Magpakalig-on
Ang aton di-mauyog nga pagtuo sa doktrina sang ginpanumbalik nga ebanghelyo ni Jesucristo nagagiya sang aton mga tikang kag nagahatag sa aton sing kalipay.
Sa katapusan nga mga inadlaw sang iya mortal nga kabuhi, ginhambalan ni Jesucristo ang Iya mga Apostoles sang mga pagpanghingabot kag mga kabudlayan nga ila pagaantuson. 1 Naghingapos Sia sa sining dako nga pagpasalig, “Sa kalibutan may kangitngitan kamo: apang magpakalig-on kamo; nadaug ko ang kalibutan” (Juan 16:33). Amo ina ang mensahe sang Manluluwas sa tanan nga mga anak sang aton Amay nga Langitnon. Amo ina ang pinakadako nga maayong balita para sa tagsa sa aton sa aton mortal nga mga kabuhi.
Ang “magpakalig-on kamo” amo man ang kinahanglanon nga pagpasalig sa kalibutan sa diin ang nabanhaw nga Cristo nagpadala sang Iya mga Apostoles. “Ginaipit kami sa tagsa ka luyo,” siling ni Apostoles Pablo sang ulihi sa mga taga-Corinto, “apang wala mapioti; ginapalibog, apang wala mawad-i sing paglaum; ginahingabot, apang wala mapatumbayai; ginapanglampusan apang wala malaglag” (2 Mga Taga-Corinto 4:8–9).
Duha ka libo ka tuig pagkatapos kita man “ginaipit sa tagsa ka luyo,” kag nagakinahanglan man kita sang kasubong sinang mensahe indi para magpangasubo kundi magpakalig-on. Ang Ginuo may espesyal nga pagpalangga kag pag-ulikid para sa Iya bilidhon nga mga anak nga babayi. Nahibal-an Niya ang inyo mga gusto, ang inyo mga panginahanglan, kag ang inyo mga kahadlok. Ang Ginuo makagagahum sa tanan. Magsalig sa Iya.
Ang Propetang si Joseph Smith gintudloan nga “ang buluhaton, kag mga plano, kag mga katuyuan sang Dios indi sarang mapaslawan, ukon mangin wala’y pulos” (Doktrina kag mga Kasugtanan 3:1). Sa Iya ginabudlayan nga mga anak, ang Ginuo nagahatag sining makapaumpaw nga mga pagpasalig:
“Yari karon, ini ang promisa sang Ginuo sa inyo, O mga alagad ko.
Karon, magkalipay kamo, kag indi mahadlok, kay ako nga Ginuo kaupod ninyo, magapabilin sa tupad ninyo; kag magapamatuod kamo parte sa akon, nga si Jesucristo, nga Ako ang anak sang buhi nga Dios” (Doktrina kag mga Kasugtanan 68:5–6).
Ang Ginuo nagatindog sa tupad naton, kag Sia nagsiling:
“Kon ano ang ginahambal ko sa isa ginahambal ko sa tanan, magkalipay kamo, magagmay nga kabataan; kay yara ako sa tunga ninyo; kag wala ko kamo ginpabay-an” (Doktrina kag mga Kasugtanan 61:36).
“Kay pagkatapos sing madamo nga pag-antos magaabot ang mga bugay” (Doktrina kag mga Kasugtanan 58:4).
Mga sisters, nagapamatuod ako nga ining mga promisa, nga ginhatag sa panahon sang mga pagpanghingabot kag personal nga mga trahedya, napatuhoy sa tagsa sa inyo sa inyo magamo nga mga sirkumstansya sa karon. Ang mga ini mapuslanon kag nagapahanumdom sa tagsa sa aton nga magpakalig-on kag mag-angkon sang kalipay sa kabug-osan sang ebanghelyo sa aton pagdutdot pasulong sa mga hangkat sang mortal nga kabuhi.
Ang mga pag-antos kag mga hangkat amo ang kinaandan nga mga eksperiyensya sang mortalidad. Ang oposisyon importante nga bahin sang diosnon nga plano agud mabuligan kita nga magtubo, 2 kag sa tunga sinang proseso, ara sa aton ang pagpasalig sang Dios nga, sa malawig nga panan-aw sang wala katapusan, ang oposisyon indi makadaug sa aton. Upod ang Iya bulig kag ang aton pagkamatinuohon kag pagpadayon magamadinalag-on kita. Kasubong sang mortal nga kabuhi sa diin nangin kabahin ang mga ini, ang tanan nga mga pag-antos umalagi lamang. Sa mga kontroberysa nga gintunaan sang makahalalit nga inaway, ang pangulo sang Estados Unidos nga si Abraham Lincoln maalamon nga nagpahanumdom sa iya tagpalamati nga sang dumaan nga kaalam nga “ini man, magalipas lang.” 3
Sa nabal-an ninyo, ang mortal nga mga kabudlayan nga akon ginatumod—nga nagapabudlay nga magpakalig-on—kon kis-a nagaabot sa aton sing dungan sa madamo nga iban pa, pareho sang minilyon sa karon nga nagahimud-os sa pila ka makahalalit nga mga epekto sang COVID-19 nga pandemia. Sa amo man, sa Estados Unidos minilyon karon ang nagaantos sa isa ka panahon sang kaawayon kag pagbinaisay nga daw pirme nagaupod sa mga eleksyon sang panguluhan apang ang ini nga tiempo amo ang pinakalala nga madumduman sang madamo sang aton mga katigulangan.
Sa personal nga bahin, ang kada isa sa aton indibidwal nga nagahimud-os sa pila sang madamo nga mga kabudlayan sa duta, subong abi sang kaimolon, rasismo, balatian, pagkadula sang trabaho ukon mga kapaslawan, malalison nga mga anak, indi-maayo nga mga pag-asawahay ukon pagkalaon, kag ang mga epekto sang sala—aton man kaugalingon ukon iya sang iban.
Apang, sa tunga sini tanan, may ara kita sing diosnon nga laygay nga magpakalig-on kag pangitaon ang kalipay sa mga prinsipyo kag mga promisa sang ebanghelyo kag sa mga bunga sang aton mga pagpangabudlay. 4 Inang laygay nangin giya, para sa mga propeta kag para sa aton tanan. Nahibal-an naton ini gikan sa mga eksperiyensya sang aton mga kalolohan kag sa ginpanghambal sang Ginuo sa ila.
Panumduma ang mga sikumstansya ni Propetang Joseph Smith. Kon tamdon paagi sa panulok sang gin-agyan nga mga kabudlayan, ang iya kabuhi nangin isa sang kaimolon, paghingabot, kapaslawan, mga kalisod sa pamilya, kag sang ulihi pagkapatay bilang martir. Sang napriso sia, ang iya asawa kag kabataan kag iban pa nga mga santos tuman nga nag-antos sang ginpangtabog sila sa Missouri.
Sang si Joseph nagpakitluoy sang kaumpawan, ang Ginuo nagsabat:
“Anak ko, ang paghidaet mangin yara sa imo kalag; ang imo kabudlayan kag imo mga pag-antos mangin sa malip-ot lamang nga tion;
“Kag dayon, kon mabatas mo ini sing maayo, pagapakataason ka sang Dios sa langit; magamadinalag-on ka sa tanan mo nga mga kaaway” (Doktrina kag mga Kasugtanan 121:7–8).
Amo ini ang personal, wala katapusan nga laygay nga nagbulig kay Propetang Joseph agud mamentenar ang iya duna nga maayong panimuot kag ang pagpalangga kag pag-unong sang iya katawhan. Ining amo man nga mga kinaiya ang nagpabakod sa mga lideres kag mga pionero nga nagsunod kag makapabakod man sa inyo.
Panumduma yadtong mga una nga mga miyembro! Sing liwat-liwat, gintabog sila halin sa isa ka lugar pakadto sa isa. Sa katapusan nagpangatubang sila sang mga hangkat sa pagpasad sang ila mga puluy-an kag sang Simbahan sa kamingawan. 5 Duha ka tuig pagkatapos nga ang nahauna nga grupo sang mga pionero nag-abot sa nalupyakan sang Dakong Salt Lake, ang mga pionero padayon nga nagahimakas agud mabuhi sa sinang mabudlay nga lugar. Kalabanan sang mga miyembro ato pa gihapon sa banas patabok sa mga kapatagan ukon nagahimakas nga makakuha sang mga kinahanglanon agud makatabok. Apang ang mga lideres kag mga miyembro nagalaum sa gihapon kag nagapakalig-on.
Bisan nga wala pa makaplastar ang mga Santos sa ila bag-o nga mga puluy-an, sang Oktubre 1849 nga pangkabilogan nga komperensya isa ka bag-o nga grupo sang mga misyonero ang ginpadala sa Scandinavia, France, Germany, Italy, kag sa Nabagatnang Pacifico. 6 Sa tinion sang ila pinakamanubo nga kahimtangan, ang mga pionero nagbangon sa pagtigayon sang dalagku nga mga butang. Kag pagkatapos lang sang tatlo ka tuig, may 98 naman nga gintawag sa pagsugod tipon sang nagalapta nga Israel. Isa sang mga lider sang Simbahan nagpaathag nga ining mga misyon “sa kabug-osan, indi mangin malawig; siguro mga 3 tubtob 7 ka tuig ang mangin kalawigon nga ang isa ka tawo mapalayo sa iya pamilya.” 7
Sisters, ang Unang Pangulohan nagakabalaka parte sa inyo mga hangkat. Palangga kamo namon kag nagapangamuyo kami para sa inyo. Kag subong man, masami kami nagapasalamat nga ang aton mga hangkat—wala labot sang mga linog, mga sunog, mga baha, kag mga bagyo—kalabanan mas magagmay sangsa mga gin-atubang sang mga ginsundan naton.
Sa tion sang mga kabudlayan, ang masami nga pagpasalig amo ang “magpakalig-on, kay pagagiyahan ko kamo. Ang ginharian inyo kag ang mga bugay sini inyo, kag ang mga manggad sang kabuhi nga wala’y katapusan inyo” (Doktrina kag mga Kasugtanan 78:18). Paano bala ini nagakatabo? Paano ini natabo sa mga pionero? Paano ini matabo sa mga kababayin-an sang Dios sa karon? Sa aton pagsunod sa giya sang propeta, “ang mga puwertahan sang impiyerno indi makadaug batok sa [aton],” siling sang Ginuo paagi sa rebelasyon sang Abril 1830. “Huo,” Sia nagsiling, “… tabugon sang Ginuong Dios ang mga gahum sang kadulom halin sa inyo, kag pauyogon ang kalangitan para sa inyo kaayohan, kag sa himaya sang Iya ngalan” (Doktrina kag mga Kasugtanan 21:6). “Gani, indi magkahadlok, diutay nga panong; maghimo sang maayo; pabay-i ang duta kag ang impiyerno nga magtingob batok sa inyo, kay kon napasad kamo sa akon bato, indi sila magmadinalag-on” (Doktrina kag mga Kasugtanan 6:34).
Tungod sang promisa sang Ginuo, kita “magkalipay sa [aton] [mga] tagipusuon kag magkasadya” (Doktrina kag mga Kasugtanan 25:13), kag “may pagpasalamat nga may kalipay sa mga tagipusuon kag mga nawong” (Doktrina kag mga Kasugtanan 59:15), nagasulong kita sa dalan sang kasugtanan. Kalabanan sa aton wala nagahimo sang dalagko nga mga desisyon, pareho sang pagbiya sang aton mga puluy-an agud magpuyo sa bag-o nga lugar. Ang aton mga desisyon sa kalabanan mga pang-adlaw-adlaw nga mga gawi sa kabuhi, apang suno sa ginhambal sang Ginuo sa aton, “Dili kamo magpakaluya sa paghimo sing maayo, kay nagapasad kamo sang pundasyon sing isa ka dako nga buluhaton. Kag halin sa magagmay nga mga butang nagaluntad inang mga dalagko” (Doktrina kag mga Kasugtanan 64:33).
Wala dulunan ang gahum sang doktrina sang ginpanumbalik nga ebanghelyo ni Jesucristo. Ang aton di-mauyog nga pagtuo sa sinang doktrina nagagiya sang aton mga tikang kag nagahatag sa aton sing kalipay. Nagapasanag sang aton mga pamensaron kag nagahatag kusog kag kompyansa sa aton mga ginabuhat. Ining paggiya, kag pagpasanag kag gahum mga ginpromisa nga dulot nga aton nabaton halin sa aton Amay nga Langitnon. Paagi sa pag-intiende kag pagpasanto sang aton mga kabuhi sa sina nga doktrina, lakip na ang diosnon nga dulot sang paghinulsol, mangin malig-on kita kon ginatipigan naton nga magpabilin kita sa dalan padulong sa aton wala katapusan nga kadangatan—ang pag-updanay-liwat kag pagpahitaas upod ang aton mapinalanggaon nga langitnon nga mga ginikanan.
“Mahimo nga nagapangatubang kamo sang tuman kabudlay nga mga hangkat,” nagtudlo si Elder Richard G. Scott. “Kon kis-a ang mga ini tuman ka bug-at, nga wala sing untat, nga imo mabatyagan nga indi mo masarangan. Indi pag-atubanga ang mga problem nga nagaisahanon. ‘[Mag]salig sa Ginuo sa bug-os mo nga tagipusuon; kag dili magsandig sa imo kaugalingon nga paghangop’ [Mga Hulubaton 3:5]. … Gintuyo ini nga ang kabuhi mangin isa ka hangkat, indi agud nga mapaslawan kamo, apang agud nga magamadinalag-on kamo paagi sa pagtibawas.” 8
Ang tanan nga ini kabahin sa plano sang Dios nga Amay kag sang Iya Anak, nga si Jesucristo, nga akon ginapamatud-an, samtang ako nagapangamuyo nga tanan kita makapadayon pakadto sa aton nga langitnon nga kadangatan, sa ngalan ni Jesucristo, amen.