Sa Paghiusa sang Balatyagon Makabaton Kita sang Gahum upod sa Dios
Samtang nagahandum kita sang paghiusa sang balatyagon, mapangayo naton ang gahum sang Dios agud himuon ang aton mga pagtinguha nga bug-os.
Ang nanay ni Gordon nagsiling sa iya nga kon tapuson niya ang iya mga ulobrahon, himuan niya sia sang pie. Ang iya paborito. Para lang gid sa iya. Nagpadayon si Gordon sa pagtrabaho para matapos ang iya ulobrahon, kag naghimo ang iya nanay sang pie. Nagsulod sa balay ang iya magulang nga si Kathy upod ang isa ka abyan. Nakita niya ang pie kag namangkot kon pwede sila magkuha sang iya abyan sang isa ka hiwa.
“Indi,” siling ni Gordon, “akon ina nga pie. Ginluto na ni nanay para sa akon, kag ginpangabudlayan ko na.”
Gin-akigan ni Kathy ang iya manghod. Kamaiya-iyahon sa iya kag kadalok. Makabatas sia nga solohon lang ini?
Pila ka oras ang naglabay sang ginbuksan ni Kathy ang salakyan para idul-ong ang iya abyan pauli, ato didto sa pulungkuan ang duha ka serbilyeta nga napiod sing mahipid, may napatong nga duha ka tinidor, kag duha ka malagpad nga pie sa plato. Gin-istorya ini ni Kathy sa lubong ni Gordon para ipakita nga handa si Gordon magbag-o kag magpakita sang kaayo sa mga indi bagay pakitaan sini pirme.
Sang 1842, nagpangabudlay ang mga Santos para ipatindog ang Templo sang Nauvoo. Pagkatapos matukod ang Relief Society sang Marso, si Propetang Joseph Smith masami nga nagakadto sa ila mga miting para ihanda sila sa sagrado, nagahiusa nga mga kasugtanan nga ila himuon sa templo sa pila ka adlaw.
Sang Hunyo 9, ang Propeta “nagsiling nga magawali sia parte sa kaluoy[.] Pananglitan si Jesucristo kag [ang] mga anghel maakig sa aton sa gagmay nga mga butang, ano ang matabo sa aton? Kinahanglan naton nga mangin maluluy-on kag indi pagsapakon ang indi importante.” Si Pangulong Smith nagpadayon, “Nasuboan ako nga wala na sing may mas lubos nga pag-inabyanay—kon ang isa ka miyembro nagaantos ang tanan nagabatyag sini—paagi sa paghiusa sang balatyagon makabaton kita sang gahum upod sa Dios.” 1
Inang malip-ot nga dinalan nag-igo sa akon nga daw kilat. Paagi sa paghiusa sang balatyagon makabaton kita sang gahum upod sa Dios. Indi ini ang kalibutan nga gusto ko. Kadamo sang butang nga gusto ko impluwensyahan kag himuon nga mas maayo. Kag sa matuod, kadamo sang oposisyon sa gusto ko matabo, kag kon kaisa daw wala ako sang mahimo. Sining karon lang, ginapamangkot ko ang akon kaugalingon sing madalom: Paano ko mas maintiendihan ang mga tawo sa akon palibot? Paano ko suguran inang “paghiusa sang balatyagon” kon ang tanan lainlain? Ano nga gahum gikan sa Dios ang akon matigayon kon mas nagahiusa ako gawa sa iban? Sa pagbinagbinag ko sa akon kaugalingon, may tatlo ako ka mga panugyan. Basi makabulig man ini sa inyo.
Magkaluoy
Sa Jacob 2:17 mabasahan, “Panghunahunaa ang inyo [mga kauturan] subong sang inyo mga kaugalingon, kag magmangin mainabyanon sa tanan kag maalwan sang inyo pagkabutang, agud nga mangin subong sila kamanggaranon sa inyo.” Islan naton ang tinaga nga pagkabutang sang kaluoy—mangin maalwan sa inyo kaluoy agud nga mangin subong sila kamanggaranon sa inyo.
Masami naton ginapanumdom ang pagkabutang nga pagkaon ukon kuwarta, pero basi ang mas kinahanglan naton tanan sa aton ministering amo ang kaluoy.
Ang akon mismo pangulo sa Relief Society nagsiling sang nagligad: “Ang akon … ginapromisa … sa imo amo nga halungan ko ang imo ngalan. … Tamdon ko ikaw sa kon sin-o ka sa imo pinakamaayo. … Indi gid ako maghambal sang kon ano nga malain sa imo, sang indi makabayaw sa imo. Ginapangabay ko nga himuon mo man ina sa akon kay nahadlok ako, sa tuod-tuod lang, nga madismaya ka.”
Ginhambalan ni Joseph Smith ang mga sister sinang adlaw sang Hunyo 1842:
“Kon ang mga tawo magpakita sang pinakagamay nga kaayo kag pagpalangga sa akon, O daw ano ang gahum sini sa akon hunahuna. …
“… Mas nagalapit kita sa aton Amay nga langitnon, mas handa kita nga magtulok nga may kaluoy sa ginabudlayan nga mga kalag—[daw gusto naton] nga pas-anon ini sa aton mga abaga kag ihaboy ang ila mga sala sa likod naton. [Ang akon mensahe gintuyo para sa] tanan sining Society—kon luyag ninyo nga kaluy-an kamo sang Dios, kaluy-i ninyo ang kada isa.” 2
Ang ini nga laygay para gid sa Relief Society. Indi naton paghukman ang kada isa ukon maghambal sang makasakit. Halungan naton ang ngalan sang kada isa kag maghatag sang regalo sang kaluoy. 3
Pahabyoga ang Inyo Baruto
Sang 1936, nagbiyahe ang indi kilala nga grupo sang mga manugbugsay sang University of Washington pakadto sa Germany para magpartisipar sa Olimpyada. Kasagsagan gid sadto sang Dakong Kapurauton. Mga trabahante ini nga mga kabataan nga ang magagmay nga mga banwa sang pagmina kag pagpangahoy nagdonar sang kuwarta para makabiyahe sila pakadto sa Berlin. Sa tanan nga aspeto sang kompetisyon daw mabudlayan sila nga magdaog, pero may natabo sa palumba. Sa kalibutan sang pagbugsay, ginatawag nila ini nga “habyog.” Pamatii ining paglaragway base sa libro nga The Boys in the Boat [Ang mga Solterito sa Baruto]:
May nagakatabo kon kaisa nga mabudlay lab-uton kag mabudlay ilaragway. Ginatawag ini nga “habyog.” Nagakatabo lamang ini kon ang tanan nagabugsay perpekto nga nagadululungan nga wala gid sang nagakawigit.
Kinahanglan sang mga manugbugsay nga kontrolon ang ila desisyon kag sa amo man gamiton ang ila kaugalingon nga mga ikasarang. Ang mga palumba ginadaog sang mga indibidwal. Ang maayo nga grupo may lainlain nga mga miyembro—may nagapanguna, may pangreserba, may agresibo, may nagapadayon sang kalinong. Wala sang manugbugsay nga labaw pa sangsa isa, ang tanan may bili sa baruto, pero agud makabugsay sila sang maayo, kinahanglan ang kada isa magpaayon sa panginahanglan kag ikasarang sang iban—ang malip-ot sang kamot mag-unat gawa diutay, ang malaba kamot magbugsay lang gamay.
Ang mga kinalain sarang himuon nga bentaha imbes nga disbentaha. Dira lang kag mabatyagan nga ang baruto nagagiho nga sia lang. Sa amo lang ang kasakit mabuslan sang pagkinalipay. Ang maayo nga “habyog” daw binalaybay. 4
Sa tunga sang dalagko nga kabudlayan, nahimo sining grupo ang perpekto nga habyog kag nagdaog. Ang bulawan sa Olimpyada makalilipay, pero ang paghiusa nga naeksperiyensyahan sang tagsa ka manugbugsay sina nga adlaw isa ka balaan nga handumanan nga nagpabilin sa ila sa bilog nila nga kabuhi.
Kuhaon ang Malain sa Kadasigon sang Pagtubo sang Maayo
Sa matahum nga paanggid sa Jacob 5, ang Ginuo sang kaolivohan nagtanom sang maayo nga kahoy sa manami nga duta, pero naglaw-ay ini sa kadugayan kag nagbunga sang talunon nga bunga. Ang Ginuo sang kaolivohan nagsiling sing walo ka beses: “Ginakasubo ko [nga] madula sa akon ini nga kahoy.”
Ang suluguon nagsiling sa Ginuo sang kaolivohan: “Hatagan ta pa [ang kahoy] sing diutay nga panahon. Kag ang Ginuo nagsiling: Huo, hatagan ko pa anay ini sing diutay nga panahon.” 5
Kag dayon nag-abot ang panulin nga pwede sa aton tanan nga nagatinguha nga sadulan kag magpatubo sang maayo nga bunga sa aton mismo diutay nga kaolivohan: “Panguhaon ninyo ang malain suno sa pagtubo sang maayo.” 6
Ang paghiusa wala nagakatabo nga daw mahika; kinahanglan ini pangabudlayan. Masabad ini, kon kaisa masaw-a, kag amat-amat nga nagakatabo kon aton kuhaon ang malain sa kadasigon sang pagtubo sang maayo.
Wala kita nagaisahanon sa aton pagpaninguha nga magtuga sang paghiusa. Ang Jacob 5 nagapadayon, “Ang mga suluguon naglakat kag nagpangabudlay sa ila ikasarang; kag ang Ginuo sang kaolivohan nagpangabudlay man upod sa ila.” 7
Ang kada isa sa aton makaangkon sang makasaklaw nga mga eksperiyensya, mga indi dapat matabo. Ang kada isa sa aton magatugot man, kon kaisa, sang bugal kag pagkamatinaas-taason nga magpalain sang bunga naton. Pero si Jesucristo amo ang aton Manluluwas sa tanan nga butang. Ang Iya gahum nagalab-ot sa pinakaidalom kag masaligan pirme naton kon manawag kita sa Iya. Tanan kita nagapangayo sang kaluoy para sa aton mga sala kag kapaltahan. Libre Niya ini nga ginahatag. Kag ginapangayo Niya sa aton kon mahatag man naton ina nga kaluoy kag paghangop sa kada isa.
Prangka nga ginsiling ni Jesus: “Mangin isa; kag kon indi kamo isa indi kamo akon.” 8 Pero kon kita isa—kon maghatag kita sang isa ka hiwa sang aton pie ukon bagayon ang aton indibidwal nga mga talento para maghabyog ang baruto sing perpekto—mangin Iya kita. Kag magabulig Sia nga kuhaon ang malain sa kadasigon sang pagtubo sang maayo.
Mga Promisa sang mga Propeta
Ayhan wala pa kita makalab-ot sa gusto naton padulungan, kag wala pa kita karon sa gusto naton kadtuhan. Nagapati ako nga ang pagbag-o nga ginapaabot naton sa aton kaugalingon kag sa mga grupo nga aton ginaentrahan magaabot indi paagi sa aktibismo kundi paagi sa pagtinguha kada adlaw nga intiendihon ang kada isa. Ngaa? Tungod nagatukod kita sang Sion—katawhan nga “isa sing tagipusuon kag isa sing panghunahuna.” 9
Bilang mga babayi sang kasugtanan, malapad ang aton impluwensya. Inang impluwensya magamit sa pang-adlaw-adlaw kon kita nagatuon upod ang isa ka abyan, nagapatulog sang kabataan, nagaistorya sa katupad sa bus, nagahanda sang presentasyon upod ang katrabaho. May gahum kita nga kakason ang diskriminasyon kag magpatubo sang pag-isa.
Ang Relief Society kag Young Women indi lamang mga klase. Sarang man ini mangin indi malimtan nga mga eksperiensya kon diin ang lainlain nga mga babayi magasakay sa pareho nga baruto kag magbugsay tubtob makita naton ang aton habyog. Ginatanyag ko ining imbitasyon: mangin bahin sang gintingob nga pwersa nga nagabag-o sang kalibutan para sa kaayuhan. Ang aton toka sa kasugtanan amo ang magminister, ang bayawon ang mga kamot nga nagapalamuypoy, nga pas-anon ang mga ginabudlayan sa aton likod ukon mga braso kag kargahon sila. Indi mabudlay hibaluon kon ano ang himuon, pero masami supak ini sa aton maiya-iyahon nga mga interes, kag dapat naton tinguhaan. Ang mga babayi sining Simbahan may wala tupong nga potensyal sa pagbag-o sang sosyedad. Bug-os ang akon espirituhanon nga kompiyansa nga, samtang nagahandum kita sang paghiusa sang balatyagon, pangayuon naton ang gahum sang Dios agud himuon ang aton mga pagtinguha nga bug-os.
Sang gindumdom sang Simbahan ang 1978 nga rebelasyon sa priesthood, si Pangulong Russell M. Nelson nagpalab-ot sang gamhanan nga bendisyon sang propeta: “Ang akon pangamuyo kag bendisyon ginabilin ko sa tanan nga nagapamati nga kabay malampuwasan naton ang bisan ano nga kabudlay sang diskriminasyon kag maglakat sing matarong upod sa Dios—kag sa isa kag isa—sa perpekto nga paghidaet kag paghangpanay.” 10
Kabay nga mabaton naton ining bendisyon sang propeta kag gamiton ang aton indibidwal kag gintingob nga pagtinguha para dugangan ang paghiliusa sa kalibutan. Ginabilin ko ang akon testimonya sa mga pulong sang mapainubuson, wala nagalubad nga pangamuyo sang Ginuong Jesucristo: “Nga sila tanan mangin isa; subong nga ikaw, Amay, sa akon, kag ako sa imo, nga sila manginsa aton.” 11 Sa ngalan ni Jesucristo, amen.