Imo Lang ang Kambyo
Paagi kay Jesucristo, ginahatagan kita sang kusog sa paghimo sang nagadugay nga mga pagbag-o. Kon mapainubuson kita nga magliso sa Iya, dugangan Niya ang aton ikasarang sa pagbag-o.
Mga sister, malipayon ako nga makaupod kamo.
Hunahunaa nga may naglakat sa tindahan para magbakal. Kon sobra ang iya ginbayad sa kahera sangsa bili sang ginbakal, hatagan sia sang kahera sang kambyo.
Gintudloan ni Haring Benjamin ang iya katawhan sa dumaan nga Amerika parte sa madamo kaayo nga mga bugay nga ginabaton naton halin sa aton Manluluwas, nga si Jesucristo. Gintuga Niya ang mga langit, ang duta, kag ang tanan nga katahum nga ara sa aton. 1 Paagi sa Iya mapinalanggaon nga Pagbayad-Sala, ginhatagan Niya kita sang paagi nga matubos halin sa sala kag kamatayon. 2 Kon ginapakita naton ang aton kapasalamatan sa Iya paagi sa matutom nga pagpangabuhi sang Iya mga kasugoan, Iya kita gilayon nga ginabugayan, gani padayon kita nga may utang sa Iya.
Kadamo sang Iya ginahatag sa aton, sobra kaayo sa balor sang pwede naton ibalik sa Iya. Gani, ano ang sarang naton ihatag sa Iya, nga nagbayad sang indi makwenta nga bili sang aton mga sala? Sarang naton ihatag sa Iya ang kambyo. Sarang naton ihatag sa Iya ang aton pagkambyo. Mahimo nga ini ang pagkambyo sang panghunahuna, pagkambyo sang panggawi, ukon pagkambyo sang direksyon nga aton ginapadulungan. Bilang balos sa Iya bilidhon nga bayad para sa tagsa sa aton, ginapangayo sa aton sang Ginuo ang pagbag-o sang tagipusuon. Ang pagbag-o nga Iya ginapangayo sa aton indi para sa Iya kaayuhan kundi para sa aton. Gani, indi pareho sa manugbakal sa tindahan nga ginakuha ang kambyo nga aton ginatanyag, ang aton maalwan nga Manluluwas nagatawag sa aton para taguon ang kambyo.
Pagkatapos nga mabatian ang mga tinaga nga ginhambal ni Haring Benjamin, ang iya katawhan nagsinggit, nga nagadeklarar nga ang ila mga tagipusuon nagbag-o na nga nagasiling, “Tungod ang Espiritu sang Ginuo nga Makaako, nga naghikot sang isa ka dako nga pagbag-o sa amon, … wala na kami sing huyog nga maghimo sing malain, kundi dalayon nga maghimo sing maayo.” 3 Ang balaan nga mga kasulatan wala nagasiling nga insigida sila nga nangin perpekto kundi, ang ila handum sa pagbag-o ang nagtulod sa ila nga mag-akto. Ang pagbag-o sang ila tagipusuon nagakahulugan sang pagpahigad sang kinaugali nga lalaki ukon babayi kag pagpaidalom sa Espiritu samtang nagatinguha sila nga mangin mas pareho kay Jesucristo.
Si Pangulong Henry B. Eyring nagatudlo: “Ang matuod nga pagbag-o nagasandig sa hilway nga pagsunod nga may pagtuo, upod ang dako nga pagpaninguha kag pila ka kasakit. Dayon ang Ginuo na ang magahatag … sang milagro sang pagtinlo kag pagbag-o.” 4 Sa pagkombinar sang aton pagpaninguha sa ikasarang sang Manluluwas nga bag-uhon kita, mangin bag-o kita nga mga tinuga.
Sang bata pa ako, napanan-aw ko ang akon kaugalingon nga nagalakat sa nagapasaka, paibabaw nga banas padulong sa akon tuyo nga kabuhi nga wala katapusan. Tagsa nga may mahimo ako ukon mahambal nga indi amo, pamatyag ko nagadausdos ako sa banas, para mag-umpisa liwat sa puno. Daw pareho ini sang pagsugod sa puno sa hampang sang kabataan nga Chutes and Ladders nga nagadausdos ka paidalom halin sa ibabaw sang board pabalik sa puno sang hampang! Makadismaya! Pero sugod sang maintiendihan ko ang doktrina ni Cristo 5 kag kon paano ko ini magamit sa adlaw-adlaw ko nga kabuhi, nakakita ako sang paglaum.
Ginhatagan kita ni Jesucristo sang nagapadayon nga sulundan sang pagbag-o. Ginaagda Niya kita nga magtuo sa Iya, nga nagainspirar sa aton nga maghinulsol—“nga ang amo nga pagtuo kag paghinulsol nagadala sang isa ka pagbag-o sang tagipusuon.” 6 Sa aton paghinulsol kag pagliso sang aton mga tagipusuon sa Iya, nagaangkon kita sang mas dako nga handum nga maghimo kag magpangabuhi sang sagrado nga mga kasugtanan. Nagapadayon kita tubtob sa katapusan paagi sa paggamit sining mga prinsipyo sa bilog naton nga mga kabuhi kag pag-agda sa Ginuo nga bag-uhon kita. Ang pagpadayon tubtob sa katapusan nagakahulugan sang pagbag-o tubtob sa katapusan. Naintiendihan ko na karon nga wala na ako nagasugod sa puno sa tagsa ka kapaslawan, kundi nga sa kada pagtinguha, ginapadayon ko ang proseso sang akon pagbag-o.
May inspirado nga dinalan sa tema sang Young Women nga nagasiling, “Halungan ko ang regalo sang paghinulsol kag magtinguha nga mag-uswag kada adlaw.” 7 Kabay nga halungan naton matuod ining matahum nga regalo kag aton hungdon ang paghandum sang pagbag-o. Kon kaisa ang mga pagbag-o nga kinahanglan naton himuon may kaangtanan sa seryoso nga sala. Pero sa masami, nagatinguha kita nga pinuhon ang aton karakter para magsanto kita sa mga kinaiya ni Jesucristo. Ang aton adlaw-adlaw nga mga pagpili mahimo nga makabulig ukon makasablag sang aton progreso. Ang magagmay pero sige-sige, hungod nga mga pagbag-o makabulig sa aton nga mag-uswag. Indi magpaluya. Ang pagbag-o bug-os-kabuhi nga proseso. Nagapasalamat ako nga sa aton mga kabudlayan sa pagbag-o, pasensyoso ang Ginuo sa aton.
Paagi kay Jesucristo, ginahatagan kita sang kusog sa paghimo sang nagadugay nga mga pagbag-o. Kon mapainubuson kita nga magliso sa Iya, dugangan Niya ang aton ikasarang sa pagbag-o.
Dugang pa sa nagapaliwat nga gahum sang Pagbayad-Sala sang aton Manluluwas, ang Balaan nga Espiritu magasuporta kag magagiya sa aton samtang nagatinguha kita. Mabuligan man gani Niya kita nga mahibal-an kon ano nga mga pagbag-o ang kinahanglan naton himuon. Makakita man kita sang bulig kag pagpaisog paagi sa mga bendisyon sang priesthood, pangamuyo, puasa, kag pagtambong sa templo.
Sa amo man, ang sinaligan nga mga miyembro sang pamilya, mga lider, kag mga abyan makabulig man sa aton pagpaninguha nga magbag-o. Sang walo ako ka tuig, kami sang akon magulang, nga si Lee, nagahampang upod sa amon mga abyan sa mga sanga sang kahoy sang kaingod. Nanamian kami nga mag-inupod sa pagpakig-abyan sa handong sinang kahoy. Isa ka adlaw, nahulog si Lee sa kahoy kag nabali ang iya braso. Kay nabali ang iya braso nangin mabudlay sa iya ang magsaka sa kahoy nga sia lang. Pero lain gid ya ang kabuhi sa babaw puno nga indi sia namon upod. Gani gintulod sia sang pila sa amon samtang ang iban nagbutong sa iya sa maayo niya nga braso, kag wala gid mabudlayi, nakasaka na liwat si Lee sa puno. Bali sa gihapon ang iya braso, pero kaupod na namon sia nga naga-enjoy sang amon pag-inabyanay samtang nagapaayo sia.
Masami ko ginapanumdom ang akon eksperiyensya sang paghampang sa kahoy bilang ang tipo sang aton gawi sa ebanghelyo ni Jesucristo. Sa handong sang mga sanga sang ebanghelyo, ginabaton naton ang madamo nga bugay nga nahiangot sa aton mga kasugtanan. Ang iban mahimo nga nahulog halin sa kahilwayan sang ila mga kasugtanan kag nagakinahanglan sang aton bulig sa pagsaka pabalik sa seguridad sang mga sanga sang ebanghelyo. Mahimo nga mabudlay sa ila nga magbalik nga sila lang. Mahimo bala naton nga butungon diri kag itulod didto sing diutay para buligan sila nga mag-ayo samtang gina-enjoy ang aton pag-abyanay?
Kon nagaantos ka sa pilas sa pagkahulog, palihog tugoti ang iban nga buligan ka nga magbalik sa imo mga kasugtanan kag sa mga bugay nga ginatanyag sini. Ang Manluluwas sarang mag-ayo kag magbag-o sa inyo mientras ginapalibutan sang mga nagapalangga sa inyo.
Kon kaisa masugata ko ang mga abyan nga wala ko na makita sa madamo nga tinuig. Kon kaisa nagasiling sila, “Wala ka gid magbag-o!” Tagsa nga mabatian ko ina, daw nagauklo ako diutay, tungod nagalaum ako nga nagbag-o ako sa kadugayon. Nagalaum ako nga nagbag-o ako halin kagapon! Nagalaum ako nga mas mabuot ako, wala gawa nagapanghusga, kag mas maluluy-on. Nagalaum ako nga mas maabtik ako magresponde sa mga panginahanglan sang iban, kag nagalaum ako nga mas pasensyoso pa gid ako.
Nanamian ako maglatas sa kabukiran malapit sa akon puluy-an. Masami, masudlan sang gamay nga bato ang akon sapatos samtang nagalakat ako sa banas. Sa ulihi, nagadulog ako kag ginataktak ang akon sapatos. Pero nagakakibot ako kon daw ano ko kadugay nga ginapabay-an ang akon kaugalingon nga maglakat sa kasakit antes ako magdulog kag kakason ang nagasablag sa akon.
Samtang nagalakat kita sa dalan sang kasugtanan, kon kaisa nagakasudlan sang bato ang aton mga sapatos sa porma sang malaw-ay nga panggawi, mga sala, ukon malain nga pamatasan. Kon mas temprano naton ini nga mataktak sa aton mga kabuhi, mangin mas makalilipay ang aton pagpanglakaton sa kabuhi.
Ang pagpadayon sang pagbag-o nagakinahanglan sang pagtinguha. Indi ko mahunahuna ang magdulog sa banas para lang ibalik sa akon sapatos ang masabad kag masakit nga bato nga bag-o ko lang gintaktak. Indi ko gusto himuon ina pareho nga indi man pilion sang matahum nga alibangbang nga magbalik sa iya putos.
Nagasaksi ako nga bangud kay Jesucristo, sarang kita magbag-o. Sarang naton liwaton ang aton mga pangginawi, bag-uhon ang aton mga panghunahuna, kag pinuhon ang aton karakter agud mangin mas pareho sa Iya. Kag upod ang Iya bulig, mahimo naton taguon ang kambyo. Sa ngalan ni Jesucristo, amen.