10:7

Purongpurong sa Baylo sang mga Abo: Ang Nagapang-ayo nga Dalan sang Kapatawaran

Ni Sister Kristin M. Yee

Ikaduha nga Manuglaygay sa Pangkabilogan nga Pangulohan sang Relief Society

Ang pagpangabuhi suno sa pamaagi nga nagahatag katahum para sa mga abo sang imo kabuhi isa ka akto sa pagtuo nga nagasunod sa ka Manluluwas.

Ang libro 1 Samuel nagalakip sang indi-gawa-bantog nga istorya ni David, ang palaabuton nga hari sang Israel, kag sang babayi nga ginhinganlan Abigail.

Pagkatapos sang kamatayon ni Samuel, Si David kag ang iya katawhan nagpalayo kay Haring Saul, nga naghandum nga patyon si David. Nagtigana sila sang mga bantay para sa kasapatan kag mga suluguon sang isa ka manggaranon nga tawo nga nagahingalan Nabal, nga isa ka mapintas nga tawo. Si David nagpadala sang 10 sang iya mga tinawo para magtamyaw kay Nabal kag magpangayo sang kinahanglanon kaayo nga pagkaon kag mga suplay.

Ginsabat ni Nabal ang pangabay ni David sang insulto kag ginpalayas ang iya mga tawo nga wala sing dala.

Nga nasaklaw, ginhanda ni David ang iya mga tinawo sa pagsulong kay Nabal kag sang iya panimalay, nga nagasiling, “Amo pa ini ang iya balos sa akon sang bulig nga akon ginhatag sa iya.”¹ Isa ka suluguon ang nagsugid kay Abigail, asawa ni Nabal, parte sa indi maayo nga pagtratar sang iya bana sa mga tinawo ni David. Si Abigail dali-dali nga nagtipon sang kinahanglanon nga pagkon kag mga suplay kag naglakat agud magpatunga.

Sang masugata sia ni Abigail, “sa gilayon nagpanaog sia sa iya asno kag magsaludo

“Kag nagluhod sa tiilan ni David, kag nagsiling, “Kon mahimo pamatii ako! Ako lang ang basula. …

“Gani karon, … Ang Ginoo amo ang nagpugong sa imo gikan sa pagtimalos kag sa pagpamatay sang imo mga kaaway. …

“… Kon mahimo, batuna ining akon mga regalo nga gindala sa imo kag ihatag ini sa imo mga tinawo. .

“Kon mahimo patawara ako sang akon mga kakulangan. …

“Nagsiling si David sa iya, Dayawon ang Ginoo, ang Dios sang Israel, nga nagpadala sa imo karon nga adlaw sa pagpakigkita sa akon:

“Salamat sa Dios tungod sang imo pagkamahinangpanon kag sang imo ginhimo karon nga adlaw sa pagpugong sa akon sa pagpakasala paagi sa pagpatay kag pagtimalos. …

“Dayon ginbaton ni David ang gindala ni Abigail sa iya nga mga regalo kag nagsiling sa iya, “Pauli ka kag indi na magpalibog. Himuon ko ang imo luyag.”²

Pareho sila nga naglakat nga may paghidaet.

Sa sini nga sugilanon, si Abigail makabig nga isa ka gamhanan nga tipo ukon simbolo ni Jesucristo.³ Paagi sa Iya nagabayad-sala nga sakripisyo, Iya kita mahilway gikan sa sala kag kabug-aton sang nagapakig-away nga tagipusuon kag magahatag sa aton sang aton mga panginahanglan.⁴

Pareho nga si Abigail nagapasugot sa pagdala sang sala ni Nabal sa iya kaugalingon, amo man ang Manluluwas—sa di-matungkad nga paagi—nagdala sa Iya Kaugalingon sang aton mga sala kag sang mga sala nila nga nagsakit ukon nagsaklaw sa aton.⁵ Sa Getsemani kag sa krus, Iya gin-ako ining mga sala. Naghimo Sia sing paagi agud madula sa aton ang kabug-at sang balatyagon sang pagtimalos. Ina nga “pamaagi” amo ang pagpatawad—nga among isa sa pinakamabudlay nga mga butang nga aton mahimo kag isa sa pinakadiosnon nga mga butang nga aton maeksperiyensyahan. Sa proseso sang pagpatawad, ang nagabayad-sala nga gahum ni Jesucristo sarang mag-ilig sa aton mga kabuhi kag magsugod sa pag-ayo sang madalom nga mga kasakit sang tagipusuon kag kalag.

Si Pangulong Russell M. Nelson nagtudlo nga ang Manluluwas nagatanyag sa aton sang ikasarang sa pagpatawad:

“Paagi sa Iya wala’y dulonan nga Pagbayad-Sala, sarang kamo mapatawad inang nakasakit sa inyo kag inang indi gid mag-ako sang ila pagpanakit sa inyo.

“Sa kinaandan mas mahapos magpatawad sa tawo nga sinsero kag mapainubuson nga nagapangayo sang inyo kapatawaran. Apang ang Manluluwas magahatag sa inyo sang ikasarang sa pagpatawad sa bisan kay sin-o nga nagmaltratar sa inyo sa ano man nga paagi. Dayon ang ila masakit nga hinimoan indi na magpakalisod sa inyo kalag.”⁶

Ang pagdala ni Abigail sang madamo nga pagkaon kag suplay makatudlo sa aton nga ang Manluluwas nagatanyag sa mga nasakit kag nasamaran sang pagkaon kag bulig nga kinahanglan naton agud mag-ayo.⁷ Wala kita nagaisahanon sa pag-atubang sang mga konsikwensya sang mga buhat sang iban nga tawo sa aton; kita man mahimo nga mag-ayo kag ginhatagan sang kahigayunan nga maluwas gikan sa kabug-at sang balatyagon sang pagtimalos kag iban pa nga mga buhat nga pwede magsunod.

Ang Ginuo nagsiling, “Ako, ang Ginuo, magapatawad kay bisan sin-o nga luyag ko patawaron, apang kamo ginakinahanglan nga magpatawad sa tanan nga tawo.”⁸ Ang Ginuo nagapangayo sa aton nga magpatawad para sa aton kaugalingon nga kaayohan.⁹ Apang wala Sia nagapangayo sa aton nga himuon ini nga wala sang Iya bulig, Iya pagpalangga, kag Iya pag-intiendi. Paagi sa aton mga kasugtanan sa Ginuo, mabaton sang tagsa sa aton ang nagapabaskog nga gahum, giya, kag bulig nga kinahanglanon naton sa pagpatawad kag agud mapatawad.

Palihog hibal-a nga ang pagpatawad sa isa ka tawo wala nagakahulugan nga ginabutang ninyo ang inyo kaugalingon sa kahimtangan nga padayon kamo nga masakitan. “Mahimo kita magtinguha sa pagpatawad kag sa gihapon pabatyagon sang Espiritu nga maglikaw sa ila.”¹⁰

Pareho nga ginbuligan ni Abigail si David nga indi “[magbasol sang kaugalingon]”¹¹ kag magabaton sang bulig nga iya ginkinahanglan, amo man nga ang Manluluwas magabulig sa inyo. Palangga Niya kamo, kag sugataon Niya kamo sa dalan “nga may pag-ayo sa Iya mga pakpak.”¹² Luyag Niya ang inyo katawhayan.

Personal ko nga nasaksihan ang milagro ni Cristo nga nagaayo sang akon akig nga tagipusuon. Nga may pahanugot sang akon amay, ginapaambit ko nga nagdako ako sa panimalay nga sa diin indi ko pirme mabatyagan nga luwas ako tungod sang pagmaltrato sa emosyunal kag sa hambal. Sa akon pagkalamharon kag pagkahamtong, naghinakit ako sa akon amay kag may kaakig sa akon dughan tungod sinang kasakit.

Sa pagligad sang mga tinuig kag sa akon mga pagpaninguha nga makaangkon sang paghidaet kag pag-ayo sa dalan sang kapatawaran, akon narealisar sing madalom nga paagi nga ang Anak sang Dios nga nagbayad-sala para sa akon, amo man ang Manunubos nga magaluwas sang mga nagsakit sing tuman sa akon. Indi ko pwede patihan ang una nga kamatuoran nga indi magpati sa ikaduha.

Samtang nagatubo ang akon paghigugma sa Manluluwas, amo man ang akon handum nga buslan ang kasakit kag kaakig sang Iya nagapang-ayo nga balanyos. Nangin isa ini ka proseso sa madamo nga tinuig, nga nagapangayo sang kaisog, pagbatyag, pagpursige, kag pagtuon nga magsalig sa diosnon nga gahum sang Manluluwas sa pagsalbar kag pagpang-ayo. May ara gihapon ako sing himuon, apang ang akon tagipusuon wala na sang kaakig kag handum sa pagtimalos. Ginhatagan ako sang “bag-o nga tagipusuon”¹³—nga nakabatyag sang madalom kag malig-on nga gugma sang isa ka personal nga Manluluwas, nga nag-unong sa akon, nga mapinalanggaon kag mapasensyahon nga naggiya sa akon sa mas maayo nga duog, nga nag-upod hibi sa akon, nga nakahibalo sang akon kasubo.

Ang Ginuo nagpadala sa akon sang katumbas nga mga bugay pareho kay Abigail nga nagdala sang mga kinahanglanon ni David. Nagpadala Sia sang mga manunudlo sa akon kabuhi. Kag ang pinakamatam-is kag makapabag-o sa tanan among akon kaangtanan sa akon Amay nga Langitnon. Paagi sa Iya, nagapasalamat ako nga nakilala ko ang mabuot, nagapangapin, kag nagagiya nga gugma sang isa ka perpekto nga Amay.

Si Elder Richard G. Scott nagsiling: “Indi ninyo mabag-o ang kon ano nga natabo, pero sarang kamo nga magpatawad.¹⁴ Ang pagpatawad nagaayo sang grabe, masubo nga mga pilas, kay ginatugtan sini ang gugma sang Dios nga kakason sa inyo tagipusuon kag panghunahuna sang dalit sang pagdumot. Ginatinloan sini ang imo panghunahuna sa paghandum nga magtimalos. Nagahatag ini sing lugar para sa nagatinlo, nagaayo, nagapasag-uli nga gugma sang Ginuo.”¹⁵

Ang akon dutan-on nga amay may yara man sing milagroso nga pagbag-o sang tagipusuon sa sining mga tinuig kag nagliso sa Ginuo—isa ka butang nga wala ko gid ginpaabot sa sining kabuhi. Isa pa ka testimonya sa akon sang bug-os kag nagapabag-o nga gahum ni Jesucristo.

Nakahibalo ako nga mahimo Niya ayuhon ang makasasala kag ang mga nahimuan sang sala. Sia ang Manluluwas kag ang Manunubos sang kalibutan, nga nagtugyan sang Iya kabuhi agud mabuhi kita liwat. Sia nagsiling, “Ang Espiritu sang Ginuo yari sa akon, tungod kay ginpili niya ako sa pagwali sang maayong balita sa mga imol; ginpadala niya ako sa pag-ayo sang mga napaslawan, sa pagpahibalo sang kahilwayan sa mga bihag, kag sa pag-ayo sang panulok sang mga bulag, sa paghilway sang mga ginapigos¹⁶

Sa tanan nga napaslawan, ginbihag, ginpigos, kag ayhan nabulagan sa kasakit ukon sala, nagatanyag Sia sang pag-ayo, pagpanumbalik, kag kaluwasan. Nagapamatuod ako nga ang ina nga pagpang-ayo kag pagpanumbalik nga Iya ginatanyag matuod. Ang tiyempo sinang pag-ayo lainlain, kag indi naton pwede husgaran ang tiyempo sang iban. Importante nga hatagan naton ang aton mga kaugalingon sang kinahanglanon nga panahon sa pag-ayo kag mangin maluluy-on sa aton mga kaugalingon sa proseso. Ang Manluluwas masami nga maluluy-on kag nagabantay kag handa sa paghatag sang suporta nga aton ginakinahanglan.¹⁷

Sa dalan sang kapatawaran kag pag-ayo makita naton ang pagpili nga indi pagpadayunon ang di-maayo nga mga sulundon ukon mga kaangtanan sa aton mga pamilya ukon sa diin man. Sa tanan nga sakop sang aton impluwensya, sarang kita magtanyag sang kaayo para sa kapintas, pagpalangga sa kaugot, kalulo sa kaparas, kaluwasan sa kalisod, kag katawhayan sa paglalisay.

Ang ihatag ang kon ano nga gindingot sa imo isa ka gamhanan nga parte sang diosnon nga pag-ayo paagi sa pagtuo kay Jesucristo. Ang pagpangabuhi suno sa pamaagi nga nagahatag ka, sa ginsiling ni Isaias, ang purong-purong sa baylo sang mga abo sang imo kabuhi¹⁸ isa ka akto sa pagtuo nga nagasunod sang pinakamataas nga halimbawa sang isa ka Manluluwas nga nag-antos sang tanan agud Iya mabuligan ang tanan.

Si Jose sang Egipto nagpangabuhi nga may mga abo. Ginkaugtan sia sang iya kauturan, gintraydoran, ginbaligya agud mangin ulipon, napriso sa patu-pato, kag ginkalimtan sang isa nga nagpromisa nga magabulig. Pero padayon sia nga nagsalig sa Ginuo. “Ang Ginuo kaupod ni Jose”¹⁹ kag nagkonsagrar sang iya mga pagtilaw sa iya kaugalingon nga pagpakamaayo kag pagtubo—kag sa pagluwas sang iya pamilya kag sang bilog nga Egipto.

Sang makita ni Jose ang iya mga utod bilang isa ka dako nga lider sa Egipto, ang iya pagpatawad kag putli nga panan-aw makita sa maalwan nga mga pulong nga iya ginhambal:

“Karon, indi kamo magkalisod ukon magbasol sang inyo kaugalingon tungod kay ginbaligya ninyo ako diri: kay ang Dios amo ang nagpauna sa akon diri sa pagluwas sang kabuhi. …

“Gani indi kamo ang nagpadala sa akon diri, kundi ang Dios.”²⁰

Paagi sa Manluluwas, ang kabuhi ni Jose nangin “purongpurong sa baylo sang mga abo.”²¹

Si Kevin J Worthen, presidente sang BYU, nagsiling nga ang Dios “sarang magpahanabo sang maayo … indi lang halin sa aton mga kadalag-an kundi subong man sa aton mga kapaslawan kag mga kapaslawan sang iban nga nagatuga sa aton sing kasakit. Ang Dios amo sina kaayo kag kagamhanan.”²²

Nagapamatuod ako nga ang pinakadako nga halimbawa sang gugma kag kapatawaran amo inang iya sang aton Manluluwas nga si Jesucristo, nga sa Iya mapait nga pag-antos nagsiling, “Amay, patawara sila; kay wala sila makahibalo sang ila ginhimo.”²³

Nakahibalo ako nga ang aton Amay sa Langit nagahandum sang kaayohan kag paglaum para sa tagsa Niya ka kabataan. Sa Jeremias aton mabasa, “Ako lamang ang nakahibalo sang akon mga plano para sa inyo, [siling sang Ginuo] mga plano sa pagpauswag sa inyo.”²⁴

Si Jesus amo ang inyo personal nga Mesias, ang inyo mapinalanggaon nga Manunubos kag Manluluwas, nga nakahibalo sang mga pag-ampo sang inyo tagipusuon. Ginahandum Niya ang inyo pag-ayo kag kalipayan. Palangga Niya kamo. Nagahibi Sia upod sa inyo sa inyo mga kasubo kag nagakalipay sa pag-ayo sa inyo. Kabay nga magpakaisog kita kag batunon ang Iya mahigugmaon nga kamot nga nagadab-ot pirme ²⁵ sa aton paglakat sa dalan sang kapatawaran amo ang akon pangamuyo sa ngalan ni Jesucristo, amen.