Mga Utod nga Babayi sa Sion
Mangin importante kamo nga kusog sa pagtipon sang Israel kag sa paghimo sang katawhan nga Sion.
Pinalangga ko nga mga sisters, nalipay ako nga maghambal sa inyo sa sining manami nga tion sa kasaysayan sang kalibutan. Adlaw-adlaw, nagahilapit kita sa mahimayaon nga tion nga ang Manluluwas nga si Jesucristo magakari liwat sa duta. Medyo nakahibalo kita sang makahaladlok nga mga hitabo nga magauna sa Iya pagkari, apang ang aton mga tagipusuon nagahabok man sa kalipay kag pagsalig sa pagkahibalo sang mahimayaon nga mga promisa nga matuman antes sia magbalik.
Bilang pinalangga nga mga anak nga babayi sang Amay nga Langitnon, kag bilang mga anak nga babayi sang Ginuong Jesucristo sa Iya ginharian, 1 may importante kamo nga bahin sa mahimayaon nga mga tinion nga ginapaabot. Nakahibalo kita nga ang Manluluwas magaabot sa katawhan nga natipon kag nahanda sa pagpangabuhi pareho sang katawhan sa siyudad ni Enoc. Ang katawhan didto nagaisa sa pagtuo kay Jesucristo kag nangin lubos nga putli amo nga gindala sila sa langit.
Ari ang rebelasyon sa paglaragway sang Ginuo kon ano ang matabo sa katawhan ni Enoc kag ano ang matabo sa sining katapusan nga dispensasyon sang kabug-osan sang mga panahon:
“Kag magaabot ang adlaw nga ang duta magapahuway, apang antes sina nga adlaw magadulom ang kalangitan, kag may tabon sang kadulom nga magalikop sa duta; kag magauyog ang kalangitan, kag amo man ang duta; kag dalagko nga mga pag-antos ang magaluntad sa tunga sang mga anak sang katawhan, apang ang akon katawhan akon amligan;
“Kag pagkamatarong ang ipadala ko halin sa langit; kag kamatuoran ang ipalapnag ko sa duta, agud magpamatuod parte sa akon Bugtong nga Anak; sa iya pagkabanhaw halin sa minatay; huo, kag amo man sa pagkabanhaw sang tanan nga tawo; kag ipahanabo ko nga ang pagkamatarong kag kamatuoran maghagunos sa duta nga daw pareho sang baha, agud tiponon ang akon mga pinili halin sa apat ka pamusod sang duta, sa lugar nga akon ihanda, isa ka Balaan nga Siyudad, agud ang akon katawhan mahimo magwagkos sang ila mga balikawang, kag magpaabot sang tion sang akon pagkari; kay dira ipahamtang ang akon tabernakulo, kag pagatawgon ini nga Sion, isa ka Bag-ong Jerusalem.
“Kag ang Ginuo nagsiling kay Enoc: Sa sina nga tion ikaw kag ang bilog mo nga siyudad magatabo sa ila dira, kag batonon naton sila sa aton sabak, kag makita nila kita; kag hakson naton sila, kag hakson nila kita, kag halokan naton ang tagsa-tagsa;
“Kag dira ang akon mangin puluy-an, kag ina mangin Sion, nga magaluntad nga pain sa tanan nga gintuga nga akon nahimo; kag sa kalawigon sang isa ka libo ka tuig magapahuway ang duta.” 2
Kamo sisters, ang inyo mga anak nga babayi, ang inyo mga apo nga babayi, kag ang mga babayi nga inyo gintatap mangin sa sentro sang paghimo sinang sosyedad sang katawhan nga magapasakop sa mahimayaon nga pagpakig-upod sa Manluluwas. Mangin importante kamo nga kusog sa pagtipon sang Israel kag sa paghimo sang katawhan nga Sion nga magapuyo sa paghidaet sa Bag-ong Jerusalem.
Ang Ginuo, paagi sa Iya mga propeta, naghimo sang promisa sa inyo. Sa primero nga mga inadlaw sang Relief Society, ang Propetang si Joseph Smith nagsiling sa mga kauturan nga babayi, “Kon inyo tindugan ang inyo mga pribelihiyo, ang mga anghel indi mapunggan nga mangin inyo mga kaupod.” 3
Inang dalayawon nga ikasarang ara sa inyo, kag ginahanda kamo para sina.
Si Pangulong Gordon B. Hinckley nagsiling:
“Kamo sisters … wala nagauyat sang segunda nga lugar sa plano sang aton Amay para sa walay katapusan nga kalipay kag kaayohan sang Iya mga anak. Importante kamo katama nga bahin sinang plano.
“Kon wala kamo ang plano indi magmadinalag-on. Kon wala kamo ang bug-os nga programa mapaslawan. …
“Ang tagsa sa inyo anak nga babayi sang Dios, nga ginhatagan sang diosnon nga pinanubli nga kinamatarong.” 4
Ang aton propeta subong, si Pangulong Russell M. Nelson, naghatag sining paglaragway sang bahin nga inyo ginatungdan sa paghanda para sa pagkari sang Manluluwas:
“Mangin imposible takson ang impluwensya sang … kababayin-an, indi lamang sa mga pamilya kundi sa Simbahan man sang Ginuo, bilang mga asawa, iloy, kag mga lola; bilang mga utod kag tiya; bilang mga titser kag lider; kag ilabi na bilang mga halimbawa kag debotado nga mga tagpangapin sang pagtuo.
“Nangin amo sini sa tagsa ka dispensasyon sang ebanghelyo humalin pa sang mga adlaw ni Adan kag Eva. Apang ang kababayin-an sang sini nga dispensasyon lain sangsa kababayin-an sang ano pa man nga iban pa bangod ining dispensasyon lain sangsa ano pa man nga iban pa. Ang kinalain nagadala sang pareho mga pribelihiyo kag responsibilidad.” 5
Ining dispensasyon may kinalain sa bagay nga ang Ginuo magatuytoy sa aton sa paghanda nga mangin pareho sa siyudad ni Enoc. Ginlaragway Niya paagi sa Iya mga apostoles kag mga propeta kon ano inang pagbag-o nga kinahanglanon agud mangin katawhan sang Sion.
Si Elder Bruce R. McConkie nagpanudlo:
“Ang panahon ni [Enoc] panahon sang kalain kag kalaut, sang kadulom kag pagrebelde, sang pag-ilinaway kag kamingaw, panahon nga nagapadulong sa pagtinlo sang duta paagi sa tubig.
“Si Enoc, ugaling, matutom. Iya ‘nakita ang Ginuo,’ kag nagsugilanon sa iya ‘sing atubangay’, pareho nga ang isa ka tawo nagapakighambal sa isa. (Moises 7:4.) Ang Ginuo nagpadala sa iya sa pagpanawag sang paghinulsol sa kalibutan, kag ginsugo sia nga ‘magbunyag sa ngalan sang Amay kag sang Anak, nga puno sang grasya kag kamatuoran, kag sang Balaan nga Espiritu, nga nagapamatuod sa Amay kag sa Anak.’ (Moises 7:11.) Si Enoc naghimo sang mga kasugtanan kag nagtipon sang kongregasyon sang matuod nga mga tumuluo, ang tanan sini nangin tuman ka tutom nga ‘ang Ginuo nagkari kag nagpuyo upod sa iya katawhan, kag nagpuyo sila sa pagkamatarong,’ kag ginpakamaayo sang langit. ‘Kag ang Ginuo nagtawag sang iya katawhan nga Sion, kay isa sila sing tagipusuon kag isa sing panghunahuna, kag nagpuyo sa pagkamatarong; kag wala sang imol sa tunga nila.’ (Moises 7:18.) …
“Pagkatapos nga gintawag sang Ginuo ang iya katawhan nga Sion, ang balaan nga kasulatan nagasiling nga si Enoc ‘nagpatukod sang siyudad nga gintawag Siyudad sang Pagkabalaan, bisan pa ang Sion;’ nga inang Sion ‘ginsabnit palangit’ sa diin ‘gindala ini sang Dios sa iya kaugalingon nga sabak;” kag nga “sumugod sadto naglapnag ang hambalanon, nadula ang Sion.’ (Moises 7:19, 21, 69.) …
“Ining amo man nga Sion nga ginsabnit palangit magabalik … kon ibalik liwat sang Ginuo ang Sion, kag ang iya sini mga pumuluyo magasimpon sa bag-ong Jerusalem, nga ipahamtang sa sina nga tion.” 6
Kon ang nagligad basehan sang palaabuton, sa pagbalik sang Manluluwas, ang mga anak nga babayi nga hugot ang katutom sa ila mga kasugtanan sa Dios mangin sobra sa katunga sadtong handa sa pag-abiabi sa Iya kon magkari Sia. Apang bisan ano man ang mga numero, ang inyo papel sa pagtuga sang pag-isa sang katawhan nga handa sa sinang Sion mangin sobra katama sa katunga.
Sugiran ko kamo kon ngaa nagapati ako sina. Ang Libro ni Mormon nagasugid sang kasaysayan sang isa ka katawhan nga Sion. Madumduman ninyo nga pagkatapos nga matudloan sila, ginhigugma, kag ginpakamaayo sang nabanhaw nga Manluluwas nga “wala sing pagbinaisay sa kadutaan, tungod sang gugma sang Dios nga nagpuno sa mga tagipusuon sang katawhan.” 7
Ang akon eksperiyensya nagtudlo sa akon nga ang mga anak nga babayi sang Amay nga Langitnon may dulot sa pagpakalma sang pagbinaisay kag sa pagpasanyog sang pagkamatarong sa ila gugma sa Dios kag sa gugma nga ila ginapukaw sa ila mga ginaalagaran.
Nakita ko ini sang hubin pa ako sang ang amon gamay nga branch nagatipon sa puluyan sang akon pagkabata. Kami lang sang akon utod nga lalaki ang nagakapot sang Aaronic Priesthood, ang akon amay ang nagaisahanon nga nagakapot sang Melchizedek Priesthood. Ang pangulo sang Relief Society isa ka hinaylo nga ang iya bana wala malipay sa iya pagserbisyo sa Simbahan. Ang mga miyembro puros tanan may edad nga mga sister nga wala sing priesthood holder sa ila mga panimalay. Ginalantaw ko ang akon iloy kag atong mga sisters nga nagpalangga, nagtib-ong, kag nagtatap sa isa kag isa sing dalayon. Nahangpan ko na karon nga nahatagan ako sang una nga siplat sang Sion.
Ang leksyon sa akon parte sa impluwensya sang matutom nga mga babayi nagpadayon sa isa ka gamay nga branch sang Simbahan sa Albuquerque, New Mexico. Ginalantaw ko ang asawa sang branch president, ang asawa sang district president, kag ang Relief Society president nga nagatandog sang balatyagon sang tagsa ka bag-ohan kag hinaylo. Sang Domingo nga naghalin ako sa Albuquerque, pagkatapos sang duha ka tuig nga paglantaw sang impluwensya sang mga sisters didto, ang una nga stake ginhimo. Karon ang Ginuo nagtukod sang templo didto.
Nagsaylo ako dason sa Boston, sa diin nag-alagad ako sa district presidency nga nagpanguna sa magagmay nga mga branch nga nagalapta sa duha ka estado. May mga pagbinaisay nga nasolbar sing sobra kaisa paagi sa mahigugmaon kag mapinatawaron nga mga babayi nga nagbulig pahumok sang mga balatyagon. Sang Domingo nga naghalin ako sa Boston, ang una nga stake sa Massachusetts gin-organisa sang isa ka miyembro sang Unang Pangulohan. May templo na didto karon, malapit sa ginaistaran sadto sang district president. Nadala sia sa pagkaaktibo sa Simbahan kag sang ulihi gintawag nga mag-alagad bilang stake president kag dayon bilang mission president, nga naimpluwensyahan sang isa ka matutom kag mapinalanggaon nga asawa.
Sisters, ginhatagan kamo sang bugay nga mangin mga anak nga babayi sang Dios nga may espesyal nga mga talento. Gindala ninyo sa inyo mortal nga kabuhi ang espirituhanon nga ikasarang sa pagtatap sang iban kag sa pagtib-ong sa ila padulong sa gugma kag kaputli nga magapabagay sa ila sa pagkabuhi upod sa isa ka sosyedad nga Sion. Indi aksidente nga ang ang Relief Society, ang una nga organisasyon sang Simbahan nga para gid sa mga anak nga babayi sang Amay nga Langitnon, may hulubaton nga “Putli nga Pagmahal Wala Nagakapaslaw.”
Ang putli nga pagmahal amo ang putli nga gugma ni Cristo. Kag paagi sa pagtuo sa Iya kag sa lubos nga epekto sang Iya di-matungkad nga Pagbayad-Sala mapabagay kamo, kag ang inyo mga ginapalangga kag ginaalagaran, sa langitnon nga dulot nga magkabuhi sa pag-inupdanay sang madugay na ginahandum kag ginpromisa nga Sion. Didto mangin mga utod kamo nga babayi sa Sion, personal nga ginahigugma sang Ginuo kag sang inyo mga ginbugayan.
Nagasaksi ako nga mga pumuluyo kamo sang ginharian sang Dios sa duta. Mga anak kamo nga babayi sang mapinalanggaon nga Amay nga Langitnon nga nagpadala sa inyo sa kalibutan upod ang pinasahi nga mga talento nga ginpromisa ninyo nga gamiton agud bugayan ang iban. Nagapromisa ako sa inyo nga ang Ginuo magatuytoy sa inyo sa kamot, paagi sa Balaan nga Espiritu. Magauna Sia sa inyo atubang samtang ginabuligan ninyo Sia nga ihanda ang Iya katawhan nga mangin nagakabagay sa Iya ginpromisa nga Sion. Nagasaksi ako sini sa sagrado nga ngalan ni Jesucristo, amen.