Tilawan Naton Sila sa Sini
Karon na ang tion sa paghanda kag pagpamatuod sang aton kaugalingon nga handa kag makasarang sa paghimo sang tanan nga butang nga isugo sa aton sang Ginuo nga aton Dios.
Nagapangamuyo ako sang bulig sang Balaan nga Espiritu sa aton tanan samtang ginapaambit ko ang mga panghunahuna kag balatyagon nga nag-abot sa akon kaisipan kag tagipusuon sa paghanda para sa sining pangkabilugan nga komperensya.
Ang Importansya sang mga Pagtilaw
Sa masobra duha ka dekada antes ako gintawag sa full-time nga pagserbisyo sa Simbahan, nagaobra ako bilang maestro kag administrador sang isa ka unibersidad. Ang mayor ko nga responsibilidad bilang maestro amo nga buligan ang mga estudyante nga makahibalo kon paano magtuon nga sila lang. Kag isa ka importante nga elemento sang akon trabaho amo ang paghimo, paggrado, kag paghatag sang komento sa resulta sa test sang estudyante. Sa inyo na nahibal-an sa personal nga eksperiyensya, ang mga test masami indi ang parte sang proseso sang pagtuon nga nanamian gid sang mga estudyante!
Pero ang regular nga mga test kinahanglanon gid sa pagtuon. Ang epektibo nga test nagabulig sa aton nga makumparar ang kinahanglan naton mahibal-an sa nahibal-an na naton parte sa isa ka topiko; nagahatag man ini sang basehan kon paano naton takson ang aton pagtuon kag pagtubo.
Sa amo man, ang mga test sa eskwelahan sang kabuhi importante nga elemento sang aton wala katapusan nga pag-uswag. Kon tan-awon mo gid, ugaling, ang tinaga nga test indi gani makita bisan kaisa sa teksto sa balaan nga mga kasulatan sang Standard Works sa Ingles. Sa baylo, ang mga tinaga pareho sang tilawan, usisaon, kag pamatud-an ginagamit para ilaragway ang lainlain nga mga sulundan sa pagpakita sing nagakaigo sang aton espirituhanon nga ihibalo sa, pag-intiendi sang, kag debosyon sa plano sang kalipayan sang aton Amay nga Langitnon kag sang aton ikasarang sa pagpangita sang mga bugay sang Pagbayad-Sala sang Manluluwas.
Sia nga nagbalay sang plano sang kaluwasan naglaragway sang pinaka-katuyuan sang aton dutan-on nga pagtilaw nga ginagamit ang mga tinaga nga tilawan, usisaon, kag pamatud-an sa dumaan kag moderno nga mga kasulatan. “Kag tilawan naton sila sa sini, agud mahibaloan kon himuon nila ang tanan nga butang nga isugo sa ila sang Ginuo nga ila Dios.” 1
Binagbinaga ining pag-ampo sang Salmista nga si David:
“Usisaa ako, O Ginuo, kag tilawi ako; tilawi ang akon tagipusuon kag ang akon hunahuna.
“Kay ang imo malig-on nga paghigugma yara sa atubangan sang akon mga mata: kag nagalakat ako sa imo kamatuoran.” 2
Ang Ginuo nagpahayag sang 1833, “Gani, indi kamo magkahadlok sa inyo mga kaaway, kay nadesisyonan ko na sa akon tagipusuon, siling sang Ginuo, nga pagaprobahan ko kamo sa tanan nga butang, kon bala magpabilin kamo nga tampad sa akon kasugtanan bisan pa tubtob sa kamatayon agud makabig kamo nga nagakaangay.” 3
Pagtilaw kag Pagpamatuod sa Karon nga Panahon
Ang tuig 2020 ginmarkahan, sa isa ka bahin, sang pangkalibutanon nga pandemya nga nagtilaw, nag-usisa, kag nagpamatuod sa aton sa madamo nga paagi. Kabay nga kita bilang mga indibidwal kag mga pamilya nagatuon sang malahalon nga mga leksyon nga matudlo lamang sa aton sang mabudlay nga mga eksperiyensya. Nagalaum man ako nga kita tanan lubos nga magakilala sang “pagkagamhanan sang Dios” kag sang kamatuoran nga “iya ikonsagrar ang [aton] mga kapipit-an para sa [aton] kaayuhan.” 4
Duha ka tig-una nga mga prinsipyo ang sarang maggiya kag magpabakod sa aton samtang nagapangatubang kita sang nagatilaw kag nagapamatuod nga mga sirkumstansya sa aton mga kabuhi, bisan ano man ini: (1) ang prinsipyo sang paghanda, kag (2) ang prinsipyo sang pagdutdot pasulong nga may kalig-on kay Cristo.
Pagtilaw kag Paghanda
Bilang mga disipulo sang Manluluwas, ginsugo kita nga “ihanda ang tagsa ka kinahanglanon nga butang; kag ipahamtang ang isa ka balay nga balay sang pagpangamuyo, balay sang pagpuasa, balay sang pagtuo, balay sang pagtuon, balay sang himaya, balay sang kahusay, balay sang Dios.” 5
Ginpromisa man sa aton nga “kon handa kamo indi kamo mahadlok.
“Kag agud malikawan ninyo ang gahum sang kaaway, kag matipon sa akon nga isa ka matarong nga katawhan nga wala’y sala kag wala’y kabasulanan.” 6
Ining balaan nga mga kasulatan nagahatag sang perpekto nga basehan sa pag-organisar kag paghanda sang aton mga kabuhi kag mga puluy-an alangay sa temporal kag espirituhanon. Ang aton mga pagpaninguha sa paghanda para sa mabudlay nga mga eksperiyensya sang kabuhi dapat magsunod sa ehemplo sang Manluluwas, nga padayon nga “nagdugang sa kaalam kag kataason, kag kahamut-an sang Dios kag sang mga tawo” 7 —gintingob nga balanse sang kinaalam, pisikal, espirituhanon, kag sosyal nga kahanda.
Isa ka hapon pila lang ka bulan ang nagligad, ako kag si Susan nag-imbentaryo sang amon tinago nga pagkaon kag mga gamit pang-emerhensya. Sang ato nga tion, madasig nga nagalapta ang COVID-19, kag may serye sang mga linog nga nagtay-og sang amon balay sa Utah. Gintinguhaan namon sugod sang bag-o pa lang kami makasal nga sundon ang laygay sang propeta parte sa paghanda para sa indi mapaktan nga mga kabudlayan, gani ang “pag-usisa” sang amon kahanda sa tunga sang kagaw kag mga linog daw maayo kag husto gid sa tiyempo nga buhaton. Gusto namon mahibal-an ang amon grado sa sining wala ginapabalo nga daan nga mga test.
Kadako sang amon natun-an. Sa madamo nga bahin, ang amon pagpanghanda hustuhan gid. Ugaling, sa pila ka bahin, kinahanglanon pa gid sang pag-uswag tungod wala namon mapakti kag mahandai ang partikular nga mga kinahanglanon sa husto nga tion.
Nakakadlaw man kami pirme. Nadiskubrehan namon, halimbawa, ang mga tinago sa pinakapunta nga kabinet nga ara lang sa bulutangan sang pagkaon pila na ka dekada. Sa tuod lang, nahadlok kami nga buksan kag usisaon ang pila ka mga suludlan kay basi mag-ibwal ang isa pa gid ka pangkalibutanon nga pandemya! Pero dapat kamo malipay nga ginhaboy namon sing husto ang delikado nga mga bagay kag nalikawan ang risgo sa ikaayong lawas sang kalibutan.
Pila ka mga miyembro sang Simbahan ang nagpabutyag nga ang pang-emerhensya nga mga plano kag suplay, pagtago sang pagkaon, kag 72-oras nga kit indi na importante kay ang Mga Kauturan wala na nagmitlang kag nag-id-id sini kag sang kaangay nga mga topiko sang nagligad nga pangkabilugan nga komperensya. Pero ang sulit-sulit nga laygay nga maghanda ginahambal sang mga lider sang Simbahan sing dinekada na. Ang padayon nga laygay sang propeta sa kadugayan nagatuga sang mabaskog kag maathag nga mensahe sang paandam nga mas makusog pa sangsa isahay lang nga paandam.
Pareho nga ang mabudlay nga panahon nagapakita sang mga kakulangan sa temporal nga pagpanghanda, sa amo man ang mga balatian sang espirituhanon nga pagkakaswal kag pagpawala nagatuga sang ila pinakadako nga halit sa tion sang mabudlay nga mga pagtilaw. Matun-an naton, halimbawa, sa paanggid sang pulo ka mga dalaga nga ang pagpabuyan-buyan sang paghanda nagabunga sang kapaslawan sa pagpamatuod. Panumduma kon paano napaslawan ang lima ka buangbuang nga mga dalaga sa paghanda sang nagakaigo para sa eksaminasyon nga ginhatag sa ila sang adlaw sang pag-abot sang nobyo.
“Kay sang nagdala ang mga buangbuang sang ila mga suga, wala sila magdala sing lana:
“Apang ang mga mainandamon nagdala sing lana sa ila mga tibudtibod pati sang ila mga suga. …
“Apang sa tunga sang kagab-ihon may isa ka sininggit, Yari karon, ang nobyo; gwa kamo sa pagsugat sa iya.
“Niyan tanan yadtong dalaga nagbangon kag nag-aman sang ila mga suga.
“Kag ang mga buangbuang nagsiling sa mga mainandamon, Hatagi kami sang inyo lana, kay nagakapalong ang amon mga suga.
“Apang ang mga mainandamon nagsabat, Basi indi ini mag-igo sa amon kag sa inyo; maayo pa magkadto kamo sa mga nagabaligya kag magbakal nga sa inyo kaugalingon.
“Kag sang nagpakadto sila sa pagbakal, nag-abot ang nobyo, kag ang mga handa nagsulod upod sa iya sa sinalusalo sang kasal; kag gintakop ang ganhaan.
“Ugaling nag-abot man ang iban nga mga dalaga, nga nagasiling, Ginuo, Ginuo, buksi kami.” 8
“Apang nagsabat sia, Sa pagkamatuod, nagasiling ako sa inyo, Wala ako makakilala sa inyo.” 9
Sa sini nga eksam, ginpamatud-an sang lima ka buangbuang nga mga dalaga ang ila kaugalingon nga manugpalamati lamang sila kag indi mga manugtuman sang pulong. 10
May abyan ako nga matutom kaayo nga estudyante sang abogasiya. Sa sulod sang isa ka semester, nagtigana si Sam sang oras kada adlaw sa pagrebyu, pagpalip-ot, kag pagtuon sang iya mga sinulat sa tagsa ka kurso nga iya ginasudlan. Ginsunod niya ang amo man nga sulundan sa tanan niya nga klase sa katapusan sang tagsa ka semana kag tagsa ka bulan. Ang iya pamaagi nagbulig sa iya nga matun-an ang layi kag indi lang sa pagsaulo sang mga detalye. Kag sang nagahilapit na ang katapusan nga eksaminasyon, handa na si Sam. Ang matuod, para sa iya ang oras sang katapusan nga eksam amo ang pinaka-indi makakululba nga bahin sang iya paghanas sa panabang. Ang epektibo kag sa-oras nga paghanda nagauna sa madinalag-on nga pagpamatuod.
Ang pamaagi ni Sam sa iya pagtuon sang panabang nagapakita sang isa sa panguna nga sulundan sang Ginuo sa pagtubo kag pag-uswag. “Amo ini ang ginasiling sang Ginuong Dios: Magahatag ako sa mga anak sang tawo sing dinalan sa dinalan, pagsulundan sa pagsulundan, diutay diri kag diutay didto; kag bulahan yadtong mga nagapamati sa akon mga pagsulundan, kag nagatamod sang akon laygay, kay makatuon sila sing kaalam; kay sa iya nga magabaton magahatag ako sing dugang.” 11
Ginaagda ko ang tagsa sa aton nga “binagbinagon ang [aton] mga dalanon” 12 kag “usisaon [ang aton kaugalingon], kon [kita] yara sa pagtuo; [kag] tilawan [ang aton] kaugalingon.” 13 Ano ang aton natun-an sa sining nagliligad nga binulan sang pagbag-o kag mga limitasyon sa pangginawi? Ano ang kinahanglan naton pauswagon sa aton mga kabuhi sa espirituhanon, pisikal, sosyal, emosyunal, kag kinaalam? Karon na ang tion sa paghanda kag pagpamatuod sang aton kaugalingon nga handa kag makasarang sa paghimo sang tanan nga butang nga isugo sa aton sang Ginuo nga aton Dios.
Pagtilaw kag Pagpadayon Pasulong
Makaisa nakatambong ako sang lubong sang isa ka lamharon nga misyonero nga napatay sa aksidente. Ang amay sang misyonero naghambal sa programa kag ginlaragway ang kasakit sang wala ginapaabot nga mortal nga separasyon sa iya pinalangga nga anak. Prangka niya nga ginsiling nga sa personal wala niya maintiendihan ang mga rason ukon ang tiyempo sang amo nga hitabo. Pero madumduman ko gid ining mabuot nga tawo nga nagasiling man nga nahibal-an niya nga ang Dios nakahibalo sang mga rason kag tiyempo sang pagtaliwan sang iya anak—kag igo na ato para sa iya. Ginsiling niya sa kongregasyon nga sia kag ang iya pamilya, bisan pa nga ginasubuan, mangin maayo lang; ang ila mga testimonya nagapabilin nga mabakod kag malig-on. Gintakop niya ang iya mensahe upod ang ini nga deklarasyon: “Gusto ko nga mahibal-an ninyo nga kon parte sa ebanghelyo ni Jesucristo, tampad ang amon pamilya. Tampad kami.”
Bisan masakit kag mabudlay nga mawad-an sang mahal sa kabuhi, ang mga miyembro sining maisog nga pamilya nakahanda sa espirituhanon nga pamatud-an nga sarang sila magtuon sang mga leksyon nga may wala katapusan nga importansya paagi sa mga butang nga ila ginaantos. 14
Ang pagkamatinuohon indi kabuangan ukon pagkapanatiko. Sa baylo, ini amo ang pagsalig, kag pagbutang sang aton paglaum kay Jesucristo bilang aton Manluluwas, sa Iya ngalan, kag sa Iya mga promisa. Samtang kita “[naga]dutdot pasulong upod ang isa ka kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo,” 15 ginabugayan kita sang wala katapusan nga perspektibo kag panan-awon lapaw pa sa aton limitado nga mortal nga ikasarang. Mahatagan kita sang ikasarang nga “magtipon, kag magtindog sa balaan nga mga lugar” 16 kag “indi maisdog tubtob nga mag-abot ang adlaw sang Ginuo.” 17
Samtang nagaserbe ako bilang pangulo sang Brigham Young University–Idaho, nagkadto si Elder Jeffrey R. Holland sa kampus sang Disyembre 1998 para maghambal sa isa sang amon semanal nga debosyunal. Gin-agda namon ni Susan ang isa ka grupo sang mga estudyante para makilala kag maistorya si Elder Holland antes sia magpamulong-pulong. Sang manugtapos na ang amon pag-ululupod, ginpamangkot ko si Elder Holland, “Kon may itudlo ka nga isa ka butang sa sining mga estudyante, ano ina?”
Nagsabat sia:
“Makita naton ang labing nagadako nga lihok sa pagtinunga-tunga. Indi na pwede ang mga Santos sa Ulihing mga Adlaw nga magpabilin sa tunga. Kinahanglan gid nga magpili sang panindugan.
“Kon nagapautaw-utaw ka sa direksyon sang ilig sang suba, may malab-utan ka gid. Maanod ka gid kon diin ka dalhon sang tubig. Indi pwede nga magpaanod lang kita sa kon ano nga popular ukon mahapos sa aton mga ginapatihan.
“Kinahanglan gid nga magpili. Ang indi pagpili isa man ka pagpili. Tun-i nga magpili subong.”
Ang pahayag ni Elder Holland parte sa nagadugang nga pagtinunga-tunga napamatud-an nga inspirado sa mga uso kag mga hitabo sa sosyedad sa 22 ka tuig matapos nga iya ginsabat ang akon pamangkot. Nga nagapaabot sang pagdako sang pagtinunga sa pamaagi sang Ginuo kag sang kalibutan, si Elder Holland nagpaandam nga ang inadlaw sang pagkakampante sa pagtuo sa ginpanumbalik nga Simbahan kag pagpati man sa kalibutan madali na lang madula. Ining alagad sang Ginuo nagapaisog sang mga lamharon nga magpili, maghanda, kag mangin debotado nga mga disipulo sang Manluluwas. Ginabuligan niya sila nga maghanda kag magpadayon pasulong sa kag paagi sa nagatilaw, nagausisa, kag nagapamatuod nga mga eksperiyensya sa ila mga kabuhi.
Promisa kag Testimonya
Ang proseso sang pagpamatuod sang aton mga kaugalingon isa ka mayor nga bahin sang plano sang kalipayan sang Amay nga Langitnon. Ginapromisa ko nga samtang alangay kita nga nagahanda kag nagadutdot pasulong nga may pagtuo sa Manluluwas, tanan kita makabaton sang pareho nga grado sa pinakaulihi nga pagtilaw sang kabuhi sa duta: “Maayo gid, ulipon nga maayo kag matutom: sa diutay nangin matutom ka, padumalahon ko ikaw sa madamo: sulod ka sa kalipay sang imo agalon.” 18
Nagasaksi ako nga ang Dios nga Wala Katapusan nga Amay amo ang aton Amay. Si Jesucristo ang Iya Bugtong kag buhi nga Anak, ang aton Manluluwas kag Manunubos. Sa sining mga kamatuoran malipayon ako nga nagapamatuod sa sagrado nga ngalan sang Ginuong Jesucristo, amen.