Sini nga Adlaw

Ni Elder Ronald A. Rasband

Sang Korum sang Dose ka Apostoles

Ang aton buhi nga propeta nagahimo sang iya bahin agud bahaon ang duta sang Libro ni Mormon. Dapat naton sundon ang iya ginhimo.

Pinalangga kong mga kauturan, sa Libro ni Mormon ang dinalan nga “sini nga adlaw”¹ sulitsulit nga ginagamit agud magtawag sang igtalupangod sa mga paglaygay, mga promisa, kag mga pagpanudlo. Si King Benjamin, sa iya hingapusan nga pamulongpulong, naglaygay sa katawhan, “Magpamati sa akon mga pulong nga akon igahambal sa inyo sa sini nga adlaw; … buksi ang inyo mga dulunggan agud inyo mabatian, kag ang inyo mga tagipusuon agud inyo mahangpan, kag ang inyo mga kaisipan agud ang mga katanhagaan sang Dios mahimo nga mahumlad sa inyo panan-awan.”² Ang pangkabilogan nga komperensya kaanggid nga kahimtangan. Nagkari kita agud mamati sang laygay “sini nga adlaw,” agud kita mangin “tampad sa tanan nga mga tinion”³ sa Ginuo kag sa Iya ebanghelyo. Ginabatyag ko gid “sini nga adlaw” ang kaimportante sang pagpabakod sang aton pangako sa Libro ni Mormon, nga gintawag ni Joseph Smith bilang “labing husto sa ano man nga libro sa duta.”⁴

Ginauyatan ko sa akon kamot ang isa ka kopya sang Libro ni Mormon. Ining akon kopya daan na nga edisyon sang tuig 1970, kag malahalon ini sa akon. Sa iya sini nga itsura, usado na kaayo kag gubaon na, pero wala sing iban nga libro nga mas importante sa akon kabuhi kag akon testimonya sangsa sini. Sa pagbasa sini, nakabaton ako sang saksi paagi sa Espiritu nga si Jesucristo amo ang Anak sang Dios,⁵ nga Sia ang akon Manluluwas,⁶ nga ining balaan nga mga kasulatan pulong sang Dios,⁷ kag nga ang ebanghelyo ginpanumbalik.⁸ Inang mga kamatuoran importante kaayo sa akon pagkatawo. Sa ginhambal ni propetang Nefi, “Ang akon kalag nagakalipay sa mga butang sang Ginuo.”⁹

Wala pa-tuo: Elder Ronald A. Rasband, bataon nga misyonero; President Harold Wilkinson, pangulo sang Eastern States Mission; kag Elder Marion D. Hanks, General Authority Seventy.

Ari ang istorya sadto. Bilang isa ka bataon nga misyonero, ginbaton ko ang laygay ni Elder Marion D. Hanks, nga nagbisita sa amon sa Eastern States Mission. Sia ang anay pangulo sang British Mission, kag duha sang iya mga misyonero ang kaupod niya sa sini nga adlaw: ang akon pinalangga nga mga Utod nga sanday Elder Jeffrey R. Holland kag Elder Quentin L. Cook.¹⁰ Pareho sang iya mga misyonero sa England, iya kami ginhangkat nga magbasa sang wala namarkahan nga Libro ni Mormon sa indi magnubo duha ka beses. Ginhimo ko ang ulubrahon. Sa una nga pagbasa kinahanglan ko markahan ukon linyahan ang tanan nga nagatudlo ukon nagasaksi kay Jesucristo. Naggamit ako sang pula nga lapis, kag ginlinyahan ko ang madamo nga mga dinalan. Sa ikaduha nga tion, si Elder Hanks nagsiling nga koloran ang mga prinsipyo kag doktrina sang ebanghelyo, kag sa sini nga tion asul ang gingamit ko sa pagmarka sang balaan nga mga kasulatan. Duha ka beses ko nga ginbasa ang Libro ni Mormon, suno sa ginpanugyan, kag dason duha pa gid ka beses, gamit ang dalag kag itom nga pangmarka sang mga dinalan nga importante gid para sa akon.¹¹ Sa makita ninyo, madamo ako sang mga ginpanulat.

May labi pa sa akon pagbasa sangsa pagmarka lang sang balaan nga mga kasulatan. Sa tagsa ka pagbasa sang Libro ni Mormon, halin sa puno hasta sa katapusan, ginpuno ako sang dako nga gugma para sa Ginuo. Nabatyagan ko ang isa ka nanggamot nga saksi sang kamatuoran sang Iya mga pinanudlo kag paano ang mga ini madapat sa “sini nga adlaw.” Ini nga libro santo gid sa iya sini tig-ulo, “Isa pa ka Katipan Nahanungod kay Jesucristo.”¹² Sa sinang pagtuon kag espirituhanon nga saksi nga nabaton, nangin misyonero ako nga nagapakamahal sang Libro ni Mormon kag nangin isa ka disipulo ni Jesucristo.¹³

“Sini nga adlaw,” isa sang pinakadungganon nga misyonero sang Libro ni Mormon amo si Pangulong Russell M. Nelson. Sang bag-ong-tawag sia nga Apostoles, nagahatag sia sang pamulongpulong sa Accra, Ghana.¹⁴ Ang mga tumalambong amo ang mga dalagkoan, lakip ang isa ka Aprikano nga hari sang isa ka tribo, nga nagapakighambal paagi sa isa nga manugpatpat. Ang hari isa ka seryoso nga tumuluon sang Biblia kag nagahigugma sa Ginuo. Pagkatapos sang pamulongpulong ni Pangulong Nelson, ginpalapitan sia sinang hari nga nagpamangkot sa perpekto nga Iningles, “Si sin-o ka?” Si Pangulong Nelson nagpaathag nga sia isa ka gin-ordin nga Apostoles ni Jesucristo.¹⁵ Ang madason nga pamangkot sang hari amo ang “Ano ang matudlo mo sa akon parte kay Jesucristo?”¹⁶

Gindab-ot ni Pangulong Nelson ang Libro ni Mormon kag ginbuksan ini sa 3 Nefi 11. Dungan nga ginbasa nanday Pangulong Nelson kag sang hari ang sermon sang Manluluwas sa mga Nefinhon: “Yari karon, ako si Jesucristo, nga ang mga propeta nagsaksi nga magaabot sa kalibutan. … Ako ang kasanag kag ang kabuhi sang kalibutan.”¹⁷

Ginregalohan ni Pangulong Nelson ang hari sang sina nga Libro ni Mormon, kag ang hari nagsabat, “Pwede mo gid ako tani hatagan sang mga diamante ukon mga rubi, pero wala sing labing malahalon para sa akon kundi ining dugang nga ihibalo parte sa Ginuong Jesucristo.”¹⁸

Indi ini isa ka nagaisahanon nga halimbawa kon paano ang aton pinalangga nga propeta nagapaambit sang Libro ni Mormon. Nanghatag sia sing kopya sang Libro ni Mormon sa ginatos ka tawo, masami nga nagapanaksihon kay Jesucristo. Kon si Pangulong Nelson nagaatubang sang mga bisita, mga presidente, mga hari, mga pangulo sang pungsod, kag mga lider sang negosyo kag mga organisasyon kag sang lainlain nga pagtuluohan, bisan sa punong-talatapan man sang Simbahan ukon sa ila kaugalingon nga mga lokasyon, matinahuron niya nga ginaregalo ining libro sang ginbugna nga balaan nga mga kasulatan. Pwede niya sila hatagan sang madamo nga mga regalo nga naputos sang mga laso nga pwede ibutang sa lamesa ukon desk ukon sa mga kabinet bilang handumanan sang iya pagbisita. Sa baylo, ginhatag niya kon ano ang pinakaespesyal sa iya, labaw pa sangsa mga rubi kag mga diamante, suno sa paglaragway sang hari sang tribo.

“Ang mga kamatuoran sa Libro ni Mormon,” siling ni Pangulong Nelson, “may gahum sa pagpaayo, pagpasulhay, pagpanumbalik, pagbulig, pagpabakod, pagpaumpaw, kag pagpasadya sang aton mga kalag.”¹⁹ Nabantayan ko ining mga Libro ni Mormon nga ginkaptan sing hugot sinang nakabaton sang mga ini halin sa aton propeta sang Dios. Wala na sing mas dako pa nga regalo.

Sang sini gid lang nakigkita sia sa unang ginang sang Gambia sa iya opisina kag mapainubuson nga ginhatagan sia [ang unang ginang] sing Libro ni Mormon. Wala sia nag-untat dira. Ginbuksan niya ang mga pahina agud basahon sa iya, sa pagtudlo kag pagsaksi parte kay Jesucristo, sa Iya Pagbayad-Sala, kag sa Iya gugma para sa tanan Niya nga kabataan—sa bisan diin.

Ang aton buhi nga propeta nagahimo sang iya bahin agud bahaon ang duta sang Libro ni Mormon.²⁰ Apang indi niya ini mahimo nga isahanon. Dapat naton sundon ang iya ginhimo.

Nga nainspirar sa sini nga halimbawa, nagtinguha ako sa pagpaambit sang Libro ni Mormon sing mapainubuson kag sing mas malipayon.

Sang sini lang didto ako sa Mozambique para sa isa ka asaynment. Ang mga pumuluyo sining matahum nga pungsod nagaantos sa kaimulon, indi maayo nga panglawas, pagkawalay palamugnan, mga unos, kag kinagamo sa pulitika. Nakaangkon ako sing pribelihiyo nga makigkita sa presidente sang pungsod nga si Filipe Nyusi. Sa iya pagpangabay, nagpangamuyo ako para sa iya kag sa iya nasyon; ginsugiran ko sia nga magatukod kita sang templo ni Jesucristo²¹ sa iya pungsod. Sa katapusan sang amon pagbisita, ginregalohan ko sia sang kopya sang Libro ni Mormon sa Portugues, nga iya tumandok nga hinambalan. Samtang mapinasalamaton niya nga ginabaton ang libro, nagpanaksihon ako parte sa paglaum kag promisa para sa iya katawhan, nga makita sa mga pulong sang Ginuo mga pahina sini.²²

Sa isa pa ka higayon, ako kag ang akon asawa nga si Melanie nakigkita kay Haring Letsie III sang Lesotho kag sa iya asawa sa ila balay.²³ Para sa amon, ang pinakatampok sang amon pagbisita amo ang pagregalo namon sa ila sang kopya sang Libro ni Mormon kag dayon pagpaambit sang akon testimonya. Kon akon balikan inang eksperiyensya kag iban pa, isa ka bersikulo sang balaan nga kasulatan sa ulihing-adlaw ang nagasulod sa akon hunahuna: “Ang kabug-osan sang akon ebanghelyo mabantala sang mga mahuyang kag sang mga simple tubtob sa mga punta sang kalibutan, kag sa atubang sang mga hari kag mga manugdumala.”²⁴

Ginpaambit ko ang Libro ni Mormon sa Ambasador sang India sa United Nations nga si Indra Mani Pandey²⁵; kay His Holiness Patriarch Bartholomew²⁶ sang Eastern Orthodox Church; kag sa madamo pa nga iban. Nabatyagan ko ang Espiritu sang Ginuo nga upod namon samtang personal ko nga ginahatag sa ila ining “bato nga pamag-ang sang aton relihiyon”²⁷ kag nagapanaksihon parte kay Jesucristo, ang bato nga pundasyon sang aton pagtuo.²⁸

Karon mga kauturan, indi ninyo kinahanglan magkadto sa Mozambique ukon India ukon makigkita sa mga hari kag mga manugdumala agud maghatag sining sagrado nga libro sang mga pinanudlo kag mga promisa. Ginaagda ko kamo, sini nga adlaw, nga maghatag sing Libro ni Mormon sa inyo mga abyan kag pamilya, kaupod sa trabaho, inyo coach sa soccer, ukon manug-utan ukon manug-prutas sa inyo tindahan. Kinahanglan nila ang mga pulong sang Ginuo sa sini nga libro. Kinahanglan nila sang mga sabat sa mga pamangkot sang pang-adlaw-adlaw nga kabuhi kag sang kabuhi nga walay katapusan nga magaabot. Kinahanglan nila mahibal-an ang dalan sang kasugtanan nga nahumlad sa ila atubangan kag ang malig-on nga gugma sang Ginuo para sa ila. Ari ini diri tanan sa Libro ni Mormon.

Kon ginahatagan ninyo sila sang Libro ni Mormon, ginabuksan ninyo ang ila mga panghunahuna kag mga tagipusuon sa pulong sang Dios. Indi ninyo kinahanglan nga magbitbit sang mga kopya sang naimprinta nga libro. Sarang mo ina ma-share halin sa imo telepono gikan sa seksyon sang balaan nga mga kasulatan sang Gospel Library app.²⁹

Pamensara sila tanan nga sarang mabugayan tungod sang ebanghelyo sa ila mga kabuhi, kag dayon padal-i sila sang kopya sang Libro ni Mormon halin sa imo telepono. Hinumduma nga ilakip ang imo testimonya kag kon paano ining libro nagbugay sa imo kabuhi.

Pinalangga kong kaabyanan, bilang isa ka Apostoles sang Ginuo, ginaagda ko kamo nga sundon ang aton pinalangga nga propeta, si Pangulong Nelson, sa pagbaha sang kalibutan sing Libro ni Mormon. Ang panginahanglan tuman ka dako; kinahanglan naton nga maghulag subong. Ginapromisa ko nga magapasakop kamo sa “pinakadakong buluhaton sa duta,” ang pagtipon sang Israel,³⁰ suno sa pagpabatyag sa inyo nga magdab-ot sa mga “wala lang nakahibalo sang kamatuoran bangod wala sila kahibalo kon diin ini pangitaon.”³¹ Kinahanglan nila ang inyo testimonya kag saksi kon paano ining libro nagbag-o sang inyo kabuhi kag nagdala sa inyo palapit sa Dios, sa Iya paghidaet,³² kag sa Iya “mga balita sang dako nga kalipay.”³³

Nagasaksi ako nga paagi sa diosnon nga disenyo ang Libro ni Mormon ginhanda sa dumaan nga Amerika agud ipagwa sa pagpahayag sang pulong sang Dios, sa pagdala sang mga kalag kay Ginuong Jesucristo kag sa Iya ginpanumbalik nga ebanghelyo “sini nga adlaw.” Sa ngalan ni Jesucristo, amen.

Mga Tanda

1. Tan-awa sa Jacob 2:2–3; Mosias 2:14, 30; 5:7; Alma 7:15; kag madamo nga iban pa nga mga bersikulo sa Libro ni Mormon.

2. Mosias 2:9.

3. Alma 53:20.

4. Teachings of Presidents of the Church: Joseph Smith (2007), 64. Ang bug-os nga pahayag nga ginhatag ni Joseph Smith sang Nobyembre 28, 1841, sa konseho sang Dose ka Apostoles: “Ginsugiran ko ang mga kauturan nga ang Libro ni Mormon amo ang labing husto sa ano man nga libro sa duta, kag amo ang bato nga pamag-ang (keystone) sang aton relihiyon, kag ang isa ka tawo magmangin mas malapit sa Dios paagi sa pagsunod sang mga pagsulundan sini, sangsa diin man nga libro.” Ang mayor nga reperensya sang “husto” mahimo ipatungod sa rebelasyon nga nabaton sa paglubad sang libro kag sa doktrina nga gintudlo sa Libro ni Mormon nga mas nagapabakod sangsa bisan ano nga libro sang “maathag kag malahalon” nga mga kamatuoran sang ebanghelyo (tan-awa sa 1 Nefi 13:40).

5. Tan-awa sa “Ang Buhi nga Cristo: Ang Panaksihon sang mga Apostoles,” isa ka deklarasyon sang Unang Pangulohan kag sang Korum sang Dose ka Apostoles, Enero 1, 2000: “Ginapamatud-an namon bilang mga awtorisado nga gin-ordin nga mga Apostoles—nga si Jesus amo ang Buhi nga Cristo, ang imortal nga Anak sang Dios. Sia ang dakong Haring Emmanuel, nga nagatindog subong sa tuo nga kamot sang Iya Amay. Sia ang kasanag, ang kabuhi, kag ang paglaum sang kalibutan. Ang Iya dalan amo ang banas nga nagapadulong sa kalipayan sa sining kabuhi kag kabuhi nga walay katapusan sa katuigan nga palaabuton. Pasalamatan naton ang Dios tungod sa indi matupongan nga dulot sang Iya diosnon nga Anak.” (ChurchofJesusChrist.org).

6. Tan-awa sa Isaias 49:26; 1 Nefi 21:26; 22:12; Doktina kag mga Kasugtanan 66:1.

7. Ang pulong sang Dios makita sa balaan nga mga kasulatan. Halimbawa, sa Libro ni Mormon, sanday Laman kag Lemuel nagpamangkot, “Ano ang kahulugan sang barandilya nga salsalon?” nga ginatumod ang damgo ni Lehi. Si Nefi nagsabat, “Ini ang pulong sang Dios; kag kon sin-o man ang magpamati sa pulong sang Dios, kag maghawid sing hugot sa sini, indi gid sila madula; kag ang mga pagsulay kag ang nagadabadaba nga mga pana sang kaaway indi man makadaug sa ila padulong sa pagkabulag, sa pagdala sa ila sa kalaglagan.” (1 Nefi 15:23–24).

8. Tan-awa sa“Ang Pagpanumbalik sang Kabug-osan sang Ebanghelyo ni Jesucristo: Ika-duha ka Gatos ka Tuig nga Anibersaryo nga Proklamasyon sa Kalibutan,” nga nagalakip sang masunod: “Hugot namon nga ginapahayag nga Ang Simbahan ni Jesucristo sang mga Santos sa Ulihing mga Adlaw, gin-organisar sang Abril 6, 1830, amo ang Bag-ong Katipan nga Simbahan ni Cristo nga ginpanumbalik. Ang ining Simbahan napasad sa perpekto nga kabuhi sang iya pangulong pundasyon nga bato, nga si Jesucristo, kag sa Iya wala dulunan nga Pagbayad-Sala kag literal nga Pagkabanhaw. Si Jesucristo sa liwat nagtawag sang mga Apostoles kag ginhatagan sila sang awtoridad sang priesthood. Ginaagda Niya kita tanan sa pagkari sa Iya kag sa Iya Simbahan, sa pagbaton sang Balaan nga Espiritu, sang mga ordinansa sang kaluwasan, kag sa pag-angkon sang nagadugay nga kalipay. … Malipayon namon nga ginapahayag nga ang ginpromisa nga Pagpanumbalik magauswag paagi sa nagapadayon nga rebelasyon. Ang kalibutan indi na mangin pareho sadto, bangud kay ang Dios ‘magatingub sang tanan nga butang kay Cristo’ (Mga Taga-Efeso 1:10)” (ChurchofJesusChrist.org).

9. 2 Nefi 4:16.

10. Tan-awa sa Quentin L. Cook, “Be Not Weary in Well-Doing” (Brigham Young University devotional, Ago. 24, 2020), speeches.byu.edu; Eliza Smith-Driggs, “This Week on Social: How to Develop a Love for the Lord, Yourself and Others,” Church News, Hulyo 17, 2020, thechurchnews.com.

11. Ika-tatlo nga pagbasa, dalag: geolohiya ukon geograpiya; ika-apat nga pagbasa, itom: istorya sang Libro ni Mormon.

12. “Isa pa ka Katipan ni Jesucristo” gindugang bilang subtitulo sa tanan nga edisyon sang Libro ni Mormon. Ang mga lideres sang Simbahan naghimo sang pagbag-o sang ngalan sa pagdagmit pa gid sang katuyuan sang Libro ni Mormon suno sa nasulat sa tig-ulo nga pahina: “Kag subong man sa pagpasanag sa Judio kag Gentil nga si Jesus amo ang Cristo, ang Wala’y Katapusan nga Dios, nga nagapakita sang iya kaugalingon sa tanan nga mga kapungsuran.”

13. Ang pagkadisipulo ni Jesucristo isa ka pagpakita sang aton paghigugma sa Iya. Ang mga disipulo ginbunyagan; ginadala nila sa ila kaugalingon ang ngalan ni Jesucristo; nagatinguha sila nga sundon Sia paagi sa pagsunod sang Iya mga kinaiya nga ginlaragway ni Apostoles Pedro: “Magtinguha, sa pagdugang sa inyo pagtuo sang pagkahalangdon; kag sa pagkahalangdon idugang ang ihibalo; kag sa ihibalo ang pagpugong sang kaugalingon; kag sa pagpugong sang kaugalingon ang pagkalig-on; kag sa pagkalig-on ang pagkadiosnon; kag sa pagkadiosnon ang paghiliutod nga malulo; kag sa paghiliutod nga malulo ang paghigugma sa isigkatawo” (2 Pedro 1:5–7; tan-awa man sa Preach My Gospel: A Guide to Missionary Service [2019], 121–32).

14. Si Pangulong Russell M. Nelson, kilala sa kalibutan nga manug-opera sang korason antes sia tawgon sa Korum sang Dose ka Apostoles sang 1984, naghatag sang lektura sa Accra, Ghana, sang 1986 parte sa kasaysayan sang pag-opera sa korason. Sang gin-interbyu sang ulihi sang media, iya ginpaathag nga ara sia didto bilang isa ka ”alagad sang Ginuo para buligan [ang mga tawo] nga mangin mas maayo nga mga pumuluyo, magpasad sang mabaskog nga mga pamilya, mag-agom sang tunay nga kalipay kag mag-uswag sa duta.” Nagbalik sia sa Accra, Ghana, sang Nobyembre 16, 2001, para sa groundbreaking sang Accra Ghana Temple (tan-awa sa “Ground Broken for First Temple in West Africa,” Church News, Nob. 24, 2001, thechurchnews.com).

15. Tan-awa sa General Handbook: Serving in The Church of Jesus Christ of Latter-day Saints, 5.1.1.1: “Sa aton panahon, ang Ginuo nagatawag sang mga tawo paagi sa Pangulo sang Simbahan nga i-ordin bilang mga Apostoles kag mag-alagad sa Korum sang Dose ka Apostoles (tan-awa sa Doktrina kag mga Kasugtanan 18:26–28)” (ChurchofJesusChrist.org).

16. Tan-awa sa Russell M. Nelson, “The Book of Mormon: What Would Your Life Be Like Without It?,” Liahona, Nob. 2017, 60.

17. 3 Nefi 11:10–11.

18. Tan-awa sa Russell M. Nelson, “The Book of Mormon: What Would Your Life Be Like Without It?,” 61.

19. Russell M. Nelson, “The Book of Mormon: What Would Your Life Be Like Without It?,” 62.

20. Tan-awa sa Moises 7:62.

21. Ang Templo sang Beira Mozambique gin-anunsyo sang Abril 4, 2021, ni Pangulong Russell M. Nelson. Masobra sa tunga sa milyon ka tawo ang nagapuyo sa Beira, nga nahamtang sa baybayon sang Indian Ocean.

22. Mga halimbawa sang paglaum kag mga promisa nga makita sa Libro ni Mormon nagalakip sang 2 Nefi 31:20; Jacob 4:4–6; Alma 13:28–29; 22:16; 34:41; Eter 12:32; Moroni 7:41; 8:26.

23. Sanday Elder kag Sister Rasband nakigkita sa harianon nga pamilya sang Pebrero 10, 2020, sang ginpadala sila sa Aprika agud idedikar ang Templo sang Durban South Africa.

24. Doktrina kag mga Kasugtanan 1:23.

25. Si Elder Rasband nakigkita kay Ambassador Indra Mani Pandey, Permanente nga Representante sang India sa United Nations and Other International Organizations sa Geneva, samtang may asaynment sa Interfaith Forum sa Bologna, Italy, sang Septyembre 17, 2021.

26. Si Elder Rasband nakigkita kay His All Holiness Ecumenical Patriarch Bartholomew sang Eastern Orthodox Church samtang may asaynment sa Interfaith Forum sa Bologna, Italy, sang Septyembre 13, 2021.

27. Teachings: Joseph Smith, 64. Ang pamag-ang nga bato (keystone) isa ka korte-pitala (wedge) nga bato sa ibabaw sang arko, nga nagahawid sang iban pa nga mga bato. Ang Propetang Joseph naglaragway sang Libro ni Mormon bilang “ang pamag-ang nga bato sang aton relihiyon,” tungod sang kaimportante sini sa pag-isa sang Simbahan paagi sa mga prinsipyo kag mga ordinansa. Ang Libro ni Mormon nagaserbe nga isa ka “pamag-ang nga bato” para sa mga kabuhi sang mga miyembro, nga nagabulig sa ila nga magpabilin nga mabakod sa banas sang kasugtanan.

28. Tan-awa sa Mga Taga-Efeso2:19–20. Si Jesucristo amo ang pangulong bato sang pamag-ang sang aton Simbahan, nga nagadala sang Iya ngalan. Pareho sang pagplastar sang pamusod sa templo nagasimbolo sang mayor nga bato sa pamusod sang pundasyon sang balay sang Dios, si Jesucristo amo ang pamusod sang aton pagtuo kag sang aton kaluwasan. Ginhatag Niya ang Iya kabuhi agud mabuhi kita, wala sang makatupong sa Iya sa kusog, sa katuyuan, ukon sa paghigugma.

29. Sarang mo ina i-share gamit ang imo mobile nga telepono. Ang isa ka paagi amo ang pagbukas sang Gospel Library app, pakadto sa Balaan nga mga Kasulatan, kag dayon tum-okon ang “Share Now” sa ibabaw. Ukon sa may Libro ni Mormon nga app, pwede mo tum-okon ang icon nga “Share,” nga magapakita sang digital nga code nga ang isa ka abyan mahapos nga maka-scan gamit ang iya telepono.

30. Russell M. Nelson, “Hope of Israel” (bug-os-kalibutan nga debosyonal para sa mga lamharon, Hunyo 3, 2018), HopeofIsrael.ChurchofJesusChrist.org. “Sang Hunyo 3, 2018, Si Pangulong Russell M. Nelson kag ang iya asawa nga si Wendy W. Nelson, nag-agda sang mga pamatan-on nga ‘magpalista sa batalyon sang pamatan-on sang Ginuo’ kag magpasakop sa ‘pinakadako hangkat, pinakadako kawsa, kag pinakadako buluhaton sa duta.’ Ano ang pinakadako nga hangkat? Ang pagtipon sang Israel” (Charlotte Larcabal, “A Call to Enlist and Gather Israel,” New Era, Marso. 2019, 24).

31. Doktrina kag mga Kasugtanan 123:12.

32. Tan-awa sa 2 Nefi 4:27; Mosias 4:3; 15:18; Alma 46:12.

33. 1 Nefi 13:37.