Lubos nga Dedikado

Ni Sister Michelle D. Craig

Unang Manuglaygay sa Kabilogan nga Pangulohan sang Young Women

Dapat kita mangin mga sumulunod ni Jesus nga malipayon kag lubos nga dedikado sa aton kaugalingon nga pag-uswag sa pagkadisipulo.

Kon kis-a, makabulig nga mahibal-an kon ano ang paabuton.

Sa hingaposan sang Iya pag-alagad, ginhambalan ni Jesus ang Iya mga Apostoles nga magaabot ang mabudlay nga mga panahon. Pero nagsiling man Sia, “Indi kamo magkakulba.”¹ Huo, malakat Sia, pero indi Niya sila pagpabay-an.² Ipadala Niya ang Iya Espiritu agud buligan sila nga makadumdum, mangin malig-on sa pagtuo, kag makasalapo sang kalinong. Ang Manluluwas nagatuman sang Iya promisa nga mangin kaupod sang Iya mga disipulo, pero dapat kita magtulok sa Iya agud mabuligan kita nga makilala kag magpangalipay sa Iya presensya.

Ang mga disipulo ni Cristo pirme gid nagapangatubang sang mabudlay nga mga tinion.

Isa ka palangga ko nga abyan ang nagpadala sa akon sang daan nga artikulo halin sa Nebraska Advertiser, periodiko sa Midwestern nga Estados Unidos nga napetsahan, Hulyo 9, 1857. Nagsiling ini: “Temprano pa sini nga aga, isa ka guban sang mga Mormon ang naglabay sa ila pagbiyahe pakadto sa Salt Lake. Ang mga babayi (pat-od gid nga indi maluming) nagaguyod sang mga karito pareho sang dalagko nga mga sapat, ang isa [ka babayi] nagbulid-bulid sa sining maitom nga lunang, nga nagpapundo sing makadali sang ila pagpanglakaton, ang magagmay nga kabataan nagatarag man suksok ang ila [di-kinaandan] nga mga bayo nga pareho man kadeterminado sang ila mga iloy.”³

Madugay ko nga ginpanumdum ang parte sining babayi nga bulit sa lunang. Ngaa isahanon lang sia nga nagaguyod? Solo bala sia nga iloy? Ano ang naghatag sa iya sang kusog sa buot, kaisog, pagpursigi agud himuon ang amo kabudlay nga pagtarag sa lunang, nga ginaguyod ang tanan niya nga pagkabutang sa karito pakadto sa wala mahibal-i nga puluy-an sa disyerto—nga kon kaisa ginayaguta pa sang mga nagatan-aw?⁴

Si Pangulong Joseph F. Smith naghambal parte sa kakusog sang buot sining pionero nga mga babayi nga nagasiling: “Mahimo bala ninyo patalikdon ang isa sining mga babayi sa ila mabakod nga mga pagpati sa Simbahan ni Jesucristo sang mga Santos sa Ulihing mga Adlaw? Madulman bala ninyo ang ila mga hunahuna nga dudahan ang misyon sang Propetang si Joseph Smith? Mapatalang bala ninyo sila parte sa diosnon nga misyon ni Jesucristo, ang Anak sang Dios? Indi, indi gid ninyo ini mahimo. Ngaa? Tungod nahibal-an nila ini. Ginpahayag ini sang Dios sa ila, kag nahangpan nila ini, kag wala sang gahum sa duta nga makapatalikod sa ila sa ila nahibal-an nga kamatuoran.”⁵

Mga utod, ang mangin pareho sinang mga lalaki kag babayi ang hangkat sang aton panahon—ang mangin mga disipulo nga nagatinguha nga maangkon ang kusog nga magpadayon kon ginatawag nga mag-agi sa mabudlay nga mga hangkat, mga disipulo nga may mabakod nga pagpati sa mga ginpahayag sa aton sang Dios, mga sumulunod ni Jesus nga malipayon kag lubos kadedikado sa aton kaugalingon nga pag-uswag sa pagkadisipulo. Bilang mga disipulo ni Jesucristo, nagapati kag makatubo kita sa tatlo ka importante nga mga kamatuoran.

Una, Mahimo naton Tumanon ang Aton mga Kasugtanan, Bisan pa Indi Ini Mahapos

Kon ang inyo pagtuo, inyo pamilya, ukon inyo palaabuton ginahangkat—kon ginaligban kamo kon ngaa tama kabudlay sang pangabuhi bisan ginahimo man ninyo ang tanan ninyo nga masarangan agud ipangabuhi ang ebanghelyo—dumduma nga ang Ginuo nagsiling sa aton nga magpaabot sang mga kabudlayan. Ang mga kabudlayan bahin sang plano kag wala nagakahulugan nga ginpabay-an ka; bahin ang mga ini sang pagmangin Iya.⁶ Kay Sia, sa pagkamatuod, “lalaki sa mga kasubo, kag nakakilala sang kalisud.”⁷

Nahibal-an ko nga ang Amay nga Langitnon mas interesado sa akon pagtubo bilang disipulo ni Jesucristo sangsa akon kasulhayan. Mahimo nga indi ko pirme luyag nga mangin amo sina—pero amo gid sina!

Ang pagpangabuhi sing mahapos wala nagadala sang gahum. Ang gahum nga kinahanglan naton agud mabatoan ang mga pagtilaw nga ginaagyan naton sa karon amo ang gahum nga Iya sang Ginuo kag ang Iya gahum nagahalin sa aton mga kasugtanan sa Iya.⁸ Ang magsandig sa aton pagtuo kon nagaatubang sang mabaskog nga mga hangin nga nagaupang—ang magtinguha sing sinsero kada adlaw nga himuon ang ginkasugtan naton sa Manluluwas nga aton himuon, bisan pa kag labi na gid kon ginakapoy, nabalaka, kag nagaatubang kita sang mabudlay nga mga pamangkot kag mga isyu—amo ang magbaton sing amat-amat sang Iya kasanag, Iya kusog, Iya gugma, Iya Espritu, Iya kalinong.

Ang rason sang paglakat sa dalan sang kasugtanan amo ang magpalapit sa Manluluwas. Sia ang katuyoan, kag indi ang aton perpekto nga pag-uswag sa sinang dalan. Indi ini palumba, kag indi naton dapat pag-ikumparar ang aton pag-uswag sa iya sang iban. Bisan pa nga magsayop kita, ara Sia.

Ika-duha, Mahimo Kita Mag-akto sa Pagtuo

Bilang mga disipulo ni Jesucristo, nahangpang naton nga ang pagtuo sa Iya nagapangayo sang pag-akto—labi na gid sa mabudlay nga mga panahon.⁹

Madamo na nga tinuig ang nagligad, ang akon ginikanan nagdesisyon nga bag-ohon ang karpet sa balay. Sang gab-i antes ang bag-o nga karpet nag-abot, ginpangabay ni nanay ang akon mga utod nga lalaki nga kakason ang karpet sa mga kwarto agud matakod ang bag-o nga karpet. Ang akon manghod nga babayi nga si Emily nga sadto 7-anyos, nagakatulog na. Gani, samtang nagatulog sia, ginpagwa nila sing mahipos ang tanan nga muwebles sa iya kwarto magluwas sa katre, kag dayon ginkakas ang karpet. Te, pareho sang ginahimo kon kis-a sang mga magulang nga lalaki, nagdesisyon sila nga mangsasko. Ginkuha nila ang tanan niya nga pagkabutang halin sa kabinet kag mga dingding, kag ginbilin ang kwarto nga mahawan. Dayon nagsulat sila sa papel kag gintapik ini sa dingding: “Mahal nga Emily, nagsaylo na kami. Masulat kami pagligad sang pila ka adlaw kag sugiran ka kon diin kami. Ang nagapalangga, imo pamilya.”

Pagkadason nga aga sang si Emily wala naggwa agud mamahaw, ginpangita sia sang akon mga utod nga lalaki—ato sia didto, masubo kag nagaisahanon sa likod sang serado nga puwertahan. Si Emily nagpamalandong sa sining eksperiyensia sang ulihi: “Nagkalisod gid ako. Pero ano ayhan ang natabo kon ginbuksan ko ang puwertahan? Ano ayhan ang akon nabatian? Ano ayhan ang akon nasimhotan? Nabal-an ko kuntani nga wala ako isahanon. Nabal-an ko kuntani nga palangga gid ako. Wala ko gid napensaran nga may mahimo ako parte sa akon sitwasyon. Nagpangampo lang ako kag nagtiner sa akon gamay nga kwarto nga nagahibi. Pero kon ginbuksan ko lang kuntani ang puwertahan, natukiban ko ang kamatuoran.”¹⁰

Ang akon manghod naghaumhaum base sa iya nakit-an, pero wala ato nagapakita sang matuod-tuod nga sitwasyon. Indi bala talalupangdon nga pareho kay Emily, kita man mahimo nga nabug-atan sa kasubo ukon kasakit ukon kawalay-paglaum ukon pag-isahanon ukon kaakig ukon kaugot nga indi naton mapensaran ang maghimo sang isa lang ka butang, nga buksan ang puwertahan, nga mag-akto sing may pagtuo kay Jesucristo?

Ang balaan nga mga kasulatan puno sang ehemplo sang mga lalaki kag babayi, mga disipulo ni Cristo, nga, sang nag-atubang sang mga hangkat nga daw ka imposible malampuwasan,naggiho lang—nagdesisyon nga mag-akto sa pagtuo kag ginhimo ini.¹¹

Sa mga aruon nga nagpangayo nga mag-ayo nagsiling si Cristo, “Lakat kamo kag ipatan-aw ang inyo kaugalingon sa mga pari. Kag, sang naglakat sila, nag-ayo sila.”¹²

Naglakat sila agud ipatan-aw ang ila mga kaugalingon sa mga pari nga daw naayo na sila, kag sa pag-akto sa ila pagtuo, nag-ayo sila.

Luyag ko man maghambal nga kon ang ideya sang pag-akto sa tion sang inyo kasakit daw kaimposible, palihog magdesisyon sa pagpangayo sang bulig—sa isa ka abyan, miyembro sang pamilya, sa lider sang Simbahan, sa espesyalista. Sarang ini mangin una nga tikang padulong sa paglaum.

Ika-tatlo, Mahimo Kita Mangin Lubos nga Dedikado kag Malipayon sa Aton Debosyon¹³

Sa mabudlay nga mga tinion, ginatinguhaan ko nga dumdumon nga nagpili ako nga sundon si Cristo antes ako nagkadto sa duta kag nga ang mga hangkat sa akon pagtuo, ikaayong lawas, kag ang akon pagpadayon tanan kabahin sang rason nga ari ako diri. Kag indi ko gid dapat pagdudahan ang pagpalangga sang Dios sa akon tungod sang akon mga pagtilaw sa karon ukon tugotan ang akon pagtuo sa Iya nga mangin pagpangduhaduha. Ang mga pagtilaw wala nagakahulugan nga ang plano nagakapaslawan; bahin ang mga ini sang plano nga nagatuyo nga buligan ako nga magdangop Dios. Mas nagapareho ako sa Iya kon nagabatas ako sing mapinasensyahon kag nagalaum nga, pareho sa Iya, kon sa kasakit, magpangamuyo ako sing hugot pa gid.¹⁴

Si Jesucristo amo ang perpekto nga ehemplo sang pagpalangga sa aton Amay sa bug-os Niya nga tagipusuon—sang pagtuman sang Iya pagbuot, bisan ano man ang bili.¹⁵ Luyag ko sundon ang Iya ehemplo paagi sa paghimo sang amo man.

Nainspirar ako sang bug-os tagipusuon, lubos nga pagkadisipulo sang balo nga naghulog sang iya duha ka sentimos sa kolektahan sang templo. Ginhatag niya ang tanan niya nga pangabuhian.¹⁶

Ginkilala ni Jesus ang iya kaalwan sa paghatag sang tanan niya bisan nga ang iban nakakita lang sang iya kaimolon. Ang amo man matuod sa tagsa sa aton. Wala Niya ginatan-aw ang aton kakulangan bilang kapaslawan kundi bilang kahigayonan nga gamiton ang pagtuo kag magtubo.

Konklusyon

Mga isigka-disipulo ko kay Jesucristo, sa bug-os ko nga tagipusuon, ginapili ko nga mag-unong sa Ginuo. Ginapili ko nga mag-unong sa Iya pinili nga mga alagad—kay Pangulong Russell M. Nelson kag iya kapareho nga mga Apostoles—kay nagahambal sila para sa Iya kag mga tinugyanan sila sang mga ordinansa kag mga kasugtanan nga nagahigot sa akon sa Manluluwas.

Kon madasma ako, padayon ako nga magabangon, nga nagasalig sa grasya kag nagapabakod nga gahum ni Jesucristo. Tumanon ko ang akon mga kasugtanan sa Iya kag mangita sang sabat sa akon mga pamangkot paagi sa pagtuon sang pulong sang Dios, paagi sa pagtuo, kag sa bulig sang Balaan nga Espiritu, nga sa Iya paggiya ako nagasalig. Magadangop ako sa Iya Espiritu adlaw-adlaw paagi sa paghimo sang diutay kag simple nga mga butang.

Ini ang akon dalan sang isa ka disipulo.

Kag tubtob sa adlaw nga ang masami nga mga pilas sang umalagi nga kabuhi pagaayuhon, magahulat ako sa Ginuo kag magasalig sa Iya—sa Iya tiyempo, Iya kaalam, Iya plano.¹⁷

Upod ninyo, magaunong ako sa Iya sa katubtuban. Lubos nga dedikado. Kay nakahibalo ako nga kon ginapalangga naton si Jesucristo sa bug-os naton nga tagipusuon, ginahatag Niya sa aton ang tanan bilang balos.¹⁸ Sa ngalan ni Jesucristo, amen.