Ang Mas Makita si Jesucristo sa Aton mga Kabuhi
Ang Manluluwas nagahagad sa aton nga tulukon ang aton mga mga kabuhi paagi sa Iya para mas makita naton Sia sa aton mga kabuhi.
Mga pinalangga kong kauturan, mapainubuson ako nga nagatindog sa inyo atubang sini nga aga. Ginabugkos ko ang akon tagipusuon upod sa inyo sa pagpasalamat nga nagatipon kita, kon diin man kamo sa kalibutan, sa pagpamati sang mga mensahe sang mga propeta, mga apostoles, mga manugpanan-aw, mga manugpahayag sang rebelasyon, kag mga lider sa ginharian sang Dios. Daw pareho kita sa katawhan sang panahon ni Haring Benjamin, nga nagaplastar sang aton mga tolda kag nagabukas sang aton mga pwertahan sa direksyon sang propeta sang Dios sa kalibutan,1 nga si Pangulong Russell M. Nelson.
Pigaw na ang akon panulukan sa akon madumduman kag kinahanglan ko gid sang antipara para magtadlong ang akon panan-aw. Kada magbugtaw ako sa aga, ang kalibutan daw indi ko maintiendihan. Ang tanan buron, kambang, kag nagatiliko. Bisan ang akon bana daw abstract nga larawan imbes nga ang ginapakamahal kag makapasulhay nga tinuga! Ang una ko gid nga ginahimo, antes sang tanan para sugdan ang akon adlaw, amo nga lab-uton ang akon antipara para makita ko ang akon palibot kag mag-athag sa akon ang tanan sa bilog nga adlaw.
Sa sulod sang tinuig, narealisar ko nga ang ini nga gawi nagapakita sang akon pagdepende sa duha ka butang: una, sa butang nga nagabulig sa akon nga maklaro, magtutok, kag makita ang kalibutan sa akon palibot; kag ikaduha, ang kakinahanglan sang makaptan nga giya para padayon ako nga itudlo sa husto nga direksyon. Ining simple, sulit-sulit nga buhat nagapakita sa akon sang importante nga obserbasyon parte sa aton relasyon sa aton Manluluwas, nga si Jesucristo.
Sa aton kabuhi nga masami puno sang mga pamangkutanon, kabalaka, hangkat, kag mga oportunidad, ang pagpalangga sang aton Manluluwas para sa aton bilang indibidwal kag bilang Iya mga anak sa kasugtanan upod ang Iya mga pinanudlo kag mga layi, masandigan naton adlaw-adlaw para mangin “kasanag nga nagasilak, … [naga]pasanag sa [aton] mga mata, [kag] [naga]dugang sang [aton] paghangop.”2 Samtang ginapangita naton ang mga bugay sang Espiritu sa aton kabuhi, makita naton, sa gintudlo ni Jacob, ang “mga butang suno sa kon ano gid ang mga ini, kag … suno sa mangin kon ano gid ang mga ini.”3
Bilang mga anak sang Dios sa kasugtanan, espesyal kita nga ginbugayan sang diosnon nga mga kasangkapan para mas mag-athag ang aton espirituhanon nga panan-awan. Ang mga pulong kag pinanudlo ni Jesucristo nga nasulat sa balaan nga kasulatan kag mga mensahe sang Iya pinili nga mga propeta, ang Iya Espiritu nga mabaton paagi sa adlaw-adlaw nga pangamuyo, regular nga pagkadto sa templo, kag semanal nga ordinansa sang sakramento makabulig-balik sang kalinong kag nagahatag sang kinahanglanon nga paghantop nga nagadala sang kasanag ni Cristo kag sang Iya paghangop sa aton mga kabuhi kag sa kalibutan nga mahimo magal-umon. Ang Manluluwas mahimo man naton nga kompas kag piloto samtang nagapalayag kita sa kalmado kag mabalod nga kadagatan sang kabuhi. Sarang Niya himuon nga maathag ang husto nga dalan nga magadul-ong sa aton sa aton wala katapusan nga destinasyon. Gani, ano ang gusto Niya nga makita naton, kag diin Niya kita gusto makadto?
Ang aton pinalangga nga propeta nagtudlo nga ang “aton panulok dapat masentro sa Manluluwas kag sa Iya ebanghelyo” kag kinahanglan naton “tinguhaan nga magtulok sa Iya sa tagsa ka panghunahuna.”4 Ginpromisa man ni Pangulong Nelson nga “wala na sang mas nagaimbitar sang Espiritu magluwas sa pagtutok kay Jesucristo. … Giyahan kag tuytuyan kamo Niya sa inyo personal nga kabuhi kon hatagan ninyo Sia sing oras sa inyo kabuhi—tagsa kag kada adlaw.”5 Mga abyan, si Jesucristo amo ang pareho nga tutok kag katuyoan sang aton destinasyon. Para buligan kita nga magpabilin nga mabakod kag nagapadulong sa husto nga direksyon, ginahagad kita sang Manluluwas nga tulukon ang aton mga mga kabuhi paagi sa Iya para mas makita naton Sia sa aton mga kabuhi. Natun-an ko pa gid ang parte sa sining imbitasyon paagi sa akon pagtuon sang Daan nga Katipan.
Ang layi ni Moises ginhatag sa nauna nga mga Israelnon bilang panghanda nga ebanghelyo, gindisenyo para ihanda ang mga tawo sa mas mataas nga kaangtanan sa kasugtanan upod sa Dios paagi kay Jesucristo.6 Ang layi, nga puno sang simbolismo nga nagatudlo sa mga nagatuo nga “magpaabot sa pagkari” kag Pagbayad-Sala ni Jesucristo,7 gintuyo para buligan ang katawhan sang Israel nga magtutok sa Manluluwas paagi sa pagpakita sang pagtuo sa Iya, sa Iya sakripisyo, kag sa Iya mga layi kag kasugoan sa ila mga kabuhi8 nga gintuyo agud dal-on sila sa mas dako nga pag-intiendi sang ila Manunubos.
Pareho sa aton karon, ang dumaan nga katawhan sang Dios gin-agda nga tulukon ang ila mga kabuhi paagi sa Iya para mas makita nila Sia sa ila mga kabuhi. Pero sang panahon sang pag-alagad sang Manluluwas, nadula na sa panulukan sang mga Israelnon si Cristo sa ila mga pagtuman, nga nagapahigad na sa Iya kag nagdugang sa layi sang indi awtorisado nga mga hilikuton nga wala na sing nagatuytoy nga simbolismo padulong sa matuod kag solo nga ginhalinan sang ila kaluwasan kag pagtubos—si Jesucristo.9
Ang adlaw-adlaw nga kalibutan sang mga Israelnon nangin buron kag madulom. Ang mga anak sang Israel, sa sining kahimtangan, nagpati nga ang mga hilikuton kag mga ritwal sang layi amo ang dalan padulong sa personal nga kaluwasan kag sa isa ka punto nagpagamay sang layi ni Moises bilang mga pagsulundan nga dumalahan ang kabuhi bilang sibilyan.10 Nagtulod ini sa Manluluwas nga ibalik ang tutok kag kaathag sang Iya ebanghelyo.
Sang ulihi kalabanan sang mga Israelnon nagsikway sang Iya mensahe, kag naglab-ot pa gani sa pag-akusar sa Manluluwas—Sia nga naghatag sang layi kag nagdeklarar nga Sia amo “ang layi, kag ang kasanag”11—nga nagalapas sini. Pero si Jesus sa Iya Wali sa Bukid, nga nagatumod sa layi ni Moises, nagsiling, “Indi kamo maghunahuna nga nag-abot ako sa pagdula sang Kasugoan ni Moises kag sang mga ginpanudlo sang mga propeta: Wala ako mag-abot sa pagdula sini, kundi sa pagdala sang katumanan sini.”12 Dayon ang Manluluwas, paagi sa Iya wala katapusan nga Pagbayad-Sala, nagtapos sang mga tanda, mga regulasyon, kag mga seremonyas nga ginasunod sang katawhan sang Israel sang amo nga panahon. Ang Iya katapusan nga sakripisyo ang nagpaliwat sang paghalad sang sinunog nga kasapatan sa paghalad sang “masinulub-on nga tagipusuon kag mahinulsulon nga espiritu,”13 halin sa ordinansa sang pagsakripisyo padulong sa ordinansa sang sakramento.
Si Pangulong M. Russell Ballard, nga nagatudlo parte sa sining topiko, nagsiling, “Kon pamensaron, ang sakripisyo nagbaylo halin sa halad pakadto sa nagahalad.”14 Kon dal-on naton ang aton halad sa Manluluwas, ginaagda kita nga mas makita si Jesucristo sa aton mga kabuhi, samtang mapainubuson naton nga ginapaidalom ang aton pagbuot sa Iya sa pagkilala kag paghangop sang Iya perpekto nga pagpaidalom sa pagbuot sang Amay. Kon itutok naton ang aton panulok kay Jesucristo, makilala naton kag maintiendihan nga Sia lamang ang ginhalinan kag ang paagi para mabaton ang kapatawaran kag pagtubos, bisan padulong sa kabuhi nga wala katapusan kag pangkahitaasan.
Bilang nauna nga sumulunod sang ebanghelyo, nakasugata ako sang madamo nga nagbantay kag nakakita sang mga pagbag-o sa akon mga pamatasan, pangginawi, kag mga pagpili sang magpa-miyembro ako sa Simbahan. Nangin interesado sila sa “mga ngaa” sang ila mga nakita—ngaa ginpili ko nga magpabunyag kag mag-entra sa sining kongregasyon sang mga tumuluo, sa Ang Simbahan ni Jesucristo sang mga Santos sa Ulihing mga Adlaw, ngaa wala ako nagahimo sang pila ka mga butang sa Adlaw nga Inugpahuway, ngaa tampad ako sa pagtuman sang Pulong sang Kaalam, ngaa ginabasa ko ang Libro ni Mormon, ngaa nagapati ako kag nagalakip sang mga pinanudlo sang moderno nga mga propeta kag apostoles sa akon pagpangabuhi, ngaa nagakadto ako sa semanal nga mga miting sa Simbahan, ngaa ginahagad ko ang iban nga “dali kag magtan-aw, dali kag magbulig, … dali kag magtiner,”15 kag “dali kag mangin bahin.”16
Sadto, ina nga mga pamangkot daw makakululba kag, hilmunon gid, kon kaisa nagaakusar. Pero sa pagpangatubang ko sang pagkilatis sang mga tawo, narealisar ko nga ang ila gali pagpangusisa, amo ang akon una nga imbitasyon nga magkuha kag magsuksok sang espirituhanon nga antipara para mag-athag, magtutok, kag pabakuron ang akon motibasyon nga magsunod sa mga hilikuton kag talaksan sang ebanghelyo. Ano ang ginhalinan sang akon testimonya? Ginahimo ko lang bala ang “panggwa nga pagtuman” nga wala ginaangot inang mga pangginawi sa mga layi sang Dios para “pabakuron ang [akon] pagtuo kay Cristo,”17 ukon ipakita ang pag-intiendi nga si Jesucristo amo ang solo nga ginhalinan sang gahum sang akon mga pagtuman?
Paagi sa maid-id nga pagtinguha nga magtulok sa kag kay Jesucristo sa tagsa ko nga panghunahuna kag buhat, nasanagan ang akon mga mata, kag ang akon pag-intiendi mas ginpadasig sa pagkilala nga si Jesucristo nagatawag sa akon nga “magpalapit” sa Iya.18 Halin sa sini katemprano nga panahon sang pagkadisipulo sang akon pagkalamharon, madumduman ko ang imbitasyon nga gintanyag sa akon sang mga misyonero nga mag-entra sa ila samtang nagatudlo sila sang ebanghelyo sa grupo sang mga dalagita nga kaedad ko. Isa ka gab-i, nga nagapungko sa balay sang isa sining lamharon nga mga babayi, ang ila sinsero nga pamangkot nga ngaa nagapati ako nagtandog sa akon, kag gintugtan ako nga magpamatuod sa ila nga mas may dako nga pag-intiendi sang panan-awan sang Ginuo parte sa espirituhanon nga motibasyon sang akon pagkadisipulo, kag nagpabakod pa gid sang akon testimonya sa kadugayan.
Natun-an ko sadto, pareho sa nahibal-an ko subong, nga ang aton Manluluwas, nga si Jesucristo, nagagiya sang aton mga tiil padulong sa mga simbahan kada semana para mag-ambit sang Iya sakramento, sa balay sang Ginuo para maghimo sang mga kasugtanan sa Iya, sa balaan nga mga kasulatan kag pinanudlo sang mga propeta para magtuon sang Iya mga pulong. Ginagiyahan Niya ang aton mga baba sa pagpamatuod sa Iya, ang aton mga kamot sa pagbulig kag pagserbisyo pareho sa Iya pagbulig kag pagserbisyo, ang aton mga mata para makita ang kalibutan kag ang kada isa pareho sa Iya—“suno sa kon ano gid ang mga ini, kag … suno sa mangin kon ano gid ang mga ini.”19 Kag kon tugtan naton Sia nga giyahan kita sa tanan nga butang, makabaton kita sang testimonya nga “ang tanan nga mga butang nagapatimaan nga may Dios,”20 tungod kon diin naton Sia ginapangita makita naton Sia21—tagsa kag kada adlaw. Sa sini ako nagapamatuod sa sagrado nga ngalan ni Jesucristo, amen.