai’o ai ’oe te 4 Nephi 1:19–49, ’a ’imi i te mau peu ’e te huru tei fa’ahope tō rātou ’oa’oa ’e tō rātou hō’ēra’a. E aha tā ’oe e nehenehe e rave nō te tauturu i te fa’a’ore i teie mau huru ’aore rā mau peu ?

Hi’o ato’a Mose 7:18 ; D. Todd Christofferson, « Mau tōtaiete tau roa », Liahona, Novema 2020, 32–35 ; Reyna I. Aburto, « Ma te ’ā’au hō’ē », Liahona, Mē 2018, 78–80.

Nō te tahi atu ā mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

3 Nephi 27:3–8

E melo vau nō te ’Ēkālesia a Iesu Mesia.

• Nō te ’ōmuara’a i te faufa’a rahi o te i’oa o te ’Ēkālesia a Iesu, ’a paraparau i tā ’oe mau tamari’i nō ni’a i tō rātou iho i’oa. Nō te aha e mea faufa’a tō tātou mau i’oa ? I muri iho e nehenehe ’outou e tai’o ’āmui te 3 Nephi 27:3, ma te ’imi i te uira’a tā te mau pipi a Iesu i ui. Tauturu i tā ’oe mau tamari’i ’ia ’ite mai i te pāhonora’a i roto te 3 Nephi 27:5–8. Nō te aha e mea faufa’a te i’oa o te ’Ēkālesia ?

• E nehenehe ato’a ’oe e tauturu i tā ’oe mau tamari’i ’ia feruri i te mau pupu rau tei roto rātou, mai te hō’ē ’utuāfare ’aore rā, hō’ē piha Paraimere. ’A ani ia rātou e aha tā rātou i au i roto i te rirora’a ’ei melo nō te pupu tāta’itahi. I muri iho, e nehenehe ’outou e hīmene ’āmui « L’Eglise de Jésus-Christ » (Chants pour les enfants, 48) ’e ’ia ’āparau nō te aha ’oe i māuruuru ai i te rirora’a ’ei melo nō te ’Ēkālesia a te Fa’aora.

3 Nephi 27:13–16

’Ua patuhia te ’Ēkālesia a Iesu Mesia i ni’a i tāna ’evanelia.

• ’Ua ha’apoto te Fa’aora i tāna ’evanelia i roto te 3 Nephi 27. E nehenehe ’oe e fa’ata’a i tā ’oe mau tamari’i ē, te aura’a nō te ta’o ’evanelia ’oia ho’i « mau parau ’āpī maita’i ». E aha te mau parau ’āpī maita’i tā tātou i ’ite mai i roto te 3 Nephi 27:13–16 ? ’A fa’a’ohipa i te ’api fa’a’ana’anataera’a nō teie hepetoma nō te ha’api’i ē, ’ua patuhia te ’Ēkālesia a te Fa’aora i ni’a i tāna ’evanelia.

3 Nephi 27:30–31

Tē ’oa’oa nei te Metua i te ao ra ’ia ho’i ana’e mai tāna mau tamari’i iāna ra.

• ’A feruri i te ha’uti i te hō’ē ha’uti i reira te hō’ē ta’ata e tāpuni ai ’e e tāmata ai vetahi ’ē i te ’imi iāna. E nehenehe te reira e arata’i atu i te hō’ē ’āparaura’a nō ni’a i te ’oa’oa tā tātou e fāri’i ’ia ’itehia mai te hō’ē ta’ata tei mo’e. I muri iho i te tai’ora’a te 3 Nephi 27:30–31, e nehenehe ’oe e ’āparau nāhea i te tauturu i te tahi ’e te tahi ’ia vai fa’afātata noa i te Metua i te ao ra ’ia « ’ore te hō’ē [’ia] mo’e. »

4 Nephi

E hōro’a mai te pe’era’a ia Iesu Mesia i te ’oa’oa.

• Nō te tauturu i tā ’oe mau tamari’i ’ia ha’api’i mai nō ni’a i te ’oa’oa o te mau ta’ata tei fa’a’itehia i roto te 4 Nephi, e nehenehe ’oe e fa’a’ite ia rātou i te mau hōho’a nō te mau ta’ata ’oa’oa. I muri iho, ’a tai’o ’āmui ai ’outou i te mau ’īrava 2–3 ’e te 15–17 (’aore rā, te « Pene 48 : Te hau i Amerika », Te mau ’ā’amu o te Buka a Moromona, 136–37), e nehenehe rātou e fa’atoro i ni’a i te mau hōho’a ’ia tae ana’e ’oe i te hō’ē ’ohipa i roto i te ’ā’amu ’o tē hōro’a mai i te ’oa’oa.

• Nō te tauturu i tā ’oe mau tamari’i ’ia fa’a’ohipa i te mea i ha’api’ihia i roto te 4 Nephi 1:15–16, e nehenehe ’oe e fa’a’ite atu ia rātou i te mau huru orara’a e riri ai te mau ta’ata te tahi ’e te tahi. E ani atu ia rātou ’ia ha’uti teata ta’ata ora mai, mai te aha te huru ’āhani tei roto te « aroha o te Atua » i tō tātou ’ā’au.

Nō te tahi atu ā mana’o, ’a hi’o i te ve’a Hoa nō teie ’āva’e.

Christ with Three Nephite Disciples [Te Mesia ’e nā pipi ’āti Nephi e toru], nā Gary L. Kapp.