Handa Ka Pa Bala?
Ang aton kabubut-on nga kahanda sa pagsunod kay Jesucristo pareho kadako sa tiempo nga ginahinguyang naton sa balaan nga mga lugar.
Isa ka Domingo, samtang nagahanda ako sa pag-ambit sang sakramento pagkatapos sang pila ka semana nga pagtambong sa mga stake conference, may pinasahi kag mabaskog nga pamensaron nga nagsulod sa akon kaisipan.
Samtang ginabendisyunan sang priest ang tinapay, ang mga tinaga nga kapila ko na mabatian sang una nagtudok sing tuman sa akon hunahuna kag balatyagon. “Kag magsaksi sa imo, O Dios, ang Wala’y Katapusan nga Amay, nga handa sila sa pagdala sa ila kaugalingon sang ngalan sang imo Anak, kag dalayon nga magdumdom sa iya kag magtuman sang iya mga kasuguan nga iya ginhatag sa ila; agud ila dalayon nga maangkon ang iya Espiritu sa pag-upod sa ila.”1 Makapila bala kita nagsaksi sa Dios nga handa kita?
Sang ginabinagbinag ko ang importansya sinang sagrado nga mga pulong, ang tinaga nga handa nangin labing makahulugan sa akon. Madamo nga manami kag sagrado nga mga eksperiyensia ang nagpuno sa akon hunahuna kag balatyagon, nga may pagpalangga kag kapasalamatan sa nagabayad-sala nga sakripisyo sang Manluluwas, kag sa Iya importante nga papel sa plano sang pagtubos sang Amay para sa akon pamilya kag sa akon. Dayon nabatian kag nabatyagan ko ang nagatudok nga mga tinaga sang pangamuyo sa tubig: “Agud sila makasaksi sa imo … nga ila sia dalayon nga ginadumdum.”2 Nahangpan ko sing klaro sa sina nga tion nga ang pagtuman sang akon mga kasugtanan dapat maglabaw sangsa maayo nga tuyo.
Ang pag-ambit sang sakramento indi seremonya nga wala kita sing himuon kundi ipakita lang ang aton pag-ugyon. Gamhanan ini nga pahanumdum sang pagkatabo kag daku nga importansya sang walay dulonan nga Pagbayad-Sala sang Manluluwas kag ang kakinahanglan nga dumdumon Sia pirme kag tumanon ang Iya mga kasugoan. Ang kahanda nga magtutok sa Manluluwas tama kaimportante nga ini ang panguna nga mensahe sang duha ka pirme gid ginasambit nga balaan nga kasulatan sa Simbahan—ang pangsakramento nga mga pangamuyo. Ang paghangop sang kamatuoran sang ginatanyag sa aton sang Amay nga Langitnon sing may lubos nga kahanda paagi sa Iya Bugtong nga Anak dapat magpukaw sang aton lubos nga pagtinguha nga mangin handa pirme sa paghimo kon ano ang Iya ginapangayo sa aton.
Ang aton bala espirituhanon nga pundasyon mabakod nga natukod kay Jesucristo?
Kon ang aton panaksihon indi mabakod, mahimo nga ibase naton ang aton kahanda paagi sa pagtulotimbang sang sosyal nga kaayohan ukon kahalitan sa aton sang aton ginahimo ukon sa kabudlayan nga ihatag sini sa aton. Kag kon nagapati kita sa opinyon nga ang Simbahan may madamo nga kinaraan nga mga polisiya nga nagapaakig ukon nagasaklaw sang pila ka grupo, di-praktikal nga mga pagdumili, kag pagsaad sang tiempo, sa sina, ang aton paghangop sang kahanda mangin indi husto. Indi kita dapat magpaabot nga ang prinsipyo sang kahanda mangin trending sa mga tawo nga bantog sa social media ukon sa mga mahilig sa Tik Tok. Ang mga pagsulundan sang tawo talagsa lang nagasanto sa diosnon nga kamatuoran.
Ang Simbahan tilipunan sang di-perpekto nga mga tawo nga nagapalangga sa Dios kag handa nga magsunod kay Jesucristo. Inang kahanda nagahalin sa kamatuoran nga si Jesus ang Cristo, ang Anak sang buhi nga Dios. Ining diosnon nga kamatuoran mahibal-an paagi lamang sa gahum sang Balaan nga Espiritu. Gani, ang aton kahanda pareho kadako sa tiempo nga ginahinguyang naton sa balaan nga mga lugar sa diin ara ang impluwensiya sang Balaan nga Espiritu.
Mangin maayo nga himuon ang maghinguyang sang panahon sa manami nga mga pagsinugilanon nga ginahambalan ang aton mga ginakabalak-an upod ang mapinalangaon nga Amay sa Langit kag mas diutay ang panahon sa pagpangita sang mga opinyon sang iban nga mga impluwensya. Mahimo man naton pilion nga islan ang aton adlaw-adlaw nga mga news feed sa mga pulong ni Cristo sa balaan nga mga kasulatan kag sa mga manalagnaon nga mga pulong sang Iya buhi nga mga propeta.
Ang importansya nga ginahatag naton sa aton pagtuman sang adlaw nga Inugpahuway, pagbayad sang husto nga ika-pulo, paghupot sang balido nga temple recommend, pagtambong sa templo, kag pagtipig sang aton sagrado nga mga kasugtanan sa templo, tanan gamhanan nga indikasyon sang aton kahanda kag ebidensya sang aton katutum. Handa bala kita sa paghatag sang labaw sangsa hapaw nga pagtinguha agud pabakuron ang aton pagtuo kay Cristo?
Ang Amay nga Langitnon nagapalangga sa aton sing perpekto, pero inang pagpalangga ginahatag sing may daku nga pagpaabot. Nagapaabot sia nga handa kita sa pagpahamtang sang Manluluwas nga pinakasentro sang aton mga kabuhi. Ang Manluluwas amo ang aton perpekto nga ehemplo sang kahanda sa pagsunod sa Amay sa tanan nga butang. Sia amo “ang dalan, ang kamatuoran, kag ang kabuhi.”3 Kabubut-on Sia nga nagbayad-sala para sa aton mga sala. Kabubut-on nga ginapamag-an Niya ang aton mga palas-anon, ginapakalma ang aton mga kahadlok, ginahatagan kita sang kusog, kag nagadala sang kalinong kag paghangop sa aton mga tagipusuon sa tinion sang kasakit kag kasubo.
Pero ang pagtuo kay Jesucristo isa ka pagpili. “Bisan pa kon indi na [kita] maglabaw sangsa maghandum sa pagpati”4 sa Iya mga pulong, may panugod na nga punto nga maumpisahan ukon mabag-o naton ang aton pagpanglakaton sang pagtuo. Ang Iya mga pulong, kon natanom sa aton mga tagipusuon nga daw isa ka liso kag ginsagod sing may daku nga paghalong, magapanggamot kag ang aton pagtuo magadako sa kasigurohan kag mangin prinsipyo sang buhat kag gahum. Ang Libro ni Mormon ang aton pinakagamhanan nga kuluhaan sa pagpadako kag pagpapanumbalik sang aton nga pagtuo. Ang kahanda ang nagapabaskog sang pagtuo.
Ang kabuhi, sa diosnon nga disenyo, indi mahapos kag kon kis-a mabug-at. Ugaling, “[kita] nagakabuhi, agud [kita] makaangkon sing kalipay”!5 Ang pagtutok sa Manluluwas kag aton nga mga kasugtanan nagadala sang nagapadayon nga kalipay! Ang katuyuan sang kabuhi amo ang probahan ang aton kahanda. “Ang daku nga hilikuton sang kabuhi [kag ang bili sang pagkadisipulo] amo ang tun-an ang pagbuot sang Ginuo kag dayon himuon ini.”6 Ang matuod-tuod nga pagkadisipulo nagadala sa lubos nga kalipay. Handa bala kita magbayad sang bili sang pagkadisipulo?
Ang dalan sang kasugtanan indi lang simple nga listahan; isa ini ka proseso sang espirituhanon nga pagtubo kag nagadugang nga katampad kay Ginuong Jesucristo. Ang mayor nga katuyuan sang tagsa ka kasugoan, prinsipyo, kasugtanan, kag ordinansa amo ang magpabakod sang pagtuo kag pagsalig kay Cristo. Ang aton determinasyon nga isentro ang aton mga kabuhi kay Cristo dapat mangin sige-sige—indi suno sa kondisyon ukon sitwasyon, kag indi hapaw. Dapat handa kita pirme nga “magtindog bilang mga saksi sang Dios sa tanan nga mga tinion kag sa tanan nga mga butang, kag sa tanan nga mga [lugar].”7 Ang pagkadisipulo nagapangayo sang daku nga pagpanikasog, tungod ang pagpakig-upod sang Balaan nga Espiritu indi mabakal.
Sigurado nga ginapanumdum sang Ginuo ang aton panahon sang gintudlo Niya ang paanggid sang napulo ka mga ulay. Parte sa lima nga maalam, nagsiling Sia “[ginhimo] nila ang Balaan nga Espiritu nga ila giya kag wala napatalang,”8 samtang ang mga lampara sang mga buangbuang “nagpiraw” tungod sa kakulang sang lana.9 Ayhan ang mga pulong ni Nefi sibu gid nga nagalaragway sining sadto tampad nga mga miyembro sang Simbahan: “Kag ang iban lugpayan niya, kag ugoy-ugoyon sa lawasnon nga kasigurohan, sa bagay nga magasiling sila: Maayo ang tanan sa Sion.”10
Ang lawasnon nga kasigurohan amo ang pagpangita kag pagsalig sa kalibutanon nga mga butang imbes sa kay Cristo—buot silingon, pagtulok kag pagbinagbinag sang mga butang sa dutan-on imbes sang sa espirituhanon nga panan-awan. Ang Balaan nga Espiritu nagahatag sa aton sang ikasarang nga makita ang “mga butang suno sa kon ano gid ang mga ini, kag … suno sa mangin kon ano gid ang mga ini.”11 Lamang “paagi sa gahum sang Balaan nga Espiritu mahimo ninyo nga mahibal-an ang kamatuoran sang tanan nga mga butang”12 kag indi mapatalang. Ginapahamtang naton si Cristo sa sentro sang aton mga kabuhi kag nagapangako sang aton kahanda sa pagtuman sang Iya mga kasugoan indi tungod bulag kita, kundi tungod makakita kita.13
Paano ya ang buangbuang nga mga ulay? Ngaa indi sila handa nga magdala sang suludlan sang espirituhanon nga lana? Nagpabuyanbuyan lang bala sila? Basi ayhan, tam-an sila ka kampante tungod mabudlay ukon daw indi ini kinahanglanon. Kon ano man ang rason, napatalang sila parte sa importante gid nga papel ni Cristo. Amo ini ang panguna nga pagpangdaya ni Satanas kag ang rason kon ngaa ang ila mga lampara sang panaksihon sang ulihi nagpiraw sa kakulang sang espirituhanon nga lana. Ini nga parabola isa ka paanggid sa aton panahon. Madamo ang nagauntat sa pagsunod sa Manluluwas kag ila mga kasugtanan malawig na antes sila magbiya sa Iya Simbahan.
Nagakabuhi kita sa di-matupungan nga mga panahon nga madugay na gintagna sang dumaan nga mga propeta, panahon nga si Satanas nagabalingaso “sa mga tagipusuon sang mga anak sang katawhan, kag magasugyot sa ila sa pagkaakig batok sa sinang maayo.”14 Tuman kadamo sa aton ang nagahinguyang sang daku nga tiempo sa virtual nga kalibutan nga nagailog sang tunay nga kabuhi nga puno sang kalingawan kag mga mensahe nga kontra sa diosnon nga pagkatawo kag pagpati kay Cristo.
Ang pinakagamhanan nga espirituhanon nga impluwensya sa kabuhi sang isa ka bata amo ang matarong nga ehemplo sang mapinalanggaon nga mga ginikanan kag mga lolo kag lola nga matutum nga nagatuman sang ila kaugalingon nga sagrado nga mga kasugtanan. Ang mga ginikanan nga nakahibalo sing husto nagatudlo sa ila kabataan sang pagtuo sa Ginuong Jesucristo agud nga sila man “[makahibalo] kon sa ano nga ginhalinan sila mahimo nga magpaabot para sa kapatawaran sang ila mga sala”15 Ang pasapayan kag indi sige-sige nga pagtuman sang mga kasugtanan nagadala sa espirituhanon nga pagpasapayan. Ang espirituhanon nga halit sa masami tuman kadako sa aton kabataan kag mga apo. Mga ginikanan kag mga lolo kag lola, handa pa bala kamo?
Si Pangulong Russell M. Nelson nagpaandam nga “sa maabot nga mga adlaw, indi posible nga makalampuwas kita sing espirituhanon kon wala ang nagagiya, nagatudlo, nagapasulhay kag dalayon nga impluwensya sang Balaan nga Espiritu.”16 Klaro ini kag maathag nga paandam sa paghanda sang aton mga lampara kag dugangan ang aton reserba sang espirituhanon nga lana. Handa pa bala kita sa pagsunod sa buhi nga mga propeta? Ano ang lebel sang espirituaon nga lana sa imo lampara? Ano nga mga pagbag-o sa imo personal nga kabuhi ang magahatag sa imo sang impluwensya sang Balaan ga Espiritu sing mas permanente?
Karon, pareho sang panahon ni Jesus, may ara sang mga magaatras, nga indi magbaton sang bili sang pagkadisipulo. Sa pagdugang sang masakit kag akig nga mga kritisismo nga ginahaboy sa Simbahan sang Manluluwas kag sa mga nagasunod sa Iya, ang aton pagkadisupulo magapangayo sing dugang nga kahanda nga pabakuron ang aton espirituhanon nga desisyon nga sundon si Jesucristo kag indi sila pagsapakon.17
Kon ang aton espirituhanon nga pundasyon mabakod nga napasad kay Jesucristo, indi kita mahulog kag indi kita magkahadlok.
“Tan-awa, ginapangayo sang Ginuo ang tagipusuon kag handa nga panghunahuna; kag ang mga handa kag mga matinumanon magakaon sang kaayohan sang duta sang Sion sa sining ulihing mga adlaw.”18
Kabay pa nga pirme kita mangin handa. Sa sagrado nga ngalan sang Ginuong JesuCristo, amen.