The Jaredites Leaving Babel [Ang mga Jarednon nga Nagabiya sa Babel], ni Albin Veselka

Nobyembre 11–17: “[Gisia Inang Belo] sang Pagkawala’y Pagtuo”

Eter 1–5

Bisan matuod nga ang mga pamaagi sang Dios mas mataas sangsa aton kag dapat kita pirme magpaubos sa Iya pagbuot, ginapaisog man Niya kita nga magpamensar kag maggiho para sa aton kaugalingon. Isa ina ka leksyon nga natun-an ni Jared kag sang iya utod. Halimbawa, ang ideya sang pagbiyahe sa bag-o nga lugar nga “labing hamili sa tanan sa bug-os nga duta” daw naghalin kay Jared, kag ginpasugtan sang Ginuo ang ginpangabay, nga nagasiling sa utod ni Jared, “Amo ini ang akon pagahimuon sa imo sanglit sa sining malawig nga panahon nag-ampo ka sa akon” (tan-awa sa Eter 1:38–43). Kag sang kinahanglan sang utod ni Jared sang suga sa sulod sang mga barkasa [barge] nga magadala sa ila sa duta nga ginpangako sa ila, namangkot ang Ginuo sang masami ginapamangkot naton sa Iya: Ano bala ang luyag mo nga himuon ko?” (Eter 2:23). Gusto Niya nga mabatian ang aton mga panghunahuna kag mga ideya, kag magapamati Sia kag magahatag sang Iya kumpirmasyon ukon indi gani laygayan kita. Kon kaisa ang nagaseparar lamang sa aton sa mga bugay nga aton ginapangayo amo ang aton mismo “[belo] sang pagkawala’y pagtuo,” kag kon sarang naton “gision inang [belo]” (Eter 4:15), mahimo nga masorpresa kita kon ano ang handa himuon sang Ginuo para sa aton.

Mga Ideya sa Pagtuon sa Puluy-an kag sa Simbahan

Eter 1:33–43

Sa akon sinsero nga pagpangamuyo sa Ginuo, pagakaluy-an Niya ako.

Ang Eter 1:33–43 nagaistorya parte sa tatlo ka mga pangamuyo sang utod ni Jared. Ano ang imo matun-an sa sabat sang Ginuo sa tagsa ka pangamuyo? Panumduma ang tion nga naeksperiyensyahan mo ang kaluoy sang Ginuo sa imo samtang nagapanawag ka sa Iya sa pangamuyo? Basi gusto mo nga isulat ining eksperiyensya kag iistorya ini sa tawo nga kinahanglan makabati sang imo panaksihon.

Eter 2; 3:1–6; 4:7–15

Sarang ako makabaton sang rebelasyon para sa akon kabuhi.

Si Pangulong Russell M. Nelson nagsiling: “Nagapangabay ako sa inyo nga inyo patubuon ang inyo espirituhanon nga kapasidad sa pagbaton sang rebelasyon. … Pilia nga himuon ang espirituhanon nga buluhaton nga ginapangayo para mabaton ang regalo sang Balaan nga Espiritu kag mabatian ang tingug sang Espiritu sing mas pirme kag mas maathag” (“Revelation for the Church, Revelation for Our Lives,” Liahona, Mayo 2018, 96).

Samtang imo ginatun-an ang Eter 2; 3:1–6; 4:7–15, ano ang imo matun-an parte sa “espirituhanon nga buluhaton” nga ginasiling ni Pangulong Nelson? Pwede mo markahan sa isa ka kolor ang mga pamangkot ukon mga palaligban sang utod ni Jared kag kon ano ang iya ginhimo sa mga ini, kag sa lain nga kolor pwede mo markahan kon paano ang Ginuo nagbulig sa iya kag nagpahibalo sa iya sang Iya pagbuot.

Ari ang pila ka mga pamangkot nga dapat binagbinagon samtang nagatuon ka:

• Ano ang nanamian mo sa paagi sang pagsabat sang Ginuo sa mga pamangkot sang utod ni Jared sa Eter 2:18–25?

• Paano mo gamiton ang Eter 3:1–5 para buligan ang isa ka tawo nga nagatuon sa pagpangamuyo?

• Ano ayhan ang magapugong sa imo sa pagbaton sang rebelasyon halin sa Ginuo? (tan-awa sa Eter 4:8–10). Paano ka mas pirme makabaton sang rebelasyon halin sa Iya? (tan-awa sa Eter 4:7, 11–15).

• Ano sa banta mo ang buot silingon sang “[gisia inang belo] sang pagkawala’y pagtuo” sa imo kabuhi? (Eter 4:15).

Ano pa ang imo matun-an sa utod ni Jared parte sa personal nga rebelasyon?

Si Elder Dale G. Renlund nagtudlo parte sa “Sadsaran sang Personal nga Rebelasyon” (Liahona, Nob. 2022, 16–19). Pamensra ang pagdrowing sang kwadro sang litrato (picture frame) kag pagsulat sang apat ka mga elemento sang balayan sa kada kilid. Paano ka mabuligan sining balayan nga “patubuon ang inyo espirituhanon nga ikasarang sa pagbaton sang rebelasyon”?

Eter 2:14–15; 3:1–20

Paagi sa Iya pagdisiplina, ginaagda ako sang Ginuo nga maghinulsol kag magpalapit sa Iya.

Bisan ang propeta nga pareho ka halangdon sang utod ni Jared kinahanglan nga disiplinahon sang Ginuo. Ano ang imo matun-an sa Eter 2:14–15 parte sa pagdisiplina sang Ginuo? Hunahunaa kon paano ayhan nakabulig ang pagdisiplina sang Ginuo kag ang reaksyon sang utod ni Jared sa paghanda sa iya sa iya mga eksperiyensya sa Eter 3:1–20.

Eter 2:16–25

Ang Ginuo magahanda sa akon nga makatabok sa akon “dako nga kadadalman.”

Kon kaisa, ang pagtabok sa “dako nga kadadalman” amo lamang ang paagi para matuman ang pagbuot sang Dios para sa aton. Nakakita ka bala sang mga pagkaanggid sa imo kabuhi sa Eter 2:16–25? Paano ka ginhanda sang Ginuo para sa imo mga hangkat? Ano ang ginapangabay Niya nga imo himuon karon agud maghanda para sa kinahanglan Niya nga ipahimo sa imo sa palaabuton?

Ipangabuhi ang imo natun-an. Ang pagtuon sang ebanghelyo dapat mag-inspirar sa aton nga bag-uhon ang aton mga kabuhi. Pagkatapos nga basahon ang Eter 4:11–12, pwede mo ilista ang pila ka mga impluwensya sa imo kabuhi kag pamensara kon bala ginaengganyo ka sini sa paghimo sang maayo. Ano nga mga pagbag-o ang nabatyagan mo nga kinahanglan mo himuon?

Eter 5

Magpamatuod parte sa kamatuoran sang Libro ni Mormon.

Samtang imo ginabasa ang propesiya ni Moroni sa Eter 5, binagbinaga ang katuyuan sang Ginuo sa paghanda sang madamo nga mga saksi sa Libro ni Mormon. Ano nga mga saksi ang nag-inspirar sa imo nga magpati nga ang Libro ni Mormon pulong sang Dios? Paano ginpakita sang Libro ni Mormon sa imo “ang gahum sang Dios kag subong man ang iya pulong”? (Eter 5:4).

Mga Ideya para sa Pagtudlo sang mga Kabataan

Eter 1:33–37; 2:16–25; 3:1–6

Ang Amay nga Langitnon nagapamati kag nagasabat sang akon mga pangamuyo.

• Kon may nahibal-an ka nga lenggwahe nga wala mahibal-i sang imo kabataan, hatagi sila sang simple nga mga direksyon sa sina nga lenggwahe (ukon magpatukar sang ginrekord sa lain nga lenggwahe). Pwede mo ini gamiton sa pagpaathag kon ngaa nangamuyo ang utod ni Jared sang bulig sa Eter 1:33–37. Ipatalupangod kon ano ang nabatyagan sang Ginuo parte sa sining pangamuyo kag kon paano Sia nagsabat.

• Pwede mag-akto ang imo kabataan nga kuno abi nagapatindog sang barkasa (barge) samtang imo ginabasa ang Eter 2:16–17. Dayon pwede mo kag sang imo kabataan basahon ang parte sa mga problema sang mga Jarednon sa ila mga barkasa (tan-awa sa Eter 2:19) kag ang lainlain nga mga paagi nga ginsabat sang Ginuo ang mga pangamuyo sang utod ni Jared (tan-awa sa Eter 2:19–25; 3:1–6). Ang litrato kag pahina para sa kahiwatan sa katapusan sining outline makabulig sa imo kag sa imo kabataan nga isugid ina nga istorya. Ano ang matun-an naton sa utod ni Jared parte sa pangamuyo? Pamensara ang pag-istorya sang eksperiyensya kon sa diin nangamuyo ka para sa bulig kag ginbuligan ka sang Amay nga Langitnon.

Eter 3:6–16

Gintuga ako sa dagway sang Dios.

• Samtang nagadako sila, makasugata ang imo mga kabataan sang butig nga mga mensahe parte sa Dios, sa ila mga kaugalingon, kag sa ila pisikal nga mga lawas. Pwede mo sila pangabayon nga buligan ka sa pagpangita sang mga kamatuoran parte sa sining mga topiko sa Eter 3:6–16. Para ipatalupangod ang kamatuoran nga gintudlo sa Eter 3:13, 15, pwede kamo magtan-aw sang litrato sang Manluluwas nga ululupod kag hagara ang imo kabataan nga itudlo ang lainlain nga mga parte sang Iya lawas. Dayon itudlo man nila ang pareho nga parte sa ila mga lawas.   Pwede ninyo hambalan sang imo kabataan kon ngaa nagapasalamat kamo para sa inyo nga lawas.

Gintuga kita sa imahe sang Dios

Eter 5

Tatlo ka mga saksi ang nagpamatuod sa Libro ni Mormon.

• Nagpropesiya si Moroni nga ang Tatlo ka mga Saksi magabulig sa pag-establisar sang kamatuoran sang Libro ni Mormon. Para itudlo kon ano ang saksi, pwede mo pangabayon ang imo kabataan nga ilaragway ang isa ka butang nga ila nakita ukon naeksperiyensyahan nga wala pa maagyi sang iban. Dayon samtang inyo ginabasa ang Eter 5 sing ululupod, pwede ninyo hambalan kon ngaa nagagamit ang Dios sang mga saksi sa Iya buluhaton. Pwede man kamo mag-istoryahanay kon paano ninyo nahibal-an nga ang Libro ni Mormon matuod kag kon paano ninyo ipaambit ang inyo panaksihon sa iban.

Para sa dugang nga mga ideya, tan-awa sa isyu sang Abyan nga magasin sini nga bulan.

Sawest Thou More Than This? [Nakakita Ka Bala sang Kapin Pa Sangsa Sini?], ni Marcus Alan Vincent