Moronae i save se i olsem wanem blong stap long wan wol we i fulap long rabis fasin—speseli afta we papa blong hem i ded long wo mo i nomo gat Ol man blong Nifae. Hem i raetem: “Mi mi stap miwan nomo … “Mi mi no gat ol fren o eni ples blong go” (Momon 8:3, 5). Maet ol samting oli stap, i luk se i nomo gat hop, be Moronae i bin faenem hop long Jisas Kraes mo testemoni blong hem abaot Sevya “ ol stamba tingting we oli no save finis blong Lod bae oli gohed blong rol i go” (Momon 8:22). Mo Moronae i bin save se wan ki pat blong olgeta stamba tingting i we Buk blong Momon nao bae i tekem rol ia—histri ia we hem i bin stap wok strong wetem strong tingting blong raetem finisim; histri ia we, wan dei, “bae i saen, aot long tudak i go,” mo i tekem plante pipol oli kam “long save abaot Kraes” (Momon 8:16; 9:36). Fet we Moronae i gat long ol promes ia, i mekem se i posibol blong hem i talemaot long olgeta we bae oli ridim buk ia afta, se: “mi toktok long yufala olsem se yufala i stap long ples ia,” mo “from mi save se bae yufala i gat ol toktok blong mi” (Momon 8:35; 9:30). Naoia, yumi gat ol toktok blong hem, mo wok blong Lod i stap rol i go, o muv i go, mo wan risen i we from, Momon mo Moronae, tufala i bin stap tru long misin blong tufala, i nomata se tufala i stap tufalawan.
“Biliv long Kraes” mo “tekem mo folem gospel blong [Hem]”
Afta we hem i putum gud ol rekod blong ol pipol blong hem, Momon i givim las mesej blong hem long Momon 7. ?Yu ting se from wanem hem i jusum mesej ia? ?Wanem i minim blong “tekem mo folem gospel blong Kraes”? (Momon 7:5).
Mi save kipim ol komanmen iven sapos ol narafala wan oli no kipim.
Samtaem yu filim se yu stap yuwan long ol efot blong yu blong kipim olgeta komanmen. ?Wanem nao yu save lan aot long eksampol blong Moronae we i save help? (Luk long Momon 8:1–11). Sapos yu save askem Moronae olsem wanem nao hao hem i stap fetful ?yu ting se bae Hem i talem wanem long yumi?
Buk blong Momon, oli bin raetem blong yumi yusum long dei blong yumi.
Jisas Kraes i bin soem long Moronae wanem bae i hapen taem bae Buk blong Momon i kamaot (luk long Momon 8:34–35), mo wanem Moronae i bin luk, i lidim hem blong givim ol klia mo strong woning blong taem blong yumi tedei. Taem yu stap ridim Momon 8:26–41 mo 9:1–30, tingting hevi se olsem wanem ol toktok blong hem maet i blong yu. Eksampol, long ol ves ia Moronae i askem 24 kwestin. ?Wanem pruf nao yu luk long ol kwestin we Moronae i luk long dei blong yumi? ?Olsem wanem nao Buk blong Momon i save help wetem ol jalenj we Moronae i bin luk?
Lisin long Spirit Luklukgud long ol tingting mo filing blong yu, iven sapos yu luk se oli no go wetem wanem we yu stap ridim. Olgeta tingting mo filing ia, maet oli ol stret samting ia we Papa blong yu long Heven i wantem yu blong lanem. Eksampol, ?wanem tingting yu gat afta we yu bin tingting hevi long ol kwestin we Moronae i bin askem long Momon 9:1–30?
Moronae i finisim raetem ol toktok blong papa blong hem wetem wan mesej we i gat paoa long dei blong yumi tedei we oli no bilif long ol merikel (luk long Momon 8:26; 9:1, 10–11). ?From wanem yu filim blong bilivim ol merikel we oli nidim tedei? Lukaotem long Momon 9:9–11, 15–27 mo Moronae 7:27–29 mo tingting hevi long ol kwestin olsem:
?Wanem nao yu lanem abaot Sevya long ol ves ia?
?Wanem nao mi lanem abaot ol merikel, blong bifo mo tedei?
?Wanem ol risal blong bilif se Jisas Kraes i wan God blong merikel? ?Wanem nao risal blong no biliv long samting ia?
?Ol wanem merikel—bigwan mo smol—we Sevya i wokem long laef blong yu? ?Wanem nao ol merikel ia oli tijim yumi abaot Hem?
Presiden Russell M i tijim: “Nelson Sevya mo Ridima blong yumi, Jisas Kraes, bambae i mekem sam bigbigfala wok bitwin naoia mo taem we bae Hem i kambak bakegen. Tru long merikel, bae yumi luk ol saen we God Papa, mo Pikinini blong Hem, Jisas Kraes, Tufala i prisaed ova long Jos ia wetem hae paoa mo glori” (“Revelesen blong Jos, Revelesen blong Laef blong Yumi,” Liahona, Mei 2018, 96). ?Wanem nao yu filim abaot sam long ol merikel ia? ?Wanem nao yu save mekem blong helpem Sevya i mekem ol merikel ia i hapen?
?Wanem nao yu lanem abaot fet mo ol merikel long ol eksperiens blong ol Sent long Samoa, Tonga, Fiji, mo Tahiti taem we Presiden mo Sista Nelson i visitim olgeta?(luk long Russell M. Nelson, “Kraes I Girap; Fet long Hem bae I Muvum Ol Maonten,” Liahona, Mei 2021, 101–4).
Blong soemaot rilesensip bitwin Baebol mo Buk blong Momon, olsem we Moronae i bin mekem, yu plei wan gem olsem hemia wetem ol pikinini blong yu: Askem long olgeta blong talem “OlTesteman, Niu Testeman” taem yu holem i go antap wan kopi blong Baebol mo “Wan Narafala Testeman” taem yu holem i go antap wan kopi blong Buk blong Momon. Yu save jusum sam stori we tugeta Baebol mo Buk blong Momon i testifae long hem—olsem taem Jisas i bon i kam long wol, taem Hem i ded, mo taem Hem i Girap bakegen long ded—mo invaetem ol pikinini blong yu blong faenem ol pikja blong ol stori ia (eksampol, in saed long Gospel Art Buk).
Blong helpem pikinini blong yu i lanem namba eit toktok blong bilif, yu save raetem wanwan toktok long sepret pis blong pepa. Invaetem ol pikinini blong putum ol toktok ia long oda mo ridim plante taem.
Mi save kipim ol komanmen iven taem mi filim mi se mi stap miwan
Eksampol blong Moronae i save givim insperesen long ol pikinini blong yu blong obei long ol komanmen blong God iven sapos oli filim se oli stap olgetawan. Afta we yu ridim Momon 8:1–7 wetem ol pikinini mo invaetem olgeta blong serem olsem wanem bae oli save bin filim sapos olgeta nao oli bin Moronae. Long ol ves 1, 3, mo 4, ?wanem nao oli talem blong Moronae blong mekem, mo olsem wanem nao hem i obei? ?Olsem wanem nao yumi save kam olsem Moronae?
Maet yu mo ol pikinini blong yu i save tokbaot ol situesen we yu mas jusum bitwin raet o rong taem nogat man i stap lukluk long olgeta. ?Olsem wanem nao taem yu gat fet long Jisas Kraes i helpem yumi long ol situesen ia? Wan singsing olsem “Stand for the Right” (Children’s Songbook, 159) yumi save putum long storian ia.
Maet yu wantem eksplenem long ol pikinini blong yu se wan merikel i wan samting we God i wantem blong soemaot paoa blong Hem mo blesem ol laef blong yumi. Yu save ridim ol toktok long Momon 9:11–13, 17 we i tokbaot sam long ol merikel blong God, mo ol pikinini blong yu save tingbaot sam narafala merikel (ol pikja long Gospel Art Buk, olsem ol ol namba 26, 40, 41, mo 83, i save help). Tokbaot ol merikel we God i mekem long laef blong yu.
Soem lon gol pikinini blong yu wan resipi, mo tokbaot wanem i hapen sapos yu lego wan impoten kaekae insaed long resipi ia. Tugeta rid long Momon 8:24 mo 9:20–21 blong faenem “kaekae” we i nidim blong yumi gat bifo God i save wokem ol merikel.
Blong kasem moa aedia, luk long magasin blong Fren long manis ia.
Pikja
Moronae i luk taem ol Man blong Nifae oli ded evriwan
Moronae i luk taem ol Man blong Nifae oli ded evriwan, i kam long Joseph Brickey