Moroni Writing on Gold Plates [Si Moroni nga Nagasulat sa Bulawan nga mga Lamina], ni Dale Kilborn

Nobyembre 4–10: “Nagahambal Ako sa Inyo nga Daw Yara Kamo”

Mormon 7–9

Nahibal-an ni Moroni kon ano ang pamatyagan sang mag-isahanon sa kalibutan nga puno sang kalainan—pagkatapos nga mapatay ang iya tatay sa giyera kag maubos ang mga Nefinhon. “Kay bisan ako lamang ang nabilin nga isahanon,” ginsulat niya. “Wala ako sing mga kaabyanan ukon makadtuan nga kon diin” (Mormon 8:3, 5). Bisan daw wala na sing paglaum, pero nakakita si Moroni sing paglaum kay Jesucristo kag sa iya testimonya nga “ang wala’y katapusan nga mga katuyuan sang Ginuo magapadayon” (Mormon 8:22). Kag nahibal-an ni Moroni nga isa ka mayor nga parte sa sinang wala katapusan nga mga katuyuan amo ang Libro ni Mormon—ang rekord nga matutom niya karon nga ginatapos, ang sinulatan nga sa pila ka adlaw magadala sang madamo nga tawo “sa ihibalo nahanungod kay Cristo” (Mormon 8:16; 9:36). Ang pagtuo ni Moroni sa sining mga promisa nagtugot sa iya nga magpahayag sa palaabuton nga mga bumalasa sining libro, “Nagahambal ako sa inyo nga daw yara kamo” kag “nahibal-an ko nga manginsa inyo ang akon mga pulong” (Mormon 8:35; 9:30 Karon ara matuod sa aton ang iya mga pulong, kag ang buluhaton sang Ginuo nagapadayon, bangud sa isa ka bahin sanday Mormon kag Moroni nagpabilin nga matutom sa ila misyon, bisan pa nga nagaisahanon sila.

Mga Ideya sa Pagtuon sa Puluy-an kag sa Simbahan

Mormon 7

“Magpati kay Jesucristo” kag “magkapyot sa [Iya] ebanghelyo.”

Pagkatapos nga ginpalip-ot ang rekord sang iya katawhan, ginhatag ni Mormon ang iya panghingapos nga mensahe sa Mormon 7. Ngaa sa banta mo ginpili niya ini nga mensahe? Ano para sa imo ang kahulugan sang “magkapyot sa ebanghelyo ni Cristo”? Mormon 7:8

Mormon 7:8–10; 8:12–16; 9:31–37

Ang Libro ni Mormon may dako kaayo nga bili.

Si Pangulong Russell M. Nelson nagpamangkot: “Kon tanyagan ka sang mga diamante ukon mga rubi ukon sang Libro ni Mormon, diin ang imo pilion? Sa matuod lang, diin ang mas bilidhon para sa imo?”  

Ano ang imo makita sa Mormon 7:8–10; 8:12–22; kag 9:31–37 nga nagabulig sa imo nga maintiendihan kon ngaa malahalon ang Libro ni Mormon sa aton panahon karon? Ngaa malahalon ini para sa imo? Mahimo nga makakita ka sang dugang nga ihibalo sa 1 Nefi 13:38–41; 2 Nefi 3:11–12; kag Doktrina kag mga Kasugtanan 33:16; 42:12–13.

Ang mga sinulatan sang mga propeta sa Libro ni Mormon para man sa aton.

Mormon 8:1–11

Sarang ko tumanon ang mga kasuguan bisan nga ang iban wala nagatuman.

Kon kaisa mahimo nga makabatyag ka nga nagaisahanon sa imo mga pagpaninguha nga tumanon ang mga kasuguan. Ano ang matun-an mo sa halimbawa ni Moroni nga makabulig? (tan-awa sa Mormon 8:1–11). Kon pwede mo pamangkuton si Moroni kon paano sia nagpabilin nga matinuohon, ano sa banta mo ang iya isabat?

Mormon 8:26–41; 9:1–30

Ang Libro ni Mormon ginsulat para sa aton panahon.

Ginpakita ni Jesucristo kay Moroni kon ano ang matabo sa paggwa sang Libro ni Mormon (tan-awa sa Mormon 8:34–35), nga nagtulod sa iya nga maghatag sang maisog nga mga paandam para sa aton panahon. Samtang imo ginabasa ang Mormon 8:26–41 kag 9:1–30, binagbinaga kon paano ayhan magamit ang iya mga pulong sa imo. Halimbawa, sa sining mga bersikulo namangkot si Moroni sang 24 ka mga pamangkot. Ano nga ebidensya ang imo makita sa sining mga pamangkot nga nakita matuod ni Moroni ang aton panahon? Paano makabulig ang Libro ni Mormon sa mga hangkat nga nakita na ngadaan ni Moroni?

Pamatii ang Espiritu. Tutoki ang imo mga panghunahuna kag balatyagon, bisan pa nga daw lain ini sangsa imo ginabasa. Basi ining mga pagpabatyag amo mismo ang gusto sang imo Amay nga Langitnon nga imo matun-an. Halimbawa, ano ang ginapabatyag sa imo pagkatapos nga binagbinagon ang mga pamangkot nga ginpamangkot ni Moroni sa Mormon 9:1–30?

Mormon 9:1–25

Si Jesucristo isa ka Dios sang mga milagro.

Gintapos ni Moroni ang mga sinulatan sang iya amay sa mabaskog nga mensahe para sa katawhan sa aton panahon nga wala nagapati sa mga milagro (tan-awa sa Mormon 8:26; 9:1, 10–11). Ngaa sa pamatyag mo nga kinahanglanon ang pagpati sa mga milagro sa karon nga panahon? Usisaa ang Mormon 9:9–11, 15–27 kag Moroni 7:27–29 kag binagbinaga ang mga pamangkot pareho sang:

• Ano ang akon matun-an parte sa Manluluwas sa sining mga bersikulo?

• Ano ang akon matun-an parte sa mga milagro, sang una kag sa karon?

• Ano ang benepisyo sang pagpati nga si Jesucristo isa ka Dios sang mga milagro? Ano ang mga konsikwensya sang indi pagpati diri?

• Ano nga mga milagro—dalagko kag magagmay—ang ginhikot sang Manluluwas sa akon kabuhi? Ano ang ginatudlo sining mga milagro sa akon parte sa Iya?

Si Pangulong Russell M. Nelson nagtudlo: “Ang aton Manluluwas kag Manunubos, nga si Jesucristo, magahikot sang pila sang Iya pinakadalagko nga mga buhulaton sugod karon tubtob magbalik Sia liwat. Makakita kita sang milagroso nga mga pagpahayag nga ang Dios nga Amay kag ang Iya Anak, nga si Jesucristo, magapamuno sa sining Simbahan sa kahalangdon kag himaya” (“Revelation for the Church, Revelation for Our Lives,” LiahonaMayo 2018, 96). Ano ayhan sa pamatyagan mo ang pila sining mga milagro? Ano ang sarang mo himuon para buligan ang Manluluwas nga tumanon ang mga ini?

Ano ang imo matun-an parte sa pagtuo kag mga milagro sa mga eksperiyensya sang mga Santos sa Samoa, Tonga, Fiji, kag Tahiti sang ginbisitahan sila nanday Pangulo kag Sister Nelson? (tan-awa sa Russell M. Nelson, “Si Cristo Nabanhaw; Ang Pagtuo sa Iya Magasaylo sang mga Bukid,” Liahona, Mayo 2021, 101–4).

   

Mga Ideya para sa Pagtudlo sang mga Kabataan

Mormon 7:8–10

Ang Libro ni Mormon kag ang Biblia nagapamatuod kay Jesucristo.

• Para ipatalupangod ang relasyon sang Biblia kag sang Libro ni Mormon, pareho sa ginhimo ni Moroni, pwede kamo maghampang sang pareho sini upod sa imo kabataan: Pahambala sila nga “Daan nga Katipan, Bag-ong Katipan” kon ipakita mo ang kopya sang Biblia kag “Isa Pa ka Testamento” kon ipakita mo ang Libro ni Mormon. Pwede ka man magpili sang pila ka mga hitabo nga ginapamatud-an sang Biblia kag sang Libro ni Mormon—pareho sang pagkabun-ag, pagkapatay, kag Pagkabanhaw ni Jesus—kag hagara ang imo kabataan nga pangitaon ang mga litrato sining mga hitabo (halimbawa, sa Libro sang mga Larawan nga Pang-Ebanghelyo).

• Para buligan ang imo kabataan nga tun-an ang ikawalo nga artikulo sang pagtuo, pwede mo isulat ang tagsa ka tinaga sa separado nga mga papel. Hagara ang imo kabataan nga magbuligay sa pagpasunod sang mga tinaga kag suliton ini sing pila ka beses.

Mormon 8:1–7

Sarang ko tumanon ang mga kasuguan bisan nga daw nagaisahanon ako.

• Ang ehemplo ni Moroni mahimo nga makainspirar sa imo kabataan nga sundon ang mga kasuguan sang Dios bisan pa nga pamatyag nila nagaisahanon sila. Pagkatapos mo nga basahon ang Mormon 8:1–7 upod sa ila, pwede nila iistorya kon ano ayhan ang ila mabatyagan kon sila si Moroni. Sa mga bersikulo 1, 3, kag 4, ano ang ginsugo kay Moroni, kag paano niya ini gintuman? Paano kita mas mangin pareho kay Moroni?

• Basi pwede mo hambalan upod sang imo kabataan ang mga sitwasyon kon diin kinahanglan nila nga magpili sa husto kag indi husto nga wala sang nagatan-aw sa ila. Paano ang pag-angkon sang pagtuo kayJesucristo nagabulig sa aton sa sining mga sitwasyon?  

Mormon 8:24–26; 9:7–26

Si Jesucristo “isa ka Dios sang mga milagro.”

• Basi gusto mo nga ipaathag sa imo kabataan nga ang milagro isa ka butang nga ginahimo sang Dios para ipakita ang Iya gahum kag bugayan ang aton mga kabuhi. Dayon pwede mo basahon ang mga dinalan sa Mormon 9:11–13, 17 nga nagalaragway sang pila ka mga milagro sang Dios, kag pwede ang imo kabataan manumdom sang iban pa nga mga milagro (ang mga litrato halin sa Libro sang mga Larawan nga Pang-Ebanghelyo, pareho sang mga num. 26, 40, 41, kag 83, pwede nga makabulig). Hambali ang mga milagro nga ginhimo sang Dios sa imo kabuhi.

• Magpakita sa imo kabataan sang recipe, kag hambali kon ano ang matabo kon kulang ini sang kinahanglanon nga sangkap. Basaha sing ululupod ang Mormon 8:24 kag 9:20–21 para pangitaon ang mga “sangkap” nga mahimo magresulta sa mga milagro halin sa Dios.

Para sa dugang nga mga ideya, tan-awa sa isyu sang Abyan nga magasin sini nga bulan.

Moroni Overlooking the Destruction of the Nephites [Si Moroni nga Nagatulok sa Kalaglagan sang mga Nefinhon], ni Joseph Brickey