Atubanga ang Palaabuton nga may Pagtuo
Ang palaabuton mangin mahimayaon para sa mga naghanda kag padayon nga nagahanda nga mangin mga instrumento sa mga kamot sang Ginuo.
Nangin isa ini ka indi malimtan nga gab-i. Pinalangga ko nga mga sister, nalipay ako nga makaupod kamo. Ginapanumdom ko kamo pirme sining nagligad nga pila ka bulan. Masobra na kamo karon walo ka milyon. Indi lang numero ang ara sa inyo kundi ang espirituhanon nga gahum agud bag-uhon ang kalibutan. Nakita ko kamo nga ginahimo ina sining pandemya.
Ang pila sa inyo gulpi lang nga nagapangita sang maiwat nga mga suplay ukon sang bag-o nga trabaho. Madamo ang nagtudlo sang mga kabataan kag nagkumusta sa mga kaingod. May mga nag-abiabi sang mga misyonero sa ila panimalay sing mas temprano sangsa ginapaabot, samtang ang iban naghimo sang inyo mga balay nga mga missionary training center. Naggamit kamo sang teknolohiya para makig-angot sa pamilya kag kaabyanan, sa pagminister sa mga nagaisahanon, kag sa pagtuon sang Dali, Magsunod sa Akon upod sa iban. Nakakita kamo sang bag-o nga mga paagi para himuon ang Adlaw nga Inugpahuway nga makalilipay. Kag naghimo kamo sang mga mask—minilyon sini!
Upod ang sinsero nga kaluoy kag gugma, ginapalab-ot ko ang pag-unong sa madamo nga kababayin-an sa bilog nga kalibutan nga namatyan sang mahal sa kabuhi. Nagahibi kami upod sa inyo. Kag nagapangamuyo kami para sa inyo. Ginadayaw namon kag ginapangamuyo ang tanan nga wala sing kakapoy nga nagatrabaho para amligan ang ikaayong lawas sang iban.
Kamo nga mga lamharon nga babayi nangin dalayawon man. Bisan pa nga ginabaha ang social media sang pagbinangig, madamo sa inyo ang nakakita sang mga paagi agud paisugon ang iban kag ipaambit ang kasanag sang Manluluwas.
Mga sisters, tanan kamo matuod-tuod nga mga baganihan! Nagadayaw ako sang inyo kusog kag sang inyo pagtuo. Ginpakita ninyo nga sa mabudlay nga mga sirkumstansya, maisog kamo nga nagapadayon. Palangga ko kamo, kag ginapasalig ko sa inyo nga palangga kamo sang Ginuo kag nakita ang dako nga buluhaton nga inyo ginahimo. Salamat! Sa liwat, napamatud-an ninyo nga literal kamo nga paglaum sang Israel!
Ginalarawan ninyo ang mga ginalauman ni Pangulong Gordon B. Hinckley para sa inyo sang iya ginpakilala ang “Ang Panimalay: Isa ka Proklamasyon sa Kalibutan” 25 ka tuig na ang nagligad sang Septyembre 1995 nga pangkabilogan nga miting sang Relief Society. 1 Talalupangdon nga ginpili niya nga ipresentar ining importante nga proklamasyon sa mga sister sang Simbahan. Sa paghimo sini, ginhatagan-bili ni Pangulong Hinckley ang indi mabayluhan nga impluwensya sang kababayin-an sa plano sang Ginuo.
Karon, gusto ko mahibal-an kon ano ang inyo natun-an sini nga tuig. Nangin mas malapit bala kamo sa Ginuo, ukon pamatyag ninyo daw nagpalayo pa gid kamo sa Iya? Kag ano ang ginapabatyag sa inyo sang mga hitabo sa karon parte sa palaabuton?
Sa matuod, ang Ginuo naghambal parte sa aton panahon sa seryoso nga mga tinaga. Nagpaandam Sia nga sa aton panahon “ang mga tagipusuon sang mga tawo [magapaslaw] sa ila” 2 kag bisan ang mga pinili may risgo nga mapatalang. 3 Ginsiling Niya kay Propetang Joseph Smith nga “ang paghidaet [paga] dulaon sa kalibutan” 4 kag ang mga kalamidad magaabot sa katawhan. 5
Apang ang Ginuo naghatag man sang panan-awon kon daw ano katahum sining dispensasyon. Gin-inspirar Niya ang Propeta nga si Joseph Smith sa pagpahayag nga “ang buluhaton sa … sining ulihing mga adlaw, mangin masangkad kag importante. … Ang iya mga himaya indi basta malaragway, kag ang pagkahalangdon sini indi matupongan.” 6
Karon, mahimo nga indi pagkahalangdon ang tinaga nga inyo pilion agud ilaragway ining nagligad nga pila ka bulan! Paano bala naton atubangon ang seryoso nga mga propesiya kag ang mahimayaon nga mga pahayag sa aton panahon? Ang Ginuo nagsiling sa aton kon paano sa simple, pero matahum, nga pasalig: “Kon handa kamo indi kamo mahadlok.” 7
Daw ano nga pangako! Literal sini nga pagabag-uhon ang pamaagi nga ginatulok naton ang aton palaabuton. Sang nagligad lang nabatian ko ang isa ka babayi nga may dako nga testimonya nga nag-ako nga ang pandemya, kaupod sang linog sa Salt Lake Valley, nakabulig sa iya nga matun-an nga indi sia amo sina ka preparado sangsa iya pagdumdom. Sang ginpamangkot ko sia kon iya ginatumod ang iya tinago nga pagkaon ukon ang iya testimonya, nagyuhum sia kag nagsiling, “Huo!”
Kon ang pagpanghanda amo ang yabi para maatubang naton ining dispensasyon kag ang aton palaabuton nga may pagtuo, paano kita maghanda sing pinakamaayo?
Sa dinekada, ang mga propeta sang Ginuo nagsugo sa aton nga magtago sang pagkaon, tubig, kag pinansyal nga reserba para sa tion sang panginahanglan. Ang pandemya sa karon nagpabakod sang kaalam sinang laygay. Ginapaisog ko kamo nga maghimo sang mga tikang agud mangin handa sa temporal. Pero mas ginaulikdan ko ang inyo espirituhanon kag emosyunal nga preparasyon.
Sa sina nga bahin, madamo kita sang matun-an kay Kapitan Moroni. Bilang kumander sang kasoldaduhan nga Nefinhon, nagpangatubang sia sang puwersa sang oposisyon nga mas mabaskog, mas madamo, kag mas wala sing kaluoy. Gani, ginhanda ni Moroni ang iya katawhan sa tatlo ka importante ka paagi.
Una, ginbuligan niya sila nga maghimo sang mga lugar nga mangin hilway sila—“mga duog sang pangamlig” ang tawag niya sa mga ini. 8 Ikaduha, ginhanda niya “ang mga kaisipan sang katawhan nga mangin mainunungon sa Ginuo.” 9 Kag ikatatlo, wala sia mag-untat sa paghanda sang iya katawhan—sa pisikal ukon sa espirituhanon. 10 Binagbinagon naton ining tatlo ka mga prinsipyo.
Prinsipyo Numero Uno: Maghimo sang mga Duog sang Pangamlig
Ginpabakod ni Moroni ang tagsa ka siyudad nga Nefinhon gamit ang mga dike, mga pamakod, kag mga pader. 11 Sang ginsulong sila sang mga Lamanhon, sila “nahayanghag sing tuman, tungod sang kaalam sang mga Nefinhon sa paghanda sang ila mga duog sang pangamlig.” 12
Sa amo man, samtang nagaeksperiyensya kita sang mga kagamo sa palibot naton, kinahanglan naton maghimo sang mga duog kon sa diin kita hilway, alangay sa pisikal kag sa espirituhanon. Kon ang inyo puluy-an mangin personal nga palasilungan sang pagtuo—sa diin nagapuyo ang Espiritu—ang inyo puluy-an mangin primero nga depensa.
Sa amo man, ang mga estaka sang Sion “mangin dalangpan sa unos” 13 tungod ginapangunahan ini sang mga nagakapot sang mga yabi sang priesthood kag nagagamit sang awtoridad sang priesthood. Samtang padayon ninyo nga ginasunod ang laygay sang mga awtorisado sang Ginuo sa paggiya sa inyo, makabatyag kamo sang mas dako nga seguridad.
Ang templo—ang balay sang Ginuo—isa ka duog sang pangamlig nga indi matupungan. Didto, ginahatagan kamo nga mga sister sang gahum sang priesthood paagi sa sagrado nga mga kasugtanan sa priesthood nga inyo ginahimo. 14 Didto, ginaselyohan ang inyo mga pamilya sa katubtuban. Bisan sa sini nga tuig, nangin limitado kaayo ang inyo pagsulod sa aton mga templo, ang inyo endowment nagahatag sa inyo sang dalayon nga paggamit sang gahum sang Dios samtang inyo ginatahod ang inyo mga kasugtanan sa Iya.
Sa simple nga pulong, ang duog sang pangamlig ara sa bisan diin nga inyo mabatyagan ang presensya sang Balaan nga Espiritu kag magiyahan Niya. 15 Kon kaupod ninyo ang Balaan nga Espiritu, makatudlo kamo sang kamatuoran, bisan pa nga lain ini sa nagaluntad nga mga opinyon. Kag sarang ninyo binagbinagon ang sinsero nga mga pamangkot parte sa ebanghelyo sa palibot sang rebelasyon.
Ginaagda ko kamo, pinalangga kong mga sister, sa paghimo sang puluy-an nga isa ka duog sang pangamlig. Kag ginasulit ko ang akon imbitasyon sa inyo nga dugangan ang inyo pag-intiendi sang gahum sang priesthood kag sang mga kasugtanan kag bugay sang templo. Ang pag-angkon sang mga duog sang pangamlig nga inyo mapasilungan makabulig sa inyo nga atubangon ang palaabuton nga may pagtuo.
Prinsipyo Numero Dos: Ihanda ang Inyo Hunahuna nga Mangin Tampad sa Dios
Ginsugdan namon ang isa ka dako nga proyekto para palawigon ang kabuhi kag kapasidad sang Templo sang Salt Lake.
Ang pila nagkwestyon sang kakinahanglan nga himuon ang amo kapinasahi nga mga tikang. Ugaling, sang ang Salt Lake Valley gintay-og sang 5.7-magnitude nga linog sang damlag sining tuig, ining halangdon nga templo nauyog sing makusog nga ang torotot sa estatwa ni anghel Moroni nahulog! 16
Pareho nga ang pisikal nga pundasyon sang Templo sang Salt Lake kinahanglan nga mangin mabakod agud mapakigbatuan ang natural nga mga kalamidad, ang aton espirituhanon nga mga pundasyon kinahanglan gid nga mangin solido. Dayon, kon ang kaanggid nga mga linog magtay-og sang aton mga kabuhi, sarang kita nga mangin “malig-on kag di-malingkang” bangud sang aton pagtuo. 17
Ang Ginuo nagtudlo sa aton kon paano patubuon ang aton pagtuo paagi sa pagpangita sang “kaalam, bisan pa paagi sa pagtuon kag paagi man sa pagtuo.” 18 Ginapabakod naton ang aton pagtuo kay Jesucristo kon kita nagatinguha sa pagtuman sang Iya mga kasuguan kag “dalayon nga magdumdom sa Iya.” 19 Dugang pa, ang aton pagtuo nagadugang tagsa nga ginagamit naton ang aton pagtuo sa Iya. Amo ina ang buot silingon sang pagtuon paagi sa pagtuo.
Halimbawa, tagsa nga may pagtuo kita nga magtuman sang mga kasuguan sang Dios—bisan nga ginapakanubo kita sang popular nga mga opinyon—ukon tagsa nga pakigbatuan naton ang kalingawan ukon mga ideolohiya nga nagaselebrar sang pagbali sang kasugtanan, kita nagagamit sang aton pagtuo, nga nagaresulta sa pagtubo sang aton pagtuo.
Dugang pa, pila lang ka butang ang nagapatubo sang pagtuo pareho sang regular nga pagpaayaw sa Libro ni Mormon. Wala na sang iban pa nga libro nga nagapamatuod kay Jesucristo nga may amo nga gahum kag kaathag. Ang mga propeta sini, nga gin-inspirar sang Ginuo, nakakita sang aton panahon kag nagpili sang doktrina kag mga kamatuoran nga makabulig sa aton sing labi. Ang Libro ni Mormon amo ang aton giya sa pagkabuhi sa ulihing adlaw.
Siyempre, ang aton pinakamataas nga seguridad nagaabot kon itakod naton ang aton kaugalingon sa Amay nga Langitnon kag kay Jesucristo! Ang kabuhi nga wala sang Dios kabuhi nga puno sang kahadlok. Ang kabuhi nga may Dios kabuhi nga puno sang paghidaet. Ini tungod sang espirituhanon nga mga bugay nga nagaabot sa mga matinuohon. Ang pagbaton sang personal nga rebelasyon isa sa pinakadako sinang mga bugay.
Ang Ginuo nagpromisa nga kon aton pangayuon, mahimo kita nga makabaton sang “rebelasyon sa rebelasyon.” 20 Ginapromisa ko nga samtang nagatubo ang inyo ikasarang sa pagbaton sang rebelasyon, ang Ginuo magabugay sa inyo sang mas dako nga direksyon sa inyo kabuhi kag sang wala untat nga mga dulot sang Espiritu.
Prinsipyo Numero Tres: Indi Mag-untat sa Paghanda
Bisan pa ang mga butang ara sa maayo, padayon nga ginhanda ni Kapitan Moroni ang iya katawhan. Wala siya mag-untat. Wala sia nagkompiyansa.
Ang kasumpong wala nagauntat sa pag-atake. Gani, indi kita dapat mag-untat sa pagpanghanda! Labi nga nagasandig kita sa aton kaugalingon—sa temporal, emosyonal, kag sa espirituhanon—mas mangin handa kita sa pagbato sa wala untat nga pagpangatake ni Satanas.
Pinalangga nga mga sister, sagaran kamo sa paghimo sang mga duog sang pangamlig para sa inyo kaugalingon kag sa inyo mga pinalangga. Dugang pa, may diosnon kamo nga gahum nga nagatugot sa inyo nga magpatubo sang pagtuo sa iban sa makakumbinsi nga pamaagi. 21 Kag wala kamo nagauntat. Ginpakita ninyo ina liwat sini nga tuig.
Palihog, padayuna ina! Ang inyo kaalerto sa pag-amlig sang inyo mga puluy-an kag pagpatubo sang pagtuo sa mga tagipusuon sang inyo mga pinalangga magaani sang mga padya sa mga henerasyon nga magasunod.
Pinalangga ko nga mga sister, kadamo kaayo sang aton pwede paabuton! Ginbutang kamo sang Ginuo diri karon tungod nahibal-an Niya nga masarangan ninyo nga atubangon ang mga problema sa ulihi nga bahin sining ulihing mga adlaw. Nahibal-an Niya nga maintiendihan ninyo ang pagkahalangdon sang Iya buluhaton kag mangin handa sa pagbulig sa pagpahanabo sini.
Wala ko ginasiling nga ang palaabuton nga inadlaw mangin mahapos, pero ginapromisa ko sa inyo nga ang palaabuton mangin mahimayaon para sa mga naghanda kag padayon nga nagahanda nga mangin mga instrumento sa mga kamot sang Ginuo.
Pinalangga ko nga mga sister, indi lang naton basta agwantahon ang ining panahon. Aton atubangon ang palaabuton nga may pagtuo! Ang mabudlay nga tinion mga oportunidad para mag-uswag kita sa espirituhanon. Amo ini ang tinion nga ang aton impluwensya mas nagadulot sangsa tinion nga kalmado.
Ginapromisa ko nga samtang nagahimo kita sang mga duog sang pangamlig, ginahanda ang aton mga kaisipan nga mangin tampad sa Dios, kag wala nagauntat sa pagpanghanda, pagabugayan kita sang Dios. Sia maga “[luwas sa aton]; huo, sa bagay nga [maga]hambal sia sing paghidaet sa [aton] mga kalag, kag [maga]hatag sa [aton] sing dako nga pagtuo, kag … [maga]pahanabo sa [aton] nga maglaum [kita] para sa [aton] kaluwasan sa iya.” 22
Samtang nagahanda kamo sa pag-atubang sang palaabuton nga may pagtuo, ang ining mga promisa mangin inyo! Nagapamatuod ako sa sini, upod ang akon pagpahayag sang akon pagpalangga para sa inyo kag sang akon pagsalig sa inyo, sa sagrado nga ngalan ni Jesucristo, amen.