12:17

Ang Aton Dutan-on nga Pagkatinugyanan

Ni Bishop Gérald Caussé

Nagapangulo nga Bishop

Dalagko nga espirituhanon nga mga bugay ang ginpromisa sa mga nagapalangga kag nagaatipan sang duta kag sang ila isigkatawo.

Sang nagbisita kami sa amon dutang natawhan nga France, gindala ko kag sang akon asawa ang pila sang amon mga apo para maglibot sa matahum nga hardin sa gamay nga banwa sang Giverny. Nalingaw kami sa paglakat sa mga banas sini para tan-awon ang matahum nga kabulakan, ang elegante nga mga water lily, kag ang silak sang adlaw nga daw nagasaot-saot sa tubig.

Ining matahum nga lugar resulta sang hilig sang isa ka tawo: ang bantog nga pintor nga si Claude Monet, nga sa 40 anyos, mauti nga nagdisenyo kag nagsagod sang iya hardin para himuon ini nga lugar kon sa diin sia nagapinta. Nagpaayaw si Monet sa katahum sang kinaugali; dayon, gamit ang iya brotsa, ginpahayag niya ang iya mga nabatyagan sa pagpalhit sang kolor kag kasanag. Sa mga tinuig, nakahimo sia sang indi matupungan nga koleksyon sang ginatos nga mga larawan, direkta nga inspirado sang iya hardin.

Mga kauturan, ang aton pagpakigbagay sa katahum sang kinaugali sa aton palibot mahimo nga magaprodukto sang pila sa pinakamakatalandog kag makalilingaw nga mga eksperiyensya sa kabuhi. Ang aton mga emosyon nagapukaw sa sulod naton sang dako nga kapasalamatan sa aton Amay nga Langitnon kag sa Iya Anak, nga si Jesucristo, nga nagtuga sining matahum nga duta—upod ang mga bukid sini kag mga sapa, mga tanom kag kasapatan—kag ang aton una nga ginikanan, sanday Adan kag Eva.¹

Ang buhat sang pagtuga indi pa ang katapusan mismo. Importante ini nga bahin sang plano sang Dios para sa Iya mga anak. Ang katuyuan sini amo ang pagpahamtang sang lugar kon sa diin ang kalalakin-an kag kababayin-an mahimo tilawan, maggamit sang ila kahilwayan sa pagpili, makakita sang kalipay, kag magtuon kag magprogreso para sa pila ka adlaw makabalik sa presensya sang ila Tagtuga kag magpanubli sang wala kabuhi nga wala katapusan.

Ining matahum nga mga tinuga ginhanda para gid sa aton kag buhi nga mga pamatuod sang pagpalangga sang Tagtuga para sa Iya mga anak. Ang Ginuo nagsiling, “Huo, ang tanan nga nagahalin sa duta … ginhimo para sa benepisyo kag sa paggamit sang tawo, sa pagpalipay sang mata pati sa pagpasadya sang tagipusuon.”²

Ugaling, ang diosnon nga dulot sang Pagtuga wala nagaabot nga wala sang mga tulumanon kag mga responsibilidad. Ining mga tulumanon ginalaragway sang maayo sa konsepto sang pagkatinugyanan. Sa termino sang ebanghelyo, ang tinaga nga pagkatinugyanan nagapahamtang sang sagrado nga espirituhanon ukon temporal nga responsibilidad sa pag-atipan sang butang nga iya sang Dios kon sa diin may salabton kita.³

Sa gintudlo sa balaan nga mga kasulatan, ang aton dutan-on nga pagkatinugyanan nagalakip sang masunod nga mga prinsipyo:

Una nga prinsipyo: Ang bilog nga duta, lakip na ang tanan nga kabuhi sa ibabaw sini, iya sang Dios.

Ang Tagtuga nagtugyan sang manggad sang duta kag sang tanan nga porma sang kabuhi sa aton pag-atipan, pero Iya sa gihapon ang bug-os nga pagpanag-iya. Siling Niya, “Ako, nga Ginuo, naghitad sang kalangitan, kag nagpasad sang duta nga binuhatan mismo sang akon mga kamot; kag akon ang tanan nga butang diri.”⁴ Ang tanan nga ari sa duta iya sang Dios, lakip na ang aton mga pamilya, ang aton pisikal nga mga lawas, kag bisan ang aton mismo nga kabuhi.⁵

Ikaduha nga prinsipyo: Bilang mga tinugyanan sang mga gintuga sang Dios, may tulumanon kita nga tahuron kag atipanon ang mga ini.

Bilang mga anak sang Dios, nabaton naton ang sugo nga mangin tinugyanan, tig-atipan, kag bantay sang Iya diosnon nga mga tinuga. Ang Ginuo nagsiling nga Iya ginhimo ang “tagsa ka tawo nga may salabton bilang tulugyanan sa dutan-on nga mga bugay nga akon ginhimo kag ginhanda para sa akon mga tinuga.”⁶

Gintugtan kita sang aton Amay nga Langitnon nga gamiton ang dutan-on nga manggad suno sa aton kaugalingon nga pagbuot. Pero ang aton kahilwayan sa pagpili indi angay nga hangpon nga pahanugot para gamiton ukon ubuson ang mga manggad sining kalibutan nga wala nagagamit sang kaalam ukon pagpugong. Ang Ginuo naghatag sining laygay: “Kag nagapalipay sa Dios nga ginhatag niya ini tanan sa tawo; kay sa sini nga katuyoan ginhimo ang mga ini agud gamiton nga may kaalam, indi nga nagasulobra, kag indi man paagi sa pagpangilkil.”⁷

Si Pangulong Russell M. Nelson sadto nagsiling: “Bilang mga benepisyaryo sang diosnon nga Pagtuga, ano ang dapat naton himuon? Dapat naton atipanon ang duta, mangin maalam nga tinugyanan sini, kag tipigan ini para sa palaabuton nga mga henerasyon.”⁸

Labaw pa sangsa siyentipiko ukon politikal nga kakinahanglan, ang pag-atipan sang duta kag sang aton duna nga kapalibutan isa ka sagrado nga responsibilidad nga gintugyan sang Dios sa aton, nga dapat magpuno sa aton sang balatyagon sang obligasyon kag pagpaubos. Importante man ini nga bahin sang aton pagkadisipulo. Paano naton tahuron kag palanggaon ang Amay nga Langitnon kag si Jesuscristo nga wala nagatahod kag nagapalangga sang Ila mga gintuga?

May madamo kita nga mahimo—sing tingob kag sing indibidwal—para mangin maayo nga mga tinugyanan. Base sa aton indibidwal nga mga sirkumstansya, ang tagsa sa aton makagamit sang madamo nga manggad sang duta nga may kaligdong kag kaalam. Pwede naton suportahan ang mga pagpaninguha sang komunidad sa pag-atipan sang duta. Pwede kita magpauso sang personal nga pangginawi kag pamatasan nga nagatahod sa mga gintuga sang Dios kag himuon ang aton mga ginagawian nga mas mahipid, mas matahum, kag mas makainspirar.⁹

Ang aton pagkatinugyanan sang mga tinuga sang Dios nagalakip sang, ang pinakamataas sini, sagrado nga obligasyon sa pagpalangga, pagrespeto, kag pag-atipan sang tanan nga tawo nga kaupod naton sa duta. Mga anak sila nga lalaki kag babayi sang Dios, aton mga kauturan, kag ang ila wala katapusan nga kalipay amo ang mismo katuyuan sang pagtuga.

Ang manunulat nga si Antoine de Saint-Exupéry nag-istorya sang masunod: Isa ka adlaw, samtang nagabiyahe paagi sa tren, natalupangdan niya nga ang iya mga kaupod mga refugees. Kay natandog sang kawala sing paglaum nga iya nakita sa guya sang isa ka bata: nagsiling sia, “Kon paagi sa pagsimpon (mutation) matuga ang isa ka bag-o nga rosas sa hardin, ang tanan nga hardinero nagakalipay. Ginaseparar nila ang rosas, ginaatipan, ginapadako. Pero wala sang hardinero para sa tawo.”¹⁰

Mga kauturan, indi bala kita dapat ang mga hardinero para sa aton mga isigkatawo? Indi bala kita manugbantay sang aton utod? Ginsugo kita ni Jesus nga palanggaon ang aton mga kaingod pareho sang aton pagpalangga sa kaugalingon.¹¹ Halin sa Iya bibig, ang tinaga nga kaingod wala lamang nagakahulugan sang kalapit sang distansya; nagakahulugan ini sang kalapit sang tagipusuon. Sakop sini ang tanan nga nagapuyo sa sining planeta—bisan nagapuyo sila malapit sa aton ukon sa malayo nga pungsod, wala sapayan sang ila mga ginhalinan, kasaysayan sang pamilya, ukon mga sirkumstansya.

Bilang mga sumulunod ni Cristo, may sagrado kita nga obligasyon nga pangabudlayan ang kalinong kag pag-isa sang tanan nga nasyon sa duta. Kinahanglan naton himuon ang pinakamaayo para proteksyunan kag hatagan sing kaumpawan kag bulig ang mga maluya, nagakinahanglan, kag ang tanan nga nagaantos ukon ginapigos. Labaw sa tanan, ang pinakadako nga regalo sang gugma nga aton matanyag sa aton isigkatawo amo ang kalipay sang ebanghelyo kag hagaron sila nga magpalapit sa ila Manluluwas paagi sa sagrado nga mga kasugtanan kag mga ordinansa.

Ikatatlo nga prinsipyo: Gin-agda kita nga magpartisipar sa buluhaton sang pagtuga.

Ang diosnon nga proseso sang pagtuga indi pa kompleto. Kada adlaw, ang mga tinuga sang Dios padayon nga nagadako, nagalapad, kag nagadamo. Ang pinakamanami amo nga ang aton Amay nga Langitnon nagahatag sa aton sang imbitasyon nga magpartisipar sa Iya buluhaton sang pagtuga.

Nagapartisipar kita sa buluhaton sang pagtuga kon ginakultibar naton ang duta ukon nagadugang sang aton kaugalingon nga mga pagpasad sa sining kalibutan—basta nagapakita kita sang respeto sa mga gintuga sang Dios. Ang aton mga kontribusyon mahimo nga makita paagi sa art, arkitektura, musika, literatura, kag kultura, nga nagapatahum sang aton planeta, nagapadasig sang aton mga igbalatyag, kag nagapasanag sang aton mga kabuhi. Nagaamot man kita paagi sa siyentipiko kag medikal nga pagdiskubre nga nagaamlig sa duta kag sa kabuhi sa ibabaw sini. Si Pangulong Thomas S. Monson nagpalip-ot sining konsepto sa sining matahum nga mga tinaga: “Ginbilin sang Dios ang kalibutan nga wala mahuman para magamit sang tawo ang iya ikasarang … agud mahibal-an sang tawo ang mga kalipay kag himaya sang pagtuga.”¹²

Sa paanggid ni Jesus sang mga talento, sang nagbalik ang agalon halin sa iya pagpanglakaton, iya gindayaw kag ginpremyohan ang duha ka mga suluguon nga nagpadako kag nagpauswag sang ila mga talento. Sa kabaliskaran, gintawag niya ang suluguon nga nagtago sang iya pinasahi nga talento sa kalibutan nga “wala sing pulos,” kag iya ginbawi bisan atong iya nabaton.¹³

Sa amo man, ang papel naton bilang mga tinugyanan sang dutan-on nga mga tinuga indi lamang para amligan ukon tipigan ang mga ini. Nagapaabot ang Ginuo nga pisanan naton, suno sa pagtandog sang Iya Espiritu nga Balaan, sa pagpadako, pagpanami, kag pagpauswag sang mga butang nga Iya ginsalig sa aton—indi lang para sa aton benepisyo kundi para bugayan ang iban.

Sa tanan nga nalab-utan sang tawo, wala sang makatupong sang eksperiyensya sang mangin isigka-manunuga upod sa Dios sa paghatag sang kabuhi ukon sa pagbulig sang bata nga magtuon, magtubo, kag magbakod—bilang mga ginikanan, manunudlo, ukon mga lider ukon bisan ano pa nga papel. Wala na sang pagkatinugyanan nga mas sagrado, mas makalilipay, kag mas trabahoso man, sangsa inang mangin kaupod sang aton Tagtuga sa paghatag sang pisikal nga mga lawas sa Iya espiritu nga mga anak kag sa pagbulig sa ila nga malab-ot ang ila diosnon nga potensyal.

Ang responsibilidad sang pagkaisigka-manunuga isa ka padayon nga pahanumdom nga ang kabuhi kag ang lawas sang tagsa ka tawo sagrado, kag wala sang nagapanag-iya sini nga iban kundi ang Dios, kag ginhimo Niya kita nga mga bantay para respetuhon, protektahan, kag atipanon ang mga ini. Ang mga kasuguan sang Dios, nga nagasakop sang mga gahum sang pagtuga kag pagpasad sang wala katapusan nga mga pamilya, nagagiya sa aton sa sining balaan nga pagkatinugyanan, nga importante kaayo sa Iya plano.

Mga kauturan, dapat naton kilalahon nga ang tanan espirituhanon sa Ginuo—lakip na ang pinakatemporal nga aspeto sang aton mga kabuhi. Nagapamatuod ako nga dalagko nga espirituhanon nga mga bugay ang ginpromisa sa mga nagapalangga kag nagaatipan sang duta kag sang ila isigkatawo. Samtang nagapabilin kamo nga tampad sa sining sagrado nga pagkatinugyanan kag nagatahod sa inyo wala katapusan nga mga kasugtanan, magatubo kamo sa ihibalo sang Dios kag sang Iya Anak, nga si Jesucristo, kag mabatyagan ninyo ang Ila gugma kag ang Ila impluwensya sing mas bugana sa inyo kabuhi. Ini tanan magahanda sa inyo nga magpuyo upod sa Ila kag magbaton sang dugang nga gahum sa pagtuga¹⁴ sa kabuhi nga magaabot.

Sa katapusan sining dutan-on nga kabuhi, ang Agalon magapangayo sa aton sang panaysayon sang aton sagrado nga pagkatinugyanan, lakip na kon paano naton gin-atipan ang Iya mga gintuga. Ginapangamuyo ko nga sa sina nga tion mabatian naton ang Iya mapinalanggaon nga mga pulong nga ginahutik sa aton mga tagipusuon: “Maayo gid, ulipon nga maayo kag matutom: sa diutay nangin matutom ka, padumalahon ko ikaw sa madamo: sulod ka sa kalipay sang imo agalon.”¹⁵ Sa ngalan ni Jesucristo, amen.