Ano ang Matuod?
Ang Dios amo ang ginhalinan sang tanan nga kamatuoran. Ang Simbahan ni Jesucristo sang mga Santos sa Ulihing mga Adlaw nagabaton sang tanan nga kamatuoran nga ginapahayag sang Dios sa Iya mga anak.
Pinalangga kong mga utod, salamat sa tanan para sa sining makainspirar nga sesyon! Halin sang aton komperensya sang nagligad nga Abril, nasaksihan naton ang madamo nga hitabo sa kalibutan, halin sa makahalanusbo tubtob sa makatalandog.
Nalipay kita sa mga report sang dalagko nga mga komperensya sang mga lamharon nga ginahiwat sa bilog nga kalibutan.1 Sa sining mga komperensya, ang aton halangdon nga mga lamharon nagatuon nga bisan ano ang matabo sa ila mga kabuhi, ang ila pinakadako nga kusog nagahalin sa Ginuo.2
Nagakasadya kita nga dugang pa nga mga templo ang ginapatindog sa bilog nga kalibutan. Sa pagdedikar sang tagsa ka bag-o nga templo, dugang nga diosnon nga gahum ang nagaabot sa kalibutan para pabakuron kita kag kontrahon ang mas nagagrabe nga pagtinguha sang kaaway.
Ang pag-abuso tuga sang impluwensya sang kaaway. Isa ini ka seryoso kaayo nga sala.3 Bilang Pangulo sang Simbahan, ginasulit ko ang mga pinanudlo sang Ginuong Jesucristo sa sining isyu. Luyag ko nga athagon: ang bisan ano nga klase sang pagpang-abuso sang babayi, kabataan, ukon bisan sin-o makangilil-ad sa Ginuo. Nagakalisod Sia kag nagakalisod ako tagsa nga ang bisan sin-o ginahalitan. Nagakasubo Sia kag kita tanan nagakasubo para sa tagsa ka persona nga nangin biktima sang bisan ano nga klase sang pagpang-abuso. Ang mga nagahimo sining malaw-ay nga buluhaton indi lamang may salabton sa mga layi sang tawo kundi magapangatubang man sang kaakig sang Dios nga Makaako.
Sa pila na ka dekada karon, ang Simbahan naghimo sang madamo nga tikang para proteksyunan—ilabi na gid—ang kabataan sa pagpang-abuso. Madamo sang mga bulig sa website sang Simbahan. Ginaagda ko kamo nga tun-an ini.4 Ini nga mga giya ginhimo para pangapinan ang mga inosente. Ginapangabay ko ang tagsa sa aton nga mangin alerto sa bisan sin-o nga ara sa peligro sang pagpang-abuso kag sa pag-akto gilayon para protektahan sila. Ang Manluluwas wala nagatolerar sang pagpang-abuso, kag bilang Iya mga disipulo, dapat kita man.
Ang kaaway may iban pa nga makahaladlok nga mga taktika. Dala diri ang iya pagpaninguha nga padulman ang linya sang matuod kag indi matuod. Sa nagabaha nga impormasyon nga madali lang naton makab-ot, makatilingala, mas nagabudlay ang pagkilala kon ano ang matuod.
Ining kabudlayan nagapadumdom sa akon sang eksperiyensya namon ni Sister Nelson sang nagbisita kami sa isa ka lider sang isa ka pungsod nga diutay lang ang nakabati parte kay Jesucristo. Ining nagatigulang nga abyan nagmasakit sang nagligad lang. Siling niya sa amon nga samtang ara sia sa iya hiligdaan sang madamo nga inadlaw, masami sia nagatulok sa kisame kag nagapamangkot, “Ano ang matuod?”
Madamo sa kalibutan sa karon “ang wala makahibalo sang kamatuoran bangod wala sila makahibalo kon diin ini pangitaon.”5 May mga magpapati sa aton nga ang kamatuoran depende sa tawo—nga ang tagsa ka tawo ang dapat maghibalo para sa iya kaugalingon kon ano ang matuod. Ang ina nga pagpati haumhaum lang sang mga abi nila indi man sila manabat sa Dios.
Pinalangga nga mga utod, ang Dios amo ang ginhalinan sang tanan nga kamatuoran. Ang Simbahan ni Jesucristo sang mga Santos sa Ulihing mga Adlaw nagabaton sang tanan nga kamatuoran nga ginapahayag sang Dios sa Iya mga anak, bisan ini natun-an sa siyentipiko nga laboratoryo ukon nabaton halin sa direkta nga rebelasyon halin sa Iya.
Sa sining pulpito sini nga adlaw kag sa bwas, padayon kamo nga makabati sang kamatuoran. Palihog isulat ang mga panghunahuna nga nakakuha sang inyo atensyon kag inang mga nagasulod sa inyo kaisipan kag nagatiner sa inyo tagipusuon. Magpamangkot nga may pangamuyo sa Ginuo nga kumpirmahon kon ang inyo nabatian matuod.
Palangga ko kamo, pinalangga kong kauturan. Kabay nga ining komperensya magahatag sang espirituhanon nga kabusog nga inyo ginapangita. Sa sagrado nga ngalan ni Jesucristo, amen.