12:41

Sadsaran sang Personal nga Rebelasyon

Ni Elder Dale G. Renlund

Sang Korum sang Dose ka Apostoles

Kinahanglan naton hangpon ang sadsaran nga sa sini nagahikot ang Balaan nga Espiritu. Kon maghikot kita sa sulod sang sadsaran, mahimo nga ihatag sang Balaan nga Espiritu ang makatilingala nga paghangop.

Pareho sa madamo sa inyo, dako gid ang nangin impluwensiya ni Elder Dieter F. Uchtdorf sa akon sa pila na ka tuig. Ginapaathag sini, bisan bahin lamang, ang akon ihambal.¹ Gani, pasaylo sa iya …

Ang nahanas sing maayo nga mga piloto sang eroplano nagapalupad sa sulod sang kapasidad sang ila eroplano kag nagasunod sa mga direksyon halin sa mga nagakontrol sang trapiko sa kahawaan parte sa paggamit sang runway kag ruta sang eroplano. Buot silingon, ang mga piloto nagahikot sa sulod sang iya sini sadsaran. Bisan ano pa sila ka alam ukon ka maabilidad, paagi lamang sa pagpalupad sa sulod sining ginpahamtang nga sadsaran nga luwas nga mabuy-an sang mga piloto ang dako nga potensyal sang eroplano agud mahimo ang iya sini milagroso nga mga katuyoan.

Sa amo man nga paagi, nagabaton kita sang personal nga rebelasyon sa sulod sang sadsaran. Pagkatapos sang bunyag, ginahatagan kita sang dalayawon pero praktikal nga dulot, ang dulot sang Balaan nga Espiritu.² Samtang nagatinguha kita nga magpadayon sa dalan sang kasugtanan,³ mismo “ang Balaan nga Espiritu … [ang] magapakita sa [aton] sang tanan nga butang [nga aton] dapat himuon.”⁴ Kon indi kita sigurado ukon nagakabalaka kita, makapangayo kita sang bulig sa Dios.⁵ Maathag kaayo ang promisa sang Manluluwas: “Pangayo, kag pagahatagan kamo; … kay ang tagsatagsa nga nagapangayo pagahatagan.”⁶ Sa bulig sang Balaan nga Espiritu, mahimo naton ang aton diosnon nga kinaugali nga mangin aton walay katapusan nga padulongan.⁷

Makahalawhaw ang promisa sang personal nga rebelasyon paagi sa Balaan nga Espiritu, pareho sang eroplano nga nagalupad. Kag pareho sa mga piloto sang eroplano, kinahanglan naton hangpon ang sadsaran nga sa sini nagahikot ang Balaan nga Espiritu agud maghatag sang personal nga rebelasyon. Kon maghikot kita sa sulod sang sadsaran, mahimo ihatag sang Balaan nga Espiritu ang makatilingala nga paghangop, direksyon, kag kasulhayan. Sa gwa sinang sadsaran, bisan ano pa kita ka alam ukon ka maabilidad, mahimo kita nga patalangon kag masakitan kag mahalitan.

Ang balaan nga mga kasulatan nagabalay sang una nga elemento sining sadsaran sang personal nga rebelasyon.⁸ Ang pagpaayaw sa mga pulong ni Cristo, nga makita sa balaan nga mga kasulatan, nagapalig-on sang personal nga rebelasyon. Si Elder Robert D. Hales nagsiling: “Kon luyag naton makighambal sa Dios, nagapangamuyo kita. Kag kon luyag naton nga makighambal Sia sa aton, ginabasa naton ang balaan nga mga kasulatan.”⁹

Ang balaan nga mga kasulatan nagatudlo man sa aton kon paano magbaton sang personal nga rebelasyon.¹⁰ Kag ginapangayo naton ang husto kag maayo¹¹ kag indi ang supak sa kabubut-on sang Dios.¹² Indi kita “magpangayo sang malain,” nga may di-nagakaigo nga mga motibo agud iduso ang aton kaugalingon nga plano ukon agud tumanon ang aton kaugalingon nga kalipay.¹³ Labaw sa tanan, dapat kita magpangayo sa Amay nga Langitnon sa ngalan ni Jesucristo,¹⁴ nga nagapati nga mabaton naton.¹⁵

Ang ika-duha nga elemento sang sadsaran amo nga makabaton kita sang personal nga rebelasyon para sa aton mga kaugalingon kag indi para sa iban. Buot silingon, nagalupad kita kag nagahugpa sa gindesignar sa aton nga runway. Ang kaimportante sang plastado nga mga runway natun-an temprano pa sa kasaysayan sang Pagpanumbalik. Si Hiram Page, isa sang Walo ka Saksi sang Libro ni Mormon, nagsiling nga nakabaton sia sang mga rebelasyon para sa bilog nga Simbahan. Pila ka miyembro ang ginpatalang kag sayop nga naimpluwensiyahan.

Bilang sabat, ang Ginuo nagpahayag nga “wala sing bisan sin-o ang pagapilion sa pagbaton sang mga kasugoan kag mga rebelasyon sa sining simbahan magluwas sa akon alagad nga si Joseph Smith … tubtob nga magpili ako … sang lain nga magbulos sa iya.”¹⁶ Ang doktrina, mga kasugoan, kag mga rebelasyon para sa Simbahan kinamatarong sang buhi nga propeta, nga nagabaton sang mga ini halin sa Ginuong Jesucristo.¹⁷ Amo ina ang runway sang propeta.

Pila na ka tuig ang nagligad, nakabaton ako sang tawag sa telepono halin sa isa ka tawo nga ginpriso tungod sa trespassing. Ginsugiran niya ako nga ginpahayag sa iya nga may dugang nga balaan nga kasulatan nga nalubong sa idalom sang salog sang bilding nga gintilawan niya nga sudlon. Nagsiling sia nga sa tion nga makuha niya ang dugang nga balaan nga kasulatan, nakahibalo sia nga mabaton niya ang dulot sang paglubad, mapaluntad niya ang bag-o nga balaan nga kasulatan, kag mapahamtang ang doktrina kag direksyon sang Simbahan. Ginhambalan ko sia nga sala sia, kag nagpangabay sia sa akon nga magpangamuyo parte diri. Ginhambalan ko sia nga indi ko ina paghimuon. Nangin masakit ang iya panghambal kag gintakop niya ang telepono.¹⁸

Indi ko kinahanglan nga magpangamuyo para sa sining pangabay sa isa ka simple pero dako nga rason: ang propeta lamang ang nagabaton sang rebelasyon para sa Simbahan. Mangin “supak ini sa plano sang Dios”¹⁹ nga ang iban makabaton sang amo nga rebelasyon, nga iya dapat sang propeta nga runway.

Ang personal nga rebelasyon nagakadapat sa mga indibidwal. Makabaton kamo sang rebelasyon, halimbawa, kon diin mag-istar, kon ano nga propesyon ang pilion, ukon kon sin-o ang pakaslan.²⁰ Ang mga lider sang Simbahan mahimo magtudlo sang doktrina kag magpaambit sang inspirado nga laygay, pero ang responsibilidad para sining mga desisyon nagadepende sa imo. Amo ina ang imo mabaton nga rebelasyon; amo ina ang imo runway.

Ang ika-tatlo nga elemento sang sadsaran amo nga ang personal nga rebelasyon maghisanto sa mga kasugoan sang Dios kag sa mga kasugtanan nga ginhimo naton upod sa Iya. Binagbinaga ang isa ka pangamuyo nga daw amo sini: “Amay nga Langitnon, katalaka magtambong sa Simbahan. Puwede bala ako magsimba sa Imo sa Sabbath sa bukid ukon sa baybay? Puwede bala nga indi na lang ako magkadto sa simbahan kag mag-ambit sang sakramento pero magbaton lang gihapon sang ginapromisa nga mga bugay sa pagpakabalaan sang adlaw nga Sabbath?”²¹ Bilang sabat sa amo nga pangamuyo, mapaabot naton ang sabat sang Dios: “Anak ko, napahayag ko na ang akon pagbuot parte sa Adlaw nga Sabbath.”

Kon magpangayo kita sang rebelasyon parte sa butang nga ginpaathag na sang Dios, ginahayag naton ang aton kaugalingon sa paghangop sing sayop sang aton mga balatyagon kag pagpamati sa luyag lang naton pamatian. May isa ka lalaki sadto nga nagsugid sa akon parte sa iya mga kabudlayan agud mapamaayo ang pinansyal nga sitwasyon sang iya pamilya. Ginahunahuna niya nga mangawat sang pondo bilang solusyon, ginpangamuyoan ini, kag pamatyag niya nakabaton sia sang positibo nga rebelasyon nga himuon ini. Nakahibalo ako nga ginapatalang sia tungod nangayo sia sang rebelasyon nga supak sa kasugoan sang Dios. Ang Propetang Joseph Smith nagpaandam, “Wala na sing mas dako pa nga kahalitan sa mga anak sang katawhan sangsa magpaidalom sa impluwensiya sang sayop nga espiritu, nga abi nila yara sa ila ang Espiritu sang Dios.”²²

May pila nga mahimo magsiling nga si Nefi naglapas sang kasugoan sang ginpatay niya si Laban. Apang, ini nga eksepsyon wala nagasupak sa pagsulundan—ang pagsulundan nga ang personal nga rebelasyon maghisanto sa mga kasugoan sang Dios. Wala sing simple nga paathag sining hitabo ang lubos nga nagakaigo, pero tugoti ako nga dagmiton ang pila ka mga aspeto. Ang hitabo wala nagsugod kay Nefi nga nagapamangkot kon puwede niya patyon si Laban. Indi ato butang nga luyag niya himuon. Ang pagpatay kay Laban indi para sa personal nga benepisyo ni Nefi kundi agud maghatag sang balaan nga mga kasulatan sa isa ka nasyon sa palaabuton kag sa isa ka katawhan sang kasugtanan. Kag sigurado si Nefi nga rebelasyon ini—sa pagkamatuod, sa sini nga kahimtangan, isa ini ka sugo halin sa Dios.²³

Ang ika-apat nga elemento sang sadsaran amo nga kilalahon ang ginpahayag na sang Dios sa imo sing personal, samtang bukas ka sa dugang pa nga rebelasyon halin sa Iya. Kon nasabat sang Dios ang isa ka pamangkot kag wala naliwat ang mga sirkumstansya, ngaa mapaabot kita nga mangin lain ang sabat? Si Joseph Smith nakasugata sining problemado nga sitwasyon sang 1828. Ang una nga bahin sang Libro ni Mormon nalubad na sang si Martin Harris, isa ka donor kag nahauna nga escriba, nagpangayo sang pahanugot kay Joseph nga dal-on ang nalubad na nga mga pahina kag ipakita ang mga ini sa iya asawa. Tungod indi sia sigurado kon ano ang himuon, si Joseph nagpangamuyo para sa giya. Ginhambalan sia sang Ginuo nga indi pag-ipadala kay Martin ang mga pahina.

Nagpangabay si Martin nga mamangkot liwat sa Dios. Ginhimo ini ni Joseph, kag ang sabat, indi katingalahan, amo man sa gihapon. Apang namilit si Martin kay Joseph sa ika-tatlo nga beses, kag ginhimo ini ni Joseph. Sa sini nga tion ang Dios wala na nagsiling indi. Kundi, daw pareho nga nagsiling ang Dios, “Joseph, nakahibalo ka na kon ano ang nabatyagan ko parte diri, pero hilway ka sa pagpili.” Nakabatyag nga nahilway sa limitasyon, si Joseph nagdesisyon nga tugotan si Martin nga dal-on ang 116 ka pahina sang manuskrito kag ipakita ang mga ini sa pila ka mga miyembro sang iya pamilya. Ang nalubad na nga mga pahina nadula kag wala na gid nakit-an pa. Ginsaway sing matigdas sang Ginuo si Joseph.²⁴

Natun-an ni Joseph, suno sa gintudlo sang propeta sang Libro ni Mormon nga si Jacob: “Indi pagtinguhai ang paglaygay sa Ginuo, kundi nga magbaton sing laygay halin sa iya kamot. Kay … nagalaygay sia sa kaalam.”²⁵ Si Jacob nagpaandam nga di-maayo nga mga butang ang matabo kon mangayo kita sang mga butang nga indi dapat. Ginpropesiya niya nga ang katawhan sa Jerusalem magapangayo “sang mga butang nga indi nila [ma]hangpan,” magtulok “sing lapaw sa tanda,” kag lubos nga indi matalupangdan ang Manluluwas sang kalibutan.²⁶ Nasandad sila tungod nangayo sila sang mga butang nga indi nila maintiendihan.

Kon may nabaton kita nga personal nga rebelasyon para sa aton sitwasyon kag wala nagliwat ang mga sirkumstansya, nasabat na sang Dios ang aton pamangkot.²⁷ Halimbawa, kon kaisa sulit-sulit kita nagapangayo sing mga pasalig nga napatawad na kita. Kon naghinulsol kita, napuno sing kalipay kag katawhay sang konsiyensya, kag nakabaton sang kapatawaran sang aton mga sala, indi na kita kinahanglan pa magpangayo sa iya kundi magsalig sa sabat nga ginhatag na sang Dios.²⁸

Bisan ginasaligan naton ang nauna nga mga sabat sang Dios, kinahanglan kita nga mangin bukas sa dugang pa nga personal nga rebelasyon. Total, pila lang sang mga destinasyon sang kabuhi ang malab-ot paagi sa wala untat nga pagbyahe. Dapat naton hibaluon nga ang personal nga rebelasyon mahimo mabaton “sing dinalan sa dinalan” kag “pagsulundan sa pagsulundan,”²⁹ nga ang ginapahayag nga rebelasyon mahimo kag masami nga amat-amat nga nagadugang.³⁰

Ang mga elemento sang sadsaran sang personal nga rebelasyon magkaanggid kag pareho nga nagapabakod. Apang sa sulod sinang sadsaran, ang Balaan nga Espiritu mahimo magpahayag kag magapahayag sang tanan-tanan nga kinahanglanon naton agud makalupad pakadto sa kag ipadayon ang pagbuylo sa dalan sang kasugtanan. Gani mahimo kita mabugayan sang gahum ni Jesucristo nga mangin mga tawo nga luyag sang Amay nga Langitnon nga kita mangin. Ginaagda ko kamo nga magsalig nga makabaton kamo sang personal nga rebelasyon para sa inyo kaugalingon, sang paghangop sang ginpahayag sang Dios, nga nahisuno sa balaan nga mga kasulatan kag mga kasugoan nga Iya ginhatag paagi sa Iya ginpili nga mga propeta kag sa sulod sang inyo kaugalingon kag hilway nga pagpili. Nakahibalo ako nga ang Balaan nga Espiritu mahimo nga magpakita kag magapakita sa inyo sang tanan nga butang nga dapat ninyo himuon.³¹ Sa ngalan ni Jesucristo, amen.