Pagkalipay kay Cristo
Ang pinakasigurado nga paagi sa pagkalipay sa sining kabuhi amo nga magbuylog kay Cristo sa pagbulig sa iban.
Ang Ginuo wala nagapangayo sa aton mga lamharon nga Aaronic Priesthood nga himuon ang tanan-tanan, pero ang iya ginapangayo amo nga makapaubos.
Pila ka tuig ang nagligad, ang amon diutay nga pamilya nakaeksperiyensya sinang ginaatubang sang madamo nga pamilya sa sining nalaglag nga kalibutan. Ang amon agot nga lalaki, si Tanner Christian Lund, nagmasakit sang kanser. Dalayawon gid sia nga bata, subong nga ang mga nuebe anyos amo man gid sina. Makadlaw ka sa iya kasutil kag makatilingala man ang iya pagkahibalo sa espirituwal nga mga butang. Kama-kama kag anghel, salawayon kag mabuot. Sang gamay pa lang sia kag sa adlaw-adlaw nga naligban kami sang iya pagpaugtas, naghunahuna kami sadto kon magdako sia nga mangin propeta ukon kawatan sang bangko. Diin man sa sini, daw magabilin sia sang marka sa kalibutan.
Kag dayon nagmasakit sia sing malubha. Sa masunod nga tatlo ka tuig, ang moderno nga medisina naggamit sang pinakamaayo nga mga terapiya, lakip ang duha ka bone marrow transplant, sa diin nagmasakit sia sang pulmonya, gani naghinguyang sia sing 10 ka semana nga wala sing animo sa ventilator. Milagro kay nag-ayo sia sa malip-ot lang nga tion, pero nagbalik ang iya kanser.
Antes lang gid sia nagtaliwan, ang kanser ni Tanner nag-ut-ot sang iya mga tul-an, kag bisan pa ginhatagan sia sang maisog nga mga bulong para sa sakit, sa gihapon nagabatyag sia sing sakit. Haluson sia nga makabangon sa iya kama. Isa ka Domingo sang aga, ang iya mama, si Kalleen, nagsulod sa iya kwarto agud tan-awon sia antes maglakat ang pamilya sa simbahan. Nakibot sia sang makita niya nga nakailis na sia kag nagapungko sa punta sang iya katre, nga nabudlayan gid sa pagsira sang iya butones. Si Kalleen nagpungko sa iya tupad. “Tanner,” siling niya, “sigurado ka nga masimba ka? Siguro magpabilin ka na lang anay sa balay kag magpahuway.”
Nagtulok sia sa salog. Isa sia ka deacono. May korum sia. Kag may asaynment sia.
“Dapat ako magpasa sang sakramento karon.”
“Ahay, sigurado ako may makahimo sina para sa imo.”
“Huo,” siling niya, “pero … makita ko kon paano ang mga tawo magtulok sa akon kon magpasa ako sang sakramento. Sa banta ko nagabulig ini sa ila.”
Gani ginbuligan sia ni Kalleen sa pagsira sang iya butones kag pagsuksok sang iya kurbata, kag nagsakay sila pa-simbahan. Maathag nga may importante nga nagakatabo.
Nag-abot ako sa simbahan gikan sa nauna nga miting kag gani nakibot ako nga makita si Tanner nga nagapungko sa raya sang mga deacono. Mahinay nga ginsugiran ako ni Kalleen kon ngaa ara sia didto kag kon ano ang iya ginsiling: “Nagabulig ini sa mga tawo.”
Kag gani nagatan-aw ako samtang nag-abante ang mga deacono sa pang-sakramento nga lamesa. Hinay-hinay sia nga nagsandig sa isa pa ka deacono samtang ang mga priest nagapasa sa ila sang mga tray sang tinapay. Kag dayon nagsudsod si Tanner pakadto sa iya pwesto kag nag-uyat sa punta sang bangko agud balansehon ang iya kaugalingon samtang ginatanyag niya ang sakramento.
Daw ang tagsa ka mata sa kapilya nakatutok sa iya, nga natandog sang iya kabudlayan samtang ginahimo niya ang iya simple nga bahin. Bisan paano si Tanner nagpabutyag sing mahipos nga leksyon samtang maligdong sia nga nagadulog sa tagsa ka raya sang pulungkoan—ang iya kalbo nga ulo basa sang balhas—nga nagarepresentar sang Manluluwas sa paagi nga ginahimo sang mga deacono. Ang iya sadto anay mabakod nga lawas sang deacono maluming na nga lawas nga samad sang masakit, nga handa nga mag-antos agud magserbe paagi sa pagdala sang mga simbolo sang Pagbayad-Sala sang Manluluwas sa amon mga kabuhi.
Ang iya panghunahuna parte sa pagka-deacono nagpahunahuna man sa amon sing tuhay—parte sa sakramento, parte sa Manluluwas, kag parte sa mga deacono kag mga teacher kag mga priest.
Nagahunahuna ako sa di-mabungat nga milagro nga nagpahulag sa iya sina nga aga nga tungdan sing maisog ang inang matinong kag magamay nga tawag sa pag-alagad, kag parte sa kabakod kag mga ikasarang sang tanan naton nga nagatubo nga lamharon samtang ginatulod nila ang ila mga kaugalingon nga tungdan ang tawag sang propeta sa pag-entra sa mga batalya sang Dios kag pagbuylog sa buluhaton sang kaluwasan kag pagpahitaas.
Sa tagsa nga ang isa ka deacono magkapot sang sacrament tray, ginapahanumdom kita sang sagrado nga istorya sang Katapusan nga Panihapon, sang Getsemani, sang Kalbaryo, kag sang lulubngan sa hardin. Sang ang Manluluwas nagsiling sa Iya mga Apostoles, “Himoa ninyo ini sa handumanan nakon,” 1 nagahambal man Sia sa tanan nga katuigan sa tagsa sa aton. Nagahambal sia parte sa wala untat nga milagro nga Iya ihatag sa tion nga ang palaabuton nga mga deacono, mga teacher, kag mga priest magtanyag sang Iya mga simbolo kag mag-agda sa Iya mga anak sa pagbaton sang Iya nagabayad-sala nga dulot.
Ang tanan nga pang-sakramento nga simbolo nagatudlo sa aton sa sinang dulot. Nagapamalandong kita sang tinapay nga Iya ginsipad-sipad sadto—kag ang tinapay nga ginasipad-sipad naman sa karon sang mga priest sa aton atubang. Ginahunahuna naton ang kahulugan sang likido nga ginakonsagrar, sadto kag karon, samtang ang mga pulong sinang pang-sakramento nga mga pangamuyo hanuot nga nagaagi halin sa mga baba sang lamharon nga mga priest padulong sa aton mga tagipusuon kag sa mga langit, nga ginabag-o ang mga kasugtanan nga nagaangot sa aton sa mismo mga gahum sang kaluwasan ni Cristo. Mahimo nga maghunahuna kita kon ano ang kahulugan kon ang isa ka deacono magbitbit sang sagrado nga mga simbolo sa aton, nga nagatindog kon diin si Jesus magtindog kon ara Sia dira, nga nagatanyag sa paghakwat sang aton mga ginakarga kag aton mga kasakit.
Maayo lang nga ang lamharon nga mga lalaki kag babayi indi kinahanglan magmasakit agud matukiban ang kalipay kag katuyoan sa pag-alagad sa Manluluwas.
Si Elder David A. Bednar nagtudlo nga agud magtubo kag mangin pareho sa mga misyonero kon ano sila, dapat naton himuon ang ginahimo sang mga misyonero, kag dayon, “dinalan sa dinalan kag pagsulundan sa pagsulundan, … [kita] sarang mangin ang misyonero … nga ginapaabot sang Manluluwas.” 2
Subong man, kon luyag naton “nga mangin pareho kay Jesus,” 3 dapat naton himuon ang ginahimo ni Jesus, kag sa isa ka talalupangdon nga dinalan, ang Ginuo nagapaathag kon ano ini ang Iya nga ginahimo: Nagsiling sia, “Kay tan-awa, ini ang akon buluhaton kag akon himaya—ang ipahanabo ang pagkawala’y kamatayon kag kabuhi nga wala’y katapusan sang tawo.” 4
Ang misyon sang Manluluwas nangin kag sa wala katubtuban ang pag-alagad sa Iya Amay paagi sa pagluwas sang Iya mga anak.
Kag ang pinakasigurado nga paagi sa pagsalapo sang kalipay sa sining kalibutan amo nga magbuylog kay Cristo sa pagbulig sa iban.
Amo ini ang simple nga kamatuoran nga nag-inspirar sang programa nga Kabataan kag mga Lamharon.
Ang tanan nga kahiwatan sa Kabataan kag mga Lamharon kag tanan nga panudlo sa Kabataan kag mga Lamharon parte sa pagbulig sa mga lamharon nga mangin mas pareho kay Jesus paagi sa pagbuylog sa Iya sa Iya buluhaton sang kaluwasan kag pagkahitaas.
Ang Kabataan kag mga Lamharon isa ka kasangkapan sa pagbulig sa tagsa ka Primary nga bata kag lamharon nga magtubo sa pagkadisipulo kag sa pag-angkon sing puno-sing-pagtuo nga panan-aw sang kon ano ang hitsura sang pamaagi sang kalipayan. Makatuon sila sa pagpaabot kag paghandum sang mga dululugan kag mga karatula sa banas sang kasugtanan, kon sa diin mabunyagan sila kag makompirma sang dulot sang Balaan nga Espiritu kag pagkadugay-dugay mangin bahin sang mga korum kag mga klase sang Young Women, sa diin magabatyag sila sang kalipay sa pagbulig sa iban paagi sa sunod-sunod nga Cristohanon nga mga buhat sang pag-alagad. Magapahamtang sila sang mga katuyoan, dalagko kag magagmay, nga magabalanse sang ila mga kabuhi samtang mangin mas pareho sa Manluluwas. Ang mga komperensya kag mga magasin nga For the Strength of Youth, ang Friend, kag ang Pagpangabuhi sang Ebanghelyo (Gospel Living) nga app magabulig sa pagsentro sa ila sa pagpangita sang kalipay kay Cristo. Ila paabuton ang mga bugay sang pagkapot sang limited-use nga mga temple recommend kag mabatyagan ang espiritu ni Elias paagi sa impluwensya sang Balaan nga Espiritu samtang ginatinguhaan nila ang mga bugay sang templo kag family history. Pagagiyahan sila sang mga patriarchal blessing. Sa ulihi, makita nila ang ila mga kaugalingon nga nagakadto sa mga templo agud mahatagan sang gahum kag agud makakita didto sang kalipay samtang ginaangot sila sing wala katapusan, ano man ang matabo, sa ila mga pamilya.
Sa atubang sang pandemya kag kalamidad, ang pagdala sing bug-os nga kapuslanan sang bag-o nga Kabataan kag mga Lamharon nga programa ginapanami pa sa gihapon—pero hilingagawon ini. Ang aton mga lamharon indi makahulat nga ihusto sang kalibutan ang iya sini kaugalingon antes pa nila makilala ang Manluluwas. May pila nga nagahimo sang mga desisyon bisan sa karon nga indi nila paghimuon kon naintiendihan nila ang ila matuod nga pagkatawo—kag ang Iya pagkatawo.
Kag gani ang ginadalian nga panawagan gikan sa mga batalya sang Dios sa tig-una nga paghanas amo nga “ang tanan nga kamot maghikot!”
Mga nanay kag tatay, ang inyo mga anak nga lalaki nagakinahanglan sang inyo dako gid kaayo nga suporta sa karon pareho sang inyo pagsuporta sang una sang magagmay pa lang nga mga butang ang ila ginatuyo pareho sang mga badge kag mga pin. Mga iloy kag mga amay, mga lider sa priesthood kag Young Women, kon nabudlayan ang inyo mga lamharon, ang programa nga Kabataan kag mga Lamharon (Children and Youth) magabulig sa pagdala sa ila sa Manluluwas, kag ang Manluluwas magadala sa ila sang paghidaet. 5
Mga pangulohan sang korum kag mga klase, akoa ang responsibilidad kag himoa ang nagakaigo sa buluhaton sang Ginuo.
Mga bishop iangot ang inyo mga yabi sang priesthood sa iya sang mga pangulo sang korum, kag ang inyo mga korum—kag inyo mga ward magabag-o sing dayon.
Kag sa inyo nga ulihing-tubo, nagasaksi ako, kay nakahibalo ako, nga kamo amo ang pinalangga nga mga anak nga lalaki kag babayi sang Dios kag may ara Sia sang ipahimo sa inyo.
Sa inyo pagtuman sang inyo halangdon nga mga tawag, sa bug-os ninyo nga tagipusuon, ikasarang, panghunahuna kag kusog, pagapalanggaon ninyo ang Dios kag pagatipigan ang inyo mga kasugtanan kag magasalig sa Iya priesthood samtang nagahikot kamo sa pagpakamaayo sa iban, sugod sa inyo mismo nga mga puluy-an.
Ginapangamuyo ko nga magtinguha kamo, sing may dugang nga enerhiya nga nagakaigo sa sining panahon, sa pag-alagad, paggamit sang pagtuo, paghinulsol, kag pag-improbar sa tagsa ka adlaw, agud mangin angayan sa pagbaton sang mga bugay sang templo kag sang nagapadayon nga kalipay nga nagaabot lamang paagi sa ebanghelyo ni Jesucristo. Ginapangamuyo ko nga maghanda kamo nga mangin inang matutum nga misyonero, tampad nga bana ukon asawa, mapinalanggaon nga amay ukon iloy nga ginpromisa sa inyo nga sa ulihi mahimo kamo nga mangin paagi sa pagka-matuod nga disipulo ni Jesucristo.
Kabay nga magbulig kamo sa paghanda sang kalibutan para sa pagbalik sang Manluluwas paagi sa pag-agda sang tanan nga magpalapit kay Cristo kag magbaton sang mga bugay sang Iya Pagbayad-Sala. Sa ngalan ni Jesucristo, amen.