Kaisog sa Pagpahayag sang Kamatuoran

Ni Elder Denelson Silva

Sang Kapitoan

Sa tion nga mahibal-an naton ang kamatuoran, ang Ginuo nagahatag sa aton sang oportunidad nga himuon ang Iya himuon kon ari Sia diri subong.

Sang 1982, ginatapos ko ang akon kurso sa topograpiya sa isa ka technical school.

Sa katapusan sina nga tuig, ginhagad ako sang isa ko ka klasmeyt nga mag-istoryahanay. Madumduman ko nga ginbiyaan namon ang iban namon nga mga klasmeyt kag nagkadto kami sa tupad sang sports court. Pag-abot namon didto, naghambal sia sa akon parte sa iya relihiyoso nga ginapatihan, kag indi lang nga nagpakita sia sang libro sa akon, kundi ginhatag niya ang libro sa akon. Matuod, indi ko madumduman ang tanan nga ginhambal niya, pero madumduman ko inang tion sing maayo kag ang akon nabatyagan sang nagsiling sia, “Luyag ko magsaksi sa imo nga ining libro matuod, kag ang ebanghelyo ni Jesucristo ginpanumbalik.”

Pagkatapos sang amon pag-istoryahanay, nagpauli ako, gintukis ang pila ka pahina sang libro, kag ginbutang ini sa estante. Tungod sa hingaposan na kami sang tuig, kag amo na ang katapusan nga tuig sang akon kurso sa topograpiya, wala ko ginhatagan sing tuman nga igtalupangod ang libro ukon ang akon klasmeyt nga nagpaambit sini sa akon. Mapaktan nyo na ang ngalan sang libro. Huo, Libro ni Mormon ato.

Pagligad sing lima ka bulan, ang mga misyonero nagkadto sa akon balay; manughalin na sila sang nagpauli ako halin sa obra. Gin-agda ko sila nga magsulod. Nagpungko kami sa gamay nga terasa sa atubang sang akon balay, kag gintudloan nila ako.

Sa akon pagpangita sang kamatuoran, ginpamangkot ko sila kon diin nga simbahan ang matuod, kag kon paano ko makita ini. Gintudloan ako sang mga misyonero nga sarang ko matigayon ang sabat para sa akon kaugalingon. Nga may daku nga pagpaabot kag handum, ginbaton ko ang ila hangkat nga magbasa sang pila ka kapitulo halin sa Libro ni Mormon. Nagpangamuyo ako sing may [sinsero] nga tagipusuon kag matuod-tuod nga tinutuyo (tan-awa sa Moroni 10:4–5). Klaro ang sabat sa akon pamangkot, kag pagligad sang pila ka adlaw, sa mas sibu, sang Mayo 1, 1983—ginbunyagan ako kag ginkumpirma nga miyembro sang Ang Simbahan ni Jesucristo sang mga Santos sa Ulihing mga Adlaw.

Subong, kon pamensaron ko ang pasunod sang mga hitabo, klaro ko nga makita kon ano kaimportante ang kaisog sang akon klasmeyt sang nagpamatuod sia parte sa ginapanumbalik nga kamatuoran kag ginhatagan ako sang maathag nga pruweba sang Pagpanumbalik sang ebanghelyo ni Jesucristo, nga amo ang Libro ni Mormon. Atong simple nga buhat, pero may daku nga importansya sa akon, nagtuga sang koneksyon sa akon kag sa mga misyonero sang nakilala ko sila.

Ang kamatuoran ginpresentar sa akon, kag pagkatapos sang akon bunyag, nangin disipulo ako ni Jesucristo. Sa nagsunod nga mga tinuig, kag sa bulig sang espesyal katama nga mga tawo pareho sang mga lider, mga manunudlo, kag mga abyan, kag paagi man sa akon personal nga pagtuon, natun-an ko nga sang nagdesisyon ako nga mangin disipulo ni Jesucristo, ginbaton ko ang buluhaton indi lang sang pagpangapin sa kamatuoran kundi sa pagpahayag man sini.

Kon sugot kita nga magpati sa kamatuoran kag sundon ini, kag tinguhaan nga mangin tunay nga mga disipulo ni Jesucristo, wala kita nagabaton sang sertipiko nga may garantiya nga indi kita magsayop, nga indi kita matentar sa pagtalikod sa kamatuoran, nga indi kita pagpakalainon, ukon gani indi kita makaeksperiyensia sang mga pag-antos. Pero ang ihibalo sang kamatuoran nagatudlo sa aton nga kon magsulod kita sa tadlong kag mapiot nga banas nga magadala sa aton balik sa presensya sang Amay nga Langitnon, may paagi gid pirme nga malutsan ining mga problema (tan-awa sa 1 Mga Taga-Corinto 10:13); sarang gid nga dudahan anay naton ang aton mga pangduhaduha antes dudahan ang aton pagtuo (tan-awa sa Dieter F. Uchtdorf, “Come, Join with Us,” Liahona, Nob. 2013, 21); kag sa katapusan, may garantiya kita nga indi gid kita mag-isahanon kon mag-agi kita sa mga pag-antos, kay ginaduaw sang Dios ang Iya katawhan sa tunga sang ila mga kapipit-an (tan-awa sa Mosias 24:14).

Sa tion nga mahibal-an naton ang kamatuoran, ang Ginuo nagahatag sa aton sang oportunidad nga himuon ang Iya himuon kon ari Sia diri subong. Matuod, ginpakita Niya sa aton paagi sa Iya mga panudlo ang dapat naton himuon: “Kag maglakat kamo sa gahum sang akon Espiritu nga nagawali sang akon ebanghelyo nga tagduha-duha sa akon ngalan, nga nagabayaw sang inyo mga tingug pareho sa tunog sang trumpeta, nga nagapahayag sang akon pulong pareho sang mga anghel sang Dios.” (Doktrina kag mga Kasugtanan 42:6). Ang oportunidad para sa pangmisyonaryo nga pag-alagad sa aton mga lamharon pinasahi!

Palihog, young men, indi na pagpaisola ang inyo pagpanghanda sa paglakat sa misyon. Sa inyo pag-atubang sa mga sitwasyon nga mahimo magpabudlay sang inyo pagdesisyon nga mag-alagad sa misyon—pareho sang pag-untat eskwela sing makadali, pagpaalam sa inyo nobya nga wala sing garantiya nga magbalikay kamo, ukon bisan ang paghalin sa maayo nga obra—dumduma ang ehemplo sang Manluluwas. Sa tion sang Iya pag-alagad, nag-atubang man Sia sang kabudlayan, lakip na ang kritisismo, paghingabot, kag sang ulihi, ang mapait nga ilimnan sang Iya nagabayad-sala nga sakripisyo. Apang sa tanan nga sirkumstansya ginhimo Niya ang pagbuot sang Iya Amay kag ginhatag sa Iya ang himaya. (Tan-awa sa Juan 5:30; 6:38–39; 3 Nefi 11:11; Doktrina kag mga Kasugtanan 19:18–19.)

Young women, ginabaton gid kamo, kon luyag ninyo magpangabudlay sa ulubasan sang Ginuo, kag sa paghanda ninyo sang inyo kaugalingon sa pag-alagad bilang full-time nga mga misyonero, indi kamo makalikaw sa amo man nga mga hangkat.

Sa tanan nga nagdesisyon nga mag-alagad sa Iya, ginapromisa ko sa inyo nga ang 24 ukon 18 ka bulan sang pag-alagad magaligad sa patag sang misyon pareho nga magaligad ini kon magpabilin kamo sa balay, pero ang mga oportunidad nga nagahulat sa takos nga young men kag young women sang sini nga Simbahan sa patag sang misyon pinasahi. Ang pribelihiyo nga magtiglawas sa Manluluwas nga si Jesucristo kag Iya Simbahan indi mabale-wala. Ang pagpasakop sa madamo nga mga pangamuyo, pagpatubo kag pagpaambit sang inyo panaksihon sing makapila sa isa ka adlaw, pagtuon sang balaan nga mga kasulatan sa madamo nga mga oras, pagpangilala sa mga tawo nga indi gid ninyo tani makita kon nagpabilin lang kamo sa balay, mga eksperiyensia nga indi malaragway. Amo man kasangkad nga eksperiyensia ang nareserba sa mga lamharon nga ginatawag sang Ginuo nga mag-alagad sa mga misyon sa pagserbisyo (service missions). Ginabaton gid kamo kag kinahanglanon. Palihog indi pagpagamaya ang kaimportante sang misyon sang pagserbisyo (service mission), kay ang misyon sang pagserbisyo nagahatag man sang indi malaragway nga mga eksperiyensia. “Ang bili sang mga kalag dako sa panulok sang Dios” (Doktrina kag mga Kasugtanan 18:10), lakip na ang bili sang imo kalag.

Sa pagbalik halin sa imo pag-alagad, mahimo nga ang imo nobya ukon nobyo wala na nagahulat sa imo, pero sigurado nga nakatuon ka na sing maayo kon paano maghimo sang maayo nga mga pangilala. Ang imo pag-eskwela mas mangin mapuslanon upod ang limitado pero makabulig nga mga eksperiyensia bilang misyonero nga magahanda sa imo para sa ulobrahan sa imo pagbalik, kag sa katapusan, may lubos ka nga kapat-uran nga maisog mo nga ginpahayag ang ebanghelyo sang paghidaet, nga nagapamatuod parte sa ginpanumbalik nga kamatuoran.

Para sa inyo nga nakasal na kag ara sa lainlain nga hugna sang inyo kabuhi, importante kamo katama sa buluhaton sang Ginuo. Ihanda ang inyo mga kaugalingon. Magkabuhi nga may maayo nga panglawas, magtinguha nga magsandig-sa-kaugalingon sa temporal kag espiritwal, tungod ang mga oportunidad sa paghimo sang buot himuon sang Ginuo para sa Iya mga anak indi limitado sa isa lang ka grupo sang pangidaron. Ang pinakamanami nga eksperiyensia namon sang akon asawa sang sini lang nga tinuig, nag-abot samtang nagaalagad upod sa espesyal nga mga mag-asawa, nga nagaalagad sa espesyal nga mga lugar nga nagaserbisyo sa tama ka espesyal nga mga tawo.

Ang akon eksperiyensia sa katapusan sang akon kurso sa topograpiya nagtudlo sa akon nga ginapangapinan naton pirme ang kamatuoran kon ginapahayag naton ini kag nga ang pagpangapin sa kamatuoran isa ka aktibo nga buhat. Ang pagpangapin sa kamatuoran indi dapat himuon sa agresibo nga paagi kundi sing may tunay nga tinutuyo nga magpalangga, magpaambit, kag mag-agda sa mga tawo nga ginasaksihan naton sang kamatuoran, nga ginapanumdum lang ang temporal kag espiritwal nga kaayohan sang mga anak sang mapinalanggaon nga Amay nga Langitnon (tan-awa sa Mosias 2:41).

Sa Oktubre 2021 nga pangkabilogan nga komperensya, si Pangulong Russell M. Nelson, ang aton pinalangga nga propeta, nagtudlo nga kabaliskaran sang ginapanumdum sang iban, matuod gid nga may ara sang ginatawag naton nga husto kag sayop. May ara gid sing bug-os nga kamatuoran—sang wala katapusan nga kamatuoran. (Tan-awa sa “Pure Truth, Pure Doctrine, and Pure Revelation,” Liahona, Nob. 2021, 6).

Ang balaan nga mga kasulatan nagatudlo sa aton, “Ang kamatuoran amo ang ihibalo sang mga butang subong, kag sadto, kag sa maabot pa” (Doktrina kag mga Kasugtanan 93:24).

Ang ihibalo sang kamatuoran wala nagahimo sa aton nga mas maayo sangsa iban nga tawo, pero nagatudlo ini sa aton kon ano ang aton himuon agud makabalik sa presensya sang Dios.

Sa inyo pagpadayon sing malig-on kay Cristo kag sing may kaisog indi lang sa pagpahayag sang kamatuoran kundi sa pagpangabuhi sang kamatuoran, makasalapo kamo sang kaumpawan kag kalinong sa tion sang kagamo nga maagyan ninyo sa sining mga panahon.

Ang mga hangkat sang kabuhi sarang magtumba sa aton, pero hibaloa nga kon magpakita kita sang pagtuo kay Jesucristo, “ang [aton] mga kalisod mangin sa malip-ot lamang nga panahon” (Doktrina kag mga Kasugtanan 121:7) sa daku nga kasangkaron sang walay katapusan. Palihog, indi pagbutangi sang petsa para sa pag-untat sang inyo mga kabudlayan kag mga hangkat. Magsalig sa Amay nga Langitnon kag indi magpangampo, kay kon magpangampo kita, indi gid naton mahibal-an kon ano ang katapusan sang aton pagpanglakaton sa ginharian sang Dios.

Magkapyot sa kamatuoran, nga nagatuon halin sa mga kuluhaan sang kamatuoran:

• Ang balaan nga mga kasulatan (tan-awa sa 2 Nefi 32:3).

• Ang mga pulong sang mga propeta (tan-awa sa Amos 3:7).

• Ang Balaan nga Espiritu (tan-awa sa Juan 16:13).

Nagapamatuod ako kay Jesucristo kag nga Iya ini Simbahan. May buhi kita nga propeta, kag makabatyag kita pirme nga hilway kon ginapahayag naton ang kamatuoran nga may kaisog. Sa ngalan ni Jesucristo, amen.