Ang Mangin pareho sa Iya

ni Elder Scott D. Whiting

Sang Seventy

Paagi lamang sa diosnon nga bulig sang Manluluwas nga makauswag kita tanan padulong sa pagpareho sa Iya.

Bisan sa sinang mahinalungon nga nagatuon sang kabuhi kag pag-alagad ni Jesucristo, ang laygay sang Manluluwas nga mangin “bisan subong man sa akon” ¹ makahalawhaw kag daw indi malab-ot. Ayhan pareho kamo sa akon—nakahibalo gid sang tanan ninyo nga mga kasaypanan kag mga kapaslawan, gani sa isip ninyo mas komportable nga maglakat sa banas nga wala sing taklaron kag diutay lang ang pagtubo. “Pat-od gid, ining pinanudlo mabudlay tumanon kag matayog,” rason naton sa aton pagpili sing mas mahapos nga desisyon, kag gani nagalikaw sa tuman nga kabudlayan para sa kinahanglanon nga pagbag-o.

Pero paano kon ang mangin “bisan subong man [sa Iya]” indi lang paanggid, bisan sa aton mortal nga kondisyon? Paano abi kon, bisan paano, sarang ini malab-ot sa sining kabuhi kag, sa pagkamatuod, kinahanglanon agud makaupod Sia liwat? Paano kon ang “bisan subong man sa akon” amo mismo ang buot silingon sang Manluluwas? Ano dayon? Ano kadako nga pagpanikasog ang handa naton ihatag agud makapangayo sang Iya milagroso nga gahum sa aton mga kabuhi agud maliwat naton ang aton mismo nga kinaugali?

Si Elder Neal A. Maxwell nagtudlo: “Samtang ginahunahuna naton nga ginsugo kita ni Jesus nga mangin pareho sa Iya, maintiendihan naton nga ang aton sirkumstansya sa karon indi nga amo gid kita sina kalain, kundi nga indi kita sinsero kag nagakulang gid kita sang kakunyag sa Iya kawsa—nga kawsa man naton! Ginadayaw naton Sia pero talagsa lang ginasunod.” ² Isa ka lamharon nga ministro, si Charles M. Sheldon, ang nagpabutyag sing amo man sini nga mga sentimiento sa sini nga paagi: “Ang aton pagka-Kristiyano nanamian gid sang mahapos kag matawhay sa bagay nga indi kita gusto sang mabudlay kag mabug-at pareho sang krus.” ³

Sa pagkamatuod, ang tanan ginamandoan nga mangin pareho sa Iya, subong nga si Jesucristo nangin pareho sang Amay. ⁴ Samtang nagauswag kita, mangin mas bug-os kita, human, kag perpekto. ⁵ Ang amo nga panudlo wala nabase sa bisan ano nga mga doktrina sang sekta kundi nagahalin mismo sa Manunudlo. Sa sini nga paagi kita dapat magpangabuhi, magbinagbinag sang aton mga komunikasyon, kag magpasanyog sang aton mga relasyon. Sa pagkamatuod, wala sing iban nga paagi agud ayuhon ang mga pilas sang guba nga mga relasyon ukon sang watak-watak nga sosyedad luwas nga ang tagsa sa aton lubos nga magsunod sa Prinsipe sang Paghidaet. ⁶

Binagbinagon naton kon paano sugdan ang madinumdumon, hungod, kag gintuyo nga pagtinguha nga mangin pareho sa Iya paagi sa pag-agom sang mismo mga kinaiya ni Jesucristo.

Magpamat-od kag Magtutum

Sang nagligad nga mga tinuig, ako kag ang akon asawa nagatindog sa panugod nga alagyan sang pinakamataas nga bukid sa Japan, ang Mount Fuji. Sang nagsugod kami sa pagtaklad nagtangla kami sa malayo pa nga putukputukan kag naghunahuna kon makalab-ot kami didto.

Samtang nagapadayon kami, ang kakapoy, pagpalanakit sang mga kaunuran, kag mga epekto sang kataason mabatyagan na namon. Nangin importante sa amon nga magtutok na lamang sa masunod nga tikang. Nagasiling kami, “Indi man ako dali-dali nga makalab-ot sa ibabaw, pero mahimo ko ining masunod nga tikang subong.” Sa kadugayan ang mabudlay nga buluhaton sang ulihi nangin posible nga malab-ot—sing amat-amat.

Ang una nga tikang sa sining banas agud mangin pareho kay Jesucristo amo ang paghandum sa paghimo sini. Maayo nga maintiendihan ang sugo nga mangin pareho sa Iya, pero ang ina nga pag-intiendi kinahanglan updan sang kaluyag nga bag-uhon ang aton mga kaugalingon, sing amat-amat, nga labaw pa sa kinaugali nga tawo. ⁷ Agud mapalambo ang ini nga handum, kinahanglan kabalo kita kon sin-o si Jesucristo. Kinahanglan may nahibal-an kita sa Iya karakter, ⁸ kag kinahanglan kita mangita sang Iya mga kinaiya sa balaan nga kasulatan, sa pagsimba, kag sa iban pa nga mga balaan nga lugar. Kon makilala pa gid naton Sia, makita naton ang Iya mga kinaiya sa iban. Magapaisog ini sa aton sa aton kaugalingon nga pagpaninguha, kay kon maagom sang iban sa bisan paano, ang Iya mga kinaiya, mahimo man naton.

Kon tampad kita sa aton mga kaugalingon, ang Kasanag ni Cristo ⁹ sa sulod naton nagahutik nga malayo pa kita sa aton ginahandum nga karakter sang Manluluwas. ¹⁰ Importante ang amo nga katampad agud mag-uswag kita nga mangin pareho sa Iya. Sa pagkamatuod, ang katampad isa sang Iya mga kinaiya.

Nagalubag-lubag nga hitsura sa espiho sa balay kalingawan

Karon, ang mga maisog sa aton mahimo magpamangkot sa nasaligan nga miyembro sang pamilya, tiayon, abyan, ukon espirituwal nga lider kon ano nga kinaiya ni Jesucristo ang kinahanglan naton—kag basi makibot kita sang ila sabat! Kon kaisa makita naton ang aton mga kaugalingon sa mga espiho sa balay kalingawan nga daw mas tambok ukon mas niwang sangsa kon ano gid kita.

Ang masaligan nga mga abyan kag pamilya makabulig sa aton nga makita naton ang aton mga kaugalingon sing insakto, pero bisan sila, nga nagapalangga kag nagabulig, mahimo nga indi man perpekto ang panulokan. Bilang resulta, importante nga magpamangkot man kita sa aton mapinalanggaon nga Amay nga Langitnon kon ano ang aton kinahanglanon kag kon diin naton itutok ang aton mga pagpanikasog. Kilala gid Niya kita kag mapinalanggaon Niya nga ipakita sa aton ang aton mga kahuyang. ¹¹ Ayhan matun-an ninyo nga kinahanglan ninyo sing mas dako nga pasensya, pagpaubos, kaluoy, gugma, paglaum, katutum, ukon pagtuman, sa pagsambit sing pila lamang. ¹²

Sining karon lang, nakaeksperiyensya ako sing pagdako sang akon kalag sang ang isa ka mapinalanggaon nga lider sa Simbahan direkta nga nagpanugyan nga kinahanglan ko mas magpatubo sang isa ka kinaiya. Wala niya gintiko ang kamatuoran tungod nagapakita sia sang gugma. Ina nga gab-i, ginpaambit ko ini nga eksperiyensya sa akon asawa. Nakaintiendi gid sia nga nagaugyon sa iya panugyan. Ginkompirma sang Balaan nga Espiritu sa akon nga ang ila laygay halin sa mapinalanggaon nga Amay nga Langitnon.

Mahimo nga makabulig man nga tapuson sing tampad ang aktibidades sang Cristohanon nga kinaiya sa kapitulo 6 sang Preach My Gospel. ¹³

Sa tion nga nakahimo na kamo sing tampad nga pagtulutimbang kag mamat-od nga sugdan ang pagtaklad sa bukid, kinahanglan ninyo nga maghinulsol. Si Pangulong Russell M. Nelson mapinalanggaon nga nagtudlo: “Kon ginapili naton nga maghinulsol, ginapili naton nga magbag-o! Ginatugotan naton ang Manluluwas nga bag-uhon kita sa pinakamaayo nga bersyon sang aton mga kaugalingon. Ginapili naton nga magtubo sing espirituhanon kag magbaton sang kalipay—ang kalipay sang pagtubos Niya sa aton. Kon ginapili naton nga maghinulsol, ginapili naton nga mangin pareho kay Jesucristo!” ¹⁴

Ang mangin pareho kay Jesucristo magakinahanglan sang pagbag-o sang aton mga tagipusuon kag mga hunahuna, sa pagkamatuod, aton mismo karakter, kag ang paghimo sini posible lamang paagi sa nagaluwas nga grasya ni Jesucristo. ¹⁵

Hibaluon kag Himuon

Karon nga namat-od na kamo nga magbag-o kag maghinulsol kag nagpangayo na sang giya paagi sa pagpangamuyo, pagbinagbinag sing tampad, kag posible nga pagpalaygay sa iban, kinahanglan ninyo nga magpili sing isa ka kinaiya nga inyo gid tutokan. Kinahanglan kamo magtutum sa paghimo sing makahulugan nga pagpanikasog. Ining mga kinaiya indi mangin mahapos ukon madasig lang, pero paagi sa Iya grasya malab-ot ini sila sing amat-amat lang samtang nagatinguha.

Ang Cristohanon nga mga kinaiya mga regalo halin sa isa ka mapinalanggaon nga Amay nga Langitnon agud pakamaayohon kita kag inang sa palibot naton. Ang aton mga pagtinguha sa paglab-ot sining mga kinaiya magakinahanglan sing sinsero nga mga pangabay para sa Iya diosnon nga bulig. Kon tinguhaan naton ining mga regalo agud alagaran ang iban sing mas maayo, pagapakamaayohon Niya kita sa aton mga pagpaninguha. Ang pagtinguha sing maiyaiyahon sang regalo halin sa Dios magadangat sa kapaslawan kag kasubo.

Paagi sa pagtutok sing maayo sa isa ka kinahanglanon nga kinaiya, sa inyo pagpadayon sa paglab-ot sinang kinaiya, amat-amat man ninyo nga maangkon ang iban pa nga mga kinaiya. May tawo bala nga nagatutok gid sa putli nga pagmahal nga wala nagadugang sa gugma kag pagpaubos? May tawo bala nga nagatutok gid sa pagkamatinumanon nga wala nagadugang sa katutum kag paglaum? Ang inyo dako nga pagtinguha sa paglab-ot sing isa ka kinaiya mangin ang taob nga nagapalutaw sang tanan nga baruto sa baybayon.

Isulat kag Ipadayon

Importante para sa akon nga samtang nagatinguha ako nga mangin pareho sa Iya ginasulat ko ang akon mga eksperiyensya kag ang akon mga natun-an. Samtang ginatun-an ko ang isa sa Iya mga kinaiya sa akon kaisipan, may matun-an ako nga bag-o sa balaan nga mga kasulatan kon mabasa ko ang mga halimbawa sining kinaiya sa Iya mga panudlo, sa Iya pag-alagad, kag sa Iya mga disipulo. Ang akon mata mas nagatutok man sa pagtalupangod sang kinaiya sa iban. Nakatalupangod ako sang manami nga mga indibidwal sa sulod kag sa gwa sang Simbahan nga may mga kinaiya nga pareho sa Iya. Sila mabaskog nga mga halimbawa kon paano inang mga kinaiya makita sa kubos nga mga tawo lamang paagi sa Iya mapinalanggaon nga grasya.

Agud makita ang matuod-tuod nga pag-uswag, kinahanglan ninyo magpadayon sa inyo pagpaninguha. Pareho sang pagtaklad sa bukid nga nagakinahanglan sang paghanda antes kag pagbatas kag pagpadayon sa tion sang pagtaklad, ang ining pagpanglakaton magakinahanglan man sang matuod-tuod nga pagtinguha kag pagsakripisyo. Ang matuod nga pagka-Kristiyano, sa diin nagatinguha kita nga mangin pareho sang aton Manunudlo, nagapangayo gid sang aton labing maayo nga mga pagpaninguha. ¹⁶

Karon yari ang isa ka paandam. Ang sugo nga mangin pareho sa Iya wala ginatuyo agud matublag kamo, magbatyag nga di-takos, ukon wala ginapalangga. Ang aton bug-os nga mortal nga eksperiyensya parte gid sa pag-uswag, pagtinguha, pagkapaslaw, kag pagmadinalag-on. Bisan nga naghandum ako kag ang akon asawa nga magpiyong na lamang sang amon mga mata kag daw mahika nga makalab-ot dayon sa putukputukan, indi amo sina ang kabuhi.

Bastante na kamo, ginapalangga kamo, pero indi buot silingon nga perpekto na kamo. May dapat pa himuon sa sini nga kabuhi kag sa pihak . Paagi lamang sa Iya diosnon nga bulig nga makauswag kita tanan padulong sa pagpareho sa Iya.

Sa sini nga mga tinion, kon “ang tanan nga butang [daw] magginamo; kag ang … kahadlok [daw] magapangibabaw sa tanan nga tawo,” ¹⁷ ang amo lamang nga sabat, ang amo lamang nga solusyon, amo ang magtinguha nga mangin pareho sa Manluluwas, ¹⁸ sa Manunubos ¹⁹ sang tanan nga katawhan, sang Kapawa sa Kalibutan, ²⁰ kag magpangita sa Iya nga nagpahayag, “Ako amo ang dalan.” ²¹

Nakahibalo ako nga ang mangin pareho sa Iya paagi sa Iya diosnon nga bulig kag kusog sarang malab-ot sing amat-amat. Kon indi, wala Niya kuntani ginhatag sa aton ining kasugoan. ²² Nakahibalo ako sini—bangod makita ko ang Iya mga kinaiya sa madamo gid sa inyo. Sa sining mga butang ako nagapamatuod sa ngalan ni Jesucristo, amen.